JOŊ 14
14
Yeesu ci-un bëga bëyaani di Nasien-batsi
1A Yeesu ja kak: “Ngëwaas ind tsë coka. Nda wak tsi Nasien-batsi, nda wakan buts tsi nji. 2Di use Asin nji, ito icumal aci rul. Par uroots ci ank, nji n bitse ka n ja ind mán ya pëyecis ind tsëko. 3A uci n ya ee n yecis ind tsëko, ka bi kak, kee jej ind n tsëpand tsi nji bërierin, pa tsi n ci tsi, ind buts ndë ci tsul. 4A tsi n pënar tsi, nda me bëga.” 5A Tomaas jaul: “Ajug, wund meets tsi m pënar tsi; a um bi wund yëlan bun pëme bëga?” 6A Yeesu jaul: “Nji n ci-un bëga, ni ucär, ni ubiira; kaats ñaan ni kan bii tsi Asin nji, uci na biinatsi tsi nji. 7Uci nda ro mein, nda bi ka me buts Asin nji. A tsi inkri nda meul, a nda winul.” 8A Filip jaul: “Ajug, piban wund Asin, din u liing wund.” 9A Yeesu jaul: “Filip, ki n ci kink ni ind ki këlum, a m meetsin-a? Na winini, awin Asin nji. A um bi kë jain bun: ‘Piban wund Asinu?’ 10M fiaarats n ci di Asin nji, a Asin nji ci di nji-a? Irim in ci yi tsi pëja ind, cits nji bërierin n tsuar un pëja yul. Maa Asin nji, nul nan ci di nji, ci-un tsi përo ngiicul. 11Nda fiaarin, man ci di Asin nji, a Asin nji ci di nji; a ucits ank, nda fiaari ŋal rin tsi undo ngan dola ngunk. 12Mán leents ind ucär: Na waki tsi nji, ka ro buts ngëko ngi n du n do ngi, në roand ngan pe ngi ngul. Par nji, mán ya di Asin nji. 13A ko wi nda yep wi ba këyep tsi katim nji, ka ro wul, pa Asin përëmbana tsi Abuk. 14Uci nda yepin ko tsi katim nji, ka ro wul. 15Uci nda ŋalin, ndë mob tsi ngëtsua nji. 16Mán yep Asin nji, në wëli ind nalon natsënk, pa në ci ni ind pa sandëndën, 17nul Uwejats ucär, wi umundu yëlanats wi pëyank, par winats wul, te nin meets wul. Maa ind nda me wul, par wul aci ni ind, a uu ci di ind. 18In di ka n dúk ind babënatsa, mán witsee tsi ind. 19tsini ko uties, umundu di ka winin kak; maa ind nduu winin, par nji man ci nayësal, a nda ci buts bayësal. 20tsi unu umënts wan, ndu me, man ci di Asin nji, a nda ci di nji, a n ci di ind. 21Nan tsiji ngëtsua nji, a na mob tsi përo ko wi nga ja wi, namënts un ci-un na ŋalini. A na ŋalini, Asin nji ka ŋalul; nji buts ka ŋalul, ka pibandar tsi nul.” 22A Judas, nan cits unk Judas Iskarioti, ja Yeesu: “Ajug, um bi m ka bun pëpibandar tsi wund, a m di kë pibandar tsi umundu?” 23A Yeesu yankul aja: “Uci ñaan ŋalin, në mob tsi përim nji, Asin nji ka ŋalul, wund ka bi tsi nul, wund ka ciina tsi nul.
24Na ŋalatsini, di ka mob tsi irim nji. Përim pi nduu te pink, cits pëmíñ, maa aci pi Asin nji na yëliini. 25Man ja ind ko wi, bi n wama bink a n ci ni ind. 26Maa natsënk ka bi, nul Uwejats-ujënts, wi Asin nji kë wëtani wi tsi katim nji. Wul kee jukan ind wun ngëko bëlieng; u tsu ind pëles ngëko bëlieng ngnja ind ngi. 27Mán dukar ind pëfac; pëfac nji, mán wël ind pul. In di ka wël bi umundu kë wël bi. Ngëwaas ind tsë coka, te ind tsë ci ni bëlal. 28Nda te ko wnja ind wi: Mán tsëp, ka witsee tsi ind. Uci nda ro ŋalin, nda bi ka lílandër bi n ja bank mán tsëp di Asin nji; par Asin nji apein. 29Man leents ind ko wan inkri, tsini u ruka ka ci; pa uwal wi u ci wi, ndë wak. 30Nji n katse ink ka ñakanaan ind ngëko ngëcumal, par kantsijëna umundu wi ka bi ink, a yëlaants ko tsi nji. 31Maa umënts wan aci, pa umundu pëme, nji ma ŋal Asin nji, a n ja n doon ka ro ko wi Asin nji tsuin wi. Nda natsaan, nda ju ngë pën tsi!
Valið núna:
JOŊ 14: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.