मर्कुस् 14
14
येशु ढोङ धङ् ॱसोम्बुल लोङ १४:१–१६:२०
येशु ॱसो़च्च्येमे ढो़ झ्यीब १-२
1ह हीनी झ्यीनी स्यक्पु ॱङीनी यहुदी घयेत् छ्यीबे धी़रीम् धङ् च्युर् मत् ज्यबे ढोप्ची सये धी़रीम् दी ॱलीक्केन् बेत्। हुगी यङ्ल छ्यो़प्पो़न् चो छ्यीया दी धङ् छ्यो़डीम्गी चयेलम घयेत् दीगी येशु घन्दुक् झ्यीन ॱयो कोर्न सुङ्न ॱसो़च्च्ये ब अक् ॱनो़बे झ्यी़ तेब बेत्। 2ॱनी यङ् हुबे हीगी धी़रीम्गी यङ्ल मत् झ्यीदोङ्। हीगी यङ्ल झ्यीन ॱनी, मी घयेत् हुट्ट लङ्न युङ्गो़ट्टो सीन्न झ्यीब बेत्।
भुमु च्यीक्की येशुल ॱनुम् ॱही़म्ब ३-९
3हुनी येशु बेथानी युगङ्दु शीमोन् सीक्केन् जीस्सो़ च्यीक्की खीम्ल स्युन देप्प बेत्। ॱनी हुदु सम सये यङ्ल भुमु च्यीक्की दोलोक्पल सो़बे ॱनो़च्च्य च्युङेत्मु च्यीक्ल ॱनुम् चङ्म फम्बोक्म ढीम स्यीम्बो़त्म ॱहीक्केन् च्यीक् खुर्न युङ बेत्। ॱनी हुगी ॱनो़च्च्य दी च्यक्नी खोङ्गी गोल योन ॱही़म्ब बेत्। 4ॱनी उन यो़प्पे मी यरी हुल गज्ये ॱमत् छोर बेत्। रोरङ्सो ॱनम्बु घन्डल नुक्मे ॱनुम् हुन्दुक् झ्यीन घो ॱमीत् छ्यो़त्ल तोङ्गेन् बेक्क? 5बोर हुगो दीनार् ज्यब ॱसुम्ले ॱल्हक्माल चोङ्न टङ्बु घयेत्ल बीन् तङ्न, हुगो गा युङेत् क ॱनी सीन्न लप्री चीय बेत्। हुनी हुबे हुगी भुमु दील लप्स्य अयेक्प तङ बेत्। 6ॱनी येशुगी हुब घयेत्ल टुङी स्योक्लोङ् हुगो। घन्डल हुगी ॱसीम्ब नदु ची़क्केन्। हीगी ङल ले गङ्ज्येन् झ्यीन टेच्च्युङ्। 7टङ्बु घयेत् हुब खीत्रङ्दङ् दल छीगङ् दो़क्केन् बेत्। खीत्रङ्गी नम् घन्ड गा झ्यीक्कीन् थेक्को़दङ् हुगो झ्यीच्च्ये ॱनोङ्गेन् बेत्। ॱनी ङ खीत्रङ्दङ् दल छीगङ् मीत् दो़क्केन् बेत्। 8हीगी भुमु हीगी रोगी घन्ड झ्यीत् छुगुक्क हुगो रोगी झ्यीब बेत्। रोगी ङल ॱनुम् ॱही़म्ब हुगो ङे सी़ हीगो रो बेक्सल ॱलुक्च्येल रोगी ॱएन्सोनी हुन्दुक् झ्यीब बेत्। 9ङे खीत्रङ्ल गन्दीय ॱस्येत् योङ्। जम्लीङ् की़ल्ल केच्च्य ॱनेम्बु घल ढम्न डोगुक्क हुगोदङ् दल भुमु हीगी ले हीगो ओक् ढेन्सो़ युङ्ज्ये यो़प्पल ॱस्यो़क्केन् बेत् सीन्न झ्यीब बेत्।
येशु डलक्ल तोङ्गेन् यहुदा इस्करीयोत्की ढो़ १०-११
10ॱनी ॱलोप्टुक् च्युन्नीबु दीगी छीक्नी च्यीक् यहुदा इस्करीयोत् दीगी येशु छ्यो़प्पो़न् चो छ्यीया घयेक्की लक्ल तोङ्ज्येमे ढीक्ल हुब घयेत् च्याल फीम्ब बेत्। 11ॱनी हुबे हुगो ॱह घोनी गेसक्की रङ्ल ङीक्की पयीसक् टेत् योङ् झ्यीब बेत्। ॱनी हुगी हुनी झ्यीनी येशु हुबे लक्ल तोङ्ज्येमे झ्यी़ ते तेब झ्यीब बेत्।
यहुदी घयेत् छ्यीबे धी़रीम्गी सम १२-२१
12हीनी च्युर् मत् ज्यबे ढोप्ची सगेङ्गी धी़रीम्गी ङीन् धङ्बु दी ॱलीब बेत्। हुगी ङीङ्गी यङ्ल यहुदी घयेत् छ्यीबे ढीक्ल लुक्टुक् ॱसेत्न पुगो़प्प बेत्। ॱनी ॱलोप्टुक् दीबे येशुल यहुदी घयेत् छ्यीबे धी़रीम् हीगो ॱसम्ज्येल हज्यरङ्ल गो़बे समे ढङ् घयेत् दी घदु ठोक्क झ्यी सीक्केन्? सीन्न ढीब बेत्। 13हुनी खोङ्गी रोरङ्गी ॱलोप्टुक् ॱङील हीन्दुक् सीन्न ॱङान तङ बेत्। खीत्रङ् ॱङीबु फागी सार् फाल ज्युक्। हुदु छ्यी़नेत् खुर्न युङ्गेन् छ्योगो च्यीक् ठेक्केन् बेत्। हुनी हुगी तीङ्ल तीङ् दीत्न ज्युक्ल 14हुगो स्युक्से खीम् दीदु खीत्रङ् ॱअङ् स्युल ज्युक्। ॱनी हुगी खीम्दक्प दील हीन्दुक् झ्यी। चयेलमे नीज्यरङ्ल हीन्दुक् ॱसुङ्गुक्। ङदङ् ङे ॱलोप्टुक् घयेत् यहुदी घयेत् छ्यीबे धी़रीम्गी यङ्ल सज्येल ङीक्की ढीक्ल कोट्ट दी घन यो़प्प? ॱसुङ्गुक् झ्यी। 15ॱनी हुगी खीत्रङ्ल थोक्स्युक्ल यो़क्केन् कोट्ट गर्चम च्यीक् तो़ङ्गेन् बेत्। ॱनी उन हज्यरङ्ल गो़बे यप्च्य घयेत् कुरीक् यो़क्केन् बेत्। ॱनी हुदु कुरीक् हज्यरङ्गी ढीक्ल ठोक्क झ्यीज्यीत् सीन्न ॱङान तङ बेत्। 16हुनी हुब ॱङीबु सार्ल फीन्नी, हुदु खोङ्गी ॱङाब दी डस्सीरङ् ठेप्प बेत्। ॱनी हुबे हुदु यहुदी घयेत् छ्यीबे धी़रीम्गी यङ्ल गो़बे सम घयेत् दी ठोक्क झ्यीन स्यक्प बेत्।
17ॱनी गोङ्ज्यो दी येशु धङ् ॱलोप्टुक् च्युन्नीबु दी हुगी खीम् दीदु सम सदु युङ बेत्। 18ॱनी हुदु देत्न सम सये यङ्ल खोङ्गी ॱलोप्टुक् दीबल ङे खीत्रङ्ल गन्दीय ॱस्येत् योङ्। ङदङ् दल सगेन् खीत्रङ्गी छीक्नी च्यीक्की ङ डलक्ल तोङ्गेन् बेत्। 19हीगी केच्च्य हील ॱलोप्टुक् दीब ॱसीम्दुक् लङ्न, हुब रीदङ् रीगी खोङ्ल ङ मेम्बेगङ् ॱनी। ङ मेम्बेगङ् ॱनी सीन्न झ्यीब बेत्। 20ॱनी हीगी लेल्ल खोङ्गी खीत्रङ् च्युन्नीबी़ छीक्नी च्यीक् ङदङ् दल ॱनो़च्च्य च्यीक्ल ढोप्ची पान सगेन् दी बेत्। 21ॱसुङ्रप्ल यो़प्पल कोलीमीगी ॱरेबु जम्बुलीङ् हीनी डोव दी त डो गोगेन् बेत्। ॱनी हीन्न अक्, कोलीमीगी ॱरेबु डलक्ल तोङ्गेन् हुगो घन्डे दुक्प। बोर हुगो ॱमत् कीब हीन्न, हुल हुगो गा युङ्गो़ट्टो झ्यीब बेत्।
झ्यील्लप् सये क ॱनङ २२-२५
22हुनी खोङ्जोसो सम दी सये यङ्ल खोङ्गी ढोप्ची दी छ्यक्ल ॱनम्न को़न्ज्योक्ल थु छ्यी पुन हुनी च्यक्न ॱलोप्टुक् दीबल ॱय हीगो लीन्। हीगो ङे सी़बु हीनो सीन्न गो़न टेप्प बेत्। 23हुनी यङ् गोङ्ज्यङ् च्येम्मे फोप्प च्यीक् छ्यक्ल ॱनम्न खोङ्गी को़न्ज्योक्ल थु छ्यी पुन हुनी ॱलोप्टुक् दीबल ॱय हीगो लीन् सीन्न टेप्प बेत्। हुनी हुब कुरीक्की हुगो थुङ बेत्। 24हीनी खोङ्गी हुबल हीगो ङे ठक् बेगो। हीगो कगो़त् धम्स्यक् झ्यीप्पल थो़म्बे ठक् बेगो। हीगो मी कुरीक्की ढीक्ल थो़ङ्गेन् बेत्। 25ङे खीत्रङ्ल गन्दीय ॱस्येत् योङ्। ह हीनी झ्यीब दी गोङ्गोङ्गी गोङ्ज्यङ् हीगो ङ ॱमीत् थुङ्। को़न्ज्योक्की ज्यागक्तु ॱलीत्नी, हस्सो़त् हुगी ङीन् दी हुदु गोङ्ज्यङ् ॱसम्ब ॱयोङ्म थुङ्गेन् सीन्न ॱसुङ बेत्।
पत्रुस्की येशु ॱलो़ ॱमीत् तोङ् सीरे केच्च्य २६-३१
26हुनी खोङ्जोसो़ को़न्ज्योक्ल पुगेङ्गी ॱलु च्यीक् लीन्न हुनी छ्यील कुरीक् थो़न्न ओलीप्की लदोक् दील जेन फीम्ब बेत्। 27फीन्नी, येशुगी ॱलोप्टुक् दीबल खीत्रङ् कुरीक्की ङ ॱलो़ तोङ्गेन् बेत्। घन्ड हीन् सीन्न को़न्ज्योक्की ॱसुङ ॱसुङ्रप्ल थो़ङ्गेन् बेत्।
लुक्चीब दी ङे दुङ्न ॱसेत्नी, हुनी लुक् घयेत् दी थीदोर्ल थोर् डोगेन् बेत्। (जकरीया १३:७)
28हुनी यङ् ङ ॱसोम्बुल लोङ्नी खीत्रङ्ले एल्ला ङ गालीलाल डोगेन् झ्यीब बेत्। 29ॱनी पत्रुस्की खोङ्ल ॱयोङ्मा कुरीक्की नीज्यरङ् ॱलो़ तङ्न आक्, ङ त नीज्यरङ् ॱस्युली ॱलो़ ॱमीत् तोङ् झ्यीब बेत्। 30ॱनी येशुगी हुल ङे रङ्ल गन्दीय ॱस्येत् योङ्। हन्दरङ् छेम्मु झ्येगेत् ॱङी भो़त् भो़त्ले एल्ला रङ्गी ङल लेम्म ॱसुम् हुगो ङु ॱमीत् ॱस्यीबेत् सीन्न सीक्केन् बेत् झ्यीब बेत्। 31ॱनी हील पत्रुस्की यङ् ङ नीज्यरङ्दङ् दल ॱस्यी गो़रङ् ॱस्यर्न आक्, ङु ॱमीत् ॱस्यीबेत् त ङ ॱस्युली मीत् सीर् सीन्न गन्दीक्म झ्यीब बेत्। ॱनी ॱयोङ्म दीबे एक् हुन्दुक् दीरङ् झ्यीब बेत्।
गेत्समनीगी ॱसनेदु येशुगी ॱसुव तब ३२-४२
32हुनी खोङ्जोसो गेत्समनी सीक्केङ्गी ॱसने दील ॱलीत्नी, येशुगी ॱलोप्टुक् दीबल ङ ॱसुव तोप्तु डोगेन्। खीत्रङ् हीदु दो़त् सीन्न 33पत्रुस्, याकुब्, युहन्ना झ्यीब कङ्ज्यीक्ल ठीक्न फीम्ब बेत्। हुनी झ्यीनी खोङ्ल गन्दीक्म ॱसीम्ल दुक्ङा धङ् ॱसीम्दुक् लङ्न युङ बेत्। 34ॱनी खोङ्गी हुब ॱसुम्बुल ङ ॱनी ॱसीम्डागी ॱस्यीयेत्। खीत्रङ् हीदु ॱङीत् मत् लोक्पल दो़त् सीन्न 35खोङ् रोरङ् फच्चो़त् च्यीक्ल फीम्ब बेत्। ॱनी हुदु खेबुक्ल ॱसल नान को़न्ज्योक्ल झ्युङ्न हुगी धी़ हुगो मीत् युङे ढीक्ल हीन्दुक् सीन्न ॱसुव तब बेत्। 36ॱअप्प ॱवे पब, नीज्यरङ् च्यानी घन्ड अक् मीत् डुप्की धो मीप्प बेत्। दुक्स्यी च्येम्मे फोप्प हीनी थुङ् मीत् गो़ब, या टो़रो झ्यी। ॱनी म दी ङे ॱनो़ब मेम्ब, नीज्यरङ्गी थुल यो़प्प दी युङ्ज्ये यो़प्प तोङ् सीन्न स्यी़ब बेत्। 37हुनी खोङ् लोङ्न ॱलोप्टुक् ॱसुम्बु दी च्याल युङ्न ॱलोप्टुक् दीब ॱङीत्ल ॱसोङ ठेप्प बेत्। ॱनी खोङ्गी पत्रुस्ल शीमोन्, खो़त् ॱङीत् लोक्को़प्प? खो़त् छ्युजो़त् च्यीक् थुक् उक् ॱङीत् मत् लोक्पल दो़त् ॱमीत् छुबेक्कक्? 38खीत्रङ् दीक्पल छ्यी़ज्ये मीप्पे ढीक्ल खीत्रङ् ॱङीत् मत् लोक्पल ॱसुव तोप्कीन् दो़त्। खीत्रङ्गी ॱसीम् दीगी त झ्यीच्च्ये ॱनो़गेन् बेत्। ॱनी कोलीमी योक्या यो़क्केन् झ्यीनी, ॱअल ॱमीत् छगेन् बेत्।
39हुनी यङ् खोङ् फच्चो़त् च्यीक् फीन्न एल्लागी लेक्मु डस्सीरङ् ॱसुव तब बेत्। 40हुनी खोङ् ॱलोप्टुक् ॱसुम्बु दी च्याल युङ्न हुब यङ् ॱङीत् लोक्कीन् यो़प्प दीरङ् ठेप्प बेत्। हुब ॱङीच्चोक्की लोङ्न दो़त् दीरङ् ॱमत् छुबल हुबे खोङ्ल घन्डे लेम्बु उक् ॱलोक् ॱमत् छुब बेत्। 41हुनी यङ् खोङ् फीच्च्य ॱसुव तप्न लेम्म ॱसुम्बल युङे यङ्ल हुबल खीत् हुन्दो ओक् ङे ॱसोगील्ल ॱङीत् दीरङ् लोक्को़प्प? ह डीक्पेत्। ह कोलीमीगी ॱरेबु दीक्च्येन् घयेक्की लक्ल तोङे धी़ दी ॱलीस्सोङ्। 42ह लोङ्ल डो। ङ डलक्ल तोङ्गेन् दी ॱनी ह हीन ॱलीच्च्युङ् सीन्न झ्यीब बेत्।
येशु सुङे तम् ४३-५२
43हीगो सीक्कीन् सीक्कीर्रङ् च्युन्नीबु दीबे नङ्गी यहुदा दी युङ बेत्। हुगी दल छ्यो़प्पो़न् चो छ्यीया घयेत्, छ्यो़डीम्गी चयेलम घयेत् धङ् लुङ्बे गेम्बा चो छ्यीया घयेक्की तङे मी गज्येन् युङ बेत्। हुबे ढी पदङ् धङ् ज्युक्प खुर्न यो़प्प बेत्। 44खोङ् डलक्ल तोङ्गेन् दीगी ङे ॱसुल च्युप् झ्यीगुक्क हुगो खीत्रङ् घयेक्की सुङ्न गन्दीक्म च्यक्चो़त् झ्यीन ठीक् सीन्न एल्लादु येशु सुङ्गेन् दीबल ढो़ टेप्प हीङ्गो़प्प बेत्। 45हुनी यहुदा दी थो़न्न युङ्न स्युङ्ज्योङ् खोङ् च्याल फीन्न खोङ्ल रब्बी सीन्न च्युप् झ्यीब बेत्। 46हुनी ॱयोङ्म घयेत् दीब छुल्ल युङ्न येशु सुङ बेत्। 47ॱनी उन यो़क्केन् मीरङ् च्यीक्की रोरङ्गी ढी पदङ् दी पीक्न हुदु युङे मी च्यीक्ल बेन्न आम्ज्योक् दी स्योक् स्योन पुर् तङ बेत्। हुगो छ्यो़प्पो़न् चो छ्यीस्स्योगी ॱयोक्पु च्यीक् हीङ्गो़प्प बेत्। 48ॱनी येशुगी हुगी मी युङ घयेत् दील खीक्की नुक्म ढी पदङ् धङ् ज्युक्प खुर्न ङ झ्यक्पा ब अक् ॱनो़न सुङ्दु युङ हीम्ब? 49ङ छीगङ् ङीन् रीम फो़स्स्यी छ्यो़गङ्गी च्यारीदु ॱलोप्स ज्यक्कील्ल देप्पेन्। हुगी यङ्ल खीक्की ङ घन्डल मत् सुङ? ॱनी हीन्न अक्, ॱसुङ्रप्ल यो़प्पे केच्च्य घयेत् डुप् गोगेन् बेत् सीन्न झ्यीब बेत्। 50हुनी येशुदङ् दल यो़प्पे मी घयेत् दीगी खोङ् ॱलो़ तङ्न कुरीक् ढो़नर बेत्।
51हीनी मी स्यो़म्ब च्यीक् घुलक् ॱल्हेङ्लेङ्म च्यीक्कीरङ् तुम्न, उन येशुदङ् दल यो़प्प बेत्। ॱनी ॱयोङ्म दीबे हुगो ओक् सुङ्नी, 52हुगी रोरङ्गी घो़ दी ज्युक् पीक्न स्यक् झ्यीज्ये च्यरेङीय ढो़नर बेत्।
छ्यो़गी छोक्तेन् छ्यीम्मुदु येशुल छ्येप्प केब ५३-६५
53हुनी येशु सुङ्गेन् दीबे येशु छ्यो़प्पो़न् चो छ्यीस्स्यो दी च्याल ठीक्न च्येब बेत्। ॱनी उन छ्यो़प्पो़न् चो छ्यीया घयेत्, लुङ्बे गेम्बा चो छ्यीया घयेत् धङ् छ्यो़डीम्गी चयेलम घयेत् जोम्न यो़प्प बेत्। 54ॱनी पत्रुस् येशुगी तीङ्जो़त् तीङ्जो़त्ल युङ्न छ्यो़प्पो़न् चो छ्यीस्स्यो दीगी खीम्गी च्यारी दीगी नङ्ल स्युन हुदु हुगी मी ॱयोक्पु दीबदङ् दल मी दीगीन् देप्प बेत्। 55छ्यो़प्पो़न् चो छ्यीया घयेत् धङ् छ्यो़गी छोक्तेन् छ्यीम्मी़ सदस्यीय ॱयोङ्म घयेत् दीबे एक् येशु ॱसो़च्च्येमल खोङ्ल ङीब कोप्केङ्गी पङ्बु ॱयेङ बेत्। ॱनी ङीब गज्येन् ॱयेङ्न आक्, ॱमत् ॱङीब बेत्। 56खोङ्ल ङीब कोप्च्येल मी गज्येङ्गी ॱएलमे केच्च्य ॱस्येप्प बेत्। ॱनी हीन्न अक्, हुबे पङ्बी़ केच्च्य दी मत् डीक्प बेत्। 57हीनी मी यरी लोङ्न खोङ्गी ढीक्ल हीन्दुक् सीन्न ॱएलमे केच्च्य ॱस्येत्न पङ्बु झ्यीब बेत्। 58हीगी मी हीगी मी लक्पे सो़बे हीगी छ्यो़गङ् हीगो ॱरुम्नी, यङ् स्यक्पु ॱसुम्ल मी लक्पे मत् सो़बे छ्यो़गङ् ॱयोङ्म च्यीक् सोगेन् सीर ङीक्की ॱह घोज्युङ् झ्यीब बेत्। 59ॱनी हील अक् हुबे पङ्बी़ केच्च्य दी मत् डीक्प बेत्।
60हुनी छ्यो़प्पो़न् चो छ्यीस्स्यो दी छोक्तेन् छ्यीम्मी़ घुङ् दीनी लोङ्न येशुल खो़त् घन्ड सीन्न लेम्बु छीक् च्यीक् इक् ॱमीत् ॱलोक्केन्? हीगी मी हीबे रङ्ल ङीब कोप्कुक् न ॱनी सीन्न ढीब बेत्। 61ॱनी ढीन अक्, येशुगी लेम्बु छीक् च्यीक् इक् ॱमत् ॱलोक्प, ॱसीङ् थागी स्युब बेत्। हुनी यङ् छ्यो़प्पो़न् चो छ्यीस्स्यो दीगी खोङ्ल खो़त् तो़प्प च्येम्मे ॱरेबु, खोङ्गी को़बे च्यप्को़न् ख्रीष्ट् दी हीम्ब ॱनी? सीन्न ढीब बेत्। 62हुल येशुगी ङ हीन्। तीङ्ला कोलीमीगी ॱरेबु ॱवङ् च्येम्मे ॱये छ्योदु दो़प्प धङ्, ॱनी इगीनी मल्ल ॱमुबल स्यो़न्न युङ खीत्रङ्गी थोङ्गेन् बेत् झ्यीब बेत्। 63-64हीगो घोनी छ्यो़प्पो़न् चो छ्यीस्स्यो दीगी रोरङ्गी घो़ दी च्येत्न उन मी ॱयोङ्म दीबल हीगी मी हीगी को़न्ज्योक्ल नुक्मे ॱमो़म्बी़त् तोङ खीत्रङ्गीरङ् ॱह घोसोङ्। ह हज्यरङ्ल घन्डे पङ्बी़ गो़ज्येत् दी यो़प्प? ह खीक्की घन्ड झ्यीच्च्ये ॱनो़ब यो़प्प? सीन्न झ्यीब बेत्। हील ॱयोङ्म दीबे कुरीक्की हील ॱसो़त् गोगेङ्गी छ्येप्प को़बल ओ़ब दुक् सीन्न झ्यीब बेत्।
65ॱनी हुब यरीगी खोङ्ल छ्युप्स्या कप्न खोङ्गी झ्येत्ङे दी घुलक्की तुम्न हुनी मुर्चोक् बेन्न ह खोक्की ॱङो़स्स्यी दी ॱस्यो़त्ते त सीन्न झ्यीब बेत्। ॱनी ॱयोक्पु घयेत् दीबे एक् खोङ्ल डम्ज्यक् बेम्ब बेत्।
पत्रुस्की येशुल ङु ॱमीत् ॱस्यीबेत् झ्यीब ६६-७२
66हुगी यङ्ल पत्रुस् ॱमेक्चो़त्न च्यारीगी धङ्र दीन यो़प्प बेत्। ॱनी छ्यो़प्पो़न् चो छ्यीस्स्योगी ॱयोक्मु च्यीक् हुदु युङ बेत्। 67युङ्नी, हुगी पत्रुस् उन मी दीगीन् दो़प्प थोङ्नी हुगी फोरील तेन पत्रुस्ल ॱवे रङ् अङ् नासरत्की येशु हुगोदङ् दल दो़क्केङ्गी मी च्यीक् हीङ्गो़प्पेत् झ्यीब बेत्। 68ॱनी पत्रुस्की लेल्ल ङ हुगो मेन्। खोक्की घन्डे तम् सीगो़प्प ङे हुगो ॱस्युली ॱह मीत् घोयेत् सीन्न हुनी रोरङ् हुगी च्यारीगी गोक्केक्ल थो़म्ब बेत्। [हुनी झ्यबु भो़ब बेत्।] 69ॱनी यङ् हुगी भुमु दीगी फीच्च्य यङ् पत्रुस् थोङ्नी उन यो़क्केङ्गी मी दीबल हीगो ओक् हुबे छ्योगी मी च्यीक् हीङ्गो़प्पेत् झ्यीब बेत्। 70ॱनी हील यङ् पत्रुस्की ङ मेम्बेत् झ्यीब बेत्। हुनी तीङ्जो़त्ल यङ् उन यो़प्पे मी यरीगी पत्रुस्ल रङ् गालीलागी मी बेत्। रङ् गन्दीय हुगी छ्योगी मी च्यीक्रङ् बेत् झ्यीब बेत्। 71हुनी पत्रुस्की ॱमो़त् भोर्न ॱन झ्यीन खीत्रङ्गी सीक्केङ्गी मी हुगो ङे ॱङो़न्ने ङु ॱमीत् ॱस्यीबेत् झ्यीब बेत्। 72हीनी ॱस्यर्च्यक् झ्यबु झ्येगेत् ॱङीब भो़ब बेत्। हुनी येशुगी एल्ला पत्रुस्ल झ्यबु लेम्म ॱङी भो़त् भो़त्ले एल्ला रङ्गी ङल लेम्म ॱसुम् ङु ॱमीत् ॱस्यीबेत् सीक्केन् बेत् सीर दी पत्रुस्ल ढेन्सो़ झ्युङ्नी, पत्रुस् ङुच्च्यङ् ॱस्योर बेत्।
Valið núna:
मर्कुस् 14: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society