LÚKAS 7
7
Yeesu yësan naleemp kapëton basondaari
(Mat 8.5-13)
1Bi Yeesu ba bi pëleents irim yan bëlieng tsi bërun bañaan, na tsëp Kafarnaum. 2Aka kapëton basondaari nan ci rul, aka naleemp ni na tsui mak tsi uwaasul. Naleemp bi maak a nu tsas pëcäts. 3Bi kapëton te bi uleka Yeesu, na yël balon bawiak Bajudeu, bee ba ñaanul na bi në yësan naleempul. 4Uband bukul di Yeesu, ba ruka mob tsi pëbuaraul, bu kë ja: “Na yëlii wund ink, atsënkan pëjaa m doorul ko wan, 5par aci na ŋali ucaak inja. Nul niewar nja un kato-kajúki.” 6A Yeesu tsëp ni bukul. Bi na okan bi kato, kapëton yëli ifetsarul, pa ba jaarul Yeesu përim pi: “Ajug, tsë noorandar. Par, nji n tsënkaants pëjaa m niaji bametsu kato nji. 7Wul ka wun n tsënkaants pëjaa man bi tsi wi bërierin. Maa, jaan përim, din naleemp nji ka yës. 8Par nji, man ci ñaan nan kai bawiak nji, a n ka buts basondaari biki n wiak biki; ma nja n ja ni: ‘Tsëpan,’ në tsëp; ka ja nun: ‘Bili,’ në bi; ka ja naleemp nji: ‘Doan ko wi,’ në ro wul.” 9Bi Yeesu te bi ko wan, a na pikra tsi uleka kapëton namënts un. Na witsësa kaŋ kandënd bañaan ban dunanul biki, na ja: “Man ja ind, yaas ka win uwak un dëmb wi pi wi, ŋal tsi bañaan Israel.” 10Bi ban do bukunk yëlee witsa bi kato, ba tsënk naleemp yës.
Ŋaats nan catsëndani ayënul, abukul naloole niints a cäts, a Yeesu kakaniul nayësal
11Jonats, Yeesu tsëp përaasa pi ka n jaka pi Nain. A bafetsul, ni kandënd bañaan kawiak, tsëp ni nul. 12Bi na band bi tsi kawok tsëniajëni përaasa, din upaas un cäts wi kë pënanda pii mooya. A kandënd bañaan përaasa ci ni aninul; aninul abukul koorul, a na cätsëndan ayënul. 13Bi Ajug win bi anin upaas, na yëkarul ipës, na jaul: “Cats rug.” 14Na tsëp ee mobara bëkaab puum, balap nats, na ja: “Upaas, ma njau, natsee!” 15Kancats natsa atsoar, na jot uñakan. Yeesu kakanul aninul. 16Din, bañaan lënk bëlieng, bu kë bëndan Nasien-batsi, bu kë ja: “Nayëlia nawiak apëni tsi pëncuaf inja.” Ba jaand: “Nasien-batsi abi pëwula bañaanul.” 17A përim pa n jaka pank tsi uleka Yeesu tea tsi Judeeya bëlieng, ni tsi ngëcaak ngan fay ngi dul.
Joŋ-namijan ayël bafetsul batëb, di Yeesu
(Mat 11.1-6)
18Bafets Joŋ leentsul ngëko ngëmënts ngan bëlieng. Joŋ rui batëb tsi bafetsul, 19na yël bukul di Ajug, bee ba yeparul, ba jaul: “Wi ci-un nan kai pëbi a, oo wund aka pëlip nalon-a?” 20Bi bayënts bamënts bukun band bi di Yeesu, ba jaul: “Joŋ-namijan ayëli wund di wi, pa pëyeparu, ne wi ci-un ank nan kai pëbi, ane wund ka lip nalon-a?” 21Tsi uler umënts wun, Yeesu yësan bañaan bacumal mmaak bukul, ni mlupi bukul, na ruakand ngëcaay ngëjuatsal tsi bukul, na tsu bakuel bacumal a bu kë win. 22#Isa 35.5,6 Isa 61.1Na yankës biki Joŋ yëli biki, aja: “Nda tsëpan, ndii leents Joŋ ko wi nda win wi a nda teand: Bakuel akak koo win, a balab kë yandaar, a ba maak biki kantsewul-kajankal jëntsana, a barika-te kë te, a bacäts natsee di pëcäts, a Upetsan-uwar leentsa baranj. 23Anaak, ñaan nan bitsee niaman uwak tsi nji!”
Yeesu añakanaan uleka Joŋ-namijan
(Mat 11.7-19)
24Bi ban tsiji biki kayëlia Joŋ-namijan pën bi atsëp, Yeesu jot pëñakanaan indënd bañaan tsi uleka Joŋ, aja: “Wee nda ya wun pëteen di ulaalats? Pëjaam pi ufuts ci pi tsi pësiints-a? 25Wee nda ya wun pëwin kalon? Ñaan nan tiemee iŋi iwar-a? Nda Teenan-e! Batiema iŋi iñatsal a bu kë ciind tsi ko uwar, bë ciina ito basien. 26Wee nda ya wun pëwin kalon? Nayëlia-a? Man ja ind, eey-e, maa apar pëjaa nayëlia. 27#Mal 3.1Nul ci-un nan picana unk ulekaul, ajaka: Nji ka n wëtani ink Nayëlia nji na yëru bërun, ni kan yecis bëgau tsi bërunu. 28Man ja ind: Tsi kabëk ki bakaats buk ki, nape Joŋ cits. Maa di pësien Nasien-batsi, nan pei pëci naties apeul.” 29#Mat 21.32; Lúk 3.12Bañaan bëlieng ban cikëndënul biki, ŋal bayep bëluk-uraasa, bë niiran Nasien-batsi ci namabal, undo bi ba mijana bi bëmijan Joŋ. 30Maa Bafariseu ni bajukan-ulua, bë bër ko wi Nasien-batsi ŋalar wi bukul, undo bë mijanaatsa bëmijan Joŋ. 31Yeesu lak përim, aja: “Wee ndu n naamanaan wun bañaan ntsari? Bë naam ni we kalon-i? 32Bë naam upäts ban tsoar biki tsi kënjëkënts, a uja bandoon biki bu kë liar bacints bukul, koo ja: ‘Wund afúts ind pëncand, a nda kayats; a wund ya uya puum, a nda rugats.’ 33Par, Joŋ-namijan abi, nu bër-mlik, di ka raan pëwat, a nda ja: ‘Atsij ucaay.’ 34Abuk ñaan-najin bi, nuu riala, nuu raan; a nda ja: ‘Nda teenan-e! Ñaan ni, aci nawaamal, na ci nakuj, na fetsar ni bayep bëluk-uraasa, ni bajuban!’ 35Maa upäts kameko, bukul bëlieng bë niiran ka ci kamabal.”
Ŋaats najuban atular Yeesu ulicar tsi itsiim
36Nalon tsi Bafariseu, aru Yeesu bee ba riala. Bi Yeesu niaj bi kato namënts un, na tsoar bariala. 37#Mat 26.7; Mar 14.3; Joŋ 12.3Nalon ŋaats tsi përaasa pëmënts pun, aci naro-ngëjuban. Bi na te bi u jaka Yeesu tsoar bariala di kato Nafariseu, na tsiji pëjaam ulicar alabastëru. 38Na bi ee nats tsi ufets Yeesu, tsi kawok itsiimul, nuu rug, a mŋandul tula añuawan itsiim Yeesu. A ni uweelul, na faaul itsiim, na wúnkëra yul, na kër yul ulicar. 39Bi Nafariseu nanduuri unk Yeesu bariala win bi ko wan, na ja tsi ibatsul: “Uci ñaan ni ro ci nayëlia, në ro me ñaan ni ŋaatsi ci, ni kan këraraul ink, ni ko wi na ci wi: aci naro-ngëjuban.” 40A Yeesu yankul, aja: “Simon! Man ka ko wi n du n leentsu wi.” Simo n jaul: “Najukan! Leentsin.” 41A Yeesu jaul: “Aka bañaan batëb, ban tsiats biki nalon uncaam. Nacak atsiatsul ngëseent kañan Dinaariu. Natëbantsan tsiatsul ngëntaaja kañan. 42Bi ba kaats bi ulukëni, na wëtar bukul uncaam wi ba tsiatsul wi, bukul batëb. Bi u ci bank, naom tsi bukul, ka pe un pëŋalul?”
43Simon ja: “Man jakar, aci na wëtara unk un pe wunk përëmb.” A Yeesu jaul: “M wejats uwar.” 44Na witsësa amab ŋaats, na ja Simon: “M win ŋaatsi? Man niaji katou, a m wëlatsin mlik mñawuni itsiim. Maa nul, añawin itsiim ni mŋandul, na faa yul ni uweelul. 45Wi m wúnkëraatsain, maa nul, ki na niaji ki wëtaants pëwúnkëra itsiim nji. 46M këratsin mkër tsi been, maa nul, akërin ulicar tsi itsiim. 47Undo ko umënts wun ka wun n du n jau, ngëjubanul nga cum ngank, ajampësaa, par apiban bëŋal mak. Maa na n jampësaai ko uties, ka piban bëŋal ko uties.” 48Din, Yeesu ja ŋaats: “Ngëjubanu ajampësaa.” 49Ban tsoar biki bariala ja tsi ibats bukul: “Yën ci-un namëntsi, ni ka n jampësaank ŋal ngëjuban?” 50Yeesu ja ŋaats: “Uwaku abueranu; tsëpan ni pëfac.”
Valið núna:
LÚKAS 7: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.