लूका 3
3
डुब्कि देहुइया यूहन्ना
(मत्ती ३:१-१२; मर्कू. १:१-१८; यूह. १:१९-२८)
1जब रोम देशके महाराजा तिबेरिअसके यहूदिया प्रदेशमे शासन कर्लक पन्द्र साल हुइल रहिस। तब वहाँक राजपाल पन्तियस पिलातस रहे। वहे समयमे हेरोद गालील प्रदेशके शासक रहे, और ओकर भैया फिलिप इतुरिया प्रदेश और त्राखोनितिस प्रदेशमे शासन करतेहे। 2जब हन्नास और कैयाफा यहूदिनके प्रधान पुजारी रहिँत। तब उ समयमे परमेश्वरके वचन उजाड़-ठाउँमे जकरियक छावा यूहन्नक थेन अइलिस। 3यूहन्ना यर्दन लदियक आँजरपाँजरके सक्कु ईलाका हुइती अइलस। और ऊ असिन प्रचार करे कि अपन मन बद्लो और पाप करना छोरदेऊ ताकि परमेश्वर तुहुरिन्के पाप माफ करिँत्। तब् मै तुहुरिन्हे डुब्कि देहम। 4परमेश्वरके अगमवक्ता यशैयक किताबमे असिके लिखल बा,
“उजाड़-ठाउँमे एकथो चिल्लुइयक बोली, परमप्रभुक डगर तयार पारो, हुँकार डगर सोझ बनाऊ।
5प्रत्येक दुन्ड्रा भँथारदेजाई, और प्रत्येक पहाड़ और प्रत्येक पख्वा बराबर करजाई।
तेँर-बेँर डगर सोझ बनाजाई, और उँचखाल डगरहे बराबर बनाजाई।
6और सक्कु जाने ओइन्हे बँचाइक लग परमेश्वरके पठाइल मुक्तिदाताहे देख्हीँ।”
7तब बहुत्ते मनै यूहन्नासे डुब्कि लेहे अइलाँ, पर यूहन्ना ओइन्हे कहल, “तुहुरे बिखार सँप्वक हस खराब बतो, तुहुरिन्के यी सोँच गलत बा कि डुब्कि लेके किल तुहुरे अपन पापके लग परमेश्वरके देना दण्डसे बँचे सेकदर्बो! 8पर दण्डसे बँचक लग असिन काम करो, जिहिसे पता चले कि तुहुरे जात्तिकमे अपन मन बदलके पाप करना छोरदेले बतो। और अपन मनमने यी ना सोँचो कि परमेश्वर हम्रिहिन्हे दण्ड नै दिहीँ, काकरेकी अब्राहाम हमार बाबा हो। काकरेकी मै तुहुरिन्हे कहतुँ, परमेश्वर यी पठरामेसे अब्राहामके लग लरका सृजाई सेक्थाँ। 9परमेश्वर उ सक्कु जहनके न्याय करक लग तयार बताँ, जे अपन मन बदलके पाप करना नै छोरत, ठिक ओस्तेके जसिके कुर्हार रहल कौनो मनैया उ रुख्वाहे काटक लग तयार रहत। अस्तेके प्रत्येक मनै जेने उ रुख्वक हस मजा फारा नै फरैथाँ, ओइने परमेश्वरसे दोषी ठहराजिहीँ और आगीमे फेँकादेजिहीँ।” 10तब मनै यूहन्नाहे पुँछ्लाँ, “असिन हो कलेसे परमेश्वरके दण्डसे बँचक लग हम्रिहिन्हे का करे परी?” 11ऊ ओइन्हे जवाफ देहल, “जेकर थेन दुईथो झुल्वा बा ऊ नै रहुइयनहे एकथो दैदेहे, और जेकर थेन खैना चिज बा उ फेन ओस्तेहेँक करे।” 12कर उठुइयन फेन डुब्कि लेहे अइलाँ, और उहिहे पुँछ्लाँ, “गुरुजी हम्रे का-का करी?” 13ऊ ओइन्हे कहल, “सरकारके टोकलसे धेउर कर ना लेहो।” 14सिपाहिन फेन उहिसे पुँछ्लाँ, “हम्रे फेन का करी?” ऊ ओइन्हे कहल, “किहुहे फेन अत्याचार करके और झूँट आरोप लगाके ना लुतो। अपन तलबमे सन्तुष्ट रहो।” 15जब मनै ख्रीष्टके अइना असरा हेरतिहिँत। और सक्कु जाने अपन मनमे यूहन्नक बारेमे सायद यहे ख्रीष्ट हुइताँ कि कहिके सोँचतिहिँत। 16तब् यूहन्ना उ सक्कु जहनहे जवाफ देहल, “मै तुहुरिन्हे पानीलेके डुब्कि देथुँ। पर मोरिक पाछे अउइया महिन्से धेउर शक्तिशाली बताँ। जेकर जुत्तक टेनी खोल्ना लायकके मै नै हुइतुँ। ऊ तुहुरिन्हे पवित्र आत्मालेके और आगीलेके डुब्कि दिहीँ। 17फत्कना सुप्पा हुँकार हाँथेम बतिन, और ऊ अपन खरहीहे पूरा सफा करहीँ, और अपन गोहूँ अपन देहरीमे कुरह्यैहीँ। पर भूसा जतरा भर नै बुट्ना आगीमे जरादिहीँ।” 18असिक औरे बहुत्ते अर्ती अनुसार शिक्षा देके यूहन्ना मनैनहे खुशीक खबर प्रचार करल।
हेरोदसे यूहन्नाहे कारागारमे डरना
19पर हेरोद रज्वा अपन भैयक जन्नी हेरोदियासहे धर्लक ओहोँरसे और ओकर कर्लक सक्कु खराब कामके लग यूहन्ना उहिहे डाँटल रहे। 20यूहन्नाहे झेलमे दारके ऊ अपन खराब कामके उप्पर एकथो आकुर खराब काम थपलेहल।
येशूक डुब्कि
(मत्ती ३:१३-१७; मर्कू. १:९-११)
21जब सक्कु मनै डुब्कि लेलाँ और येशू फेन डुब्कि लेके प्राथना करतिहिँत, तब् स्वर्ग उघरगिलस। 22और पवित्र आत्मा शारीरिक रुपमे परेउना हस हुँकार उप्पर उतरल। तब् परमेश्वर स्वर्गमेसे येशूहे असिके कलाँ, “तैँ मोरिक दुलार छावा हुइते, तुहिसे मै गजब खुशी बतुँ।”
येशूक खानदान
(मत्ती १:१-१७)
23येशू अपन सेवाके काम सुरु करेबेर ऊ लगभग तीस सालके रहिँत। मनै हुँकिन्हे योसेफके छावा हुइँत कहिके कहिँत। योसेफ एलिक छावा रहे। 24एली मत्तातके छावा, और मत्तात लेवीक छावा रहे। लेवी मल्कीक छावा, और मल्की यान्नक छावा रहे। यान्ना योसेफके छावा रहे। 25योसेफ मत्ताथियासके छावा, और मत्ताथियास आमोसके छावा रहे। आमोस नहूमके छावा, और नहूम इसलीक छावा रहे। इसली नग्गैके छावा रहे। 26नग्गै माथके छावा, और माथ मत्ताथियासके छावा रहे। मत्ताथियास सेमैनके छावा, और सेमैन योसेखके छावा रहे। योसेख योदाके छावा रहे। 27योदा योआननके छावा, और योआनन रेसाके छावा रहे। रेसा यरुबाबेलके छावा, और यरुबाबेल शालतिएलके छावा रहे। शालतिएल नेरिक छावा रहे। 28नेरी मल्कीके छावा, और मल्की अद्दिक छावा रहे। अद्दी कोसामके छावा, और कोसाम एलमादमके छावा रहे। एलमादम एरके छावा रहे। 29एर यहोशूक छावा, और यहोशू एलिएजरके छावा रहे। एलिएजर योरीमके छावा, और योरीम मत्तातके छावा रहे। मत्तात लेवीक छावा रहे। 30लेवी शिमियोनके छावा, और शिमियोन यहूदक छावा रहे। यहूदा योसेफके छावा, और योसेफ योनानके छावा रहे। योनान एल्याकीमके छावा रहे। 31एल्याकीम मलेअक छावा, और मलेआ मिन्नक छावा रहे। मिन्ना मत्ताथाके छावा, और मत्ताथा नातानके छावा रहे। नातान दाऊदके छावा रहे। 32दाऊद यिशैक छावा, और यिशै ओबेदके छावा रहे। ओबेद बोअजके छावा, और बोअज सल्मोनके छावा रहे। सल्मोन नहशोनके छावा रहे। 33नहशोन अम्मीनादाबके छावा, और अम्मीनादाब अरामके छावा रहे। अराम हेस्रोनके छावा, और हेस्रोन फारेसके छावा रहे। फारेस यहूदक छावा रहे। 34यहूदा याकूबके छावा, और याकूब इसहाकके छावा रहे। इसहाक अब्राहामके छावा, और अब्राहाम तेरहक छावा रहे। तेरह नाहोरके छावा रहे। 35नाहोर सरुगके छावा, और सरुग रऊके छावा रहे। रऊ पेलेगके छावा, और पेलेग एबेरके छावा रहे। एबेर शेलहक छावा रहे। 36शेलह केनानके छावा, और केनान अर्पक्षदके छावा रहे। अर्पक्षद शेमके छावा, और शेम नोअक छावा रहे। नोआ लेमेखके छावा रहे। 37लेमेख मतूशेलहक छावा, और मतूशेलह हनोकके छावा रहे। हनोक येरेदके छावा, और येरेद महलालेलके छावा रहे। महलालेल केनानके छावा रहे। 38केनान एनोशके छावा, और एनोश शेतके छावा रहे। शेत आदमके छावा, और आदम परमेश्वरके छावा रहे।
Valið núna:
लूका 3: DVGNT
Áherslumerki
Deildu
Afrita
Want to have your highlights saved across all your devices? Sign up or sign in
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.