LÚKAS 8
8
Bakaats bando biki ka tsënk Yeesu, ni bëka bukul
1A u ba, Yeesu ja kara përaasa, në yaana pul, ni kara untab; nu leents Upetsan-uwar, nu ñakanaand tsi uleka pësien Nasien-batsi. Bafetsul, untaaja bukun ni batëb, ci ni nul. 2#Mat 27.55,56; Mar 15.40,41; Lúk 23.49A Balon bakaats ci buts ni nul, ban pënana biki ngëcaay ngëjuatsal, ba yësana biki mmaak. Aci Maaria, ni ka n jakee Magëdala, ni ngëcaay paaj ni ulon pën ngi tsi nul; 3a u ci Juaana, áar Kusa. Nul Kusa aci nagaang bëka Eroodis, nasien. A u ci buts Susaana, ni balon bacumal; bë ja ba roon bu kë jej bëka bukul koo tsënkëna Yeesu ni bafetsul.
Yeesu tib përim anaamanaan nagur
(Mat 13.1-23; Mar 4.1-20)
4Bi kandënd bañaan kawiak júk bi, balon kë pëni di kara përaasa pëbi tsi Yeesu, na tib përim, aja: 5“Nagur apën atsëp pëgur utulul. Bi nu gur bi wul, a u ka u yër wi tsi kambaŋ bëga; a u poosa, ngëko-ngëyits re wul. 6Ulon yër tsi tsëko ilaak, a u mayi, u kay, par tsëko teets mlik. 7Ucínts yër tsi umetaari myu, myu natsa ni wul, a ma nëts wul. 8Ulon kak yër tsi tsëko mgiji, a u mayi. A uja pëbuk pëloole, pë buk këbuk useent.” Bi Yeesu ja bi ko wan a nuu ba, na kat përim, aja: “Nan kai ibats iteeni, na teen.”
9A bafetsul yeparul ko wi katib-irim përim pi pac wi. 10#Isa 6.9Na ja: “Ind, nda wëla pëme ngan doots ngunk mea, ngi pësien Nasien-batsi. Maa ban duka bukunk, bu koo tiba këtiba irim, pa uteen bukul, bu ri ka win; ute bukul, bu ri ka me ko wi i pac wi.”
11“Përim pan tiba pank, ko wi pa pac wi ci wun wi: Utul, aci përim Nasien-batsi. 12Utul u yër wunk tsi kambaŋ bëga, aci ba nja biki ba te përim Nasien-batsi, a uu ba, Ujabël ka bi kee pënan pul tsi ngëwaas bukul, pa ba rits wak tsi pul bu ka buër. 13Utul u yër wunk tsi tsëko ilaak, aci ba nja biki ba te përim Nasien-batsi, bu ka niiran pul ni ulílan, maa bu liincats. Uwak bukul di ka jon; u band uwal mteen-teenana, din bu ka fats ufets. 14Utul u yër wunk tsi myu, aci ba nja biki ba te përim Nasien-batsi a uu ba, pëya tsi bërun, kawejats ngëko umundu, ni kaka bëka, ni ulílar ngëko umundu ka nëts bukul, u tsu bukul përits jëŋ. 15Utul u yër wunk tsi tsëko mgiji, aci ba nja biki ba te përim Nasien-batsi, bu ka gaang pul di ngëwaas nga wara ngi a nga maband, ba tambandar, a bu kë buk mbuk.”
Yeesu tib përim anaamanaan ulamp
(Mar 4.21-25)
16 #
Mat 5.15; Lúk 11.33 “Ñaan di ka taban ulamp, në jej ko na kúndëna wul, nin di ka tsu wul di utsia bëkaab. Maa ka tsu wul di tsëpafëni ulamp, pa uja biki kan niaji biki, bu ka win ufacar tsëko. 17#Mat 10.26; Lúk 12.2Par, kaats ko un kunda wi, un dits wi kee pibandar; te kaats un beka wi, un dits wi kee pibanaa, u meaa. 18#Mat 25.29; Lúk 19.26Bi u ci bank, nda rukan ibats tsi bi nda ja bi nda roon ndu cikëndën. Par, nan kai, nii wëlaa; maa nan kaatsi, nii caanaa ŋal wi na ja wi tsi ibatsul aka.”
Anin Yeesu, ni ban tsaar biki ni nul Yeesu
(Mat 12.46-50; Mar 3.31-35)
19Anin Yeesu, ni ban tsaar biki ni nul Yeesu, bë bi tsi nul, maa bë yëlanats pëwokanul, undo kandënd bañaan. 20Na jaka: “Aninu, ni ban tsaar biki ni wi, bukul nats bukunk di utsand, bë ŋal pëwinu.” 21Yeesu yank bukul, aja: “Anin nji, ni ban tsaar biki ni nji, aci biki kan cikëndën biki përim Nasien-batsi, a bu kë ro ko wi pa ja wi.”
Yeesu natsan ukëk
(Mat 8.23-27; Mar 4.35-41)
22Ulon unu tsi ngënu ngëmënts ngun, Yeesu gija kanawa ni bafetsul, na ja bukul: “Nda ju ngë lutar kajara bërëk kun.” Din ba pën pëtsëp. 23Bi ba ci bi tsi pëpaat kanawa, Yeesu yër bëŋooy. A ufuts natsee ni ukëk di bërëk, a mlik kë cumi kanawa; a bëjuats baandë-ni bukul. 24Ba ya ee wamb Yeesu, ba jaul: “Nawiak, nawiak, pëcäts abaandë-ni inja!” Yeesu natsa aleentsar ufuts ni ngëmaroŋ, a nga tsëk; a tsëko juabëts jok. 25Na ja bukul: “Uwak ind aci tsum?” Ba lënk, ba pikra; a uja nan dooni në ja bacintsul: “Yën ci-un namëntsi kalon? Ŋal ufuts ni mlik, në ja ngul përim, din ngë ro ko wi na ja wi.”
Yeesu yësan nalon niints ni ngëcaay niaji
(Mat 8.28-34; Mar 5.1-20)
26Ba kata pëboos pi ka n jaka pi Geraasa, pa mabëlar pi ni Galileeya. 27Bi Yeesu katee bi kankay, nalon niints na niajee ngëcaay bi pii jëk ni nul, apënë-ni përaasa. Ajon mak ki na tiemaatsa ki iŋi, ni ki na ciinats ki kato, maa di ibuk di na ciina run. 28Nu win Yeesu, na lië, na yër tsi bërunul, na kat përim mak, aja: “Yeesu, Abuk Nasien-batsi Kanpe pëci di ruëts! Wee n kaar wun ni wi? Man ñaanu, cats pikaarin.” 29Añakan ank, par Yeesu ja ucaay ujuatsal u pëni di ñaan namënts un. Par wul, amobul ngëyaas ngëcumal, na ja na tana mkorente, në janka, maa në mar-maran mkorente, në cok ngëjank, ucaay ka tsëpandul ngëlaay. 30Yeesu yeparul, ajaul: “Katimu ka jaka um?” A na yankul, aja: “Kandënd.” Aja ank, par ngëcaay ngëcumal aniajul. 31A nga ci tsi pëbuara Yeesu, pa na rits tsu ngul nga tsëp baar-tsëko-unoor. 32Pëtan pëwiak pi ngënkëmbe ro ci tsul tsi kafeer tsi untunda. A ngëcaay buara Yeesu, pa na wët ngul nga niaj ngënkëmbe ngëmënts ngun. Na wët ngul. 33Ngëcaay pën tsi ñaan namënts un, din nga niaj ngënkëmbe. Pëtan ngënkëmbe këra-këree di ruëts, ee yër di bërëk, tsi utsia untunda, a pa ba rul. 34Bi bayafan ngul win bi ko un par wi, ba túk ee leents bañaan di përaasa, ni di ngëntab ireeŋ. 35Din, bañaan pëni, pa pii win ko un par wi. Ba baandi tsi Yeesu, ba tsënki ñaan namënts un tsoar tsi bërun Yeesu; ngëcaay apën tsi nul, na tiema iŋi, a been tsëkënul. Bukul, ba lënk. 36Ba win biki ko un par wank leents buts bukul bi niints ni ngëcaay niaji yësana bi. 37Din, bañaan bëlieng, ban ciina biki ngëjara ngan fay ngunk tsul buara Yeesu na pën na lawan bukul, par bë lënk mak. Yeesu gija kak kanawa awitsa. 38Niints ni ngëcaay pën unk tsi nul ro ka buara Yeesu na wëtul na ci ni nul. Maa, Yeesu wëtanul na tsëp, na jaul: 39“Witsaan katou, kii leents ngëko ngi Nasien-batsi rooru ngi bëlieng.” Niints pën ayaana përaasa bëlieng, nuu leents ngëko ngi Yeesu roorul ngi.
Yeesu ayësan ŋaats ni kan tulee pëñaak
(Mat 9.18-26; Mar 5.21-43)
40Bi Yeesu witsa bi kajara kun, kandënd bañaan welanul, par bë ro ka lipul bëlieng. 41Niints nalon baandi, katimul Jairus, aci nawiak kato-kajúki. Ayër tsi bërun Yeesu, na rugarul, pa na niaj katoul, 42par abukul naloole ŋaats, na wokani ngëwaanu untaaja ni ngëtëb, ka tsas pëcäts. Bi Yeesu kë tsëp bi rul, a indënd bañaan kë miŋanul. 43Tsi bukul, aka ŋaats ni kan tulee pëñaak, ko un do wi ngëwaanu untaaja ni ngëtëb. [Acok bëkaul bëlieng tsi bacuunkan] maa nayësanul cits. 44Na ya bi ufets Yeesu, na këraraul kambiantëmb kaŋí ki na tiema ki. Ucar umënts wun pëñaak katse tula. 45Yeesu ja: “Yën kërarain un?” Bi ba pok bi bëlieng, Per ja: “Nawiak! Indënd bañaan afayu a bu kë miŋanu!” 46Maa, Yeesu ja: “Aka nan kërareeni, par man te uyëlan pën tsi nji.” 47Bi ŋaats win bi na kaats bi nu beka bi, a na bi ee yër tsi bërun Yeesu, a uliaful kë lënk. A tsi bërun bañaan bëlieng, na leents ko un ka wi na kërara Yeesu, ni bi na yës bi ucar umënts wun. 48Yeesu jaul: “Abuk nji! Uwaku abueranu; tsëpan ni pëfac.”
Abuk Jairus ŋaats a cäts, a Yeesu kakaniul nayësal
(Mat 9.23-25; Mar 5.35-43)
49Na wama ka ñakan, u ka nan pënii di use nawiak kato-kajúki, na ja: “Abuku cäts; cäts kaka nooran najukan.” 50Maa Yeesu te ko wan, na ja Jairus: “Cats lënk; moban tsi uwak, din në buer.” 51Yeesu kë band kato, niiraants ñaan pëniaj bametsu ni nul; aci koon Per, ni Joŋ, ni Jakob, ni asin napäts ni aninul, niaj bukun ni nul. 52Bañaan bëlieng kë rug, bu kë kob ijinc bukul, undo napäts. Yeesu ja bukul: “Ind tsë rug; napäts cätsats, aŋooy këŋooy.” 53Maa ba ci tsi përiatul, par bë me na cäts. 54Yeesu mobul tsi kañan, na kat përim mak, na ja: “Napats, natsee!” 55Din uyafënts napäts kaki. Ucar umënts wun, na natsa. Yeesu tsu bukul ba wël napäts bariala. 56A bábukul pikra. Yeesu ja bukul, ba rits les koon këles ñaan ko un par wi.
Valið núna:
LÚKAS 8: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.