Matayi 11
11
1Bo u Yesu amala pakumanyizya abamanyili bache 12 bala ivintu vinivi, akepapo pabuzilo bula, akabuka pakumanyizya nu kulumbilila mutwaya tuto tukaba papipi.
U Yohani Uwalozyo akubatuma abamanyili bache kwa Yesu
(Luk. 7.18-35)
2Bo u Yohani Uwalozyo ali mujele, akivwa zyosi zizyo u Kilisitu akabombagha, po akatuma abamanyili bache bamo kwa Yesu. 3Bakamulalusya bakati, “Tubuzye, nkimba awe we yuyo akaneniwanga ukuti akwiza, pamo tulindililaye uyunji?” 4U Yesu akamula akati, “Nyokela kamubuzye u Yohani zizyo mukwivwa nu kuzyennya. 5#Yes. 35.5-6, 61.1Abafwamaso bakwennya, babo bafuye ivinama bakwenda, na bamambombo bakuswepa, na bamapuli bakwivwa, na bantu abafwe bakuzyuka kubufwe, sona Amazyu Amiza ghakulumbililiwa pakasi pa bantu abapina. 6Basayiwa babo batakwilamwa nane.”
7Bo abamanyili aba Yohani bepapo, u Yesu akanda pakuchilalusya ichilundilo icha bantu nizya Yohani ukuti, “Bo mwabuka kwa Yohani munkolongo, nkimba mukalindililagha pakwennya ichoni? Nkimba ulutete lulo lukatetema ni mpepo? 8Nkimba mukabuka pakwennya ichoni? Nkimba umuntu yuyo avwalite amenda amiza nkani? Awe, abantu babo bakuvwala amenda amiza bakwikala munyumba izya bumwene? 9Mumbuzye, nkimba mukabuka pakwennya ichoni? Umulaghuzi? Naloli momumo, mukennya yumo uwakumuchila umulaghuzi. 10#Mal. 3.1Pakuti u Yohani we yuyo Amasimbo ghakumunena ukuti, ‘U Chala akati, “Nkwiza pakuyituma intumi yane kuntazi kukwako pakukuyanizizya izila.” 11Naloli inkubabuzya ukuti pakasi pa bantu bosi babo bakapapiwa muchisu ichapasi, nayumo umuntu uyunji uwakumuchila u Yohani Uwalozyo. Loli umuntu yuyo munandi nkani mu Bumwene ubwa Kumwanya mukulu ukumuchila u Yohani. 12#Luk. 16.16Ukwanda pakabalilo aka Yohani Uwalozyo mupaka ilelo, Ubumwene ubwa Kumwanya bwayimba nkani,#11.12 bwayimba nkani: Pamo bwakula ni ntamyo. sona abantu abamaka bakuyezya pakubunangannya. 13#Luk. 16.16Abalaghuzi bosi poka ni Ndaghilo izya Mozesi bakanenela zila nizya Bumwene ubwa Kumwanya mupaka pakabalilo aka Yohani Uwalozyo; 14#Mal. 4.5; Mat. 17.10-13; Mlko. 9.11-13sona nanti mukulonda pakusubila amazyu ghabo, u Yohani we Eliya, yuyo akaneniwa ukuti akwiza. 15Yuyo ali na makutu aghakwivwila, ivwe!
16“Nkimba ningafwanikizya ni choni abantu abankulilo iyi? Bayanite bulo na bana babo bikaye muminalo. Akabukatila koka kakukabuzya akanji ukuti, 17‘Tukabimbila inyimbo izya pasendwa, loli mutakimba. Tukabimbila inyimbo izya pafwa, loli mutakalila!’ 18Bo u Yohani Uwalozyo iza, akatuzya pakulya, sona atakang'wela uvinyo. Po abantu bakati ali nu muzimu umubibi! 19U Mwana uwa Muntu akiza, akalya nu kung'wela, po abantu bakati, ‘Ennya, umuntu umupavu nu ching'wela uyu, sona umumanyani uwa basonkezya umusonko na bantu abambibi!’ Loli amahala agha Chala ghakulanjiziwa ukuti ghanaloli ni mbombo zyache.”
Nizya twaya tuto tughuniwe
(Luk. 10.13-15)
20Po u Yesu akanda pakutuchemela utwaya tuto akabombaghamo ivyika ivyinji pakuti abantu batakapinduka nukuzileka imbibi zyabo nukuti, 21#Yes. 23.1-18; Ezk. 26.1—28.26; Yow. 3.4-8; Amo. 1.9-10; Zek. 9.2-4“Chighune kukwako Kolazini! Chighune kukwako Betisayida! Nanti ivyika vivyo vibombiwe mumwinyu, vyabombiwe mutwaya utwa Tile nu Sidoni, ngali abantu mulamula bavwalite kale amasaka nukwikupulila itoyi mumubili ukulanjizya ukuti naloli bapinduka nukuzileka imbibi zyabo! 22Inkubabuzya ukuti pisiku lilyo u Chala akwiza pakubalonga abantu, u Chala akwiza pakubapelela ichisa nkani abantu aba mu Tile nu Sidoni ukuchila amwe. 23#Yes. 14.13-15; Ubw. 19.24-28Nawe Kapelinahumu! Nkimba ukwinong'ona ukuti ukwiza pakukweziwa mupaka kumwanya? Awe, loli ukwiza pakusumbiwa kubuzilo ubwa bantu abafwe! Ivyika vivyo vibombiwe kukwako, nanti vibombiwe mukaya aka Sodomu, ngali akaya kalakala kaliko nilelo? 24#Mat. 10.15; Luk. 10.12Inkubabuzya ukuti pisiku lilyo u Chala akwiza pakubalonga abantu, u Chala akwiza pakubapelela ichisa ichikulu abantu aba mukaya aka Sodomu ukuchila amwe!”
Ukutuzya mwa Yesu
(Luk. 10.21-22)
25Pakabalilo kalakala u Yesu akati, “Wee Tata, Mwene uwa kumwanya na pachisu ichapasi! Inkukupalizya pachifukwa chakuti wabavumbulila abantu babo batamanyiye ivintu vivyo ukabafisa abantu abamahala na bamanyi.” 26Ee, Tata, umu mo mumo ukalondela ukuti chibombiwanje.
27 #
Yoh. 3.35, 1.18, 10.15 “Utata wane ampiye ubulaghili ubwa vintu vyosi. Nayumo umuntu yuyo amumenye u Mwana, loli Uwise mwene, sona atalipo umuntu yuyo amumenye Uwise, loli u Mwana mwene, sona na bantu babo u Mwana akubasala ukuti abavumbulile Uwise.
28“Zagha kukwane, mwebosi mwe mulitite nu kung'wamilwa ni ntamyo, po inkwiza pakubapa ubutuzyo. 29#Yel. 6.16Nyamula ikoli lyane, manyila kukwane pakuti ane ne mololo nu wakwiyisya. Po mukwiza pakubwagha ubutuzyo. 30Pakuti ikoli lilyo inkwiza pakubapa lipepe, nu katundu yuyo inkwiza pakubika papinyu mupepusu.”
Valið núna:
Matayi 11: LMBNT2016
Áherslumerki
Deildu
Afrita
Want to have your highlights saved across all your devices? Sign up or sign in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Lærðu meira um Ulufingo Ulupya