Luka 22
22
Ikigaho cha ukumuwulaga Yesu
(Matayo 26:1-5; Maliko 14:1-2; Yohane 11:45-53)
1Ikimunyi ikikomi cha imikate je simihate uwuhahu, chekitambulwa Pasaka, yechekihegelye. 2Neke avavina va avatambisi na vigisi va indagilo, vasakige ikigaho cha ukumuwulagila lino wogopige avanu.
Yuda akwidikila ukumupituka Yesu
(Matayo 26:14-16; Maliko 14:10-11)
3Neke Setani amwingile Yuda Isikalyote, uyumwi va vala avanyichumi na vavili. 4Ndawe ahegige nu kubita kukulongana na avavina va avatambisi na avanyigalu, weagita pakumutawula mu mawoko gawo. 5Vahekelye na ukwiyidikisa nave ukumupela amagobole. 6Nave idikise ivanga ukutandila ikilega cha ukumutawula kuvene apagaya mukong'ano gulonga gulukagule ulo.
Yesu igelanisa ichakulya icha i Pasaka
(Matayo 26:17-25; Maliko 14:12-21; Yohane 13:21-30)
7Ndawe chafikige ikimunyi cha imikate je simihate uwuhahu, che lweluvaje ukudumula ing'olo ya i Pasaka. 8Swe Yesu akuvatuma Petulo na Yohane itigila, “Mubitage neke mukatugelanikise ifilyo fya i Pasaka, sambi tulye.” 9Ndawe vamulongelige, “Wisaka tukugelanikise kwi?” 10Neke avatigile “Mulavage, pembe mufike muboma, mutang'ana na munyidama yategwe kisilo cha lulenga mumufwatage mwingile mukaye yeingila umwene. 11Na mumulongelage umunyakaye, ‘Mwigisi akukutigila, yilikwi ikaye ya avagenzi, sambi umo ndile i Pasaka pamwi na vanyigendo vangu?’ 12Nave avalagila kuchanya ku bwalo ingelanise, mugelanisage mumo.” 13Swe vibita, nu kusiwona ndawe lwealavalonje; nu kugelanisa i Pasaka.
Ichakulya cha Umutwa
(Matayo 26:26-30; Maliko 14:22-26; 1 Avakolindo 11:23-25)
14Na ikivalilo peyekifikite, ateng'eme pawulilo umwene na vala avigendo vakwe. 15Swe akuvalongela, “Ndidoboka hilo ukulya i Pasaka pamwi na nyenye wesindilava mbe muluteseko, 16pakuva nguvalongela ulwa sisandya kangi mbaka pesayikwilye mu wutwa wa Nguluvi.”
17Ndawe ategulige ikinywelo, alumbe swe itigila, “Mukote iki, mwivalage pakunywa nyenye kwa yinyenye. 18Pakuva nguvalongela, uluhuma lino sisanywa uluveleko lwa umusabibu mbaka uwutwa wa Nguluvi pesawusile.” 19Neke ategule umukate, neke alumbe, amegule we itigila, “Ugu gwe muvili gwangu, [ugwitawulwa kwa nyenye. Mugitage ndahihyo pa kunziwuka nene.” 20Peyevalye ndahihyo ategwe ikinywelo itigila, “Ikinywelo iki lwe lufingano ulupya lwa Nguluvi ulwikangaswa mudanda yangu, iyikwitika ukwimila nyenye.]
21“Ino mulavage iliwoko lya yula yeakumituka lilipamwi twililasa. 22Pakuva Umwana va Umunu akwibitilaga ndawe lwee mukelele, neke inalyo umunu yula yeakumituka.”
23Swe vivanga ukwiwusa we vavene ng'ani ye nani mwavene yeapiga ulukani ulo.
Ulubesa ulwa ye nani ava muvina
24Ndawe lwavangige ulubesa mwavavene ulwa ye nani yeava muvina. 25Swe akuvalongela, “Avatwa va avamyanza va ing'i isingi, na vala avavalutye uludali vavitambulwa vanyawuwuya. 26Neke kwa nyenye silwindahihyo yeiva muvina kwanyenye avelage ndawe umudodo, na umulongosi avelage ndawe umukami. 27Pakuva umuvina yealikwi yateng'eme pawulilo, apangi umukami? Si yula yeateng'eme pawulilo? Neke nene mwanyenye ndindawe umukami.
28“Nyenye ye nyenye ye mukananite pamwi na nene mukugelwa kwangu; 29nani ndawe Dada vangu lweamelye uwutwa, nani ndahihyo nguvapela nyenye uwutwa. 30Sambi mulye na ukunywa pawulilo wangu muwutwa wangu, na ukuteng'emala mufigoda fya uwutwa kono we mukusihiga ing'olo nyichumi na sivili sa Vaisilaeli.
Yesu akumupavila Petulo ulwa amubihila
(Matayo 26:31-35; Maliko 14:27-31; Yohane 13:36-38)
31“Simoni, Simoni! Lavage! Setani akuvasaka nyenye, sambi avapete nda ngano. 32Neke ulwene ngusuche veve ulwa ulufuuwo lwako lulatindagila, nave pupitwike ukangasage vanyalukolo vako.” 33Neke pamutigile, “Mutwa pendilipamwi na veve nane nditawe ukubita nambi kwe ndinde.” 34Neke atigile, “Ngukulongela Petulo, inzogolo namunyi wesiyilavika uva umbihye kadatu ukuta sunzeli.”
Ulwa ikibogolo, ibogolo na ilimage
35Swe Yesu akuvawusa, “Ndawuli pengengavatumite we muvagaya kibogolo nambi bogolo nambi ndatu muke mukagayite kinu?” Neke vatigile, “Nda.” 36Neke avatigile, “Lino, umunya kibogolo ategulage na umunyabogolo ndahihyo. Na umugaya limage agusage isopeka yakwe akagule. 37Pakuva nene nguvalongela inzandike muwandike uwelu; ‘Ukuta vamuhanzise mukilugu cha avananzi, luvaje sikwile. Ena, mbesili isimbaje yesifikila ku wukwilanifu waso,” 38Swe vakumutigila Mutwa, “Lavage, ipa pogali mamage gavili.” Swe itigila, “Lukwilye!”
Yesu akwifunya
(Matayo 26:36-46; Maliko 14:32-42)
39Yesu ahumite muboma, ndawe lwealasovye ukubita kukidunda cha ku Miseituni; na avanyigendo vamufwatite. 40Ave ifika apono pala avalonje, “Mwifunyage sambi mulemwe ukwingila mukugelwa.” 41Ndawe ikwegige ludodo kwa avene luvala lwa kutosa ng'ongwa swe ifugama akwifunya. 42“Dada wone wiwenda, nyesekese uluteseko ulu, neke lekage lulemwe ukupigika ndawe lwendiwenda nene, luvelage ndawe lwe wiwenda veve.” [ 43Ipo munyivaha va Nguluvi uluhuma kuchanya, aasile ukumukangasa. 44Nave pakuva ali mwe wuhuguvafu aginite hilo ukwifunya na ilifuke lyahumite wita danda iyidomola pasi.]
45Ave ihega mukwifunya ahele kuvanyigendo, neke avafike vagonelye tulo mu wuhuguvafu. 46Neke avatigile, “Mbi ndawuli mugonelye tulo? Mulamuke mwifunye mulonga mwingile mukugelwa.”
Ukupitukwa na ukwibatika kwa Yesu
(Matayo 26:47-56; Maliko 14:43-50; Yohane 18:3-11)
47Yesu we pealonga, wonage ililugu lya avanu, pamwi na umunu yeitambulwa Yuda uyumwi va vala avanyichumi na vavili, akuvalongosa. Na peahegelye pa Yesu amunonie. 48Neke Yesu amutigile, “Yuda! Ukumupituka Umwana va Umunu kwa kumunonela?” 49Na vala avepipi nave pevasiwene isikwenda suse vatigee, “Mutwa, ngali tuvaputage na amamage?” 50Uyumwi va avene swe akumuputa umukami va umutambisi umuvina ilipulikilo lya kundyo. 51Neke Yesu atigile, “Pa ulu mulawila!” Ndawe amupamisige ilipulikilo nu kumuponia.
52Yesu neke avalongele avavina va avatambisi, na avavina va avanyigalu va mu tembeli, na avavaha va avanu avevasile kulumwene, “Mbi ndawuli musile na amamage ni fisonzo wita wanda mwibita kwibata muhiisi? 53Mbepali penge na nyenye mu tembeli simwe mulagolola amawoko munzibate. Neke lino iki che kivalilo chenyu, na uludali lwa ulwisa.”
Petulo akumubihila Yesu
(Matayo 26:57-58; Maliko 14:53-54, 66-72; Yohane 18:12-18, 25-27)
54Swe vakumwibata Yesu na ukumusindika kukaye ya Umutambisi Umuvina, na petulo e mumbele we ali pataali. 55Vavelige vikosa umoto pagati pa ilipala vateng'eme pamwi, nave petulo swe iteng'emala nawo. 56Pepene umukami umwanahinza amuwene Petulo ateng'eme pawelu, ndawe amulavige hilo itigila, “Na yuyu ake pamwi na Yesu.” 57Neke Petulo abihye itigila, “Ve! Mung'inetu veve umunu uyo sindimuseli.” 58Ulusika ludodo pambele umunu uyungi amuwene Petulo itigila, “Veve nave wimuyawo na vavala.” Petulo swe itigila “Munu veve si nene nda!” 59Lwave nda lwa kivalilo kimwi umunu uyungi akangise pakulonga atigile, “Nachene na yuyu ake pamwi nave, pakuva nayiveve wihuma ku Galilaya si lwelulo.” 60Petulo neke atigile, “Munu veve; singulukagula lwe wilonga!”
Na baho mumweilonga, inzogolo yavikite. 61Neke Umutwa amupituche nu kumulava Petulo. Swe Petulo akwiwuka lula ulukani lwa Umutwa, lwe alaamulonje, “Namunyi wesiyilavika inzogolo, uva ye umbihye kadatu.” 62Swe neke ahume kwivala ivemba ulutalamu.
Yesu vakumwelanga na ukumutova
(Matayo 26:67-68; Maliko 14:65)
63Na vala avanu vevamumingige Yesu vamwelanzile nu kumutova. 64Neke pevamugubike kumiho vakumuwusa wusa vitigila, “Ulonge ye nani yeakutofile?” 65Neke vamulongange fivi na ukumuliga.
Yesu ihigwa
(Matayo 26:59-66; Maliko 14:55-64; Yohane 18:19-24)
66Na kwavelige kwicha, avavaha va avanu, avatambisi avavina na avigisi va indagilo vakong'ine vakumusindika pawuhigilo wawo vitigila, 67“Wone veve wi Kilisito! Tulongele.” Neke atigile, “Na ndivalongele we simufuuwa ha! 68kangi wone ndivawuse lukani simumitula. 69Neke uluhuma lino, Umwana va Umunu saateng'emala ulubali lwa kundyo lwa Nguluvi umunyaludali.”
70Mbevali swe vitigila, “Veve ye veve mwana va Nguluvi!” Swe akuvalongela, “Nyenye mwilonga ukutigila nene yenene.” 71Swe vitigila, “Ali lino tuva petusaka wolelesi wakiki kangi? Pakuva twipuliche yihwehwe ing'ani sa mumulomo gwakwe yumwene.”
Valið núna:
Luka 22: HeNT2004
Áherslumerki
Deildu
Afrita
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.