BON 1
1
Tumanam Tiyopilas
1Ngoqg xeqconam kitap ho, Tiyopilas nga, ngo Jisug bonam nyirabnam mam la mwwg tomswr swrabnam hog mwlw luucw-luutam xeqtkun, 2mwam ao gvdab bool caag maadab mwv xuql ap kunam nyi tulungam Dvrwqbo Yal ator lvgab tomswrnum. 3Hoggab mwv mwwg sixo kokw so aal campy go mwv sija godab turl doodnvk hvl bulam mwum mvma dvb hvl atam naleqgo kaatam banv yvnum, bulv mwam kaapanum, ho bulug lvgab Pwnbog lvpw-haty pagoqkam goonum. 4Bulv olum gob hookum yukho, mwv bulam soq gaml sam jinum, “Jerusalem mam apaq maabv, hvbmabde ngoqg Abwg lvqc citayinwk hvl dingrwl apnam mam ham kaapa maady deedib nulv kaayal doota, hoq pagoqkam ngo nulam bekin tukun. 5Jon iss lvgab baptijum jinum, hvbmabde oyu maadab Dvrwqbo Yal lvgab nulam baptijum jidub nyitayin.”
Jisu Ao Gvdab Caaknam
6Kokw so Jisug buu tulungv mwam toxnum, “At Sw, sija no Israel nyi tulungam bulug lvpw-hatiam jikur tayin kun i?” 7Jisu bulam birwqnum, “Ham nulv cengsma, hoq aalam hoo moodam Abv mwwg mwwkub xil ap pan. 8Hvbmabde hwdlo Dvrwqbo Yalv nulug aoho ipoq yukam nulv atoram kaapa tayin, ho nulv Jerusalem, Judiya, ho Samariya gvda tvqpw ho la swcw nvg ywwtwr namgob ngoqg puiyam baqnbo hvvky gob nyitayin.” 9Sam bexo kokw so mwam bulv aob jaarab dvb kaapanum, ho bulv mwam kaamin gvl doodu dvb doomwqkv mwam bulug vnyiq kaaga hoqgv hwrlub gvnkun.
10Bulv hvraqb doonyi aob mwwg wnam mam rodul doonum, ho haqmapaqb nyi vnyi go vj jipu kootwl bulug ogumho daqnum. 11Bunyiv benum, “Galili gvdag nyi tulu, nulv hoggub doonyi aob koodul doodwn? Soq Jisun nulug pengko hoqgv ao gvdab boocal caagnam hvbkalam lokta mwam nulv hookur dukub kaapa tayin.”
Judaswg Kwlib Mattiyasnvn Xuqnam
12Kokw so bulv Olib puutu hoqgv Jerusalem wkur kunum soq puutu si bopam hoqgv mail papo gob aadonum. 13Bulv Jerusalemb haaknum, ho bulug nam doodu ko aob caonum, Pitor, Jon, Jems, Andriyo, Pilip, Tomas, Bortolomiyu, Metiyu, Alpiyus gv ko Jems, Jilot Simon, hoo Jemsig ko Judas. 14Bulv lvkin gob hang pwkinb mwwnv swgwnam mam mvtab nyem tulungv la Jisug ann Meeri la mwwg bor tulungv lokub doonum.
15Kokw so oyu maadab mwwjwbo nyiv lwwg la camnyi gob nyiknum, ho Pitor daqrab banv benum, 16“Ngoqg vbw-bor tulu, Dvrwqbo potalo xeqnam hvbkalam Dvrwqbo Yalv Debidnvn Judaswg pagoqkam beol ap coonam, hiyv Jisun leedy bo nyi tulungam bool lamta kaatam bo nyiib nyinum. 17Judas ngulug dulu soq akgon, mwam ngulug lvgab nyibam mvdwb hvl xuqnamv.”
18(Judas mwwg nyic nyijo twngkam ked ak rvnum, mwv bwdw hoqgv geql yikho aiyeqngam geqdeq tukul aiyeq ura hoqgv hog mwlwngv lengnum. 19Jerusalemho doon bo nyi tulungv soq pui sam tapanum, hoo bulv bulug agamb hoqgv ked ham Akeldama, hoqhv goqnum, hvgdvn hv “Hilw swtw.”)
20“Soq sam Mwmin nwswr potalo xeqptvl doodwn,
“ ‘Mwwg nammam asarb doomto,
hoo hiyv kam hoq uraso doomabv;’
hoo
“ ‘Mwwg bon nyitungam asaqkam kwlib nyimto.’
21Hoqgab, hiyv nyi akv ngulug lvgab yvmin gvnum hwdlo At Sw Jisu ngulug pengko so yvmin gviyikho, 22Jonwg baptijum jirab yuk hoqgv mwam ao gvdab ngulug pengko soqgv boocanam gob yvba bo akam mwwg turkur kunam hvvkib swwnyiloq alpa.”
23Hoo bulv nyi vnyig emin go xuqlinum, Barsabas ngvk hvl benam Josap, (mwam Jastas hvlakam benum) hoo Mattiyas. 24Kokw so bulv xumnum, “At Sw, no nyi mwlwg hangam cengdwn, hoggab no ngulam soq nyi vnyig pengko 25soqg hogloq akam no Judaswg nyingo pel mwwg nyookub wleq kunbog kwlib xuqpa kun ham ngulam kaatam tvb.” 26Hoo kokw so bulv vnyig pengko hoqgv xuqdub tak kaanum. Mattiyasnvn xuqknum, hoo mwam wyw leq akin lvgab xitaq kunum.
Valið núna:
BON 1: NYISBSI
Áherslumerki
Deildu
Afrita
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.