Luka 3
3
Ukulūmbilila kwa Johanị Umōsị
(Mat. 3:1-12; Mali. 1:1-8; Joh. 1:19-28)
1Nkyinja kya kalōngo na fịhāno mbulagilị bwa Kesalị uju āli jo Tịbelịja īngamụ bo Pontị Pịlāti nndindililakị̄su mwa Jụ̄ta, bo Helotị Malafyale nkulūmba gwa mụ Galịlaị, nugwamyabo Fịlịpụ bo Malafyale nkulụmba gwa mụ Ịtulịja na mụ Talakonịtị, Lịsanị bo Malafyale nkulūmba gwa mụ Abịlene, 2nkabalilo aka Anasị na Kajafa bajege bapụ̄tị bakulūmba, ilịsyu lya Kyala lilinkummwịsila Johanị umwana gwa Sakalịja mmatengele; 3po papo alinkubūka mōsa nkị̄su iki kipalamēne nulwisi Jolịtanị alinkulūmbilila alinkuti: Amụpīndukege mōsịgwege, po Kyala ịkubaswaga īnōngwa syinụ. 4Bo apa lisị̄mbị̄gwe mwa kalata gwa masyu ga Jesaja unkụ̄ngụlụka ili lịkuti: Ilịsyu lya mụ̄ndu jumo lịkukōlela nndukubo lịkuti: Amụnngolokesyege utujila twake.
5Kukuti lusōko lusyilịgwege,
kukuti kyamba kitelamịkịgwege.
Injila īnịongafụ sịgolosịgwege,
utujila twa fịgịma tugwasịgwege;
6abāndu bōsa bịsakububonaga ubupokị bwa Kyala.
7Po papo lelo alinkujoba na bāndu ifịlūndilo fịfịngị aba bālisịle kukōsịgwa kumyake alinkuti: Mwe luko lwa njoka umwe! Jwanị abasokịle umwe ukusịbopa īngalalisị isị sịkwịsaga? 8Amụpege īseke isị sịbagisēnịe nulupīnduko, Mụngịjobaga ukuti: Tuli na Tāta Abụlahamụ, Kyala amēnye ukumpelela Abụlahamụ abāna ukufụma mmabwe aga. 9Īndwanga ja kutụmụlila imịpịkị jijilị̄lepo ngānị pāsi pa mịsị, umpịkị gōsa ugu gutịkupa īseke īnụnụ gụkutụmụlịgwaga nukusopịgwa mmōto.
10Abāndu balinkunndālūsya balinkuti: Po tubōmbe fịkị lelo? 11Ābāmwịle ạ̄tile: Uju linga ali na makotị mabili, ajabanage nagwe uju akāja nalyo nalịmo; uju ali nifị̄ndu, jope abōmbēge bo bunobuno. 12Abasōngesya sōngo bope balinkwịsa kukōsịgwa, balinkulālūsya balinkuti: Mmanyịsị kali po tubōmbe fịkị lelo? 13Alinkubāmụla alinkuti: Ukusāngula ifya sōngo komma ukukikisyapo pali ifị mụlagilị̄gwe. 14Abasịkali bope balinkunndālūsya balinkuti: Uswe twe tubōmbēge sịliku? Alinkubāmụla alinkuti: Umụ̄ndu najumo utūndu twake mụngapokaga kumaka, pamo ukwegela mbusyobị, mụfwanege nafyo fịfyo mụkupēgwa ukuja mfwalo.
15Kunōngwa jakuti abāndu bāli ndugụ̄lilo, balinkulwa nasyo mụndụmbụla syabo isya Johanị ukuti pamo āli jo Kilisịtị. 16Johanị alinkubāmụla bōsa alinkuti: Une nịkubōkesya na ga mị̄si gēne, lolị ịkwịsaga unkulūmba fị̄jo kumyangu, uju ngabagila nukufụndula utukoba twa mfịlato fyake; jo ịsakubōkesyaga na Mbepo Mwịkemo numōto. 17Jo ali nuluselo lwa kululukisya, bo apūlịle īnganụ pakipalo iki apyagị̄le, īnganụ ịkubūngānịkisya nkitūba kyake; lolị unkupili ịkugukosya mmōto unsịtakusịma sịku.
18Johanị alinkulūmbilila īnōngwa īnụnụ kubāndu mụnjila sịnyịngị, alinkubasụkānịa ukuti bapīndukege. 19Lolị Johanị ālinndōngịle Helotị, umalafyale, kunōngwa ja kummwega ukuja nkasị Helotịja Unkasị gwa gwamyabo (Fịlịpụ) na kumbị̄bị isị̄ngị isị ābōmbịle Helotị. 20Po lelo Helotị alinkōngelapo ukubōmba īmbị̄bị, alinkumpịnya Johanị mụnnyololo.
Ukōsịgwa kwa Jesụ
(Mat. 3:13-17; Mali. 1:9-11)
21Lelo pānyụma bo abāndu bōsịgwe, bo na Jesụ ōsịgwe ịkwịpụ̄ta, kumwanya kulinkwịguka, 22po papo Mbepo Mwịkemo alinkunsololokela, ummbili alinkufwana ngụ̄nde. Po papo ilịsyu lilinkufụma kumwanya lilinkuti: Ugwe gwe mwanāngu unkūndwe, gwe ungyelị̄le.
Abanyēnya ba Jesụ
(Mat. 1:1-17)
23Lelo bo Jesụ āndịle imbōmbo jake ali mfyinja amalōngo matatu ubukusị, alinkujobịgwa ukuja mwana gwa Josefụ unnya Elị, 24umwana gwa Matatị, unnya Lebị, umwana gwa Melekị unnya Janaị, uju āpāpị̄gwe na Josefụ, 25unnya Matatịja umwana gwa Amosị, unnya Nahụmụ umwana gwa Esịlị, unnya Nagaị, 26umwana gwa Matị, unnya Matatịja, unnya Semejịnị, umwana gwa Josekị unnya Jota, 27umwana gwa Jwanani, unnya Lesa umwana gwa Sulubabeli, unnya Sịlịtyelị, umwana gwa Nelị, 28unnya Melekị, umwana gwa Andi, unnya Kosamụ, umwana gwa Elimatamu, unnya Ele, 29Umwana gwa Joswa, unnya Elịjeselị umwana gwa Jolimụ unnya Matatị, umwana gwa Lebị, 30umwana gwa Sịmyonị unnya jụ̄ta, umwana gwa Josefụ, uju ālimpāpịle Jonamụ, umwana gwa Elyakịmụ, 31unnya Meleje unnya Mena, umwana gwa Matata, unnya Natani umwana gwa Ndabitị, 32unnya Jese, unnya Obelị, umwana gwa Boasị, umwana gwa Sala unnya Nahasonị, 33unnya Amịnatabu umwana gwa Andịmịnị, unnya Alịnị, umwana gwa Heselonị, unnya Pelesị, umwana gwa Jụ̄ta, 34Umwana gwa Jakobụ unnya Ịsịhaka umwana gwa Abụlahamụ, unnya Tela, umwana gwa Naholị, 35unnya Selugị, umwana gwa Legu unnya Pelegị umwana gwa Ebelị unnya Syele, 36umwana gwa Kaịnaị, umwana gwa Alipakisatị, unnya Semu, umwana gwa Nwaka, unnya Lamekị, 37Umwana gwa Metụsela, unnya Enokị, umwana gwa Jaletị, unnya Mahalelị umwana gwa Kaịnanị, 38unnya Enosị, umwana gwa Setị unnya Atamụ umwana gwa Kyala.
Valið núna:
Luka 3: NYB96
Áherslumerki
Deildu
Afrita
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.