Matthew 14
14
Sa Natoyan John We Ambobonyag
(Mrk. 6:14-29; Luk. 9:7-9)
1Sa sadi ye timpu, dingngoḻ Herod#14:1 Sa annae Herod, Herod Antipas we abeng Herod we Ari si ḵaban-og Jesus. Sa ustu we awagna tetrarco, yaḵon isun ni gobernor saadna. we gobernor atte probinsiya'd Galilee mipanggob atta ḵingwan Jesus, 2ḵanana'tta sammiluna, “Sa annae Jesus, siya'ḵ John we Ambobonyag we ummuli. Siya gapunae annat ḵabooḻanae angwa'tta nakaskasdaaw.”
3-4Imbagan Herod ḵaḵna gapu'tte ḵingwana si awe. Siya nampadoḵma ḵan John woḵ impaibaḻudna te sinuppaḵan John we adimpun ni lintog iyunude asaw-ona'ḵ Herodias we asawan ni sunudnae aḵ Philip. 5Taḵon ay nu pion Herod pagongat, umogyat atta adu we tagu te ibelangda'ḵ John we profeta.
6Dummatong ḵad aḻgawe niyanaḵan Herod, inayagana da tagu ta maḵagangganasda. Inninggaw babaḻasange abeng Herodias. Pun nansala si sinagung da losan. Nas-om aḵ Herod 7woḵ gapu'tte sana ḵanana, “Isapataḵe ittoḵ ngaimane ḵodawom ḵan saḵon!”
8Gapu'tte intuttudun inanae ḵodawona, ḵanana ḵan Herod, “Pioḵe ittom ḵan saḵon sinsadi uḻun John we Ambobonyag we maigga'tte duḻan.”
9Ansigab si somsomoḵ ni ari yaḵon gapu ta insapatana'tte sinagung da adu we naayagan, mabaine adi angituttuwa. Pun imbilinnae maatod ḵodawona 10woḵ nambuun aḵ ummoy namungtuḻ si uḻun John atte babaḻḻudan. 11Pun indatongda uḻun John we inniggada'tte duḻan woḵ innatodda'tte babaḻasang ta umoyna itton ḵan inana. 12Dingngoḻ ḵad da disipulun John, ummoyda innaḻa ladagna ta umoyda ilibon. Pun ummoyda imbaga ḵan Jesus naḵwa.
Sa Namaḵanan Jesus Atta Lummabos Aḵ Limallibu
(Mrk. 6:30-44; Luk. 9:10-17; Jhn. 6:1-15)
13Dingngoḻ ḵad da Jesus naḵwa ḵan John, nambangkada woḵ ummoyonda'tte bumbummaaw ta umabusda oḵyan. Yaḵon inigammun ḵad da amoamode tagu we ummoyonda, nallibbatda woḵ nanadtaddaḻandae naḻpu'tta nansabasabali ye ili ta mibuḻunda ḵan dida. 14Dummatong ḵad da Jesus atte taḻantag ni baybay, lummogsadda'tte bangka. Innilana ḵad da amode tagu, ḵummadagu ḵan dida woḵ ḵinaanna da saḵit da nasaḵit.
15Anna ḵade mumasdom, ummoy da disipuluna ḵan siya woḵ ḵananda, “Naabus ay mummasdom ya anna taḵu si bumbummaaw. Ibagam ḵappos atta tagu ta umoyda ngumina'ḵ maḵan atta adani ye ili.”
16Ḵanan Jesus, “Daḵampun aḵ ḵasapuḻane umoyda. Diḵayu amaḵan ḵan dida.”
17Ḵananda ḵan siya, “Abuse limae tinapay ḵan duwae nidawise ugadiw anna ḵan diḵani.”
18Ḵanan Jesus, “Idatongyu dida ḵan saḵon.” 19Pun binilinna da tagu ta tumuḵduda si lullumun woḵ innaḻana limae tinapay ya sa duwae ugadiw woḵ nantangad ad langite nanggappiya ḵan Apudyus. Pun binisbisaḵna tinapay ya da ugadiw woḵ innatodna'tta disipuluna ta iwaḻasda. 20Pun nanganda losan woḵ nassugda. Nagangputda ḵad, dinagup da apostol da nabun-an. Pun napnu nasawaḻan aḵ duwae aḵḵubaw. 21Da nangan, umoye limallibu da laḻaḵi, adipun niyiyap da bubai ya da abeng.
Sa Nanaddaḻanan Jesus Atte Labaw Ni Danum
(Mrk. 6:45-52; Jhn. 6:16-21)
22Nagangput ḵade pinaḵanan Jesus da tagu, nambangkaona da disipuluna ta umunada dumoḻmang ad domang. Pun pinaḻyawna da adu we tagu'tta ilida. 23Ummoyon ḵad da tagu, nanagada'ḵ Jesus atte beleg ta umoy alluwaḻu we abus. Lummabi ḵad, sissiya'ḵ Jesus atte beleg, 24ya da disipulunae nambangka, adayuda si taḻantag ni baybay. Baag-en bummali woḵ amod de tupiyaḵe tupatupaḵana bangkada te niyabot ḵan dida ampigsae bibbid. 25Madam-an taḻun ḵad, nan-osog aḵ Jesus woḵ nanaddaḻan si labaw ni danum pun ummadani ḵan dida. 26Innilan ḵad da disipulunae anadtaddaḻan si labaw ni danum, simboboggada si ḵimutda te ḵanandapun nu lagayan.
27Pun daguse gumminga'ḵ Jesus woḵ ḵanana, “Tumuḻod ḵayu! Adi ḵayu maḵimut! Saḵon aḵ Jesus!”
28Ḵanan Peter, “Apu, nu tuttuwae siḵa, ayaganaḵ ta umaliyaḵ si sanat anaddaḻan si labaw ni danum.”
29Ḵanan Jesus, “Awwaynu.” Dingngoḻ ḵad ay Peter, lummogsad si bangka woḵ insaḻadnae nanaddaḻane ummoy ḵan Jesus. 30Yaḵon giniḵnana ḵade amod de pigsan ni bibbid, naḵimtan woḵ insaḻadnae milisob. Pun daguse nampoḵaw woḵ ḵanana, “Apu, taguwonaḵ!”
31Pun daguse indawawan Jesus imana ḵan Peter woḵ doḵmaana. Ḵanana, “Aḵit pammatim! Ngaipaḵa anduwaduwa?”
32Unipun, summaḵayda ḵad atte bangka, daguse naḵaginoḵ ampigsae bibbid. 33Pun awad ay osa ḵan didae inninggaw si bangka nandayaw ḵan siya, ḵananda, “Tuttuwae siḵa Abeng Apudyus.”
Sa Nangaanan Jesus Atta Saḵit
(Mrk. 6:53-56)
34Dummoḻmangda ḵad, dummatongda si ili'd Gennesaret. 35Immatunan da tagu'ḵ Jesus. Pun nambuunda'ḵ ummoy nangibaga'tta tagu'tta nampaliḵwose ili ta an-idatongda'tta losane nasaḵit ḵan Jesus. 36Nandagdaguda ta taḵon ay oḵyan nu abuse tokkon da nasaḵit gayadan ni silupna. Pun losan atta nandoḵ, naḵaan da saḵitda.
Valið núna:
Matthew 14: kml
Áherslumerki
Deildu
Afrita
Want to have your highlights saved across all your devices? Sign up or sign in
© 2019 Translators Association of the Philippines (TAP), All rights reserved.