Matayo 5
5
Liekesi lia Yesu nda Löngo
1Ɛ̈nɛkɛ̈ Yesu biindi ya bato, Inde lolila nda löngo limɔ, 2ayalaka Inde se, baeki bande loya end’Inde la Inde loakola ndoonga lau la Inde loekes’iyo mbo—
3Limɛngɔ lile l’eba touwe nda betema yau, eoka Bɔkɔta wa Use bole lau.
4Limɛngɔ lile l’ebatolela ndeli, eoka batɔɔnjɔnjɔmɔkɔ.
5Limɛngɔ lile l’eba bɔfɔu eoka batosangola wenda botiko.
6Limɛngɔ lile l’eba yɛmɛ la isiyɛ sha njasɔ ya liengani, eoka batokanelo.
7Limɛngɔ lile l’eba shota, eoka batowɛlɔmɔ shota ko la bato basi.
8Limɛngɔ lile l’eba betema betanu, eoka batɔɛnɛ Mungu.
9Limɛngɔ lile l’ebatɔɔngɛsɛ njasɔ eoka batotangomo bana ba Mungu.
10Limɛngɔ lile l’ebasokongolomo eoka ya liengani, eoka Bɔkɔta wa Use bole lau.
11Limɛngɔ lile lanu imɔ ani akamɔlɛkɛ bato ɛmɔlɔkɔ ino, l’ani akakongoleke iyo ekongokol’ino l’ani batotɔ̈ngɔ ino la lolanga ko l’eoka yami.
12Okaka to limɛngɔ la omakalaka eoka bondanda wanu wende ofi nda use. Bakongokolaka batɔndɔli ebaaka oso wanu ko ongoma.
13Ino wende bokwa wa wenda; nde eyambo bokwa botemba shokana imɔ shao kookana liasi l’iye? Botiengane imɔ ndokela la yeka, kangä ndokushomo tungi bomatekelomoko la batindi ba bato.
14Ino wende liangangi lia wenda; bokenge eboswomu likolo lia löngo angokɔkɔlɔ ndoisomo. 15Atoanesa bato taka baitokasɛlɛ yao ose ya mbutɛ, kangä nda etalielo la yao koangangekela bato batotina nda ndakɔ. 16Liangangi lianu liangangeleke bato mbo bɛnɛkɛ bolau wa bekeeli yanu la mbo baomaleseke Sango wanu oyayali nda use.
17Oenyelëke mbo isoyatungesa Bikela la Baoi ba Batɔndɔli; itiye ndoyasilesa yao, kangä ndoyakɔchaka yao. 18Wewe, isoonga lanu mbo— Ko nda mbile eyekawanjweke use la se, angwɛnɛ ango lioi ango itɔitɔni sha lioi lia Bikela ya Mungu nde kowanjwa, sakolo ngo ko bitotina bilakɔchɔmɔkɔ fɛɛ. 19Eokao boto oyatosɔmbɔlɔ ekela ɛmɔi ɛkɛkɛ nda yao, ango oyatoekesa bato otefola yao, botoyo etangomoko bokɛkɛ fafo nda Bɔkɔta wa Use; nde oyatolitesa yao la oyatoekesa yao, inde etangomoko ofi nda Bɔkɔta wa Use. 20Im’itoonga lanu mbo— Sakolo ko liengani lianu litolongela elia Batikasa la BaFalusi, ani ino angɔɔtɔ nda Bɔkɔta wa Use.
Efango
21Osooka mbo bangau baongomökö mbo— Wolëke oto la yɛnɔ, la imɔ mbo oyatoola oto la yɛnɔ, eyalaka nde la loasɔ ende Bokumi; 22nde Imi nd’atoonga lanu mbo boto oyasosoma la wina lisomela, inde eyalaka la loasɔ ende Bokumi. Boto oyatoonga la wina mbo— Aɛ ebebe, eyalaka la loasɔ ende eb’ikumbɛ, la oyatoonga mbo— Aɛ wende itume, inde eyalaka nde la loasɔ lɔkɛs’inde nda Ngehena ya bösä. 23Eokao eyambo ototamba lifaefi liaɛ nda ndakɔ ya Mungu, lamao boenyela mbo wina ale l’aɛ la loasɔ, 24tamachaka lifaefi liaɛ oso wa etambelo, takɛndɛkɛ okakomyana loasɔ mbo oyaleke lande lisaɔ liasi, limɔ otoyatamba lifaefi liaɛ. 25Ɔngɛsɛ botema wa oto oyatɔkɛ laɛ ende Bokumi ani okoyala nda mboka, mbo atakɛsɛ aɛ ende juge; limɔ juge kokɛsɛ aɛ ende Botingani wa bɔnyɔlɔlɔ, l’aɛ kotomo omao nda bɔnyɔlɔlɔ. 26Isoonga laɛ wewe mbo aɛ otiasekwe omao ko nd’akakambeke aɛ bitotina fɛɛ, angotikala ango sɛngi.
Bolëfë
27Osooka mbo loaongomökö mbo— Otwëke nyongo; 28nde Imi nd’atoonga lanu mbo— Boto oyatoticha otomali ko ndookel’inde bolëfë, asosila oko ndotwa lande nyongo nda botema. 29Liso liaɛ lia olome likwes’aɛ nda obe ɔ̈mɔlɔkɔ liao, eoka losoeta la olau mbo elengo yaɛ ɛmɔi eweke, inga mbo bindo yaɛ itotina biumbolomoko nda Ngehena ya bösä. 30Bosamba waɛ w’olome bokwes’aɛ nda obe, tenaka wao, umbolaka wao tungi, eoka losoeta la olau end’aɛ mbo elengo ɛmwito eweke, inga mbo bindo yaɛ itotina biumbolomoko nda Ngehena.
Lisokoli lia Wali
31Loatomökö ekela mbo— Boto esokola wali wande, afek’inde lokasa loluwesa mbo liyäla lisowa. 32Nde Imi nd’atoonga lanu mbo— Boto oyasosokola wali sakolo ko loasɔ loa nyongo, asokɛsɛ wali nda nyongo la boto ona oyatosɔngo wali ona oyasosokolomo, inde imɔ asotwa nyongo.
Ekanɔ
33Liasi imɔ, osooka mbo bangau baongaka mbo— Otinyëke ekano litinyela nde kɔchaka bikanɔ yaɛ ende Mungu. 34Nde Imi nd’atoonga lanu mbo— Otinyëke ekanɔ angɔmwito, ango la Use, eoka Use wende kɛka ya Mungu; 35ango la wenda-bo eoka wenda-bo wende esolo ya bakolo bande; ango la Yelusaleme eoka wende bokenge wa Bɔkɔta Ofi. 36Otinyëke ekanɔ la botö waɛ, eoka otikɔkɔlɛ ndokikola loswe lɔmwito lofufu ango windo. 37Lioi liaɛ liyaleke ango ko Eingo, eingo, Mbayɔ, Mbayɔ; lioi lioeta bao lile ko libe kongo.
Bosakane
38Osooka mbo loaongomökö mbo— Liso swana la liso, la linyo swana la linyo; 39nde Imi nd’atoonga lanu mbo— Otambëke oto obe bokondo, nde boto eom’aɛ nda likɛkɛ lia olome, tambak’imɔ ko inde elia wali. 40Boto ɛlɛmbɛ otinjak’aɛ nda likomyi eoka ya esinda yaɛ, fak’imɔ ko inde kanjo. 41Boto ɛkɛs’aɛ lande botikake wa kilometa ɛmɔi, kɛndɛkɛ lande ko imbale. 42Faefak’inde oyatömba yeka yaɛ la olotelëk’inde oyalɛmbi ndɔsɔ yeka sɔmbya end’aɛ.
Losamɔ
43Osooka mbo loaongomökö mbo— Samaka boyalani l’aɛ nde koiyela ewa liya. 44Nde Imi nd’atoonga lanu mbo— Samaka eba liya, sombolelak’iyo ebatokongol’ino, 45mbo boyaleke bana ba Sango wanu nda Use, eoka Inde nd’asokomya mbo löwa loande losɔswɛkɛ ende ebalau l’ebabe lisanga, la Inde nd’atotɔnɛsɛ mbula end’eba liengani, l’ebatiengane lisanga. 46¿Eoka eyambo bosama ko bato ebasosam’ino, ani boni bondanda botɔɔlɔ ino? ¿Bɛsɔnji ya besombi baitokelaka ko ongoma? 47¿Eyambo bolamokola ko beoto yanu kongo, boni to olau woeta bato basi? ¿Ebati BaYuda baitokeleka ko ongoma? 48Ɔlɔlɔkɔ to nde liengani kwani ayali Sango wanu oyale nda Use, Inde nd’asɔɔlwa hɔlɔ.
Valið núna:
Matayo 5: NTKE58
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.