मर्कुस् 15
15
पीलातस्की येशुल ठीम् च्येप्प १-१५
1हुनी ॱङेट्टो नम् लोङ्जो़त् दील छ्यो़प्पो़न् चो छ्यीया घयेत्, लुङ्बे गेम्बा चो छ्यीया घयेत्, छ्यो़डीम्गी चयेलम घयेत् धङ् छ्यो़गी छोक्तेन् छ्यीम्मी़ मी ॱयोङ्म घयेत् दीब जोम्न हुब घयेत् ढो़गो च्यीक्ल थी़न्न येशु कीङ्न ठीक्न पीलातस्ल ची ज्यब बेत्।
2ॱनी पीलातस्की येशुल खो़त् म दी यहुदी घयेक्की ज्याबु हीम्ब ॱनी? सीन्न ढीब बेत्। ॱनी हीगी लेल्ल खोङ्गी नीज्यरङ्गी सीक्केन् दीरङ् हीन् झ्यीब बेत्। 3ॱनी हुदु छ्यो़प्पो़न् चो छ्यीया घयेत् दीगी खोङ्ल ङीब गज्येन् कब बेत्। 4ॱनी पीलातस्की फीच्च्य यङ् खोङ्ल खोक्की ॱह मीत् घोयेक्क? रङ्ल हुबे नुक्मे ङीब मङ कोप्कुक्। खो़त् हुल लेम्बु छीक् च्यीक् इक् ॱमीत् ॱलोक्केन्? झ्यीब बेत्। 5ॱनी हुल अक् येशुगी घन्डे लेम्बु उक् ॱमत् ॱलोक्पल पीलातस् ॱह लेब बेत्।
6यहुदी घयेत् छ्यीबे धी़रीम्गी यङ्ल मीमङ् घयेत् दीबे चो़म्बा च्यीक् ॱसु तोङ् सीगुक्क हुगो पीलातस्की तोङे लुस यो़प्प बेत्। 7ॱनी स्युङ्गी डल लोङ्न हुट्ट छुबे यङ्ल मी यरीगी मी ॱसेत्न एल्लादु उन चो़ल्ल ॱस्योर्न यो़प्प बेत्। ॱनी हुबे छीक्नी च्यीक् बारब्बा सीक्केन् च्यीक् यो़प्प बेत्। 8ॱनी मी छेत्मीत् जोम्न युङ घयेत् दीबे पीलातस्ल नीज्यरङ्गी एल्ला जेक्केङ्गी लेक्मु दी डस्सीरङ् जेत्रो झ्यी सीन्न स्यी़ब बेत्। 9ॱनी पीलातस्की हुबल खीत्रङ् यहुदी घयेक्की ज्याबु हुगो तोङ्ज्ये न? सीन्न ढीब बेत्। 10घन्ड हीन् सीन्न छ्यो़प्पो़न् चो छ्यीया घयेत् हुब येशुल सीगुक् लङ्न, रोरङ् च्याल च्येब हीम्ब पीलातस्की ॱह घोव हीङ्गो़प्प बेत्। 11ॱनी छ्यो़प्पो़न् चो छ्यीया घयेत् दीबे हुगी मी ॱयोङ्म घयेत् दी येशुगी डल लोङ्दु ची़त्न हुबल येशु मेम्ब, बारब्बा तोङ्रो झ्यी सीन्न स्युव ज्योप् सीन्न ॱङाब बेत्। 12ॱनी पीलातस्की हुब घयेत्ल हुगो हीन्न ॱनी, खीत् यहुदी घयेक्की ज्याबु सीक्केन् हील ङ घन्ड झ्यी सीक्केन्? सीन्न ढीब बेत्। 13ॱनी मी घयेत् दीगी हुगो कुरुस्ल तान ॱसो़त्रो झ्यी सीन्न केत् ज्यब बेत्। 14ॱनी पीलातस्की हुब घयेत्ल घन्डल ॱसो़त् सीक्केन्? हीगी घन्डे ङीब झ्यीदुक् सीक्केन्? सीन्न ढीब बेत्। हुनी हुगी मी घयेत् दीगी हरुङ् केत् छ्यीदु तो़न्न हीगो कुरुस्ल तान ॱसो़त्रो झ्यी झ्यीब बेत्। 15हुनी पीलातस्की हुगी मी घयेत् दी गुदु ची़च्च्येल बारब्बा दी तङ बेत्। ॱनी येशुल हुदु डेङ्ज्यक् बेन्दु ची़त्न कुरुस्ल तक्तु तङ बेत्।
येशुल ॱमक्मी घयेक्की ॱङीन्जीन् ज्यब १६-२०
16हुनी ॱमक्मी घयेत् दीबे येशु पो़ङ्गङ्गी धङ्रदु ठीक्न हुदु ॱमक्मी ॱमक्च्यप् च्यीक् ॱयप्न युङ बेत्। 17ॱनी हुबे खोङ्ल घो़ छ्यी घो़ ॱमुक्लोक्प च्यीक् को़म्ब बेत्। हुनी थोप् छ्यीम्मी़ स्यमुङ् सीन्न चङ्ल सो़बे धोम्रे डस्सी च्यीक् इक् खोङ्गी गोल को़म्ब बेत्। 18हुनी झ्यीनी हुबे येशुल ॱवे यहुदी घयेक्की ज्याबु, रङ्ल छ्यक्सुम् थेमु यो़दो सीन्न झ्यीब बेत्। 19हुनी खोङ्गी गोल हुबे पे तोक्लङ् बेन्न छ्युप्स्या कोप्कील्ल पीमुङ् चुन खोङ्ल छ्यक् छेब बेत्। 20खोङ्ल हीन्दुक् झ्यीन ॱङीन्जीन् ज्यप् छर्नी, हुनी हुगी ॱमक्मी दीबे खोङ्ल को़म्बे घो़ ॱमुक्लोक्प दी पीक्न यङ् खोङ् रोरङ्गी घो़ दीरङ् को़न्न कुरुस्ल तक्तु ठीक्प बेत्।
येशु कुरुस्ल ताबे तम् २१-३२
21ॱनी खोङ् ठीक्न डोये यङ्ल सैरेनीगी मी शीमोन् सीक्केन् च्यीक् स्यीङ्गनी लोक्न युङदङ् लम्दु ठेप्प बेत्। हुगो अलेक्जेन्डर् धङ् रुफस्की पब हीङ्गो़प्प बेत्। ॱनी हुल येशुगी कुरुस् दी खेरक्की केन ठीक्प बेत्। 22ठीक्नी, गलगथा सीस्से ॱसने च्यीक्ल ॱलीब बेत्। गलगथागी ॱसने दीगी मीङ्ल मी गो डस्सी सीगो़प्प बेत्। 23ॱनी हुदु हुबे खोङ्ल ॱमुर् ॱरीबे गोङ्ज्यङ् च्यीक् टेप्प बेत्। ॱनी खोङ्गी हुगो मत् स्यीब बेत्। 24हुनी हुबे येशु हुदु कुरुस्ल ॱनम्ल ताब बेत्। खोङ्गी ली़ज्ये दी ॱसु ॱसुल थोप्, हुबे रोरङ्सो नङ्दु ज्येन् पुर्न गो़ब बेत्। 25खोङ् कुरुस्ल तक्पे यङ्ल ॱङेट्टो छ्युजो़त् गु ॱलीब हीङ्गो़प्प बेत्। 26कुरुस् दीगी गो दीदु यहुदी घयेक्की ज्याबु सीन्न खोङ्ल ङीब कबे यीगी दी ढीन ज्यर्न स्यक्प बेत्। 27ॱनी खोङ्दङ् दल झ्यक्पा मीरङ् ॱङी खोङ्गी ॱये छ्योदु च्यीक् धङ् ॱयेन् छ्योदु च्यीक् कुरुस् रीदङ् रील ताब बेत्। 28[ॱसुङ्रप्ल खोङ् नक्पो़न् घयेत्तङ् च्यीक्प ॱसम्गेन् बेत् सीन्न यो़प्प दी डुब बेत्।] 29कुरुस्की दोङ्नी फल्ल छुल्ल छ्यम्गेङ्गी मी घयेत् दीबे गो गुक् गुक् झ्यीन येशुल छ्यो़गङ् ॱरुम्नी, यङ् स्यक्पु ॱसुम्ल सोगेन् सीक्केङ्गी मील ह नोङ्गुगङ् ॱनी? 30रङ्गी रङ् या ढेन कुरुस्नी भोप्लेत् सीन्न ङेन्दम् लब बेत्। 31ॱनी छ्यो़प्पो़न् चो छ्यीया घयेत् धङ् छ्यो़डीम्गी चयेलम घयेत् दीबे एक् हुन्दुक् दीरङ् झ्यीन खोङ्ल ॱङीन्जीन् ज्यप्न हुबे रोरङ्सो नङ्दु हुगी ॱयोङ्म घयेत् त ॱसो़दु ची़स्सोङ्। ॱनी रोरङ्गी रोरङ् यङ् ॱसो़दु ची़त् ॱमत् छुसोङ्। 32इस्राएल्की ज्याबु को़न्ज्योक्की को़बे च्यप्को़न् ख्रीष्ट् हीन् सीक्केन् हुगो हुन्दो कुरुस्नी मल्ल भप्न युङ थोङ्न ॱनी, हुनी हस्सो़त् हज्यरङ्गी छ्य स्यक्तोङ् सीन्न झ्यीब बेत्। ॱनी खोङ्दङ् दल कुरुस्ल ताबे झ्यक्पा ॱङीबु दीगी इक् हुन्दुक् दीरङ् झ्यीन खोङ्ल ॱङीन्जीन् ज्यब बेत्।
येशु ढोङे तम् ३३-४१
33हुनी ङीमे घुङ्नी झ्यीनी छ्युजो़त् ॱसुम् थुक्ल हुगी लुङ्ब जेङ्ल नम् ॱरो़नर डस्सी ॱनक् थीङीय झ्युङ्नर बेत्। 34ॱनी छ्युजो़त् ॱसुम्गी छो़त्ल येशुगी केत् छ्यीम्मु तो़न्न एलोयी एलोयी लेमा सबक्तनी सीन्न केत् ज्यब बेत्। हीगी धो़न् दी ॱवे ङे को़न्ज्योक्, ॱवे ङे को़न्ज्योक् नीज्यरङ्गी ङ घन्डल ॱलो़ तङ? सीक्केन् बेत्। 35ॱनी उन लोन यो़प्पे मी यरीगी हीगो घोनी, नेन्दे त। हुगी एलीयाल केत् ज्यप्सोङ् सीन्न झ्यीब बेत्। 36ॱनी हुनी मी च्यीक् ज्युन फीन्न छ्यु थीम्गेन् इस्पोन् च्यीक् ज्युक्पे चीमुङ्ल डान हुगो गोङ्ज्यङ् खीया च्यीक्ल ॱहोप्न खुर्न युङ बेत्। हुनी येशुल हुगो ज्यीप्तु ची़च्च्येल खोङ्गी खल ॱङोन ह तेदोङ्दे त एलीया या टो़दु युङ् मीत् युङ् सीन्न झ्यीब बेत्। 37हुनी येशु केत् छ्यीम्मु ज्यप्न, उ ठोक् छ्येत्नर बेत्। 38हुगी यङ्ल छ्यो़गङ्गी नङ्गी योल दी फीस्स्याल टेक् रानर बेत्। 39ॱनी हुगी यङ्ल येशुगी दोङ्न यो़क्केन् ॱमक्पो़न् दीगी हुदु खोङ् केत् ज्यक्पदङ् ढोङ दी थोङ्नी हुगी हीगी मी हीगो गन्दीय को़न्ज्योक्की ॱरेबु दीरङ् हीङ्गो़प्पेत् सीन्न झ्यीब बेत्।
40ॱनी उन फच्चो़त् दीनल भुमु यरी हुल तगीन् यो़प्प बेत्। हुबे छीक्नी च्यीक् मरीयम् मग्दलीनी, ॱनी च्यीक् याकुब् च्युङा धङ् योसेस्की आम मरीयम् धङ् च्यीक् सलोमी हीङ्गो़प्प बेत्। 41हुबे एल्ला येशुसो गालीलादु यो़प्पे यङ्ल अक् खोङ्ल स्यप्च्यी़ ज्युक्कील्ल खोङ्दङ् दल गीर्न युङ हीङ्गो़प्प बेत्। ॱनी उन कुरुस्की दोङ् दीन भुमु ॱयोङ्म आक् यो़प्प बेत्। हुब एल्लादु येशु यरुशलेम्ल युङे यङ्ल खोङ्दङ् कङ्ज्यीक्ल युङ्न यो़प्प बेत्।
येशुगी कुबुर् रो बेक्सल ॱलुक्न स्यक्पे तम् ४२-४७
42हीगी ङीन् हीगो ङीत्तुवे यङ्ल गो़बे योज्येत् घयेत् ॱसाम ॱसुत्त डीक्पे ङीन् हीङ्गो़प्प बेत्। ॱनी गोङ्ज्यो ङीत्तुव दी ॱस्यर्च्येम ॱयेङ हीङ्गो़प्प बेत्। 43ॱनी अरीमथीयागी मी युसुफ् सीक्केन् च्यीक् युङ बेत्। हुगो छ्यो़गी छोक्तेन् छ्यीम्मी़ सदस्यीय, को़न्ज्योक्की ज्यागक् नम् युङ्गो़दङ् ॱनो़न गुन दो़क्केङ्गी मी छ्यीया च्यीक् हीङ्गो़प्प बेत्। ॱनी हुगो ज्यीब मीप्प ॱआर् झ्यीन पीलातस् च्याल फीन्न येशुगी कुबुर् दी ङल ॱनङ्रो झ्यी सीन्न लीम्ब बेत्। 44ॱनी येशु नुक्मे ज्योब ढोङ्नर हीम्ब पीलातस्की ॱह घोनी पीलातस् हुल ॱह लेन हुगी ॱमक्पो़न् दी भो़ब बेत्। ॱनी हुल येशु गन्दीय दीरङ् ॱस्यीसोङ ॱनी? सीन्न ढीब बेत्। 45ॱनी ॱमक्पो़न् दीगी ॱस्यीसोङ् सीक्केङ्गी केच्च्य ॱस्येत्नी, हुनी येशुगी कुबुर् दी पीलातस्की युसुफ्ल खुर्ल ज्युक् सीन्न टेप्प बेत्। 46हुनी युसुफ्की रे गङ्ज्येन् च्यीक् नो़न येशुगी कुबुर् दी कुरुस्नी पप्न हुगी रे दीगी तुम्न ढक्ल ढी़न स्यक्पे रो बेक्स च्यीक्ल ॱलुक्न स्यक्प बेत्। हुनी घप्तोक् दील लागोर् डस्सी झ्यीबे दो च्यीक् टीन च्येत्न स्यक्प बेत्। 47ॱनी मरीयम् मग्दलीनी धङ् योसेस्की आम मरीयम् दी येशुगी कुबुर् हुदु ॱलुक्न स्योक्प दील तेब बेत्।
Valið núna:
मर्कुस् 15: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society