GÉNESIS 40
40
José oikuaauka mókoi mbaɨu reta
1Opa ma kuaekuae reta oasa güire, mburuvicha guasu oëɨ vino pe vae jare mbɨyape iyapoa, ombaeyavɨ reta mburuvicha guasu Egipto pegua kotɨ. 2Jare Faraón iyarasɨ kuae mókoi tembiokuai ruvicha reta kotɨ; oporoëɨ vae reta itenondegua kotɨ jare mbɨyape iyapoa reta itenondegua kotɨ, 3jare oñono tembipɨɨrɨru pe, mburuvicha guasu isundaro reta juvicha jëta pe oï vae pe, José oïa pe. 4Jare jókuae sundaro ruvicha oyókuai José oyangareko vaerä jókuae mókoi tembipɨɨ reta re, jare jae oyangareko jese reta; jare yogüɨreko reta mbovɨ ara rupi tembipɨɨrɨru pe.
5Jare mburuvicha guasu oëɨ vae jare mbɨyape iyapoa tembipɨɨrä ñogüɨnoi vae. Metei pɨ̈tu opaɨu reta mókoi reve, jare kuae ipaɨu ñavo oime mbae oipota jei vae. 6Jare José ou ndeimbove omae jese reta yave, oecha ipɨatɨtɨ yae ñogüɨnoi; 7jare jae oparandu kuae Faraón jembiokuai ruvicha reta ñogüɨnoi jae ndive tembipɨɨrɨru pe vae pe:
—¿Maera pa añave perova ambuaeyee yae peï?
8Jayave jae reta jei chupe:
—Ropaɨu, jare mbaetɨ kia oikuaauka oreve mbae ra oipota jei vae.
Jayave José jei chupe reta:
—Tumpaño ko oikuaaukata mbae ko oipota jei vae. Añave pemombeu cheve.
9Jayave oporoëɨ vae reta itenondegua imiari ipaɨu re José pe, körai:
—Chepaɨu pe aecha temitɨ uva oï cheróvai, 10jare temitɨ re oï mboapɨ jäka; jare jeñɨi rami, jare ipotɨ, jare ou yagüɨye iagüe. 11Jare chepo pe oï Faraón ikopa, jare aipɨɨ uva iagüe jare aitɨami Faraón ikopa pe, jare che amee kopa Faraón ipo pe.
12Jayave José jei chupe:
—Kuae ko jae ndepaɨu oipota jei vae: Jókuae mboapɨ uva jäka reta mboapɨ ara ko, 13mboapɨ araa pe Faraón iñɨ̈rota ndeve jare neñono yeta ndeparavɨkɨa pe; jökorai remee yeta kopa Faraón ipo pe, oporoëɨ vaerä reiko yave reyapose rami. 14Nemaendúa cheré kuri reï kavi ye ma yave, romoñera ndeporoparareko vaerä cheré kuri jare nemiari cheré Faraón pe, cherenoe kuae tembipɨɨrɨru güi. 15Echa cheñomi ko hebreo reta iɨvɨ güi; jare mbaetɨ tëi mbae ayapo aï vaerä kuae tembipɨɨrɨru pe.
16Oecha yave mbɨyape iyapoa reta itenondegua, kërai José imiari mbae ikavi vae re jókuae ïru pe yave, jei chupe:
—Che apaɨu vi, cheke pe aecha mboapɨ kanata raɨ tïiasɨ vae cheäka re. 17Jare kanata raɨ iárambo ete oï vae pe, oï opaño oyea yea mbɨyape jëe ngatugüe Faraón peguarä; ërei güɨra reta jou kanata raɨ güi cheäka regua güi.
18Jayave José omoë iñee jare jei chupe:
—Jókuae mboapɨ kanata raɨ repaɨu jese vae, mboapɨ ara ko, 19mboapɨ araa pe Faraón ndeyuvɨukata ɨvɨra re, jare chucha reta opata ndereu.
20Mboapɨa ara pe Faraón iara oväe, año oupitɨ ye vae, jare mburuvicha guasu oyapo arete opaete jembiokuai reta pe; jare omondo güɨnoeuka tembipɨɨrɨru güi oporoëɨ vae reta itenondegua jare mbɨyape iyapoa reta itenondegua, opaete vae jembiokuai reta jóvai. 21Jare oporoëɨ vae reta itenondegua omondo ye iparavɨkɨa pe; jökorai kuae omee ye Faraón ipo pe kopa; 22ërei mbɨyape iyapoa reta itenondegua oyuvɨuka, José omombeu chupe rami. 23Jare oporoëɨ vae reta itenondegua mbaetɨ imaendúa José re, ñakañɨ chugüi.
Nke Ahọpụtara Ugbu A:
GÉNESIS 40: GUABD
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Biblia DC Guaraní Bolivia © Bolivian Bible Society, 2001.