Aba Vatowo 33
33
Yakobo be Iso idi valoboda tetelina
1E tuwo adi taiyuwo yaidi. 2Ina pakonayaoyadi ma natudiyao ilatuwokoidi sivakumgo. Mlidi Reya ma natunao. Reitiyeli ma natuna Iyosepa sivámliya. 3E Yakoboyana ivakumgo ina tuwowona matana goi aena sivanima sivayuwo ivatuguyalako isakululu. 4Go Iso ilokoina ina Yakobo ivayavau nukotona goi iyoisi, iyowoi. Tuwo adi taiyuwokova sitáiya. 5Sitáiya ikavava, Iso imatavilavila vevina be gogómana igitedi, e idigo kana,
‘Ame tauyadi avatauwa?’
‘Yau im pákwana, Yaubada ikanuwoiyegu, e ame natugowo ivinigu’, Yakobo kaena.
6E Yakobo ina pakonayaoyadi ma natudiyao sima aedi sivatugúyala. 7Reya nakae ma natunao sima aedi sivatugúyala. Tauyadi mlidi Iyosepa be Reitiyeli sivámliya sima aedi sivatugúyala. 8E Isoyana idigo kana,
‘Go maine boda madi yoguyogu ababanedi. Moe kaga yoguyoguna?’
‘Guna tomoya, bego itoboinegu bei im kanuwóiya ababane’, Yakobo kaena.
9E Iso idigo kana,
‘Guna gómana, tuwo. Yau guna yoguyoguyao badabadaidi. Moe kom im yoguyoguyao.’
10Go kina Yakoboyana idigo kana,
‘Geya. Neta itoboinegu im kanuwóiya ababane, e guna yabobona kuuyaone. Unana maisim agite moe nakae Yaubada maisina agite go, geya akamaseta, go sem mam nuwotao kuuyaonegu. 11Tuwowogu, guna yabobona aavinim kwābi unana Yaubada ikanuwoiyegu, e yau guna yoguyoguyao badabadaaidi, tauna bogina yoiyagu.’
Tuwo Yakobo ilumakikine ana kadókana Iso itagona, e yoguyoguyadi ikabidi.
12E Iso idigo kana,
‘Tao. Yau avakedemi.’
13Go kina Yakoboyana idigo kana,
‘Guna tomoya, bogina kuyagoi gogómana sineneta be nakae yoguyogu maniyedi ma natudiyao. Tauna geya itoboinedita maliyalina ana madabokina goi siiketoiya, govila bei sikámasa. 14Tuwo guna tomoya, kom kuvakūmgo go, kai im pakonayao manukaima kavámliya kao Seira goi.’
15E Isoyana idigo kana,
‘Siyagu, neta moe nakae, guna topaisewa maniyedi sikaiyaka be sivaitem.’
Go Yakobo idigo kana,
‘Moe tuwo. Guna tomoya, tayamo dogoi latuwogu moe im kanuwóiya ababane. Ame tauna.’
16E tuwo Iso ina Seira goi. 17E kina go Yakoboyana geya inoita Seira, go sem ina asa Sukota goi yoyou parai iyowóidi toinina manuna be nakae ina yoguyoguyao manudi. Moe pasina asayana yoina Sukota.#33:17 Sukota: Ame youyana ana yagoina moe yoyou parai.
18E boi Padani Aram ikalave, e mana dedevina isowóduwo asa Sekem goi; moe Kenani sinaena. Asayana kikina goi ina yoyou parai iyowóidi. 19Ina yoyouyadi Emori natunao koroto idi poyapoya goi sikaaiyaka. Emoriyana natuna tayamo yoina Sekem. Tuwo Yakobo poyapoyayana igimone ana badabada tayamo andedi (100) goi.#Iys 24:32; Iyo 4:5. 20Amoko goi dídiya ikabi, ikaudakodako, .#33:20 El Eloe Isileli: Ame youyana ana yagoina moe Yaubada, Isileli ina Yaubada, o ana yagoina moe Isileli ina Yaubada itogaga.
Valið núna:
Aba Vatowo 33: GVS
Áherslumerki
Deildu
Afrita
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.