मारकुस 13
13
आखेरि लेम्बाङिगा चिन्नाचि
(मात्ति २४:१-२४; लुका २१:५-१९)
1येसु ओचेलाचिलोक् माङ्ठानाङाना टेल्लाङ्लाम्मा ओहोन्डा लाबाना बेला ओचेलाचि माड्डे ठिबाङ् चेलाङा उन् लोडुए, “काहिसिक्बा, पुयुटे, इम्टेप्मा ठेगा लुङ्गेॽवाचि हिट्नुङ् आम्टेप्मा ओचेट्नुगा ठे-ठेगा पाङ्चि!”
2हिट्नुङ् येसुङा हिट्ना लोडुए, “आए, पुयानुम् टे, नागा ठे-ठेगा ओचेट्नुगा पाङ्चि हाट्ले खानिङा आनिसुएट्टुम्, टरो खानिङा आनिसुम्गा नागा पाङ्ङिगा ठिक् लुङ्गेॽवाधारि चा लिनिना, ना ख्वाप्पा ओहोडुटु॥”
3येसु माङ्ठानाङाना याहाँपारा जैतुन झोन्झोबाङि युङैसाना॥ हिट्ना बेला पाटरुस, याकुब, युहान्ना हिट्नुङ् आन्दरियास सोगोप् ओआबाउङ् उन् उसिलाप्टुए, 4“काहिसिक्बा, आन्याँ याप्मिलोडा लो, नागा सोब्बे रिङ् खोना बेला उलियुग्गा? हिट्नुङ् नागा सोब्बे घाट्नाचि एला डोक् लियुक् नुङ् खोड्डे पाराना चिन्ना लियुक्ना होला?”
5येसुङा हिट्नागा लोडुचे, “ओछेक्छेक् चोगानि, साङा चा खानि माबान्डिन्चा॥ 6जोम् याप्मिचि आनिङ्ङि ‘खिरिस्ट आङा डोक्’#१३:६सोरोत रिङ्ङि “आङा उन् डोक्” छेप्टेसे॥ पिक्सा ओटायुक्, हिट्नुङ् हिट्नागाँ जोम् याप्मिचि ओबान्डुचिचि॥ 7जब खानिङा खेमाबुङ्मा लिसागा हिट्नुङ् खेमाबुङ्मा लियुगेट् पिक्सा ओमाट्टुगा रिङ् आखेम्सुम्टुम्, टरो खानि किट्नेनिन्॥ नाड्डेगा घाट्नाचिउम् लिमा डोक् कोन्युक्, टरो हिट्ना बेला डोक् नाराङाना आन्तेउम् लिनिना॥ 8पोङ्भोने ठिक् छोङ्बाङाना बिरुद्दाङि आरको छोङ्बाङि खेमाबुङ्मा लियुक्, हिट्नुङ् ठिक् मुलुक् बिरुद्दाङि आरको मुलुक्ङि खेमाबुङ्मा लियुक्॥ ठोङ्-ठोङ्ङि लुट्लेमा काट्युक् हिट्नुङ् चामा-ठुङ्मागा थोक्चि चा लाट्युक्॥ नाड्डेगाउम् टे छाडाङ्मा बेथा लिना बेला गाड्डे डोक् नागाउम् याङ्छामा लिना उटुम् एरोक् ए॥
9“खानिम्बाक् ओछेक्छेक् चोगानि, पोङ्भोने हिट्नागाँ खानि मालाबिउङ् आड्डा आदालातङि माखाट्टिटि, हिट्नुङ् याहुदिचिगा छुम्मापाङ्ङि माखाट्टिउङ् मालेम्सिटि॥ खानिङा आङि बिस्वास आचोगुम्नाँ खानि सासाक्चि हिट्नुङ् हाङ्बाचि सोरि चा माखाट्टिटि, हिट्नुङ् खानिङा आङाना बारेङि गाबाइ पिमा कोन्युक्॥
10“टरो पाइले सोब्बे छोङ्बाचिलोङ्सा नुना खाबोर खेम्मेप्माचि डोक् कोन्युक्, हिट्नुङ् एरोक् आन्ते लियुक्॥ 11याप्मिचिङा खानि मालाबि माखाट्टिउङ् मुद्दा माठेन्डिटि हिट्ना बेला पाक् रिङ् माप्माना नुङ् खानि निङ्ग्वा ओेभेन्निचा॥ टरो हिट्ना बेला माङ्हाङ्ङा पाक् मालोडिटिगा हिट्ना रिङ् डोक् माट्टानुम्, पोङ्भोने हिट्ना बेला खानिङा आप्पे निङ्ग्वाङिना रिङ् आमाट्निम्ना टरो सेङ्सेङ्ना हाङ्सा खानिङि लियुङ् चेक्युक्॥#मात्ति १०:१७-२०; लुका १२:११-१२
12“हिट्ना बेला भुम्भु-झान्झाचिङाना बिरुद्दाङि आप्पे भुम्भु-झान्झाचि ओकोब्युङ् सेप्मा ओमेट्टुचिचि॥ पाबा छाचि हिट्नुङ् छाचि पाबा-मामाचि बिरुद्दाङि ओकोब्युङ् सेप्मा ओमेट्टुचिचि॥ 13हिट्नुङ् आनिङ्ङि बिस्वास आचोगुम्नाँ सोब्बेङा खानि चिम्मा माफुट्टिटि, टरो आन्ते सोम्मा बिस्वास चोगुयाक्टुनाम्बाक् माङ्हाङ्ङा न्याएलाम्मा बाचाँ चोगुटु॥#मात्ति १०:२२
माङ्ठेना किप्माडुङ् बेलाङाना रिङ्
(मात्ति २४:१५-२८; लुका २१:२०-२४)
14“हिट्ना लेम्बा आड्डिक् फ्याङ् जाखाम् काचोक् चिम्मा फुट्टुम्ना रिङ् लिमा लिनिना ठोङ्ङि येबाना खानिङा आनिसुम्टुम्॥#दानिएल ९:२७; ११:३१; १२:११ #१३:१४ ना रिङ् दानिएल माङ्काटाङा माट्टुना नुङ् ठाहा टोगुम्टुम्॥ पोढाँ काचोक्बाचिङा ना छेप्बालाक् रिङ्ङाना उटुप् बुजा चोगानुम्, हिट्ना बेला याहुदिया छेट्राङि उलिसागा याप्मिचि झोन्झोबालेङ् पिन्युओखाट्याक्॥ 15हिट्नुङ् कौसिङि उलिसागा याप्मिचि उन्चि माल्माट्टा होट्सिङा पाङ् भिट्रा खाप्मा चा ओखाट्न्याक्॥#लुका १७:३१ 16बेङ्सि आथाबा स्वाँराङि टोॽवा काचोक्बाचि लोट्लिङ् लोहोट्सिङा ओनोक्निखाट्निचा॥ 17हिट्ना बेला माभोक् उखुयुगा मेन्झेमाचि हिट्नुङ् ओओ ओकाप्टुचिगा मामाचि लोङ्सा आड्डिक् टुक्ना याङ्छामा लियुक्॥ 18नाड्डेगा रिङ् चुङ्ग्वामा बेला उलिनि चा नुङ् माङ्हाङ्ङि बिन्टि ठाङ्सानुम्॥ 19पोङ्भोने हिट्ना बेला माङ्ठेना किप्माडुङ् याङ्छामा लियुक्॥ ना याङ्छामा माङ्हाङ्ङा नारा सिरिस्टि चोगुनालाम्मा हाट्ले सोम्मा लिनिगेट्निना हिट्नुङ् फेरि काइले चा लिनिना॥#दानिएल १२:१; पारस्थान ७:१४ 20माङ्हाङ्ङा हिट्ना याङ्छामा लेम्बा उन्ना चोग्वाट्टुन्ना बे खोना याप्मि हिङ्मा उहिन्याट्नि, टरो उन्ङा सेगुचिगा याप्मिचिगा खातिर हिट्ना याङ्छामा लिना लेम्बा घाटाँ चोगुएसुए॥
21“हिट्ना बेला कोइङा खानि ‘पुयानुम्, खिरिस्ट नेहि वाहेट्’ आथाबा ‘हिट्नि वाहेट्’ पिक्सा मालोडिए भोने, हिट्नागा बिस्वास चोक्नेनुम्चिम्॥ 22पोङ्भोने हिट्ना बेला माङ्जोगा खिरिस्ट हिट्नुङ् माङ्जोगा माङ्काटाचि चा ओहोन्युक्॥ हिट्नुङ् हिट्नागाँ ठे-ठेगा मिक्सेन् लोक् डोङ् ठोङ्डिगा टोॽवा ओचोगुङ् माङ्हाङ्ङा सेगुचिगा याप्मिचि चा ओबान्डुचिचि॥ 23हिट्डेउङ् खानि ओछेक्छेक् चोगानिउङ् युङानि॥ खेम्सानुम्, आङा नागा सोब्बे थोक् पाइले डोक् खानि लोनाइनाने॥”
येसु फेरि उङ्ना बारे
(मात्ति २३:२९-३१; लुका २१:२५-२८)
24“टरो हिट्ना माङ्किप्माडुङ् बेला काक्टुङ् नाम् डुम्बारिक् डुम् लियुक्, हिट्नुङ् लालिप्माङ्ङा व्हाङ् पिमा नाडुटु॥#यासैया १३:१०; इजिकिएल ३२:७; योएल २:१०,३१; ३:१५; पारकास ६:१२ 25टाङ्साङ्ङिगा चोक्चिङ्गेट्चि ओठायुक्, हिट्नुङ् टाङ्साङ्ङिगा साक्तिचि ओवान्युक्॥#यासैया १३:१०; ३४:४; योएल २:१० 26हिट्नुङ् हिट्ना बेला याप्मि छा माङ्ठेना साक्ति लोक् माहिमाङि खिमेमाङि उङ्युगेट्ना याप्मिचिङा उनिसुटु॥#दानिएल ७:१३; पारकास १:७ 27हिट्नुङ् उन्ङा माङ्हाङ् रिङ् काउग्बाचि पाङ्सुचिचि, हिट्नुङ् उन्ङा सेगुचिगा ओयाप्मिचि नारा हिट्नुङ् टाङ्साङ् सोब्बेलाम्मा छुम्सुचिचि॥”#१३:२७ सोरोत रिङ्ङि चारै दिसालाम्मा छेप्टेसे॥
वामाखोक्पो उभुङ्माङाना हिसिक्मा
(मात्ति २४:३२-३५; लुका २१:२९-३३)
28हिट्नुङ् “हाट्ले वामाखोक्पो उभुङ्मालाम्मा ना रिङ् सिकाँ लिसानि, जब ना उभुङ्माङाना ओहागेप्पा उपाट्छाट् लियुक्, हिट्नुङ् हिट्ना ओहागेप्पालाम्मा उलिङ् होप्मा ठालाँ चोगुटु, टब हुटुॽवामा बेला लिसे नुङ् ठाहा टोक्युक्॥ 29नाड्डेडोक् खानिङा नागा सोब्बे रिङ् उलिसागा आनिसुम्टुम्, हिट्नुङ् उन् एला डोक् उङ्युक्ना रैछो, ढुवारिक्ङि डोक् युङ्ग्वा नुङ् ठाहा टोगानुम्॥ 30छेम्बा डोक्, आङा खानि लोनाँनि, नागा सोब्बे थोक्चि मिलिए सोम्मा ना टालाङिगा याप्मिचि खोना चा उसिनिगा॥ 31टोनालोग् हिट्नुङ् नारा मेग्युक्, टरो आङा लोनानिगा रिङ् मेग्निना॥
ओछेक्छेक् लिमाना बारेङि हिसिक्मा
(मात्ति २४:३६-४४; लुका १२:३८,४०)
32“हिट्ना लेम्बा हिट्नुङ् घाडि खोना बेला लियुक्ना नुङ् साङा चा ठाहा ओटोगुन्ना॥ हिट्ना बारेङि टोनालोग्ङिगा माङ्हाङ् रिङ् काउग्बाचि हिट्नुङ् छाङा चा ठाहा टोगुन्ना, टरो माङ्हाङ् पाबाङा एरोक् ठाहा टोगुटु॥ 33हिट्डेउङ् खानि ओछेक्छेक् चोगानिउङ् युङानि, पोङ्भोने हिट्ना बेला खोना बेला टायुक्ना हिट्ना खानिङा ठाहा आटोक्निम्ना॥
34“ना रिङ्उम्टे चाकारचि पाङ्ठाङ् पुमा पिडुचिउङ् ठिबाङ् डाङ्बा लाप्माङ् वाजासि खाडाना रिङ् गाड्डेना डोक्॥ हिट्ना डाङ्बाङा ओचाकारचि उन्चि उन्चि टोॽवा चोक्मा लोङ्सा जिम्मा पिडुचिचि हिट्नुङ् पाङ् नुलोक् कोडु पिक्सा पाङ् काकोबा लोडुङ् लाप्माङ् खाट्युक्॥#लुका १२:३६-३८ 35हिट्डेउङ् खानि नुभेक् टाप् चोगानिउङ् युङानि, पोङ्भोने पाङ्डाङ्बा खोना बेला टायुक्ना हिट्ना खानिङा ठाहा आटोक्निम्ना॥ उन् युसाना पाका, माध्ये युसा, कोक्साबा ओक्ना बेला, भ्यानिक् सारका आथाबा जुन्सुके बेला चा टामा हियुक्॥ 36हिट्नुङ् उन् इक्किनाँ होन्डा टाए भोने, खानि आइम्सिएसिगा माटुबि ए॥ 37खानि लोनानि गाड्डे डोक् सोब्बे याप्मिचि ओछेक्छेक् चोगानिउङ् युङानि पिक्सा लोनाँनि॥”
Valið núna:
मारकुस 13: APH
Áherslumerki
Deildu
Afrita
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society