IIMU/UUNGW 27
27
Tsuuqár Yakobo
1Isaka iwa dín, nee ilaawós naa tampuutiyé', Esau garmaawós oo úr guri amoorós i ateét, guri báy, «Garmaaeé'.»
Inós iri oó', «Aníng a diirí.»
2Isaka iri oó', «Ga/aaweek, aníng a aakoó aa din, slamí baalár ni gwaa' a xuaaká. 3Ala xosluuwók tataahheek, tlaangasirók nee ga/aleerók, tláw baraá sla/a, makiito'o gaasang. 4Daqaní muruú /aymár tsuú' ngu tléhh, kudá' ni sla'aa'aam, ngu húp as niwa /ayiim nee kuúng uwa tsuuq dír nira gwaaiiká.»
5Laatí, qoomaadá' Isaka iwa garmaawós Esau i axweesi, Rebeka i axamís. Naagáy Esau iwa tláy baraá sla/a as iwa slaktuú ay, 6Rebeka garmaawós Yakobo guri beér, «Aníng baabuúwók ugwa axaás iwa hhiyaawók Esaú babay, 7‹Slakat aweek as muruú /aymár tsuú' nguwa tlehh, as kahhó' uwa tsuuq dír geeraá AAKOÓ MUNGÚ wa alé, dír nira gwaaiiká.› 8Daxta garmaaeé', /aymi'iieé' iiárií qaaseek, nee tidá' ni kuúng bawa ka iialooés. 9Tláw baraá daqtá aara, deeloó tsár oo aara, kudá' hhohhó' ngu húp, baabuúwók u muruú /aymár tsuú' i tleéhh, kudá' i sla'aa'an. 10Kuúng daqaní baabuúwók un muruú /aymár i húp, iwa /ayin, as kuúng uwa tsuuqi dír ira gwaaiiká.»
11Ala Yakobo aayírós Rebeka gari báy, «Inslaweek, hhiyaaeé' Esau, slaqwtós i háts se'eengo, aníng u koomaaká. 12Hám wané baabá aníng i matsotsoqoos, án iri tsaahh adór ngura al/aáy, aluuwo aníng lo'o iri eér, tsuuqa ngiri slawaaká.»
13Aayiírós guri beér, «Lo'oorók aníng i /ak, garmaaeé', kuúng tí ni kah na tleehheek, tláw deeláysuú aara na huwang.» 14Naagáy Yakobo iri tláy, deeloó tsár oo aara nguri huúw amór aayírós. Inós muruú /aymár tsuú' guri tléhh, kudá' Isaka i sla'aa'an. 15Rebeka tlabaá Esau, garmaawós kudá' úr giri taatáhh, kudá' i kon do'o, Yakobo, garmaawós kudá' niiná guri tsiitís. 16Rebeka dabaá Yakobo nee isto giri kadaá deeláyduú aarií tsék. 17Naagáy guri muruú /aymaadá' tsuú' i hanís, nee mikaáteedá' aa amohhe'és.
18Yakobo iri dáh amór baabuúwós, guri ateét, «Baabá».
Inós iri oó', «Aníng a diirí. Kuúng a heemá, garmaaeé'?» 19Yakobo iri oó', «A aníng Esau, barsuuwók. Adoodá' kuúng naa ó' aga tleéhh. Na'ás, baabá, gwe'edár iwiitang, sluqor'eé' /ayeek, as án iwa tsuq.»
20Ala Isaka ina yaahaás, «A adoomá, bareemák naa gaanslár slúq, garmaaeé'.»
Yakobo iri oó', «Asma Munguú Aleesleemusmo, Munguúwók án ina alee/iís.»
21Isaka Yakobo guri báy, «Garmaaeé', diirí suruukang as uwa matsotsoqoos as ngiwa tsaahh, adór kuúng tar tsuwa garmaaeé' Esau.» 22Yakobo baabuúwós Isaka guri i suruúk, Isaka guri matsotsoqoós, iri oó', «Afoorí a afór Yakobo, ala daba' a dabaá Esau.» 23Gwaa tsaahhiiká, asma dabaawós i se'éngw koná' adór awa hhiyaawós Esau. Naagáy guri tsuúq. 24Guri malé yaahaás, «Kuúng aqo tsuwa garmaaeé' Esáwúwo garmaaeéne?»
Inós iri oó', «Eeít».
25Naagáy baabuúwós guri báy, «Fu'unaydaá sluqoorók huwang, ngiwa /aay, as uwa tsuuq.» Yakobo guri muruú /aymaadá' i huúw, iri /ayín, difaái sleeme gay huúw, gari wáh. 26An qoomár baabuúwós Isaka iwa oó', «Suruukáng, diirí tseewuwang garmaaeé', án ma'aasáng.» 27Naagáy Yakobo iri suruúk dír baabuúwós, guri ma'aás. Baabuúwós xarángw tlabaawós nguwa sláy, guri tsuúq, i kaahi,
«Ga/aaweek, xarángw tsuú' oo garmaaeé'
a adór xarángw qaymór taa tsuúq nee AAKOÓ MUNGÚ.
28Mungú har'uú doori ngu haniisi,
hhapér hho' ngi haniisi,
balaangw nee difaáiro ni hamaariye'.
29Tlahh'aá muu u sagadiyuusiye',
nee xoordu u ilaiwawa/iye'.
Kuúng hhaeewók ki sawaawuti'iín,
nee na/aá aayírók u ilaiwawa/iye'.
Kudá' kuúng u lu'ús, ku lu'usi,
nee kudá' kuúng u tsuúq, ku tsuuqi.»
Esau i tsuuqaá firiirín sleeme
30Isaka Yakobo tsuuqaro nguwa hhe'eés, nee Yakobo hamtidár kilae niwa ti'iít dír baabuúwose, Esau hhiyoó Yakobo nina harakií/ baraá slaktuú wa alé. 31Esau sleeme muruú /aymaadá' tsuú' guri adaá tleéhh, guri baabuúwós i huúw, guri báy, «Gím baabá, tlawáng, sluqór garmaawók /ayeek, as án iwa tsuq.»
32Isaka guri yaahaás, «Kuúng a heemá?»
Inós iri oó', «A aníng garmaawók Esau, barsuuwók.»
33Isaka adoorí ngiwa axaás, daaraxoó úr guri áy, iri oó', «A heemá kar ala kudá' aa slakaat, nee sluqo ngiri huúw, aníng aga qaroó /ayiím qoomár kuúng niwa hardatiká. Nee ugwa qaroó tsuúq, nee tsuuqa gaa sláy.»
34Esau /ayma'aá baabuúwós ngiwa axaás. Ina slahhaá', iri tseé' /aa/eewo. Aluuwo baabuúwós guri báy, «Baabá, na'ás, aníng sleeme tsuuqáng.»
35Ala Isaka iri oó', «Hhiyaawók nina dáh ar al/ayma, inós tsuuqaawók gaa ar tláy.»
36Esau iri oó', «An gár tas Yakobo,#27:36 Yakobo: Afór umuuwí baraá tsifrír Ebraniaro a slaqás nee /aymuú al/ayma. aníng iga sagaá wa tsár wa al/aáy. Gár geera a uroó án tawa baris guna hayóh, nee daxta tsuuqaaeé' gaa malé hayóh.» Esau baabuúwós guri yaahaás, «Tsuuqaá taa meetís as aníng i kahhiía?»
37Isaka iri oó', «Yakobo ugwa waawutmoowók tleéhh, nee hhaeewós iga haniís tawa sagadiyuuseerós. Ugwa balángw i haniís nee difaáiro. Gár uy tleehh daxta garmaaeé'?»
38Esau baabuúwós guri báy, «Baabá, tsuuqa ki koon aqo wak kilóse? Aníng sleeme tsuuqáng, baabá.» Esau iri tseé' /aa/eewo.
39Naagáy Esau kuri báy nee Isaka baabuúwós,
«Hotaangók ku saáw dír hhapér hhoe,
nee kuúng tu saáw dír har'uú dooriwo.
40Muruú /aymaarók un slasleér ar lawaala,
kuúng hhiyaawók un sagadiyús,
ala qooma i xeér ar kuúng /uuru kuwa malé sleer#27:40 /Uuru kuwa malé sleer: Laqaá, ar kuúng tawa tawó hi'iimit.
Qoomaadae taaqwani an hingés gawaá istoge.»
41Esau Yakobo guri aáhh as tsuuqaá taa haniís nee baabuúwós. Esau iri baraá muunaáwós i oó', «Deelór baabá kuwa sa tsuunqumiisi naa naká/. Daqaní hhiyaaeé' Yakobo un gaás.»
42Ala Rebeka kángw Esau garmaawós kudá' úr guri axás. Hee guri ya/áp Yakobo garmaawós kudá' niiná nguwa ateeti, guri beér, «Ti harmagahh, hhiyaawók Esau ti gurkwa/amis as kuúng uwa gaasár wa slai. 43Garmaaeé', /aymi'iieé' iiárií qaaseek, tláw, goów ay amór hhiyaaeé' Labani, baraá Harani. 44Afi qoomár niinawe hooté' nee inós ay dír buhhtaá hhiyaawók nay faakiya'. 45Buhhtaawós birinda faakiyé', inós tidá' kuúng taa tléhh birnga gunqareés, án hee ngu ya/aáw as niwa ki/. Gár kuungá' tsaraawo tas looár wák alqatla' a milá?»
Yakobo kuwa ya/aáw amór Labani
46Rebeka Isaka guri beér, «Aníng amohhooa a koomaaká baraá slafingw'eene as /ameenarír Hiti. Yakobo /ameenír wák ar múk Hiti birnga duúx, gár nis slaaf a milá?»
Valið núna:
IIMU/UUNGW 27: IRQW
Áherslumerki
Deildu
Afrita
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.