O Kandɔɔ 11
11
Cɛi coocoo vannda va tangullo Babɛl-lo
1Sɔɛi mangalɛi pilɛi kpé vanndacieea o ceendo coo kpow a va dimio ni, diomnda pilɛlan ndáà soaa ni. 2Mɛɛ nda faŋan a ba paalen le can-ndo, má va kɔlan, má komal dɛngbɛ bɛndu-bɛndoo pum o lɛŋnde Sinear len nin, má kila dɔ́ɔ́ngɔ́ɔ̀ lon. 3Má dimulan vellaa-velle aa: «Vannda sei! N tosan vali pilɛ. N lɔɔnun kpilikion mì n lomnun mun.» Má tosa vallo a kpilikin nda lom mún-ndon maa lapow, má tosa vɛlɛ vallo a puulu lindaa maa laso. 4Má dimulan vɛlɛ aa: «N tangulun kobio, mì n baŋnun cɛi coocoo, mì bolle ndɔlen le tiiya háá o halataala. N tosa pɛ lende, n pɛlnun ladio, handɔɔ o kon coo, n ve lɛnin a saŋnannda o lɛŋnden coo le.»
5Mí Mɛlɛka toal, mó hun mɛɛndan kobio a cɛi coocoo vanndacieea va tangullo-o. 6Mɛɛ o cii mɛɛndan, mó dimi aa: «Vanaa pilɛa vannda ha kpede a co ni, sɔɛi mangalɛi pilɛi kpé nda co dimio ni, taa kandu pɛ dɛnɛ vaa nuaa tosaa, le fɛɛn a fɛɛn nin, ɲɛ-ɲɛ nɔla lɛ mò kuuna nda ɲɛ nda tuu le tosaa-o tosa le. 7Lelan, n tolnun mì n kɔ laasian sɔɛi ndɛi mangalɛi, yɔŋii nda tuɛyan ladiom vellaa-velle.» 8Mí Mɛlɛka puusiaa nda lon, mó sɛŋi nda o lɛŋnden kpow coo, má mal tangul ndáà kandu kon-ndo. 9Le kɔlɔɔ ho nda ke fonda kon diolan ni aa Babɛl. Kani lon Mɛlɛka laasiaa sɔɛi mangalɛi vanndacieea ni, mó sɛŋi nda o lɛŋnden coo kpow.
Diola van-banaa masindɛa: kandɔɔ a Sɛm kɔ bii a Abram
(1Dɛnnda lemasalan 1.24-27, Luke 3.34-36)
10Diola vanpiaandua fula o polale Sɛm-nden nin-nda la co lan ni. Sɛm ndóò nɔ vɔsilan kɛmɛ mó vialu Arpaksad. Vɔsila tiɔn o kpundɛ mɛmma bɛndoo kɔɔli kon yɔŋnun ni. 11Mɛɛ o velu Arpaksad, mó cii vɛlɛ vɔsilan kɛmɛ leŋuɛɛnu, mó vialu cuavaa celen: a piaandua a à laandua.
12Mɛɛ Arpaksad cii vɔsilan beleyaa a laŋuɛɛnu, mó vialu Sela. 13Mɛɛ o velu Sela, mó cii vɛlɛ vɔsilan kɛmɛ lehiɔɔlu a layàá, mó vialu cuavaa celen: a piaandua a à laandua.
14Mɛɛ Sela cii vɔsilan beleyaa, mó vialu Hebɛr. 15Mɛɛ o velu Hebɛr, mó tosa vɛlɛ vɔsilan kɛmɛ lehiɔɔlu a layàá, mó vialu cuavaa celen: a piaandua a à laandua.
16Mɛɛ Hebɛr cii vɔsilan beleyaa a lahiɔɔlu, mó vialu Pelɛk. 17Mɛɛ o velu Pelɛk, mó tosa vɛlɛ vɔsilan kɛmɛ lehiɔɔlu a beleyaa, mó vialu cuavaa celen: a piaandua a à laandua.
18Mɛɛ Pelɛk cii vɔsilan beleyaa, mó vialu Reu. 19Mɛɛ o velu Reu, mó tosa vɛlɛ vɔsilan kɛmɛ lediin a laŋɔmahiɔɔlu, mó vialu cuavaa celen: a piaandua a à laandua.
20Mɛɛ Reu cii vɔsilan beleyaa a latiɔn, mó vialu Seruk. 21O violɔn Seruk-o kɔɔli, mó tosa vɛlɛ vɔsilan kɛmɛ lediin a laŋɔmmɛw, mó vialu cuavaa celen: a piaandua a à laandua.
22Mɛɛ Seruk cii vɔsilan beleyaa, mó vialu Nahɔr. 23O violɔn Nahɔr-o kɔɔli, mó tosa vɛlɛ vɔsilan kɛmɛ lediin, mó vialu cuavaa celen: a piaandua a à laandua.
24Mɛɛ Nahɔr cii vɔsilan bidiin a laŋɔmahiɔɔlu, mó vialu Tera. 25Mɛɛ o velu Tera, mó tosa vɛlɛ vɔsilan kɛmɛ a tɔ́ a laŋɔmahiɔɔlu, mó vialu cuavaa celen: a piaandua a à laandua.
26Mɛɛ Tera cii vɔsilan belaŋɔmmɛw, mó vialu poaa nda yáá: Abram, Nahɔr a Haran.
27Diola vanaa fula o polale Tera len nin-nda la co lan ni, Tera yɔŋnun kon fuɲaa Abram, Nahɔr a Haran-ndo pɛɛn: mí Haran vialu Lɔt. 28Haran kon mɛi Tera fuɲa ndɔ yoomu, mó vu nɛɛ ndóò velun Ur o lɛŋnde Babilonii len nin-nda. 29Mí Abram yil lanɔɔ, diolan Sarai. Mí Nahɔr bɛɛ yil lanɔɔ, diolan Milka, cua Haran-ndo o va ni. Haran kon koni velu vɛlɛ Yiska ni. 30Sarai ndóò vilu hɔ́ɔ́ le, kani o ve vana vialaa le.
31Mí Tera cua Abram po ndɔ, a Lɔt po ndɔ mama, po Haran-ndo pɛɛn, mó cua vɛlɛ Sarai lanɔɔ Abram po ndɔ, mó faŋan Ur o lɛŋnde Babilonii len nin, mó kɔa a nda o lɛŋnde Kanaan-nden nin. Mɛɛ nda tiiya Haran ciee, má cal lon. 32Tera ciiyo vɔsilan kɛmɛ lediin a laŋuɛɛnu, mó vu Haran ciee lon.
Valið núna:
O Kandɔɔ 11: BKG
Áherslumerki
Deildu
Afrita
Want to have your highlights saved across all your devices? Sign up or sign in
© Alliance Biblique en Guinée