Matalikilo 7
7
Shamuyoba
1Mwaami Lesa wakaambila Nowa ayi, “Njila mubwaato abamuŋanda yako boonse. Ndacana kwaamba ayi pabantu boonse mucishi ca panshi ndiwe ucitabo shiluleme. 2Nyamuna abanyama basalalite kweelana aMilawo bali bosanwe abobilo bacende ampwishi mweelo ngomunya. Sombi kubatasalalite kweelana aMilawo ubwese bobilo bobilo mucende ampwishi. 3Nyamuna abayuni basankwa abanakashi bali bosanwe abobilo mumushobo womwi awomwi. Ucite ubo kwaamba ayi banyama abayuni bamushobo womwi awomwi batakaloobi, sombi bakashalane alimwi pacishi ca panshi. 4Na peende nshiku shosanwe ashobilo kuswa sunu ndaakutuma mfula ishi ikaloke kwanshiku shili makumi one malumwi amashiku, kwaamba ayi nyonyoole shintu shoonse shiyoya isho nshindakalenga.” 5Alakwe Nowa wakacita shoonse Lesa nshaakamwaambila.
6Nowa wakalinga kucite myaaka ili 600 muyoba uyo ndiwakashika. 7Mpeeke lakwe amukaakwe, bana bakwe basankwa abamakaabo, bakenjila mubwaato kuloonda muyoba uyo.#Mate 24:38-39; Luka 17:27 8Mucende ampwishi pabanyama ba mushobo womwi awomwi pantu pomwi abayuni, basalalite nabi batasalalite 9bakenjila mubwaato kweelana aLesa mbwaakaambila Nowa. 10Ndipakeenda nshiku shosanwe ashobilo muyoba wakesa.
11Nowa ndyaakaba amyaaka ili 600, pabushiku bwa likumi anshiiku shosanwe ashobilo, mumweenshi wabili, toonse tuntupu twa mashiba anene ali panshi lya nshi twakacaluka. Ashalo shilyango sha miyoba shakacaluka kwiculu.#2 Pita 3:6 12Lyalo mfuula yakaloka pacishi ca panshi kwa nshiku shili makumi one, malumwi amashiku. 13Pabushiku bweenka ubo, Nowa amukaakwe bakenjila mubwaato pantu pomwi abana bakwe basankwa botatwe, Shemu, Amu, Jafeti alimwi abamakaabo. 14Abalo banyama bamushobo womwi awomwi, bafubwa abamuluundu, banene abaniini alimwi abayuni ba mushobo uli woonse, bakayaabo. 15Cisankwa acanakashi pamushobo womwi awomwi wa shintu shiyoya shoonse shakenjila mubwaato pantu pomwi aNowa, 16kweelana aLesa mbwaakaamba. Lyalo Mwaami Lesa wakacala cisasa Nowa ndyaakenjila mubwaato.
17Imfula yakatolelela kwa nshiku shili makumi one, alimwi mbuli maanshi mbwaakalinga kuya cifula bwaato bwakatalika kuseela. 18Maanshi akafulilaako, abwalo bwaato bwakalinga kuya ciseela peculu lya maanshi. 19Akafula cakwaamba ayi akepisha tulundu twiindaawo kulaampa. 20Akatolelela kuya cifula tibili ainda patulundu amamita osanwe aobilo kuya mwiculu. 21Shintu shoonse shiyoya pacishi ca panshi shakafwa. Nkokwaamba ayi bayuni, banyama alimwi abantu boonse. 22Shoonse shakalinga kuyoya pacishi ca panshi shakafwa. 23Mwaami Lesa wakanyonyoola shoonse shakalinga kucite buumi pacishi ca panshi, nkokwaamba ayi bantu, banyama, abayuni. Bakacaalakobo nguNowa abaabo mbwaakalingaabo mubwaato. 24Maanshi akatalika kuya panshi ndipakeenda nshiku shili mwaanda anshiiku makumi osanwe.
Valið núna:
Matalikilo 7: BBBLI
Áherslumerki
Deildu
Afrita
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.