NGËRO 8
8
1Sol, abofëna tsi ba niiran biki Estefan pëfiŋa.
Pënoor-noorana Ngëriisia, pëcak
Tsi unu umënts wun, a pënoor-noorana pëwiak baandari Ngëriisia ngan ci ngi di Jerusalem, a bañaan bëlieng garandar pa ngëcaak Judeeya ni Samaaria, a bapostolu rin, duka bukun. 2A balon bayënts ba lënk biki Nasien-batsi mooy Estefan, a ba kaandarul mak. 3#Ngë 22.4,5; 26.9-11Maa, Sol natsara pëba ni Ngëriisia; aja na roon nu niaj di ito koo púuli bayënts ni bakaats koo guts di ukalabus.
Filip di Samaaria
4A ban gara biki tsëp ngëburu bëlieng ee ka leents rul Upetsan-uwar. 5Unk, a Filip wela përaasa Samaaria, na leents bukul uleka Këristu. 6A indënd bañaan bofëlar bëlieng, a bu kë cikëndën ngëko ngi Filip kë ja ngi, par bë te ngul, a ba win ngëpibanaani ngi na ro ngi. 7A ngëcaay ngëcumal, ngan niaj ngi bañaan, ja nga lië mak ngë pën tsi bukul; a balab bacumal ni bajënk yësana. 8A ulílan uwiak ci tsi përaasa pëmënts pun.
Simon napene
9A u ka nalon niints ni ka n jakee Simon, ni kan doi uleemp bëpene, a na pikran bañaan Samaaria, na tsu beenul pëci ñaan nawiak; 10a bañaan bëlieng kë fetsul, pëkur di upäts te di bawiak, bu kë ja: “Niintsi aci pëyëlan Nasien-batsi, pi ka n jaka pi Pëyëlan Pëwiak.” 11Bañaan kë fetsul, par aro jon ki nuu pikran ki bukul ni ngëko bëpene. 12Maa, bi ba fiaar bi Filip, nul na leentsi bukul Upetsan-uwar tsi uleka Pësien Nasien-batsi, ni uleka katim Yeesu Këristu, ba mijana, bayënts ni bakaats. 13Simon bërierul buts, afiaar a na mijana, na mob tsi pëfets Filip; a nu win ngëpibanaani ngëwiak, ni ngëko bawitsa ngan roa ngi, a na pikra.
14A bapostolu ban ci biki di Jerusalem te u jaka bañaan Samaaria niiran përim Nasien-batsi, ba yël rul Per ni Joŋ. 15Ba juŋa band rul, a ba ñaandar bukul pa ba yank Uwejats-ujënts; 16par Uwejats-ujënts netse ro welee tsi nin nalon tsi bukul, maa bë mijana rin, tsi katim Yeesu, Ajug. 17Din, a Per ni Joŋ paf bukul iñan, a ba yank Uwejats-ujënts.
18Maa bi Simon win bi bapostolu paf bañaan iñan, a ba yank Uwejats-ujënts, na wël bukul uncaam, 19na ja: “Nda wëlin buts pëyëlan pi, unk, uja ñaan ni n pafi iñan, në yank Uwejats-ujënts.”
20Maa, Per yankësul aja: “Uncaamu, u ciin ni wi pa pëniam, par m ja ne utseend Nasien-batsi ka tsënkanaana uncaam. 21M bofaatsa, te m kaats ko tsi uleemp wi, par uwaasu cits umabal tsi bërun Nasien-batsi. 22Wëtani uwejatsu wi kawaraatsa, kë ñaan Ajug, uci wi kan ci wi, kë jampësaa uwejats un ci wi di uwaasu. 23Man win uwaasu cum ngëko ngëwaayal, a m tana tsi ujuban.” 24Maa Simon yankës, a na ñaan bukul aja: “Nda ñaandërin Ajug, pa ko wi nda ja wank përits baandë-niin.”
25Bi Per ni Joŋ ba bi pëleents ko wan, ni pëñakanaan përim Ajug, ba pën pëwitsa Jerusalem, bu kë leents Upetsan-uwar di ngëntab bañaan Samaaria ngëcumal.
Filip, ni niints nan pënë-nii Etioopia
26Ulon uwaanju Ajug añakanaan Filip aja: “Natsaan kë tsëp kajara utsia-ucaak, di bëga ban pëni bi Jerusalem ajuŋa Gaasa; bul aci bi ulaalats.” 27A na natsa atsëp. A nalon niints nan kasee, nan pënë-nii Etioopia, nawiak baleemp Kandas nan ci nasien Etioopia ŋaats. Niints namëntsi aci nagaang bëka nasien; aro ya pëjintëla Nasien-batsi di Jerusalem. 28A na pëni pëwitsa ucaakul, a na tsoar di kasaretul a nuu juk ulibëru Isaaya, nayëlia. 29Din a Uwejats ja Filip: “Kíkaan kab kasaret kun.” 30A Filip kë túk, na te niints kë juk tsi ulibëru Isaaya nayëlia, na jaul: “Me uwar ko wi kë juk wi-a?” 31Na yankës aja: “Um di n yil run pëme uwar, uci ñaan pibanatsin?” A na buara Filip na paya nii tsoar ni nul.
32 #
Isa 53.7,8 A kafa ki na ro ki ka juk tsi Bëpican, ci kun ki:
“A naam pi unkaanel u tsëpanda wi pëfiŋa, pi unkaanel uties uyilats-pieents
tsi bërun namanc wul;
unk, a waabaats mtumul.
33Tsi mkawul na laaŋa ufaŋi.
Yën kee leents un bi kajërul ci bi ja?
Par, ubiiraul apënanaa tsi umundu.”
34A niints nan kasa unk ja Filip: “Man ñaanu këñaan, leentsin, uleka yën wi nayëlia kë ñakanaan wun? Ulekaul bërierul, oo uleka nalon-a?” 35Din, a Filip jej uñakan, na kur-ni tsi kafa ki niints nan kasa unk ro kunk ka kajuk, a na leentsul Upetsan-uwar tsi uleka Yeesu. 36Ba repa bëga pëtsëp, a ba band tsëlon tsëko tsan tsij tsi mlik, a niints nan kasa unk ja: “Teenan-e, mlik mi! We ka laaŋin wun pëmijana?” [ 37A Filip yankës aja: “Aniirana, uci m wak tsi uwaasu bëlieng.” A niints yankës aja: “Man wak u ci Yeesu Këristu ci-un Abuk Nasien-batsi.”] 38Din, a na tsu kasaret a ka nats. A ba wela mlik, bukul batëb, a Filip mijanul. 39Bi ba pëni bi di mlik, a Uwejats Ajug waj Filip, a niints nan kasa unk katse winul; a na cum ni ulílan, na repa bëgaul pëtsëp. 40Maa Filip ruka winaa di Asootu, a nuu leents Upetsan-uwar di iraasa i na par-na yi bëlieng, te na band Seesareeya.
Valið núna:
NGËRO 8: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.