मारकुस 14
14
येसु सेप्मा ओकोलुना रिङ्
(मात्ति २६:१-५; लुका २२:१-२; युहान्ना ११:४५-५३)
1हिट्नुङ् छुट्कारा चाडा हिट्नुङ् खामिर मिठेन्ङे चोक्बालाक् चालेपाङाना चाडा टामा इप्पोक् लेम्बा ओएङ्स्वालेङ् एडोक् डाना॥ गाडुवाडाङ्बाचि हिट्नुङ् धारमाबिधि काहिसिक्बाचिङा येसु खोड्डे पारिक् वारिक्ङि ठेम्माउङ् लाब्माउङ् सेप्माना नुङ् निङ्ग्वा ओचोगुएट्टुना॥#पारस्थान १२:१-२७ 2टरो हिट्नागाँ नाड्डेना निङ्ग्वा ओचोगुए, “ना चाडा बेला आनि हिड्डे चोक्मा लिनिना, हिट्डे चोगिए भोने याप्मिचिङि खालाङ्बालाङ् लिमा हियुक्॥”
येसु ओटेहेक्ङि मेन्झेमाङा आट्टार नेक्टुबिडुना
(मात्ति २६:६-१३; युहान्ना १२:१-८)
3येसु बेथानिया युक्टाम्ङि कोरि सिमोन ओपाङ्ङि खाडे॥ हिट्ना पाइले कोर रोग लाहाब् लिसेसाना॥ उन्ङा चामा चामा ठालाँ चोगुना बेला ठिबाङ् मेन्झेमाङा चोखो जाटामासि ओलोडुना उभुङ्मालाम्मा चोक्बालाक् आड्डिक् माहाङ्गो सिङ्गामरमरङाना सिसाङाना बोटालङि आप्टुङ् आबे॥ हिट्ना आट्टार जाटामासि ओलोडुना उभुङ्माङा चोक्बालाक् डाना॥ हिट्ना सिसा बोटाल हेडुङ् हिट्ना बुङ्बुङ् नाम्ना आट्टार येसुङाना ओटेहेक्ङि सोब्बे हुङ्सुए॥#लुका ७:३७-३८ 4टरो हिट्नि ओवासेट्टागा कोइ याप्मिचिगा उन्चि याक्लेडाउङ् उन्चि उन्चि नाड्डे उपिगे, “ना आड्डिक् माहाङ्गो आट्टार पोङ् नाड्डेउङ् खेरोक् लेप्माना? 5ना क्या सुम्बोक् साए रुपाक् राङ् नुङ्ना याप्माङि छोङ्सुङ् हिट्ना ओफाबा पाक्चा ओवानिगा याप्मिचि पिडुचिनाँ बे लिसाएट्टे बे टे॥” हिट्नुङ् हिट्नागाँ हिट्ना मेन्झेमा ओपाट्टुए॥
6टरो येसुङा हिट्नागा लोडुचे, “लिसे टे, पोङ् खानिङा ना मेन्झेमा खेमा आलाप्टुम्टुम्ना? नाङा आङालोङ्सा ओचेट्नुना टोॽवा चोगुएसुए॥ 7पोङ्भोने पाक्चा ओवानिगा याप्मिचिउम् टे खानिलोक् डोक् सोरोक् उलियुक्, हिट्नुङ् खानिङा हिट्नागा निङ्ग्वा आचोगुम्ना बेला घुवार फामा आहिडुम्चिम्चिम्, टरो आङाउम्टे जाइले टाइले खानिलोक् लिनिङ्ना॥#धारमाबिधि १५:११ 8ना मेन्झेमाङा चोक्मा हिडुना रिङ् एरोक् चोगुएसुए॥ नाङा आयेम् उहुम्पाङि युङ्मा पाइले डोक् बुङ्बुङ् नाम्ना आट्टार नेक्टुङ् टेयार चोगुएसुए॥ 9छेम्बा डोक्, आङा खानि लोनाँनि, नारा टेप् खोनि खोनि नुना खाबोर पारचार चोक्युक्, हिट्नि ना मेन्झेमा मिट्मा लोङ्सा उन्ङा चोगुना टोॽवा बारेङि उमाट्टुटु॥”
याहुदा इस्कारियोतिङा येसु लाप्माना बारेङि रिङ्पान् चोगुना
(मात्ति २६:१४-१६; लुका २२:३-६)
10येसुङाना बारो जाना ओचेलाचि माड्डे ठिबाङ् याहुदा इस्कारियोत ओलोडुनाम्बाक् येसुलोङ्सा गाडुवाडाङ्बाचिगा उन्चि उमुक्ङि लाब्माउङ् जिम्मा पिमा लोङ्सा हिट्नागाङि खाडे॥ 11ना रिङ् ओखेम्सुङ् हिट्नागाँगा आड्डिक् उन्चि चाप् टाए, हिट्नुङ् ओफाबा पिनाँ पिक्सा चामारसिङा ओचोगुए॥ हिट्नुङ् याहुदाङा येसु खोड्डे पारिक् लाप्माना हिट्ना लाम्बो पुमा ठालाँ चोगुए॥
येसुङाना ओचेलाचिलोक् आखेरि भातेर
(मात्ति २६:१७-३०; लुका २२:७-२३; युहान्ना १३:२१-३०; १ कोरिन्थि ११:२३-२५)
12खामिर मिठेन्ने चोक्बालाक् चालेपाङाना चाडाङाना पाइलेना लेम्बा छुट्कारा चाडाङि इस्राएलि याप्मिचिङा ठुँबाङाना उइछा भोक् ओठाँसुना डाना॥ ओचेलाचिङा येसु उसिलाप्टुए, “काहिसिक्बा, आन्याँ खोनि खाडिङाउङ् छुट्काराङाना भातेर टेयार चोगुम्माना नुङ् आमिट्युक्ना?”
13हिट्नुङ् येसुङा ओचेलाचि माड्डे इप्पाङ् ओचेलाचि नाड्डे लोडुचिउङ् पाङ्सुचे, “खान्चि खालाङ्गाङि खाडाचि, हिट्नुङ् गाक्रोङि चुवा खुयुङ् खाट्युगेट्ना ठिबाङ् याप्मिङा खान्चि माटुब्चिचि, हिट्नुङ् ओएङ्-ओएङ् खाडाचि॥ 14हिट्नुङ् हिट्ना लिग्ना पाङ्ङिना पाङ् ओडाङ्बा लोडाचु, ‘काहिसिक्बाङा नाड्डे माट्टुएसुए, आचेलाचिलोक् छुट्कारा चाडाङाना भातेर चामाना कोठा खोनाइ बो युङ्ग्वाना?’ 15हिट्नुङ् पाङ् उठुङ्ङिना टाला ओचेट्नुलोक् टेयार ओचोगुएसुना ठिक् ठेना कोठा हिट्नाँ खान्चि मापुमेट्चिचि, हिट्नुङ् हिट्नि डोक् खानिङा आनि लोङ्सा छुट्कारा चाडाङाना भातेर टेयार चोगानुम्॥” 16हिट्नुङ् नागाचि इप्पाङ् चेलाचि खाडाचिउङ् खालाङ्गाङि लिगाचे, हिट्नुङ् हिट्नागाचिङा येसुङा माट्टुना गाड्डे डोक् सोब्बे रिङ् लिसाना टुबाचुए, हिट्नुङ् हिट्नागाँ हिट्नि छुट्कारा चाडाङाना भोज टेयार ओचोगुए॥ 17हिट्नुङ् युसाना पाका येसु हिट्नुङ् बारो जाना ओचेलाचि हिट्नि ओटाए॥ 18हिट्नुङ् हिट्नागा भातेर चासा उयुङासाना बेला येसुङा हिट्नागा नाड्डे लोडुचे, “छेम्बा आङा खानि लोनाँनि, आङालोक् भातेर चासा आयुङिगा खानि माड्डे ठिबाङ्ङा आङा धोका याङ्पियुक्॥”#छाम्लोमा छाप्ला ४१:९
19ना रिङ् ओखेम्सुङ् ओचेलाचिगा निङ्ग्वा आड्डिक् टुगे, हिट्नुङ् ठिबाङ्-ठिबाङ्ङा सिलाप्मा ठालाँ ओचोगुए, “खान्ङा आमाट्टुना हिट्ना याप्मि आङा डोक् इ टे?”
20येसुङा हिट्नागा लोडुचे, “खानि बारो जाना चेलाचि माड्डे ठिबाङ् ए, हिट्नाँ आङालोक् ठिक्ए ठालिङि चालेपा लुमुएट्टु॥ 21हिट्नुङ् याप्मि छा लोङ्सा उन्ङाना बारेङि धारमाछाप्लाङि छेप्टि गाड्डे सिमा कोन्युक्, टरो इनाबा, याप्मि छा धोका कापिबा याप्मि, हिट्ना पोङ्नेट्निनाम्बे ओचेट्नु लिसे॥”
22हिट्नुङ् भातेर ओचेएट्टुना बेला येसुङा चालेपा कोबुङ् माङ्हाङ्ङि पोए-पोए ठाङ्सुङ् चालेपा एगुए हिट्नुङ् ओचेलाचि पिडुचिउङ् नाड्डे लोडुचे, “ना टाक्टानुमुङ् चायानुम्, ना आयेम् ए॥” 23हिट्नुङ् खोरे याङुङ् माङ्हाङ् पोए-पोए ठाङ्सुए हिट्नुङ् ओचेलाचि पिडुचे, हिट्नुङ् हिट्नागा सोब्बेङा हिट्नालाम्मा उठुङुए॥ 24हिट्नुङ् येसुङा हिट्नागा फेरि लोडुचे, “ना ओछोङ्ग्वाट् माङ्हुप्ङाना आहेलिक् ए,#१४:२४ मुलि सोरोतङि ओछोङ्ग्वाट् वाइना॥ ना याप्मा याप्मिचिगा लोङ्सा वेयुक्॥#पारस्थान २४:८; यारमिया ३१:३१-३४ 25छेम्बा आङा खानि लोनाँनि, हाट्लेलाम्मा माङ्हाङ् उमुलुक्ङि ओछोङ्ग्वाट् मिलिए सोम्मा आङा फेरि आङ्गुर ओमोॽवा ठुङ्निङ्ना॥” 26हिट्नुङ् हिट्नागाँ ठिक् छाम्लोमा ओठाक्टुङ् जैतुन झोन्झोबालेङ् ओखाडे॥
पाटरुसङा येसु इन्कार चोगुना बारे
(मात्ति २६:३१-३५; लुका २२:३१-३४; युहान्ना १३:३६-३८)
27येसुङा हिट्नागा लोडुचे, “खानि सोब्बेङा आङा आपोक्टिङाउङ् आपिन्डि आखाडिटि, पोङ्भोने धारमाछाप्लाङि नाड्डे छेप्टेसे–
‘आङा गोठाले सेडुङ्टुङ्, हिट्नुङ् ठुँबाचि चेम्बेलेङ् उलियुङ् उपिन्युओखाट्युक्॥’#जाकारिया १३:७
28“टरो आङा सिमालाम्मा उहिङ्ग्वाट् लिङाउङ् कोब्मा काट्ना हिट्नुङ् खानि नुङ्ना पाइले गालिलङि खाट्नाँ॥”#मात्ति २८:१६
29पाटरुसङा येसु लोडुए, “सोब्बेङा खान् मानाडे भोने चा आङाम्बाक् खान् खोना बेला चा नानेन्ना॥”
30हिट्नुङ् येसुङा पाटरुस लोडुए, “छेम्बा, आङा खान् लोनाँ, हामो युसा इप्पोक् खेप् कोक्साबा ओक्मा नुङ्ना पाइले मिसेन् डोक् निनेन्ना पिक्सा खान्ङा आङा सुम्बोक् खेप् सोम्मा इन्कार आचोक्ङा॥”
31टरो पाटरुसङा आङा हिट्डे चोक्मा डोक् चोक्निङ्ना माट्टुङ् नाड्डे लोडुए, “आङा खान्लोक् सिमा डोक् कोन्डे भोने चा आङा खान् इन्कार चोक्नेन्ना॥” हिट्नुङ् आरु सोब्बे चेलाचिङा चा हिड्नाड्डे डोक् ओमाट्टुए॥
गेतसामनिङि येसुङाना बिन्टि
(मात्ति २६:३६-४६; लुका २२:३९-४६)
32हिट्नुङ्ना येसु ओचेलाचिलोक् गेतसामनि ओलोडुना ठोङ्ङि खाडे॥ हिट्नुङ् येसुङा ओचेलाचि नाड्डे लोडुचे, “आङा बिन्टि चोगुङ्लोक् सोम्मा खानि नाहि डोक् युङानि॥” 33टरो येसुङा पाटरुस, याकुब हिट्नुङ् युहान्ना उन्लोक् खाट्टुचे, हिट्नुङ् उन्ङाना आड्डिक् उनिङ्ग्वा टुगाउङ् चिन्तित् लिसे॥ 34हिट्नुङ् ओचेलाचि लोडुचे, “आङाना आसोक्मा ठेक्टाउङ् सिङा गाड्डे डोक् लिसाइसाङे॥ खानि नाहि ओछेक्छेक् चोगानिउङ् युङानि॥” 35हिट्नुङ् उन् चिपा याम्बा खाडाउङ् खाम्ङि गुङ् चोगे, हिट्नुङ् “लिमा हियुक् भोने ना टायुगेट्ना याङ्छामा आठुङ्ङि ओठानिचा” पिक्सा बिन्टि चोक्मा ठालाँ चोगुए॥ 36उन्ङा नाड्डे माट्टुङ् बिन्टि चोगुए, “आब्बा,#१४:३६ आरामाइक रिङ्ङि आब्बाङाना उटुप् आप्पा आथाबा पाबा लियुक्॥ माङ्हाङ् पाबा, खान्ङा सोब्बे रिङ् चोक्मा आहिडुटु॥ ना याङ्छामाङाना खोरे आङालाम्मा याङ्होट्टाबिडा, टरो चा आनिङ्ग्वा माखाक्, कानिङ्ग्वा गाड्डे डोक् उलियाक्॥”
37हिट्नुङ् येसुङा बिन्टि चोग्मा हिडुङ् नोक्टा आबानाँ सुम्बाङ् डोक् ओचेलाचि उइम्सेसागा टुबुचे॥ हिट्नुङ् येसुङा पाटरुस लोडुए, “सिमोन, पाक् खान् आइम्सेसेनि? पाक् खान् ठिक घान्टा चा मिइम्मे युङ्मा आहिनिनिनै? 38खानि ओछेक्छेक् युङानि हिट्नुङ् बिन्टि चोगानि, हिड्डेउङ् खानि वारिक्ङि आठाइन्गा॥ खानि निङ्ग्वाउम् टेयार युङ्ग्वा, टरो खानि येम् फेटुलो लिसाइसे, टेयार वाइना॥”
39येसुङा फेरि ओचेलाचि नाडुचिउङ् खाडे हिट्नुङ् पाइले गाड्डे डोक् माट्टुङ् बिन्टि चोगे॥ 40हिट्नुङ् येसु फेरि ओचेलाचि उलिसागा ठोङ्ङि नोक्टा आबानाँ हिट्नागा उइम्सेसागा टुबुचे, पोङ्भोने हिट्नागा उन्चि मिक्युमाङा आड्डिक् ओटेडुएसुचिगा, हिट्नुङ् हिट्नागाँ येसु पाक् रिङ् लोमाना हिट्ना माप्मा डोक् उहिडुवाट्टुन्॥
41येसु सुम्बोक् खेप्ङाना पालाङि चेलाचि सोरि नोक्टा आबाउङ् उन्ङा हिट्नागा लोडुचे, “पाक् खानि हाट्ले चा आइम्सिउङ् आराम आचोगेट्टिगि? हाट्ले इम्माना बेला लाट्टे, पुयानुम्, याप्मि छा ओलाबुङ् पापि याप्मिचिगा मुक्ङि पिमाना बेला लिमा हिडे॥ 42हाट्ले कोबान्याँक् हिट्नुङ् खाड्याक्॥ पुयानुम्, आङा धोका कापिबा याप्मि टामाहिडे॥”
येसु ओलाबुना
(मात्ति २६:४७-५६; लुका २२:४७-५३; युहान्ना १८:३-१२)
43येसु चेक्टेट्टाना बेला डोक् बारो जाना ओचेलाचि माड्डे ठिबाङ् याहुदा हिट्नि होन्डा टाए॥ उन्लोक् गाडुवाडाङ्बाचि, धारमाबिधि काहिसिक्बाचि हिट्नुङ् याहुदि ओठेडोङ्चिङा ओपाङ्सुचिगा लाहुरिक् हिट्नुङ् चेप्सा ओयाङुगा जोम् याप्मिचिगा खिमेयाङ्मे ओडागा॥ 44उन् धोका कापिबा याहुदाङा हिट्नागा याप्मिचि नाड्डे लोडुएसुचिगा, “जुन् याप्मि आङा चुप्पा चोगुङ्टुङ्, हिट्ना डोक् येसु ए, हिट्ना लाबानुमुङ् ओचेट्नुलोक् सुरेक्छा पिडानुमुङ् खाट्टानुम्॥” 45हिट्नुङ् याहुदाङा टासुनामे येसुङि खाडाउङ् “काहिसिक्बा” पिक्सा चुप्पा मेट्टुङ् स्या मेट्टुए॥ 46हिट्नुङ् हिट्नागाँ येसु ओलाबुए॥ 47हिट्नि नेहेट्टाङ् ओयेबाइसागा याप्मिचि माड्डे ठिबाङ्ङा चेप्सा होट्टुङ् सानिङ्डाङ्बाङाना ओचाकारङाना उनुभेक् रुप् खोक्टुबिडुए॥
48येसुङा हिट्नागा लोडुचे, “पाक् खानि ठिबाङ् याङ्काखुट् गाड्डे डोक् लाहुरिक् हिट्नुङ् चेप्सा आयाङुमुङ् आङा लाब्सिङा आटैसेगि? 49आङा सोरोक् लेम्बा माङ्ठानाङि हिसिक्नाँनि बेला खानिलोक् वासाङे, हिट्नुङ् खानिङा आङा आलाबेएट्टिन्ङा॥ टरो धारमाछाप्लाङि छेप्टाना रिङ् उयुयाक्॥”#लुका १९:४७; २१:३७ 50हिट्नुङ् ओचेलाचि सोब्बेङा उन् ओपोक्टुढोङ् उपिन्डाडे॥
51हिट्नुङ् ठिक् सुति लोट्लिङ्ङा एरोक् ओयेम् रिगुना ठिबाङ् ठाङ्बेन् याप्मिङा येसु रोक् रिक्टुएट्टुना॥ हिट्नुङ् हिट्नागाँ हिट्ना ठाङ्बेन् याप्मि चा ओलाबुए, 52टरो हिट्नाँ ओलोट्निङ् पोक्टुढोङ् हिट्ना एकेलिपोट् पिन्डे॥
सानिङ्डाङ्बा ओपाङ्ङि येसु
(मात्ति २६:५७-६८; लुका २२:५४-५५,६३-७१; युहान्ना १८:१३-१४,१९-२४)
53हिट्नागाँ येसु सानिङ्डाङ्बा ओपाङ्ङि ओखाट्टुए, हिट्नुङ् हिट्नि सोब्बे गाडुवाडाङ्बाचि, ओठेडोङ्चि हिट्नुङ् धारमाबिधि काहिसिक्बाचि उछुमाइसागा॥ 54हिट्नुङ् पाटरुसउम्बाक् नेट्टाङ् मिखाट्ने चिपा लाप्माङ्लाम्मा येसु ओएङ्-ओएङ् सानिङ्डाङ्बाङाना ओटेल्लाङ् भिट्रा लिगे, हिट्नुङ् हिट्नि माङ्ठाना काकोबाचिलोक् युङाउङ् मि हुङ्मा ठालाँ चोगुए॥
55गाडुवाडाङ्बाचि हिट्नुङ् काचाहारि-कुन्डालङिगा ख्वाप्पाङा येसु सेप्मा लोङ्सा उन्ङाना बिरुद्दाङि पारमान् ओकोलुए, टरो हिट्नागाँ पाक्चा उटुबुवाट्टुन्॥ 56जोम् याप्मिचिङा उन्ङाना बिरुद्दाङि माङ्जोना साँचि ओमाट्टुए, टरो साङाना चा रिङ् टोङ्नेट्नि॥ 57हिट्नुङ् आम्टेप्मा याप्मिचि ओकोबाउङ् येसुङाना बिरुद्दाङि नाड्डेना माङ्जोना साचिँ ओमाट्टुए, 58“नाङा नाड्डे माट्टुना रिङ् आन्याँ खेम्सुम्मे, याप्मि मुक्ङा चोक्बालाक् ना माङ्ठाना आङा होडुङ्टुङ्, हिट्नुङ् सुम्बोक् लेम्बाङि डोक् याप्मिङा घुवार मिफाए डोक् आरको माङ्ठाना चोगुङ्टुङ्॥”#युहान्ना २:१९ 59टरो चा हिट्नागाँ ओमाट्टुना गाबाइ टोङ्नेयाट्नि॥
60हिट्नुङ् सानिङ्डाङ्बा काचाहारि-कुन्डाल सोरि येबाउङ् येसु सिलाप्टुए, “पोङ् आचेक्निना, खान्ङा माप्माना रिङ् पाक्चा वाइना इ? नागा याप्मिचिङा खान्ङाना बिरुद्दाङि साचिँ ओमाट्टुना रिङ्उम्बाक् पाइना?” 61टरो येसु स्वाग् मिचेक्ङे युङे, हिट्नुङ् पाक्चा माट्टुवाट्टुन्॥ फेरि सानिङ्डाङ्बाङा उन् सिलाप्टुए, “पाक् खान् सेङ्सेङ्ना माङ्हाङ् छा खिरिस्ट इ टे?”
62टरो येसुङा माट्टुए, “आए, आङा डोक्, हिट्नुङ् खानिङा याप्मि छा सोब्बे नुङ्ना बोल्लेउ माङ्हाङ्ङाना उछुप्टाङ्लेङ् युङाना हिट्नुङ् टाङ्साङ्लाम्मा खिमेमाङि उङ्युगेट्ना आनिसुम्टुम्॥”#दानिएल ७:१३
63हिट्नुङ् ना रिङ् खेम्सुङ् सानिङ्डाङ्बाङाना ओयाक् लेडे हिट्नुङ् ओलोट्लिङ् सेङ्सुङ् माट्टुए, “हाट्ले आनिलोङ्सा आरु पाक्चा पारमान् चाहाबा लिनिना॥ 64ना याप्मिङा माङ्हाङ् लोडुजोना रिङ् खानिङा आखेम्सुम्एट्टुम्मे॥ लु माट्टानुम्, खानि खोड्डे आपिगिटिगा?”
हिट्नागा सोब्बेङा “ना सेप्मा डोक् कोन्युक्” पिक्सा ओमाट्टुए॥
65हिट्नुङ् कोइ-कोइ याप्मिचिङा उन् ठ्या ओठोक्टुए, हिट्नुङ् उमिक् ओटेप्टुबिडुङ् लेम्सा ओलोडुए, “लु माङ्हाङ्लाम्माना रिङ् माट्टुवाक् टे, खान् साङा मालेम्सेना?” हिट्नुङ् माङ्ठाना काकोबाचिङा उन् जिम्मा ओलाडुए, हिट्नुङ् हिट्नागाँ चा ओलेम्सुए॥
पाटरुसङा येसु इन्कार चोगुना
(मात्ति २६:६९-७५; लुका २२:५६-६२; युहान्ना १८:१५-१८,२५-२७)
66पाटरुस यो टेल्लाङ्ङि वासेट्टाना बेला सानिङ्डाङ्बाङाना ओचाकारनिचि माड्डे ठिबाङ् हिट्नि आबे, 67हिट्नुङ् हिट्नाँ पाटरुस मि हुङेट्टाना निसुङ् नुलोक् पुयुङ् लोडुए, “खान् चा नासारातङिना येसुलोक् आवासेट्टाना, माहि टे?”
68टरो पाटरुसङा नाड्डे पिक्सा लोडुए, “माखाक् हाउ, खान् पाक् आपिग्येट्ना, आङाउम्टे पाक्चा ठाहा टोक्निङ्ना, बुजा चा चोक्निङ्ना॥” हिट्नुङ् पाटरुस भारा मुलि ढुवारिक्लेङ् खाडे, हिट्नुङ् हिट्ना बेला डोक् कोक्साबा ओक्टे॥
69हिट्नुङ् हिट्ना चाकारनिङा पाटरुस निसुङ् हिट्नि ओयेबागा याप्मिचि फेरि लोडुचे, “ना याप्मिउम् हिट्नागा माड्डे ठिबाङ् याप्मि डोक्॥”
70टरो पाटरुसङा फेरि “आङाउम्टे माखाक् हाउ” पिक्सा माट्टुए॥ टरो होप्मो बेला एङ्स्वा हिट्नि ओयेबागा याप्मिचिङा फेरि पाटरुस ओलोडुए, “छेम्बा डोक्, ना याप्मिउम् हिट्नागा माड्डे ठिबाङ् याप्मि डोक्, पोङ्भोने खान् चा गालिलि छेट्रालाम्मा आबाना याप्मि डोक् टे॥”
71टरो पाटरुसङा आप्पे लोङ्सा साराप याङ्सा चामारसिङा चोङ् नाड्डे माट्टुए, “खानिङा आमाट्टुम्ना याप्मि साइना, आङाउम्टे मिसेन् डोक् निनिङ्ना॥” 72हिट्नुङ् हिट्ना बेला डोक् आरको खेप् कोक्साबा ओक्टे, हिट्नुङ् “इप्पोक् खेप् कोक्साबा ओक्मा नुङ्ना पाइले खान्ङा आङा सुम्बोक् खेप् सोम्मा इन्कार आचोक्ङा” पिक्सा येसुङा लोडुना रिङ् पाटरुसङा मिट्टुङ् पाटरुस टुक्लोक् हाबे॥
Valið núna:
मारकुस 14: APH
Áherslumerki
Deildu
Afrita
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society