Matayo 6
6
Likusolomu lia Lifaefi
1Taenyelaka la wɛlï mbo otakelaka eya liengani ko mbo bato bɛnɛkɛ ino mbo wende balau, eoka ko ani ot’imɔ wofomo bondanda ende Sango wanu oyayali nda Use.
2Eokao atokusol’aɛ lifaefi liosunga ebatouwe, otëke to boekï oso, kwa atokelaka balimbakeli nda bisɔngɔmɛlɔ nda mboka, mbo basemolomoko la bato. Wewe isoonga lanu mbo iyo ana basɔɔlɔ bondanda wau fɛɛ. 3Nde atokusola aɛ lifaefi, bosamba waɛ wa wali boluwëke elotokela ewa olome, 4mbo lifaefi lia ngandi yaɛ liyaleke wisakumbo, limɔ Sango waɛ oyatɔɛnɛ wisisa ɛɔlɛsɛkɛ aɛ bondanda.
Lisomboli lia momongo
5Atosombol’ino, okelëke kwa ebalimbakeli eoka iyo basami wemala nda bisɔngɔmɛlɔ la nda bau ba mboka mbo bato bɛnɛk’iyo; wewe isoonga lanu mbo iyo basɔɔlɔ bondanda wau fɛɛ. 6Kongo ko, atosombol’aɛ ɔtokɔ hɔu nda kuku ya ndakɔ yaɛ, limɔ bome boliyama ndi, aɛ kosombola Sango waɛ oyayali nda wisakumbo; la Sango waɛ oyatɔɛnɛ wisisa ɛɔlɛsɛkɛ aɛ bondanda.
7Atosombokol’ino, osombolëke boongaonga kwa atokelaka ebati BaYuda, eoka iyo batangi nde mbo batookomo eoka ya wike wa beongaonga. 8Okweekelëk’iyo eoka Mungu Sango wanu nd’aluwi yao ebisoeno ino ani okafel’Inde.
9Eokao ino sombolaka ko ani mbo—
Sango wasu oyayali nda Use,
Lina liaɛ lilitesomoko,
10Bɔkɔta waɛ boyeke;
Lisangi liaɛ likelomoko,
Kwa atokelomo liao nda Use, ko ongoma ono se;
11Faefak’iso louse bieka yoengana louse,
12Mɛsɛlɛk’iso batongwi basu kwa iso imɔ
Tosotamɛsɛlɛ iyo ebatotongwa lasu.
13Okɛsɛk’iso nda lisoshela,
Kangä ɔnɔkɔlɔkɔ iso nda obe.
14Eoka eyambo bomɛsɛlɛ bato batongwi bau, Sango wanu imɔ atomɛsɛlɛ ko batongwi banu, 15nde eyambo ino otimɛsɛlɛ bato, ani Sango wanu aitomesɛlɛ ango batongwi banu.
16Atokilak’ino bieka, oyalëke la biɔmbɔ wuno kwa atokelaka ebalimbakeli, eoka batonunakalesa biɔmbɔ yau, mbo bɛnɔmɔkɔ la bato mbo batile yeka. Wewe isoonga lanu mbo basɔɔlɔ bondanda wau fɛɛ. 17Kongo ko atokilak’ino lɔɔkɔ betö yanu la baningo, soolaka biɔmbɔ yanu, 18mbo bato bataɛnɛ likili lianu lia bieka, kangä Sango wanu oyayali nda wisakumbo, limɔ Sango wanu oyasɔɛnɛ wisisa Inde ɛɔlɛsɛkɛ ino bondanda.
19Osɔnjɛ̈kɛ bondanda wanu ono se, olo sambola la batälɛ la mbombö batosɛɛsɛlɛsɛ wao, la olo eba biya batofindola etutu mbo biyeke wao; 20kongo ko sɔnjaka bondanda nda Use, ona angoko sambola, angoko batälɛ la mbombö angosɛɛsɛlɛsɛkɛ wao, angoko eba biya angofindola, ango wiya yeka. 21Eoka olo ayali bondanda waɛ, botema waɛ boyalaka imɔ ko omao.
22Täla ya bindo ende liso, eokao liso liaɛ liyala fololo, bindo yaɛ bitotina bitoana swaa. 23Nde ango liso liaɛ liyala libe, bindo yaɛ bitotina bitosɔlɔnɔ sɔlɛ̈ la lilima. Eokao eya ngo mbo liangangi elile laɛ litufaka, aina to botufɛlɛ.
24Angwɛnɛ oto wokɔkɔlɔ oyala bɔkɔwa wa bato ambale, eoka mbo ataiyana la ɔmɔi nde kosamaka oyo ɔmɔi, angoko atowatema la ɔmɔi nde kosɛɔlɔ oyo ɔmɔi; otikɔkɔlɛ oyala bɔkɔwa wa Mungu la bieto lisanga.
25Eokao, itoonga lanu mbo— Otakelëke bolenda loasɔ loa liwawi lianu mbo toleke to eni yeka, tomweke to iye; ango ko loasɔ loa bindo mbo towateke bini bisinda. ¿Liwawi liisoeta yeka yola? ¿Bindo biisoeta bisinda yowata?
26Tichaka nɔli nda use, biitolɔɔ, biitoina, biitoisaka eula nda ekukyelo, kongo ko Sango wanu wa Use atoles’iyo; ¿Ino oisolongel’iyo finɛ? 27Ndai wanu kokɔkɔlɔ ndokondesa bindo yande ko sinyo kongo, eoka ndotakela bolenda nda yao? 28¿Monito bototakela bisinda yowata bolenda? Taenyelaka fɔtɔtɔ ya lokonda, biitokela likuwa, biitotita bisinda, 29kongo ko itoonga nde lanu mbo— Ango Solomo angɛnɛ kwa aaka inde la bɔfɛkɔ wa likama, atiawataka bɔfɛkɔ woengana la lɔfɔtɔtɔ lɔmwitɔ loa lokonda. 30Eya to mbo Mungu asowatesa ko chwingi chwa lokonda la bofɛkɔ ani, chwingi etosoyala louse nde lɛlɛngɔ tototomo nda etumbelo, nde simbi to Inde kowates’ino bato ba lilendelu likɛkɛ.
31Eokao otakelëke bolenda mbo— ¿Iye eyetolak’iso?, ¿Iye eyetomw’iso? ango ko mbo— ¿Eni yeka eyetowat’iso? 32Yeka bina, ebati BaYuda batokalukake yao, Nde Sango wanu wa Use aluwi mbo botoeno nde ebitotina-bi. 33Talukaka Bɔkɔta wa Mungu la eliande liengani, limɔ ebi-bitotina kofomoko ino imɔ.
34Eokao otakelëke bolenda loasɔ loa lɛlɛngɔ, eoka bocho wa ɛlɛngɔ bototakela bolenda ko eya wao angɛnɛ. Eweuse bokanelu nde la obe wa wao.
Valið núna:
Matayo 6: NTKE58
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.