JOŊ 13
13
Yeesu ñawës bafetsul itsiim
1Ufesta-pëbuer aruka ka baandi, a Yeesu ro me ba Ulerul band, pa nul pëpën tsi umundu wi pëtsëp di Asin; nul na ŋali bayiicul ban ci biki tsi umundu, a na ŋal bukul te tsi utuami. 2Bi bu kë re bi ufëri, a Ujabël ro cum ba uwaas Judas, nul abuk Simon Iskarioti, pa na ya Yeesu ufets. 3Yeesu me Asinul wëlul ngëko bëlieng tsi iñanul, na me buts na pënë-ni tsi Nasien-batsi, a nu tsëp di Nasien-batsi. 4A na natsa tsi bariala, a na waas iŋi, na jej kasarbet atana. 5A uu ba, na tsu mlik tsi urung, a na kur pëñawës bafetsul itsiim, a nu faa yul ni kasarbet ki na tana ki. 6A nu band di Simon Per, a na jaul: “Wi, Ajug, a kë ñawësin itsiim-a?” 7A Yeesu yankul aja: “Ko wi n ci wi tsi përo, m meets wul inkri; maa kii me wul tsi bërun.” 8A Per jaul: “Nin-a! M di kë ñawësin itsiim, yaas!” A Yeesu yankul aja: “Uci n ñawësatsu, m di kë bof ko ni nji.” 9Din, a Simon Per jaul: “Ajug, cits rin itsiim nji, maa buts iñan ni been.” 10A Yeesu jaul: “Ñaan na ñawee ba, afier koon pëñawës itsiim din; uliaful bëlieng ajënts. A ind, nda jënts, maa cits ind bëlieng.” 11Yeesu aro me ba ni ka yauli ufets, wul ka wun na ja: “Cits ind bëlieng jënts bukun.”
12 #
Lúk 22.27
Bi na ba bi pëñawës bukul itsiim, a na jej iŋiul, na kak aci tsi bariala ni bafetsul, a na ja bukul: “Ko wi ndo ind wi, nda me ko wi u pac wi-a? 13Ind, nda ja nda roon nduu ruin koo ja Najukan ni Ajug; nda ñakan uwar, par man ciul. 14Unk, uci n ñawës ind itsiim, nji nan ci Ajug a n ciind Najukan, ind buts nda ka puu ñawëlar itsiim. 15Par, ma wël ind unaamanaani, pa bi ndo ind bink, nda roon unk buts. 16#Mat 10.24; Lúk 6.40; Joŋ 15.20Mán leents ind ucär: Naluek peets ajugul, a na yëlee peets na yëluli. 17Uci nda me ngëko ngan, a uci nda mob tsi përo ngul, ndë ci ba naak biki. 18#Iya 41.10Nji n ñakanaanats uleka ind bëlieng, par man me biki n dat biki. Maa aci pa pëbandan ko wi Bëpica n ja wi: ‘Nan ci tsi përe pëpom nji, ariang pësuanjul pëkamanin.’ 19Inkri, man leents ind ko wan, tsini u ruka ka baandi; pa uwal wi u baandi wi, ndë wak, nji MAN CI. 20#Mat 10.40; Mar 9.37; Lúk 9.48; 10.16Mán leents ind ucär: Na welani ñaan ni n yëli, awelanin; a na welanini, awelan na yëliini.”
Yeesu aja Judas Iskarioti kee yaul un ufets
(Mat 26.20-25; Mar 14.17-21; Lúk 22.21-23)
21Bi Yeesu ja bi ank, a uwaas re mak, a na leents un jënts wi, aja: “Mán leents ind ucär: Nalon tsi ind kee na yain ufets.” 22Din, a bafetsul teenëlar, maa bë meets ni na ŋali pëja. 23A nalon tsi bafetsul, ni na ŋal unk, ro tsoar akabëlar ni nul. 24Nul ni Simon Per siintsar un been pa na yepar Yeesu, yën ci-un ni na ja ank. 25Nafets Yeesu namënts un araga tsi bëjínc Yeesu, a na jaul: “Ajug, aci yën?” 26A Yeesu yankul aja: “Aci ni ndu n wëli kapom ki ndu n ñuawan ki.” Din na jej kapom ki na ñuawan ki, a na wël kul Judas, abuk Simon Iskarioti. 27Bi Judas yank bi kapom, Ujabël niajul, uyëk umënts wun. Din, a Yeesu jaul: “Ko wi kë ro wi, caran do wul.” 28Maa, tsi ban tsoar bukunk bariala, nin naloole meets ko un ka wi Yeesu ja ank. 29Bi Judas kë tsijëna bunk uncaam, a balon wejats aja, Yeesu ro jaul këja na weel ngëko ngan fiera ngi pa ufesta, oo na wël baranj ko ulon. 30A nul Judas, bi na yank bi kapom, na cil ucar umënts wun. Uwal umënts, aci bërëm.
Utsua uwalu
31Bi Judas cil bi, a Yeesu ja: “Inkri, Abuk ñaan-najin arëmbana, a Nasien-batsi rëmbana tsi nul. 32A uci Nasien-batsi rëmbana tsi nul, Nasien-batsi ka rëmbanul buts tsi nul bërierul; a inkri-inkri di nu rëmbanul run. 33#Joŋ 7.34Upats nji baties, ma wama n ci ni ind ko uties. Nduu tsasin; a bi n ja bunk Bajudeu, má n ja ind buts inkri: ‘tsi n du n ya tsi, nda yëlanats pëya rul.’ 34#Joŋ 15.12,17; 1Joŋ 3.23; 2Joŋ 1.5Mán wël ind utsua uwalu: Nda ŋalëlari; bi n ŋal ind bunk, nda ŋalëlari buts. 35Uci nda ŋalëlar, tsul tsi bañaan bëlieng kë meena tsun nda ci bafetsin.”
36A Simon Per jaul: “Ajug, tsum tsi kë ya tsun?” A Yeesu yankul aja: “tsi n du n ya tsi, m yëlanats pëfetsin inkri. Maa tsi bërun, kii fetsin.” 37A Per jaul: “Ajug, we ka wun n di ka n yëlan pëfetsu inkri? Mán wël ubiira nji pa wi.” 38A Yeesu yankul aja: “Kë wël ubiirau pa nji-a? Mán leentsu ucär: Uguk ka ruka ka aan, kë bërin aa ngëyaas ngëwaants.”
Valið núna:
JOŊ 13: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.