NGËRO 7
7
Uñakan Estefan
1A nan pei pëci nawiak-bajakan yeparul aja: “Ngëko ngan, aci ank di nga ci run-a?” 2#Uju 12.1Estefan yank bukul aja: “Batsaar ni nji bayënts, ni basin nji, nda cikëndëni! Nasien-batsi përëmb apibandari tsi Abraam, asin nja bi na wama bi ci di Mesopotaamia, te netse ro ci di Karan; 3a na jaul: ‘Pëni di ucaaku ni di bayëtsu, kë tsëp ucaak wi ndu n pibanu wi.’
4 #
Uju 11.31
Uju 12.4
Din, a Abraam pëni di ucaak bakaldeu a na tsëp ee tsoar di Karan. Bi asinul cats bi, Nasien-batsi pënandiul pa ucaak wi nda tsoarëna wink inkri. 5#Uju 12.7; 13.15; 15.18; 17.8Nasien-batsi wëlatsul bërukanda tsul, ŋal tsëko tsëpafi kayots, maa awatsan pëwëlul ucaak na kaana ni babukul; te nul Abraam kaats napäts. 6#Uju 15.13,14A iink di Nasien-batsi ja run: ‘Babuku kee tsoar di ucaak utsooŋ, bu ka ruka ci baluek, bu kë pikaar bukul aa u ro ngëwaanu ngëseent ngëbaakër. 7#Pëp 3.12Maa, ucaak wi ba ro wunk ciina baluek, nji Nasien-batsi ja un, mán wat wul pëleents a uu ba, bu ka pëni bu kee ru rëmbanaanin tsi tsëko tsi.’ 8#Uju 17.10-14 Uju 21.2-4 Uju 25.26 Uju 29.31—35.18Din a na wëlul karo-pëloole kambac; unk, a Abraam bëk Isaak, a na welanul kambac tsi unu uwasantsan; unk di Isaak ro run Jakob, a Jakob bi ro buts basin nja untaaja bukun ni batëb.
9 #
Uju 37.11
Uju 37.28
Uju 39.2,21 A basin nja ñíbëla Juse, a ba waapul bañaan Ejipët; maa Nasien-batsi ro ci ni nul, 10#Uju 41.39-41a na randul ngënoor bëlieng, a na wëlul bëtseend ni kameko tsi bërun Farao, nasien Ejipët, nan tsuuli pëtsijëna ucaak Ejipët ni kato nasien bëlieng.
11 #
Uju 42.1,2 A ubon baandi tsi ucaak Ejipët bëlieng, ni wi Kanaan; a u tsiji unoor uwiak, a basin nja ka ats bariala. 12Maa, bi Jakob te bi u jakaa bariala aci di Ejipët, a na yël rul basin nja uyaas ucak. 13#Uju 45.1 Uju 45.16Tsi uyaas utëbantsan, a Juse tsu ban tsaar bukunk ni nul a ba yëkëranul, a Farao ruka me bañaan pëbuka Juse. 14#Uju 45.9,10,17,18 Uju 46.27Din, a Juse yël bañaan pii rui asinul Jakob, ni bayëtsul bëlieng, ban ci biki bañaan ngëntaaja paaj ni ulon, ni bañaan kañan. 15#Uju 46.1-7 Uju 49.33Jakob wela atsëp Ejipët; a ndul di na cätsëna run, nul ni basin nja buts. 16#Uju 23.3-16; 33.19; 50.7-13; Jos 24.32A ba tsëpanda Sikem, bee tsua di baar bi Abraam weelëna bi përes uncaam, tsi iñan babuk Emoor di Sikem.
17 #
Pëp 1.7,8 Bi u wokan bi uwal wi Nasien-batsi kë ro wi ko wi na watsan wi Abraam, a bañaan watsësar di Ejipët, a ba ruka pe këpe pëcum, 18aa nalon bi ci nasien Ejipët, nul meets Juse. 19#Pëp 1.10,11 Pëp 1.22Nasien namëntsi, areanaan bañaan nja a na pikaar basin nja atsu bukul pëbër babuk bukul, pa ba rits bëk. 20#Pëp 2.2Tsi uwal umënts wun, wi Moises bëka wun; na ci ñaan na waree tsi bërun Nasien-batsi. A na kusa këlí këwaants di kato asinul. 21#Pëp 2.3-10Bi na jukana bi di utsand, abuk Farao ŋaats coontsul ee kus pi abukul bërierul. 22A Moises jukana kameko bëlieng, ki bañaan Ejipët, a na ka pëyëlan tsi irimul, ni tsi ngi nuu ro ngi.
23 #
Pëp 2.11-15
Bi na band bi ngëwaanu ngëntaaja ngëbaakër, a na te tsi uwaasul na ka na roon në tsëp pii ci ni ban tsaar biki ni nul, babuk Israel. 24A nu win nalon niints kë kamana, a na yankarul ukam, na fiŋ nan ci-unk ñaan Ejipët. 25Moises aro ja ne, ban tsaar biki ni nul ka yëkërën u ci tsi nul tsi Nasien-batsi ŋal tsun pëbuëran bukul, maa bukul bë yëkëranats. 26Tsi unu ucints, a na win balon ban ci biki tsi ukam, na ŋal pëtsu pëfac tsi bukul, na ja: ‘Bayënts! Ind tsaar bukun; a we ka wun nda riabatsar tsi nda ci tsi.’ 27Maa ni kan kaman unk acintsul piemb Moises, aja: ‘Yën tsuu un pëci nawiak, ni nawat-pëleents tsi wund? 28Ane m ŋal pëfiŋin bi m fiŋ bunk ñaan Ejipët nun taakal-a?’ 29#Pëp 18.3,4A Moises te irim yan, na túk ee ruka ci natsooŋ di ucaak Madian, di na bukëna ri upäts utëb.
30 #
Pëp 3.1-10
A uu band ngëwaanu ngëntaaja ngëbaakër, a ulon uwaanju pibandar tsi bërunul di ulaalats untunda Sinai, di bametsu bërua bi ka yëk bi di bëwuul. 31A bi Moises kë win bi ko wan, na pikra tsi bëwinal bëmënts ban; a nuu kika pa pëteen uwar, na te përim Ajug, a pa ja: 32‘Nji n ci-un Nasien-batsi basinu; Nasien-batsi Abraam, Nasien-batsi Isaak, Nasien-batsi Jakob.’ Maa, Moises lal a nuu lënk, yeentsats pëteen. 33A Ajug jaul: ‘Pënani iraala tsi itsiimu, par tsëko tsi m nats tsink aci tsëko-tsëyëman. 34Unoor bañaan nji di Ejipët, ma win wul uwar, a n te irug bukul; a n welee pii buëran bukul. Inkri, bili mán yëlu Ejipët.’
35 #
Pëp 2.14
Moises namëntsi ni ba ron un bër aja: ‘Yën tsuu un pëci nawiak, ni nawat-pëleents.’ Nul ni Nasien-batsi yël un, na tsuul pëci nawiak ni nabëëran, tsi pëyëlan uwaanju un pibandar wunk tsi bërunul di bëwuul. 36#Pëp 7.3 Pëp 14.21 Ngëp 14.33Moises namëntsi, pënani un bukul di Ejipët, a nuu ro ngëko ngan pikran ngi, ni ngëpibanaani, di Ejipët, di bërëk bëjankal, ni di ulaalats, tsi ko un do wi ngëwaanu ngëntaaja ngëbaakër. 37#Ulú 18.15,18Nul Moises ja un babuk Israel: ‘Nasien-batsi ka natsani nalon nayëlia pi nji, tsi nda tsaar tsi.’ 38#Pëp 19.1—20.17; Ulú 5.1-33Bi baisrael juk bi di ulaalats, a Moises namëntsi ci-un ni basin nja ni uwaanju u ñakanaanul wunk di untunda Sinai; aciul yanki un irim ubiira pa pëwël nja yul.
39Basin nja ŋalats pëcikëndënul, maa ba bërul a ngëwaas bukul witsa Ejipët; 40#Pëp 32.1a ba ja Aaron: ‘Roor wund basien-batsi biki kan ci biki di bërun wund; par Moises nan pënani nja ink di pëboos Ejipët, ngë meets ko un parënul wi.’ 41#Pëp 32.2-6Tsi ngënu ngëmënts ngun, ba leemp ubay, a ba wël pëcap pëmënts pun bëjakan, a ba lílandër uleemp iñan bukul. 42#Amo 5.25-27Maa Nasien-batsi akikësa bukul, a na wët unk bukul tsi karëmban ngëko batsi, bi u picana bi di ulibëru bayëlia aja:
‘Kato Israel, ane nji ni m fiŋar un ngëcaam, ni ijakan bëtseend di ulaalats,
tsi ko undo wi ngëwaanu ngëntaaja ngëbaakër-a?
43A nda lap unkundan Molok,
ni upesaj nasien-batsi ind Raifan, icap yi nda leemp yi, pa puu jintëla yul.
Wul ka wun ndu duak ind,
lutan Babiloonia.’
44 #
Pëp 25.9,40 Basin nja ro tsij unkundan un piban wi Nasien-batsi ci ni bukul di ulaalats, nul na njai Moises na leemp wul na naaman ni wi na ro wunk win. 45#Jos 3.14-17Bi basin nja yank bi wul buts, a ba tsëpand wul ni Josue, pa pëyank ucaak bañaan ban cits biki Bajudeu, bukul biki Nasien-batsi ruak biki tsi këkës basin nja te tsi uwal Dawid. 46#2Sam 7.1-16; 1Bën 17.1-14A Dawid ka bëtseend tsi bërun Nasien-batsi, na ñaanul pa wëtul në leemp tsëko tsi Nasien-batsi Jacob kë ciina tsi. 47#1Bas 6.1-38; 2Bën 3.1-17Maa, aci Salomon bi leemparul kato.
48Maa, Kanpe pëci di ruets di ka ciina ito i leempëna yi ni iñan bañaan-bajin. Bi nayëlia Batsi ja bi:
49 #
Isa 66.1,2 Nasien-batsi aja: ‘Batsi aci pëtsoari nji,
a utsia ci tsëpafi iyots nji;
Kaom kato ki ndu leemparin kun,
oo tsum ci tsun tsënaakësaani nji?
50Ane cits iñan nji leemp yun ngëko ngi bëlieng-a?’
51 #
Isa 63.10
Baliinc-iyeen, batamb-ngëwaas, ni ibats in dits yi ka te! Kara bëyaas ndë natsar pëkaman Uwejats-ujënts; bi basin ind ro bi ka ro, unk buts di nda ro run. 52Naom tsi bayëlia, ni basin ind noor-nooranats un? Bë fiŋ bando biki jon ki ba leents ki u biiri Namabal, inkri nda ruka ci bayaul ufets, ni bafiŋul. 53Ind yank bukun ulua wi ngëwaanju leents wi, a nda mobats tsi përo ko wi u ja wi.”
Pëcäts Estefan
54A bu kë te ko wan, a ngëwaas bukul cokee, bu kë ñaamarul irumaj. 55Maa, Estefan cum Uwejats-ujënts, na kaŋan këkës di batsi, a na win përëmb Nasien-batsi, a Yeesu nats tsi kariir Nasien-batsi. 56A na ja: “Nda teenan-e! Man win batsi waantsar, a Abuk ñaan-najin, nats tsi kariir Nasien-batsi.”
57Maa, ba lië mak, a ba nëts ibats bukul, ba yërandul bëlieng, 58a ba gutsarul utsand përaasa, ba tapul ni ilaak. Bamaatir jukan iŋi bukul tsi itsiim ulon upaas wi ka n jaka wi Sol. 59Bi bu kë tap bi Estefan ni ilaak, a na ñaan aja: “Yeesu Ajug! Yankan uwejats nji.” 60Din, a na jintëla na lië mak aja: “Ajug! Cats tsu ujuban bukul ko.” Bi na ja bi irim yan, a na juab.
Valið núna:
NGËRO 7: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.