Matthew 15
15
Sa Tinawid Da Judyu Atta Danaḵḵoḻda
(Mrk. 7:1-13)
1Sin-aḻgawan ḵad, ummoy da Pharisee ya da mimistulun ni lintoge naḻpu'd Jerusalem ḵan Jesus woḵ ḵananda, 2“Ngaipan da disipulum lisalison ugali ye tinawid taḵu'tta danaḵḵoḻ taḵu? Anganda ya adidapun unudon ustu we inondae ambuḻu.”
3Ḵanan Jesus we summongbat, “Diḵayu ḵad, an-awidanyu bilin Apudyus ta siya unudonyu ugaliyu. 4Te sa imbilin Apudyus ḵanana, ‘Dayawom da amam ḵan inam,’ ya ‘Ngaimane an-ugud aḵ lawweng atta amana ḵan inana, aaddi ye magongat.’#15:4 Exodus 20:12; 21:17; Deuteronomy 5:16; Leviticus 20:9. 5Yaḵon sa ituttuduyu sabali. Te ituttuduyu we miyunud nu adipun tagu bumadang atta amana ḵan inana, nu ittona badangna ḵan Apudyus. Iyunudyu we ḵanana'tta amana ḵan inana, ‘Sa ittoḵ oḵyan ḵan diḵayu, inkariḵe idatun ḵan Apudyus.’ 6Ḵatti ḵamman inonyu we angipatog atta amayu ḵan inayu? An-awidanyu Ugud Apudyus ta siya unudonyu ugalin da danaḵḵoḻyu. 7Ḵapappaila ḵayu! Tuttuwa pagay impadtun Profeta Isaiah si mipanggob ḵan diḵayu we ḵanana,
8“ ‘Da annae tagu, dayawonda saḵon si sungadda,
yaḵon adayu somsomoḵda ḵan saḵon.
9Ippun paat daḻat ni andayawanda ḵan saḵon
te sa ituttududa abus da ugali ye ḵingwan da tagu
ḵad ibagadae bilinḵu.’ ”#15:9 Isaiah 29:13.
Sa Angaissaw Atte Tagu
(Mrk. 7:14-23)
10Pune sadi, inayagan Jesus da tagu woḵ ḵanana, “Andongoḻ ḵayu ta maawatanyu. 11Sa mibelang aḵ angaissaw atte tagu si antotollong Apudyus, daḵampun atte lumnoḵ si sungadna yaḵon sa tumoḵwaḻ atte sungadna.”
12Pun ummadani da disipuluna ḵan siya woḵ ḵananda, “Adimpun ḵamman igammu we sumanga da Pharisee si dingngoḻda imbagam?”
13Ḵanan Jesus we nangipani, “Sa umali ye aḻgaw, da losane muḻae daḵampun aḵ immuḻan Amaḵ we awad ad langit, mabagutda. 14Sinnamaḻ da Pharisee te isudan naḵuḻape ipuyutda asinḵuḻapda. Ḵad nu ipuyut ni naḵuḻap asinḵuḻapna, aaddi ye maottagda losan si abut.”
15Ḵanan Peter, “Ngai pion ni sadi ye impanim ḵanan mipanggob atte inon ni tagu we mibelang aḵ ḵaissaw atte antotollong Apudyus?”
16Ḵanan Jesus, “Inggana sinsadi taḵon ay diḵayu, daanyupun os maawatan da ituttuduḵ? 17Adiyupun ḵamman igammu we da lumnoḵ si sungad ni tagu, umoy atte buwangna ya miyattay? 18Yaḵon sa tumoḵwaḻ si sungadna, maḻpu'tte pusuna ya siya mibelang aḵ angaissaw ḵan siya si antotollong Apudyus. 19Te sa somsomoḵ, siya maḻpuwan ni losane somsomḵon ni tagu we isun da sana; adaḻugona daḵampun aḵ asawana, an-aḵaw, pumatoy, maḵadagdagas, taḵdoḻana da tinutuli ya an-ugud aḵ lawweng atta asintataguna. 20Sana da mibelang aḵ angaissaw atte tagu si antotollong Apudyus. Yaḵon sa tagu we angane adipun ambuḻu, daḵampun aḵ sanat da mibelange angaissaw ḵan siya si antotollong Apudyus.”
Sa Pammatin Ni Bubai Ye Gentil
(Mrk. 7:24-30)
21Pun tinenan da Jesus sidi woḵ ummoyda'tta ili ye saḵubna'd Tyre ḵan Sidon. 22Inninggaw bubai ye iCanaan we Gentil we naḵaumili. Ummadani ḵan Jesus woḵ isassaudna ḵanane nampoḵaw, “Apu, we ganaḵ Ari David, ḵadaguwanaḵ ḵappos! Awad de abengḵu we babaḻasange naaḻanan. Ḵad awade amod de saḵitna.”
23Aḵ Jesus ḵad, gummiginnoḵe adinapun songbatan bubai. Pun ummadani da disipuluna ḵan siya woḵ ḵananda, “Paḻyawom ḵappos ta umoyon ḵan agaynae mituntun-ude ampoḵapoḵaw.”
24Ḵanan Jesus, “Abuse nibuunaḵ ta iyyaḵ bumadang atta ganaḵ Israel we da ummadayu ḵan Apudyus we isun di nataḻaḵe karnero.”
25Yaḵon sa sadi ye bubai, amo ummoy nanalluḵu si sinagung Jesus woḵ ḵanana, “Apu, ḵadaguwanaḵ ḵappos ta badanganaḵ.”
26Ḵanan Jesus we nangipani, “Daḵampun aḵ ambaḻu nu ipaḵanta ḵanon ni abeng atte asu.”
27Ḵanan ni bubai, “On Apu, yaḵon taḵon ay da asu ḵanonda da dadaḵon ni apuda nu anganda.”
28Ḵanan Jesus, “Bubai, ampigsa pammatim! Ḵad gapu'tte sadi, maatod de ḵindawnu.” Pun sa nangibag-ana, daguse lummawa aḻan si abengnae babaḻasang.
Sa Nangaanan Jesus Atta Saḵit
29Pune sadi, tinenan Jesus sidi woḵ ummoy si taḻantag ni Baybay ad Galilee. Pun summang-at atte beleg woḵ ummillong. 30Pun amod da tagu we nan-idatong atta napilay, da naḵuḻap, da naumoḻ, da nabaḵawog da imada ya da adu we nasaḵit. Pun ḵinaanna da losane saḵitda. 31Ḵatti ḵad naḵwa, sintataag da tagu we nangila'tta naumoḻe an-ugud, da nabaḵawoge nipaḻ-og da imada, da napilaye nanaddaḻan ya da naḵuḻape maḵaila. Pun indaydayaw da ganaḵ Israel aḵ Apudyus.
Sa Namaḵanan Jesus Atta Opatlibu
(Mrk. 8:1-10)
32Pun inayagan Jesus da disipuluna woḵ ḵanana, “Madaguwaḵ atta annae tagu te inniinggawda ḵan saḵon aḵ tuḻun aḻgaw pun annate ippun ogon ḵanonda. Adiḵpun pion paoyonon didae mauuḻat te angunawada ḵad os ay si daḻan.”
33Ḵanan da disipulunae nangimus ḵan siya, “On, yaḵon dinu ḵad ain angaḻ-an taḵu'tte adu we maḵan aḵ ipaḵan taḵu'tta ummamdane tagu si annae bumbummaaw?”
34Ḵanan Jesus, “Piga awade tinapay ḵan diḵayu?”
Ḵanandae summongbat, “Pitun baḻase tinapay ya sa aḵit ose ugadiw.”
35Pun binilin Jesus da tagu ta tumuḵduda si luta. 36Innaḻana pitu we tinapay ya da ugadiw woḵ nanggappiya ḵan Apudyus. Naabus ḵad, binisbisaḵna dida woḵ innatodna'tta disipuluna ta iwaḻasda'tta amode tagu. 37Losanda nangan pun nassugda. Dinagup ḵad da disipuluna da bunada, napnu pitu we danaḵḵoḻe aḵḵubaw. 38Sa iyap da nanḵaḵaḵane laḻaḵi opatlibu, adipun niyiyap da bubai ya da abeng.
39Naabus ḵad, pinaḻyaw Jesus da tagu woḵ naḵabangka'tta disipulunae ummoy atte saḵubna'd Magadan.
Valið núna:
Matthew 15: kml
Áherslumerki
Deildu
Afrita
Want to have your highlights saved across all your devices? Sign up or sign in
© 2019 Translators Association of the Philippines (TAP), All rights reserved.