Luka 4
4
Ukugelịgwa kwa Jesụ
(Mat. 4:1-11; Mali. 1:12-13)
1Lelo bo Jesụ ị̄swile Mbepo Mwịkemo, alinkugomoka ukufụma ku lwisi Jolịtanị, alinkulōngosịgwa na Mbepo. 2Mmasịku amalōngo mana mmatēngele, alinkugelịgwa na Setano. Mmasịku gōsa galagala akālilemo nafịmo; lelo bo gakīndịle, jilinkwenda nukunkola īnjala. 3Setano alinkujoba nagwe alinkuti: Linga uli Mwana gwa Kyala lilagile ilị̄bwe ili ukuti lị̄pele fị̄ndu. 4Jesụ alimmwamịle ātịle: Sịsị̄mbị̄gwe isya kuti: Umụ̄ndu fịtịkumpa ubūmị fịfị̄ndu fyene. 5Po Setano alinkummwega alinkufyuka nagwe pakyamba alinkunnāngisya ifịtangālala fya nkị̄su fyosa nakalīnga ịtolo, 6alinkummbūla alinkuti: Āngukupaga ubulagilị bōsa ubu nubusịsya bwake; namanga une mbēgị̄gwe, po nngumpa gwesa uju nịganịle. 7Linga ugwe kwịpụ̄ta kumyangu, āngukupaga fyosa. 8Jesụ ālimmwamwịle ātịle: Lisị̄mbị̄gwe ilyakuti: Gwịpụ̄tege ku NTWA gwako Kyala, jo ummbōmbelege mwene po papo. 9Alinkubūka nagwe ku Jelụsalemụ, alinkwakummbīka pakisōnge kya nyụ̄mba īnyị̄kemo alinkummbūla alinkuti: Linga uli mwana gwa Kyala, po nyēla ukufụma papapa ukagwe pāsi; 10buno lisị̄mbị̄gwe ili likuti: Ịsakukulagililaga abāndumị bakukutị̄ma ugwe. 11Bo bịsakukupīmbaga ugwe mmaboko gābo ukuti ikilūndi kyako kingị̄komaga pị̄bwe. 12Jesụ ālimmwamwịle ātịle: Sịjobị̄gwe isya kuti: Unnganngelaga UNTWA Kyala gwako. 13Lelo bo Setano amalịle īngelo syake syosa, alinkunsōkelapo, alinkugụ̄lila akabalilo akāngi.
Jesụ ịkwanda īmbōmbo jake mụ Galịlaị
(Mat. 4:12-17; Mali. 1:14-15)
14Po papo, mmaka ga Mbepo, Jesụ alinkusụmụka ukubūka mụ Galịlaị, po papo īnōngwa syake sịlinkufụmụka nkị̄su kyosa. 15Alinkumanyịsya nnyụ̄mba syabo syakwịpụ̄tilamo, balinkuntụ̄fya abāndu bōsa.
Jesụ ịkukānịgwa mụ Nasaletị
(Mat. 13:53-58; Mali. 6:1-6)
16Po papo alinkubūka mụ Nasaletị mụno ākulị̄le; alinkubūka nnyụ̄mba jakwịpụ̄tilamo, bo mụno ulwịho lwake lwajīlị̄le, pị̄sịku lya sabāti. Alinkusụmụka pakubala; 17āpēgị̄gwe ukubala kalata gwa nkụngụlụka Jesaja. Alinkubālula kalata alinkupāga apa lisị̄mbị̄gwe ili likuti:
18Mbepo gwa NTWA ali pamyangu,
namanga āmbakịle īnyēmba ukuti ndūmbililege
īnōngwa īnụnụ ku balōndo,
āndumịle kukubafụmụkisya ukwabuligwa
abapịnyịgwa, nukwịguka kwa māso gā bafwamāso,
nukubābula aba bịkuboneligwa.
19Ukufụmụsya ukuti akabalilo kafịkịle akakubapokela abāndu bāke UNTWA.
20Po papo alinkwenda nukwịgala kalata, alinkumpa ummbōmbị, abāndu balinkunndūlalila jūjo. 21Alinkwanda ukujoba nabo alinkuti: Umụsyugu ilịsyu lya Kyala ili lịsịle bo mụmo lyasị̄mbilị̄gwe bo mụkupilika. 22Lelo bōsa balinkunjoba kanụnụ, balinkugaswịga amasyu amatēngamōjo aga gāsōkaga nkanwa mmyake; balinkujoba balinkuti: Akaja jo nnya Josefụ uju? 23Umwene alinkubabūla alinkuti: Kisịta kwịlāmwa mụkūngumbusyaga ubujobị bwa mbupīngamụ ubu bukuti: Gwe nnganga ulị̄gangulaga gwịmwene; syosa isị tupilị̄ke ukuti usịbōmbịle mụ Kapelịnaumụ syo ulībōmbaga sị̄syo na mụno mụno nkị̄su iki gwapāpilị̄gwemo. 24Alinkubabūla alinkuti: Nalolị nịkubabūla umwe nịkuti: Akajako najumo unkụ̄ngụlụka uju ịkuganịgwa mmyabo mụno akulị̄le. 25Lolị ukujobela mbwanalolị ngubabūla ukuti bālimo abakị̄kulu abafwīle bị̄ngị mwa Ịsịlaelị nkabalilo ka Elịja, bo kumwanya kūmịle ifyinja fịtatu ni myesị ntandatu, apa jigwege īnjala īngulūmba nkị̄su kyosa; 26kuli balabala akāliko najumo uju Elịja ātumị̄gweko, lolị kwene kunkị̄kulu umfwile gwa mụ Salepatị, nkị̄su kya Sịtonị. 27Nkabalilo kankụngụluka Elịsa bālimo abā mbūngo ja bukoma bị̄ngị mwa Ịsịlaelị; kangi akābūmbulusị̄gwemo najumo, mwene ju Naamanị Unsịlịja.
28Bo bapilị̄ke sịsịsị, bōsa aba bāli nnyụ̄mba ja kwịpụ̄tilamo balinkukalala fị̄jo. 29Balinkunsụmụkila balinkunsōsyamo nkāja balinkubūka nagwe pamwanya pakyamba apa kājēngị̄gwe akāja kābo, ukuti bammbụngụlụkisye ndupānga. 30Lolị umwene alinkwenda pakāti pamyabo ukukīnda alinkubūka.
Umụ̄ndu gwa mbepo īnyalị
(Mali. 1:21-28)
31Po papo alinkwikilila ukubuka mụkapelịnaumụ, akāja ka mụ Galịlaị. Alinkubamanyịsya pa Sabāti; 32īmanyịsyo syake balinkusị̄swiga, namanga ābonekaga ukuja jo mwenenalyo ilịsyu jūjo. 33Lelo nnyụ̄mba ja kwịpụ̄tilamo ālimo umụ̄ndu uju īmbepo īnyalị syalinkụlị̄le; jo alinkukụ̄ta fị̄jo, 34alinkuti: Tuleke! Tuli bukị nanụngwe gwe Jesụ gwe Nnasaletị? Gwịsịle kukutupyụta? Ngumēnye, ugwe gwe Mwịkemo gwa Kyala. 35Lolị Jesụ alinkunkemela alinkuti: Batama, sōkamo mmyake! Lelo bo m̄bepo īnyalị jinngwisịsye pāsi pakāti pakilūndilo, m̄bepo īnyalị jilinkusōka mmyake kisịta kunndemasya napamo. 36Po papo bōsa balinkuswịga, balinkulālūsanịa balinkuti: Fị̄ndu fịkị fịlịmo mmasyu ga mụ̄ndu uju? Ịkusịlagila m̄bepo īnyalị mbulāmbikị na maka, sịkusōka. 37Po papo īnōngwa sịsịsị sịlinkubalanịla sịlinkufụmụka nkị̄su kyosa.
Jesụ ịkubabūmbulusya abāndu bị̄ngị
(Mat. 8:14-17; Mali. 1:29-34)
38Po papo alinkusụmụka alinkusōka nnyụ̄mba ja kwịpụ̄tilamo, alinkwakwịngila nnyụ̄mba ja Sịmonị. Lelo unko gwa Sịmonị unkị̄kulu āli mmbịne, āli ni sekema (akakịnya) ingali, balinkunsūmila ubutūlị kumyake. 39Po papo alinkwakwima ku kitala kyake, alinkujikemela īsekema jilinkwenda nukunndeka; nakalīnga ịtolo alinkusụmụka alinkubabōmbela.
40Lelo bo ilị̄suba lijōngịle bōsa aba bāli na bakamụ bābo aba bābịnaga īmbūngo sya luko nuluko, balinkubatwala kwa Jesụ; alinkummbīkapo amaboko gāke kukuti mmbịne, alinkubabūmbulusya bōsa. 41Syope ni mbepo īnyalị sịlinkusōkamo mmbāndu bị̄ngị, sịlinkukụ̄ta bo sịkusōka sịlinkuti: Ugwe gwe Mwana gwa Kyala! Umwene alinkusịkemela alinkusịkānịsya ukujoba sịmo papo syalimmēnye ukuti āli jo Kilisịtị.
Jesụ ịkulūmbilila nnyụ̄mba sya kwịpụ̄tilamo
(Mali. 1:35-39)
42Lelo bo kụkujēnjeluka Jesụ alinkusōkamo nkāja alinkubūka ndukubo: Abāndu balinkunndōnda, lelo bo bammwāgịle, balinkulōnda ukunngomola ukuti angasokāngamo mmyabo; 43lolị ābabūlịle ātịle: Kumbagị̄le une ukufụmụsya īnōngwa īnụnụ sya kitāngālala kya Kyala na ntwaja utūngi tope; namanga syo isị nātumị̄gwe nkubōmba. 44Po papo alinkulūmbilila nnyụ̄mba sya kwịpụ̄tilamo sya mụ Jụtaị.
Valið núna:
Luka 4: NYB96
Áherslumerki
Deildu
Afrita
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.