Luka 21
21
Ikitawulwa icha Umung'inetu umufwile
(Maliko 12:41-44)
1Yesu alafile neke avawone avanono visopa ifitawulwa mukinyawugali cha mu Tembeli, 2swe akumuwona umung'inetu umufwile umumikaa isopa amagobole gavili. 3Neke atigile, “Nachene nene nguvalongela umufwile uyu umumikaa asopite ukulutila mbevali. 4Pakuva iwo mbevali vasopite ifisige mu wunono wawo, neke uyu mu wumikaa wakwe asopite mbefili fyeakeinafyo.”
Yesu ipava ulwa ukudenywa Itembeli
(Matayo 24:1-2; Maliko 13:1-2)
5Na avangi pevalonganige isa Itembeli, we yiwali uwunofu na uwunofu wa amaganga na ifitawulwa fya avanu atige, 6“Ifi mbefili fye mukufiwona safyusa ifilo pesisalisigala liganga mwiganga lyesisalidenywa.”
Ifilagilo ifya uluteseko
(Matayo 24:3-14; Maliko 13:3-13)
7Neke vamuwuse vitigila, “Mwigisi ing'ani iso siva Panili, na kiki ikilagila ukuta ing'ani iso sili pipi ukuwoneka?”
8Neke atigile, “Mwikomalilage, mulonga musangwe. Pakuva wolofu savasa mwitawa lyangu vitigila, ‘Nene ye nene’, na yilino ikivalilo ye kifikite, samulavafwata iwo! 9Nyenye pemwipulika isa amagalu na ulwitakilo mulogopa pakuva iso sivaje ukuwoneka tandi, neke uwusililo siwangufya wuse.” 10Neke pavalongele: “Ing'i ukwihoma na ing'i yingi, uwutwa wukwihoma na uwutwa wungi. 11Sakuva na ifitulo ifikomi mung'i na kikinge na lulufo, pono pono na ing'ani isa logofyo na uwuhulo uluhuma kwilanga. 12Neke pesiva sikaali siwoneke iso mbesili, vavibata, vavatesa nu kuvasindika mumasinagogi neke vavasope mundinde; samusindikwa pa vatema na avanzagila vakuvavala lilitawa lyangu. 13Ulo saluva lwe lusika lwenyu ukolelela. 14Apo musikimalage munumbula senyu: na mulahwa mwihosa chemupitula, 15pakuva ndivapela icha ukulonga na uluhala, na avatavangu venyu mbevali sivahwana vavaleme nambi kwibesa. 16Nayi nyenye sa mupitukwa na avavaha venyu, avanyalukolo venyu, avaseela venyu, na avanyawiyendi venyu, na avamwi mwanyenye sa vawulagwa. 17Nyenye sa muvipilwa na mbevali ikivalwa lilitawa lyangu. 18Nambi, lufwili lumwi lwa mumitwe jenyu sisaluyaga. 19Na mulwikangaliso lwenyu, samusipoka inumbula senyu.
Yesu ipava ukudenywa iboma ya ku Yelusalemu
(Matayo 24:29-31; Maliko 13:24-27)
20“Neke pesamuyiwene iboma ya mu Yelusalemu yipilimwe na avanyigalu, pepene pemulukagulage ukuta lino uwanangifu wuli pipi. 21Pepene lino avali ku Yudaya vakimbililage kufidunda, na avali pagati ya iboma vakimbililage kwivala na avali ku migunda valapiluka. 22Pakuva ifilo ifyo fye fya ukuhigwa sambi sikwile mbesili isandikwe. 23Vinalyo vala avanyafilo na vevakoosa mufilo ifyo! Pakuva sakulava na kuguda mung'i na ililakali ku vanu va ing'i iyi; 24Savadumulwa na ilimage ilyugi, nawo savagalulwa na ukusindikwa mung'i mbesili nayi Yelusalemu sayilivatwa na avamyanza avanu va ing'i isingi mbaka imisika ja avamyanza iwo va ing'i isingi pegikwilye.
Ukusa kwa Umwana va Umunu
(Matayo 24:29-31; Maliko 13:24-27)
25“Kangi sakulava na ifilagilo mwisuva na mu mwesi na mu ng'eng'esi. Avanu va mung'i mbesili savalava mulugudo wimila uwuhuguvafu, ibahali peyisukanzwa na amavingo ni mibumo. 26Avanu savafwa libupwi na umuhwehwe, pevisindila isikusa mung'i pakuva uludali lwa kwilanga saluhogoleka. 27Neke ipo pesamumuwona Umwana va Umunu akusa mumafufu pamwi na uludali na uwunyandolo uwulutye. 28Lino wone muwone sivanzile ukuwoneka ing'ani iso, mumamagalage na ukukang'ula imitwe jenyu pakuva uwupoki wenyu wuhegelye.”
Mulavage umusombe
(Matayo 24:32-35; Maliko 13:28-31)
29Ndawe Yesu avalongelige ikiganiso: “Mulavage umusombe na imibiki igingi mbegili. 30Pembe gikavangage ukutopola, nyenye mwakulukagula ulwa imisika ja pamasika yegihegelye. 31Lwindahihyo, pemuwene iso sivanzile ukuwoneka, mukalukagulage ukutigila, uwutwa wa Nguluvi wuheglye. 32Nachene nene nguvalongela, imbegalo iyi sisayilutila mbaka iso mbesili pesikwilye. 33Kuchanya na ing'i safilutila, neke ing'ani sangu sisasilutila nda.
Mwikalage Miho
34“Apo mwikomalilage, inumbula senyu silingila muwuhatufu, mu wugaasi na ukuguda muminanile igi sakilonga kivafikanise ikimunyi kila nda libada. 35Pakuva ulu wesalulava ku vanu mbevali vevakwikala konivala kono. 36Apo nyenye muvelage miho mbepali we mukwifunya sambi mupelwe uludali lwa ukulutila wunofu mwa mbesili isi pesiwoneka, na ukwima pa Umwana va Umunu.”
37Ino Yesu igisige mbepali pamunyi mu tembeli, neke pakilo abitige kukuvasa kukidunda cha Miseituni. 38Avanu mbevali vilaavige pamilawu ukubita ku tembeli; kukumupulikisa.
Valið núna:
Luka 21: HeNT2004
Áherslumerki
Deildu
Afrita
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.