OTSAK 2
2
Manglā Kathara Kharā
1Pentecost zimiksho kharā eina shitkasangabing saikora apam akhali kaziprumsai. 2Kashuirak eina masi panglāk eina kaphan thada akhon akha kazingramwui eina tālaga athumna pamkasa shim chi pemtinghaowa. 3Kala malezak kakhui meiwon thada rāda mi kachiva̱wuitungli rāsāza̱mi. 4Chieina athum Manglā Katharana pemtinghaoda Manglāna athumli matui khangasak tuiyur khangatei eina matuiphokhaowa. 5Chitharan okathui apam kachiva̱wui eina kharā shitkasang khangazipa Jihudi kachungkha Jerusalemli leisai. 6Athumna akhon chi kashā eina, mi kachungkha rakazipa, kala athum matakhakhaowa kaja shitkasangbingna kachichāramtui eina matuikasa chi athum kachivana shai. 7Chieina athumna khakshingakta kala matakhakhaida hānga, “Matuida khaleibing hi Galilee mi maningsermala? 8Kala ithum kachiva̱na kachicharamtui eina matuida khalei ithumna kashā hi kathada rāhaokhala? 9Ithum Parthia, Media, Elam kala Mesopotamia, Judea, Cappadocia, Pontus kala Asia, 10Phrygia, Pamphylia, Egypt kala Cyrene ngaleili khalei Libyawui ngakaikha, Romewui eina kharā Jihudibing kala Jihudi onkahaibing, 11Crete, eina Arabia mibing, ithumna Varewui matakhak kahai otsak athumna imaramtui eina hāngda khalei ithumna shai.” 12Chieina athum saikora matakhakhaoda maphākhuilakla akha eina akha hāngngaroka, “Hi khiwui kakhalatkhala?” 13Kha khangatei kaikhana mana̱shida, “Athum zamshei manglaga malip kahaina” da hānga.
Peterwui Chānpao
14Kha Peterna tharāda akha chili ngasoda nganingkālaga akhon panglāk eina vaoda hānga: “He Judea mibing kala Jerusalemli kapama saikora, nathumna hi theimilu kala iwui tui hi ningsangda khanganāmilu, 15kaja nathumna kaphaning thada athum khamalip maningmana, arui pung kakathumamāng tāthadharmaya. 16Shokta khalei hi Joel marānna hānghaikasā china:
17 #
Joel 2.28-32. Varena hānga, khanaowa zimiksholi ina hi shokngasakra:
Kaja mi saikorali iwui manglā heirorra,
kala nathumwui naomayarabing eina naongalāva̱bingna marānra,
mahākhami nathumwui khanuithotna theira,
kala ararnaobingna mang shimanra,
18Mha, iwui rao sha̱nao mayarnaobingwuitungli chitharan
ina iwui Manglā heirorra kala athumna marānra.
19Ina atungshong kazingramli matakhak kahai chitheira,
azingshong okathuili machut mira,
ashee kala mei kala tara̱ akahurwui meikhutla theingasakra,
20zimikla tangkhamang onngasakhaora,
kachāngla ashee onhaora,
Prohowui hakkhamahā
tekhamatei zimiksho chi marāranglakha.
21Kala Prohowui mingli khangakao mi kachiva̱ makahatlakla kahui samphangra.
22“Isrealnaobing, tui hi nganāmilu, Nazarethwui Jishu hi Varewui ngasokhami mangā eina nathumwui ngachaili hakkhamahā otla, matakhak kahaila kala machutkakhui otla kasā nathumna theihaira. 23Rilak eina Varena ngarānping kahai athishurda Jishuli nathumwui pāngli horsangmi kala makaphābingwui pāng zangda ali krushtungli shaothat ngasaka. 24Kha Varena ali kathiwui kachotkachāng eina khalāmihaida ringngasakhaowa. Kathiwui pangshap china matuknarrarmana. 25#Laa 16.8-11. Kaja Davidna awui pongli hānga,
‘Proholi ina iwui mangāli theichinga,
A iwui yashongli lei, chieina ina mangatha̱luimara.
26Chieina iwui ning ringphai kala imale khamathānna pemtinghai.
Kala thikapai iphasāna chihansa̱ ngasāmkhuira,
27Khikhalajila nana ili kazeiramli manothahaimara
lah nawui Katharapa chili chikhurli mashuitā ngasakmara.
28Nana ili kharingwui shongfa theingasakhaira,
Nawui ngasokhami china ili khamathān chipemmira.’
29“Ivānaobing, ina pinglak eina awo kharar Davidwui pongli hangshapa; kaja a thihaida kachizanla chizanhaira, kala awui chikhur aja eina tangda ithumwuili lei. 30#Laa 132.11. A marān akhana kala awui wungpamkhongli awui naotun akha chipamra da Varena ngashitmi kahai chi ana thei. 31#Laa 16.10. Ana naoda khi shokrakhala kaji theida, Khristana ringshokluiki kajiwui pongli hithada hānga, ‘Ali kazeiramli manothāhaimana, awui phasāla chikhurli mashuitāmana.’ 32Varena Jishuli ringkhangasak ithum saikorana shākhina. 33Ara Varewui yāshong pamngasakta, ngashit kahai Manglā Kathara chi Avāva̱wui eina samphanga kala ithumwuitungli heirorkhami chi nathumna kathei kala kashā hina. 34#Laa 110.1. Kaja Davidna kazing makāmana, chithālala ana hānga,
‘Prohona iwui Proholi hānga;
iwui yāshong pamlu.
35Nawui yangkashebingli ina nawui pheinai masangasakranglakha eina tangda.’
36“Chiwui vang eina, nathumna krushli shaothat kahaia Jishu hili Varena Prohola, Khristala sāngasakhaira kaji hi Isrealnao saikorana theikazazakhairanu.”
37Tui chi kashā tharan, athumwui ning sāza̱haoda Peter kala paokazatbing chili hānga, “Ivānaobing, ithumli khi saulu jikhala?” 38Chieina Peterna hānga, “Ning ngateihaolu, kala nathumwui morei pheomi khavai Jishu Khristawui ming singda nathum kachiva̱ ra̱hikhaolu, chithākha Manglā Katharawui lemmet chi nathumna samphangra. 39#Isa 57.19; Joel 2.32. Tuingashit hi nathum kala nathumwui naongarāli kala katāva̱li khalei ithumwui Proho Varena hokakhui mi kachiva̱li khamina.” 40Peterna khangatei tui kachungkha eina shākhi mida athumli kasatsangda poi, “Makhamashunga mithot hiwui eina yāmshok khavai sālu.” 41Awui tui khuikasanga mi saikorali ra̱hikmi kala chithanghon mi thingkathum sha̱kha ngarumsanga. 42Athumna paokazatbingwui tamkachitheilila, ngarumsakla, kala khamui shaikhangarum eina seihā kasālila ningtumlak eina sakruma.
Shitkasangbingli Ringkharum
43Paokazatbingwui mangā eina matakhak kahai machutkakhui kachungkha sāda mi kachiva̱wuitungli khangachee rai. 44#Ots 4.32-35. Shitkasanga saikora akha sāda ot saikora ngaraichāda sāngarumsai. 45Athumwui khalalei lan, thongthāng saikora yorhaida kachikathāthā khavātabing saikorali ngayarmi. 46Thangkachida khorumshimli kāngarumda athumwui shimli khamuila shaingarumda shaohaha phazāngarumchinga. 47Kala Vareli sochikatta mi saikorana ngahānngai. Huimi kahai mi Prohona athumli thangthang ngarumsangmichinga.
Valið núna:
OTSAK 2: TANGBSI
Áherslumerki
Deildu
Afrita
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.