OTSAK 1
1
Manglā Kathara Ngashitkhami
1 #
Lk 1.1-4. He Theophilus, kharewui lairikli Jishuna kasāsā tamkachithei saikora chi 2ali kazingramli makhuikāranglakha awui paokazata sāda kapangkhui kahai mibingli Manglā Katharawui pangshap eina hāngmathinkhami chi ina kapihaira. 3Ana thikahaiwui thili zimiksho hangmati thangwui alungli athumli rāsamphangda apong kachungkha eina a ringda lei kaji tharzā eina azak eina chithei. Athumna ali mik eina thei kala ana athumli ngazekta Vare wungramwui pongli tamchithei. 4#Lk 24.49. Ana athumli ngasopamda leilakha, Jerusalemwui eina mathuihaila Avāva̱na ngashitmi kahai chi honpamsā khavai hithada hānga, “Nathumna iwui eina shāhaira, 5kaja Johnna tara̱ eina ra̱hikmi kha ara masāngla nathumli Manglā Kathara eina ra̱hikmira.”
Kazingram Kakā
6Athum rākakazip tharan, athumna ali ngahāna, “Proho, atam hitharan nana Israelli wungram chi samphang ngasakmiluishitrala?” 7Jishuna hānga, “Atam angarit chi Avāna a khalattawui sāshap eina retkahaina, chi nathumna theikapai maningmana. 8#Lk 24.48-49. Kha Manglā Kathara chi nathumwuitungli tāshungkhami tharan, nathumna pangshap samphanglākra. Cheina nathumna Jerusalemlila, Judea ngalei katongalila, Samarialila kala okathuiwui akatanga vāshungda iwui vang shākhi sāra.” 9#Lk 24.50-53. Hi hānghailaga athumwui miktāli ali khuikāhaowa, kala muiyāna tākhaluikhuida chiwui alungli shimānhaowa. 10Ana kakā chi athumna yangda leilakha, yanglu, kachon kachara khangavai mayarnao khanina athumwui ngalemli nganingda hānga; 11“Galileenaobing, nathum kachiwui vang eina kazingramli ngashānkhayangkhala? Nathumwui eina kazingramli khuikā kahai Jishu hi, arui kazingli khuikakā kathei hi tākam eina ana latrāluira.”
Judaswui Mahut Kakapang
12Chiwui thili athumna Jerusalemwui ngalemli khalei, kilometer akha sha̱kha katā, Olive phungreiwui eina Jerusalemli latunga. 13#Mat 10.2-4; Mk 3.16-19; Lk 6.14-16. Athumna keinung chili kazang eina Peter, John, James, Andrew, Philip, Thomas, Bartholomew, Matthew, Alphaeuswui naomayara James kala Zealot kaho Simon kala Jameswui naomayara Judaslong pamkasa mathāng atowui kā chili kai. 14Athumna Jishuwui ava̱ Mary eina achināngarā kala sha̱nao kateila zangda atam kasang kharei ungkaziplaga seihā sāchinga.
15Chitharan Peterna avānaobingwui (athum mi shakha maga̱ sha̱kha ngasokapam chiwui) ngachaili nganingda hānga, 16#Mat 27.3-10. “Ivānaobing, Jishuli tukkakhuibingli kathāna Judaswui apongli Manglā Katharawui pangshap eina achālakha Davidna hāngkahai kathara tui chi ungshungphalungra. 17Ali ithumwui ngachaili shānsanghaisai, kala otram khangatha̱ hili awui yarla mihaisai.” 18(Mayara hina awui makhayāwui sāman eina lui akha lokhui; kala chili kashuirak eina kongluida akhari akharā ngapophātserhaowa. 19Kala chi Jerusalemli khalei mi saikorana theisera, chieina lui chi athumwui tui eina Akeldama, “Asheewui Lui” da phokmi.) 20#Laa 69.25; 109.8. “Kaja Laa lairikli hithada kapihaida leili,
‘Awui shim machohaoranu,
khipānakha chili maokthuiranu.’
kala
‘Mi khangatei akhana awui otpam chi khuiranu.’
21“Chiwui vang eina Proho Jishuna ithumwui ngachaili leilakha atam kachida ithumli ngasokasā, 22Johnna ra̱hikkhamiwui ot sākaphok eina thuilaga Proholi khuikakā eina tangda chiwui alungli kazangabingwui ngachaili akhana ithumli ngasoda ringkhaluiwui pongli shākhi sāphalungra.” 23Chieina athumna Joseph, Barsabbasla kaho (Justusdala kaho) eina Matthiasli kapangshoka. 24Chiwui thili athumna seihā sai, “Proho, mi kachiva̱wui kaphaning nana thei, chieina khalattana vākhangayiya apamli vākhavai 25Judaswui mahut sāda paokazata sākhavai khani hiwui ngachaili nana kapangkakhui chi chitheimilu.” 26Athumna aniwuitungli ka̱lā yanga; yanglaga Matthiaswuitungli tāhaoda rida leikasā pāokazata tharāda akha chiwui alungli ngarumsanghaowa.
Valið núna:
OTSAK 1: TANGBSI
Áherslumerki
Deildu
Afrita
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.