Matthew 6
6
Sa Badang Atta Anḵasapuḻ
1Pinagatupan Jesus we nantuttudu woḵ ḵanana, “Ilanyu ta adiyu gagaḻ-on ipappaila'tta tagu we naun-unan ḵayu te nu siya ḵoonyu, ippun gungunayu ḵan Amayu'd langit.
2“Pun nu awad ibadangnu si anḵasapuḻe tagu, adim umoy ipalapalawag ḵingwame ambaḻu, isun ni ḵoon da ḵapappaila'tta sinagoga ya da ḵaḻsa. Ḵoonda da sana ta midayawanda'tta tagu. Ibagaḵ ḵan diḵayu ḵatuttuwaan, nagagangpute inawatda da gungunada. 3-4Nu awad ibadangnu'ḵ ittom si anḵasapuḻe tagu, iyaggaḵawnu we angitod ta adi maigammu taḵon ay ḵaadaniyane buḻbuḻunnu. Ḵad aḵ Ama taḵu we nangitotollong si ḵingwame mitataḻu gungunaana siḵa.”
Sa Mipanggob Atte Luwaḻu
(Luk. 11:1-4)
5Pinagatupan Jesus woḵ ḵanana, “Ḵad nu alluwaḻu ḵayu, adi ḵayu oḵyan miyisu'tta ḵapappaila te pipiondae sumisiḵade alluwaḻu'tta sinagoga ya da ḵaḻsa ta ilan da tagu dida. Ibagaḵ ḵan diḵayu ḵatuttuwaan, nagagangpute inawatda da gungunada. 6Yaḵon nu alluwaḻu ḵayu, lumnoḵ ḵayu si kuwartuyu ya iyyonobyu sawang ḵad alluwaḻu ḵayu ḵan Ama we adipun maila. Ḵad ḵan siyae angitotollong si milammonge ḵoonyu, gungunaana diḵayu.
7“Nu alluwaḻu ḵayu, adiyu paanduanduwon atta ugude ippun aḵit aḵ bogasnae isun ni ḵoḵoḵḵon da adipun angigammu ḵan Apudyus. Ḵanandapun nu dongngon Apudyus dida te adipun mangpus luwaḻuda. 8Adi ḵayu miḵama ḵan dida te iniiggammun Apudyus ḵasapuḻanyu si daanyu ḵodawon. 9Ḵaḵna inonyu we alluwaḻu.
“ ‘Amani ye awad ad langit,
madayawḵa oḵyane nasantuwane Apudyus.
10Dumatong oḵyan ampangatam sina'd luta,
ta mituttuwa da piniom sina'd lutae ḵama'd langit.
11Ittom ud maḵane ḵasapuḻanni si inaḻgaw.
12Ḵad pakawanom da basuḻni
te pinakawanni bos da naḵabasuḻ ḵan diḵani.
13Ḵad adim iyunude masulisug ḵani,
yaḵon iligsim diḵani si lawweng.’ ”#6:13 Sa osae piona ugudon atte Greek iligsin diḵani ḵan Satan.
14Pun ḵanan Jesus, “Nu pakawanonyu da naḵabasuḻ ḵan diḵayu, pakawanon os diḵayu ḵan Amayu'd langit. 15Yaḵon nu adiyu pakawanon da naḵabasuḻ ḵan diḵayu, adimpun os Amayu'd langit pakawanon da basuḻyu.”
Sa Mipanggob Atte Allaunan
16Pun pinagatupan Jesus woḵ ḵanana, “Ḵad nu allaun ḵayu, adiyu ipailae andadauy ḵayu we isun da ḵapappaila. Te ipailadae andadauyda ta ipailada'tta tagu we nallaunda. Ibagaḵ ḵan diḵayu ḵatuttuwaan, nagagangpute inawatda gungunada. 17Yaḵon nu allaun ḵayu, andaḻ-up ḵayu ya lanaanyu da buuḵyu ya nanagaysay ḵayu 18ta ippun angigammu we allaun ḵayu, abus aḵ Amayu we adipun maila. Te siyae angitotollong si milammonge ḵoonyu, gungunaana diḵayu.”
Sa Ḵinabaḵnang Ad Langit
(Luk. 12:33-34)
19Pinagatupan Jesus woḵ ḵanana, “Adiḵa anonson aḵ binaḵnangnu si annae luta te allasu we dadailon da laḵoy ya sa lati,#6:19 Sa ugude “allati” atte Greek adu mausarana. Sa piona ḵanan, ngaimane ḵanon ḵan dadailon da lati, da utut, da layaḵ-an ya da bubuḵ. ḵad lonḵon os da aḵḵawan ya innaḻada dida. 20Yaḵon sa ḵoonyu oḵyan, ḵoonyu mas-oman Apudyus ya gapu'tte sana anonson ḵayu'ḵ gungunayu we maḻpu ḵan Apudyus ad langite naippun laḵoy ḵan lati'ḵ anadail ya naippun maḵaḻnoḵ aḵ umoy an-aḵaw. 21Te sa igaw da binaḵnangyu, sadi bos igaw ni somsomoḵyu.”
Sa Mipanggob Atte Silaw Ni Long-ag
(Luk. 11:34-36)
22Pinagatupan Jesus woḵ ḵanana, “Sa ata silaw ni long-ag. Nu ambaḻu da atam, ampadda losane long-agnu. 23Yaḵon nu lawweng da atam, anggiḵbot losane long-agnu. Ḵad nu giḵbot awad ḵan siḵae padda oḵyan, ummamdan giḵbotna!”
Sa Anserbi Atta Duwae Apu
(Luk. 16:13; 12:22-31)
24Pinagatupan Jesus woḵ ḵanana, “Adipun maḵwa'tte sammilu anserbi'tta duwae apu te aaddi ye ay-ayatona osa ya an-awidana osa. Ḵad ipapatinae anserbi si osa ya am-amsewona osa. Ḵad nu ḵatti, adipun maḵwae tuttuwae anserbiḵa ḵan Apudyus nu siya igaw ni somsomoḵnu gamgamam adu we binaḵnang.”
Sa Mipanggob Si Bimbinsaw
25Pinagatupan Jesus woḵ ḵanana, “Pun sa ibagaḵ ḵan diḵayu, adi ḵayu ambinsaw mipanggob atta biyagyu, da ḵanonyu, baḵon nu da inumonyu, baḵon nu sa mipanggob atta long-agyu ya da ansilupyu. Te napatpatog biyagyu nu sa maḵan ya napatpatog da long-agyu nu da silup. 26Ilanyu ḵad da sissiwite antattayap: Adidapun ammuḻa baḵon nu an-ani ḵan amompon aḵ maḵan atta aḻang yaḵon paḵanan Amayu'd langit dida. Maguḻa ḵayu mane napatpatog nu da sissiwit! 27Sa osa bos, lamogyu ḵamman paanduwon biyagyu'ḵ sin-orasan gapu'tte binimbinsawyu?
28“Ngaipa ḵayu ambinsaw mipanggob atta ansilupyu? Ilanyu ḵad inon da tabbaḵe dumaḵoḻ atta pappayaw, adidapun anḵewaaḻ ya an-aboḻ. 29Yaḵon ibagaḵ ḵan diḵayu, taḵon ay aḵ Ari Solomon we ḵabaḵnangan,#6:29 1 Kings 10:4-7; 2 Chronicles 9:3-6. naippun silupna'ḵ nabaḻbaḻu nu sa osa'tta annae tabbaḵ. 30Pun nu ḵaḵnat itton Apudyus we binaḻun da lumune matagu sinsadi ya appigat miballuda si apuy, aaddi ye ittona bos da silupe ḵasapuḻanyu. Diḵayu ḵad, ngaipa aḵit pammatiyu? 31Pun adi ḵayu ambinsawe ḵananyu, ‘Dinu maḻpuwan ni ḵanoḵ baḵon nu inumoḵ baḵon nu ansilupḵu?’ 32Te ḵaḵnat singsington da losane tagu we adipun angigammu ḵan Apudyus. Yaḵon ḵan diḵayu, iniiggammun Amayu'd langit da ḵasapuḻanyu. 33Yaḵon umunae ipatpatogyu ampangatan Apudyus ya unudonyu maun-unane antatagu we piniona woḵ ittona da ḵasapuḻanyu. 34Pun adi ḵayu bos ambinsaw atta ampaḵaḻamane dumatong appigat. Te sa umali ye aḻgaw, awad de ḵuwanae binimbinsaw. Sa binimbinsaw atte osae aḻgaw lamog ni sanate aḻgaw, pun adi taḵu amo dog-an.”
Valið núna:
Matthew 6: kml
Áherslumerki
Deildu
Afrita
Want to have your highlights saved across all your devices? Sign up or sign in
© 2019 Translators Association of the Philippines (TAP), All rights reserved.