Aba Vatowo 32
32
Yakobo ikatubayasi bego Iso ivaalobode tetelina
1E kina go sima Yakobo sivalobode. 2E Yakobo igitedi idigo kana,
‘Ame Yaubada ina tovayaviyayao!’
Tuwo amo asayana ivayou Makanaim.#32:2 Makanaim: Ame youyana ana yagoina moe boda tovayaviya aiyuwo. Moe unana kidi Yakobo boda tayamo go, Yaubada ina tovayaviyayao boda aiyuwoina.
3E Yakobo ina lobutu adi tolokoinayao ietunedi sivakumgo sina tuwowona Iso yaina, tauyana ikaaiyaka Seira goi, moe Idom dadavina. 4Ego mainao tolokoinayadi ilatuwokoidi kana,
‘Kōna tuwowogu Iso kolatuwōko kami,
“Guna tomoya, yau Yakobo im boi asuvaadavada Lebani taiyao go, ame bogina akaluvilamna. 5Guna bulumakau, guna ase, guna sipiyao, guna be guna pakonayao vevina be koroto amedi. E tauna tomoya, ame livalayana aetune iwo yaim bego im kanuwóiya bei ababane.”’
6Tuwo moitamo tolokoinayadi silokoina sina Iso silatuwoko. Silatuwoko ikavava, sikaluvila sima Yakobo silatuwoko kadi,
‘Tuwowom Iso bogina kalatuwoko. Tauyana imamaima bego ivalobodem go, koroto adi badabada poa andedi (400) taiyao simamaima.’
7E livalayana Yakobo inove, imatoita be nakae atena iyova. Tuwo ina bodao ikiwotaidi boda aiyuwo. Aiyuwoina ina yoguyoguyao, moe ina sipi, ina bulumakau be ina ikiwotaiyuwedi. 8Ina nuwonúwana kana,
‘Neta Iso ima boda tayamo ilauidi, imaiko go, boda tayamo itoboinedi sisiya dedevidi.’
9E ikiwotaidi ikavava, ikawanoi Yaubada yaina, idigo kana,
‘Tubugu Eberamo be tamagu Aisake idi Yaubada, kunovēgu. , boi kom kulatuwokoigu kam,
“Kwaluvīla kūna im kasa be nakae osemowo yaidi, e bei ayabobonem.”
10Yau im pákwana nakae, yau giyaigu go, tuwo bogina kukubunuwegu be nakae im guinuwa goi kom yau yaigu tuta liliuna. Moe moitamo. Boi nimatu kulatuwokoigu ana Lebani goi akaaiyaka go, sákala Iyoridani ame boi asaidamane, guna kaituko kaka akavale. Go sem ame tutayana bogina aguyau be nakae asusáila, boda aiyuwo sikaaiyaka. 11Ame tuta tuwowogu Iso yaina kuyavēgu. Amatoita tauyana bei ima vevina ma natudiyao be yau ilauima. 12Kunuwaisi boi kom bogina kulatuwokoigu kam,
“Bei ayabobonem be nakae akisailim, im boda adi badabada nakae ediédila mamaya goi, geya itoboinemta kwatuyaividi.”’#Abv 22:17; 28:13-15.
13E tuwo amoko goi ikaaiyaka imasisi. Ego ina yoguyoguyao maniyedi ikabidi, bei tuwowona Iso ivini, ina yabobona. 14Yoguyoguyadi ame nakae: Goti bovavina aiyuwo andedi (200) be goti bolamo tuwenti (20), sipi bovavina aiyuwo andedi (200) be sipi bolamo tuwenti (20), 15kameri bovavina teti (30) natudiyao taiyao, bulumakau bovavina poti (40) be bulumakau bolamo yawou, bovavina tuwenti (20) be ase bolamo yawou. 16Ago yoguyoguyadi ikiwotaidi yauwo ituli ituli. Ikiwotaidi ikavava, e ina pakonayao ilatuwokoidi idigo kana,
‘Koroto tamo tamo yauwo tamo tamo imatakavate. E kovakūmgo go, taabu koolamgōgana, go sem imi ketoiya kovaamasāba.’
17E yauwo vakuumgoina ana tomatakavata ilatuwoko idigo kana,
‘Tuwowogu Iso bei ivalobodem be ilumadadem kana,
“Im tomoya avatau? Nako kunonoina? Ame avatau ina yoguyoguyao?”
18Tutayana nakae ilumadadem, kom kam,
“Ame im pákwana Yakobo ina yoguyoguyao. Ame ietunegu amedi avinim, ame nakae ina yabobona kom guna tomoya yaim. Ago tauyana mligu goi imamaima.”’
19E yauwo adi tomatakavatayao tamo tamo nakae ilatuwokoidi, idigo kana,
‘Tutayana Iso kobabane, nakae bei kolatuwoko. 20Ego konuwookavāte kami,
“Im pákwana Yakobo mlima imamaima.”’
Yakobo ina nuwonúwana kana,
‘Ame yoguyoguyadi moe guna yabobona sivakumgo go, yoguyoguyadi goi anúwala tauyana yaina bei guna goyo inuwotao go, agu gogo yaina bei dedevina.’
21Tuwo ina yoguyoguyadi sivakumgo sina go, Yakoboyana ina yoyou parai goi ikaaiyaka.
Yakobo Yaubada taiyao sivaadidídina tetelina
22E vanuwo bogina isabamgo, Yakobo itaoya monenao adi taiyuwo, ina pakonayao adi taiyuwo be natunao koroto yawou tayamo ietunedi sivakumgo sina sákala Yaboka sisaidamane. 23E ina pakonayao nakae ilatuwokoidi kónana sikavaledi mlidi sisaidamanedi. 24E kina anetava ikaaiyaka. Ikaaiyaka go, koroto tayamo isowóduwo ima Yakobo iyoisi taiyao sivadidídina ana kadókana botomotomo.#Ose 12:3-4. 25E korotoyana igite bego geya itoboineyeta Yakobo ikalisave, tuwo Yakoboyana sokisokina luluna ikikapusi, e dibuwatuna itakapusi. 26E korotoyana idigo kana,
‘Kwalavēgu! Bogina botomotomo.’
‘Geya akalavemta ana kadókana ’, Yakobo kaena.
27E korotoyana idigo kana,
‘Yoim manakoyoina?’#32:27 Yoim manakoyoina: Anerose bogina iyagoi Yakobo yoina. Tutayana Yakobo ikatumapu ina sinapu ikaiwoduwe unana Yakobo mana yagoina. Ana yagoina moe tosónana. Tupwana nakae tutayana Yakobo ikatumapu be yoina ivatoi ikamoitamo bego kina ina sinapu igoyo.
‘Yoigu Yakobo’, Yakobo kaena.
28E korotoyana idigo kana,
‘Bogina kuvayaviya Yaubada be koroto yaidi goi go, kom kukalisavedi. Tauna geya tuwaina yoim Yakobo.#Abv 35:10. Kom yoim .’#32:28 Isileli: Ame youyana ana yagoina geya imavadeta. Itoboineda takaigavile kada, ‘Yaubada ikaalibúbuna o iilovina.’ O itoboineda takaigavile kada, ‘Ivayaviya Yaubada yaina.’ O itoboineda takaigavile kada, ‘Yaubada ivayaviya.’
29E Yakoboyana idigo kana,
‘Siyagu, kom yoim manakoyoina?’#Tot 13:17-18.
Go korotoyana idigo kana,
‘Kaga kulumadadanae yoigu manuna?’
Go amoko goi Yakoboyana ikaipakuye. 30E Yakobo idigo kana,
‘Yaubada maisina agite go, geya availaita.’
Tauna moe pasina asayana ivayou Penieli.#32:30 Penieli: Ame youyana ana yagoina moe Yaubada maisina.
31E níyala itukotuko go, Yakobo itaoya Penueli#32:31 Penueli: Ame asayana moe Penieli go, ana gínina ituli. ikalave. Ego sokisokina itakapusi, tauna isakau. 32Tauna ame tutayana yoguyogu sokisokina luluna goi woliwoli poowouna geya sikanikani unana Yaubada boi Yakobo sokisokina luluna ikikapusi, tauna woliwoliyana geya sikanikani.
Valið núna:
Aba Vatowo 32: GVS
Áherslumerki
Deildu
Afrita
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.