Maˍkuˆ li‸ 13
13
Bon yehˬ lonˉ gʼa luˬ tuˬ ve awˬ lawn
1Yeˍsuˆ bon yehˬ lonˉ awˬ hkʼaw lo tawˆ kʼai ve teˇ yanˇ, yawˇ ve awˬ la‸ gʼawˇ teˇ gʼaˇ yawˇ hta‸ kʼoˆ piˇ ve, Saˍ la‸-oˬ, nyi sheˍ. Hkʼaˬ ma da‸ jaˇ ve haˉ pui teˇ hpaˍ leh, hkʼaˬ ma da‸ jaˇ ve yehˬ teˇ hpaˍ cawˬ ve le.
2Yeˍsuˆ yawˇ hta‸ kʼaw‸ kʼoˆ piˇ ve, Uiˍ jaˇ ve yehˬ chi teˇ hpaˍ hta‸ nawˬ mawˬ laˇ. Choˬ kaˬ lo haˉ pui teˇ shiˍ awˬ hkʼoˆ teˇ shiˍ maˇ cawˬ htaˇ hkʼa gaˬ shu te luˬ tuˬ yoˬ teh‸ kʼoˆ ve yoˬ.
Awˬ leh meuˇ gaˬ paˇ neˇ htaˇ ve awˬ heˆ teˇ hpaˍ
3Yeˍsuˆ lehˬ, bon yehˬ lonˉ awˬ gʼuˇ suhˍ teˇ hpawˇ, Shaˍlonˍ hkʼaw hkʼoˆ lo mui chehˇ htaˇ, Peˍtruˆ, Yaˍkoˆ, Yoˇhanˬ leh Anˍdrehˍ hui laˬ leh, 4Awˬ ceuˬ oˇ ve teˇ hpaˍ hkʼaˬ htaˆ hpeh‸ la tuˬ le. Chi hkʼa peu-eˬ hpeh‸ la paˇ neˇ ve teˇ yanˇ awˬ heˆ hkʼaˬ hkʼe hpeh‸ tawˆ la tuˬ ve le teh‸, yawˇ hta‸ a yehˉ na nyi ve yoˬ.
5Yeˍsuˆ yawˇ hui hta‸ kʼaw‸ kʼoˆ piˇ ve, Chaw teˇ gʼaˇ ka‸ nawˬ hui hta‸ maˇ gʼa heˍ yuˬ beˬ yuˬ tuˬ shaˍ ti‸ taˍ-o‸. 6Chaw maˇ maˇ ngaˬ ve awˬ meh hta‸ pfuhˇ laˬ leh, Ngaˬ lehˬ yawˇ yoˬ teh‸ kʼoˆ leh, chaw maˇ maˇ hta‸ heˍ yuˬ beˬ yuˬ tuˬ yoˬ. 7Ma‸ bawˆ ve leh bawˆ da‸-a teh‸ te chehˇ ve awˬ lawn hta‸ nawˬ hui gʼa kaˇ ve teˇ yanˇ, nawˬ hui kawˆ cheˇ ve nyi ma taˇ cawˬ piˇ. Awˬ ceuˬ chi teˇ hpaˍ gʼa hpeh‸ la tuˬ yoˬ. Ya‸ hkʼaˇ, awˬ leh meuˇ maˇ gaˬ sheˍ. 8Chaw teˇ ceuˬ leh teˇ ceuˬ, mvuhˇmiˬ teˇ peˆ leh teˇ peˆ ya‸ da‸ jiˆ da‸ tuˬ yoˬ.#Isy 19:2 Chehˇ kuiˬ teˇ kaˬ peuˬ teˇ kaˬ awˬ hkʼaw lo miˬ hiˆ la tuˬ yoˬ. Meu‸ ve kaˆ ve htawˇ cawˬ la tuˬ yoˬ. Awˬ ceuˬ chi teˇ hpaˍ lehˬ, tu‸ ve hkanˍ ve awˬ hkuiˉ puiˍ ceh tiˉ hpeh‸ sheˍ ve yoˬ.
9Nawˬ hui a shu yawˇ awˬ to hta‸ shaˍ ti‸ te-o. Awˬ lawn kʼo, jehˬ shehˍ hpaˇ awˬ moˍ teˇ hpaˍ ve la‸ sheh awˬ hkʼaw lo shu nawˬ hui hta‸ chiˇ a‸ piˇ tuˬ yoˬ. Bon yehˬ teˇ hpaˍ awˬ hkʼaw lo shu nawˬ hui hta‸ jaw‸ tuˬ yoˬ. Ngaˬ htaˬ pa taw nawˬ hui mvuhˇmiˬ jawˇmawˇ lonˉ leh hkunˉ hawˉ hkanˇ teˇ hpaˍ mehˆ gʼuˇ suhˍ gʼa huˉ taˍ leh, yawˇ hui mehˆ gʼuˇ suhˍ shaˉ hkiˆ gʼa hkanˍ tuˬ yoˬ. 10Ha lehˬ ve bon hkawˇ chi, chaw ceuˬ hkʼa peu-eˬ hta‸ awˉ lawˉ gʼa maˍ piˇ tuˬ yoˬ. 11Nawˬ hui hta‸ suhˉ jehˬ laˇ tuˬ shu nawˬ hui hta‸ chiˇ a‸ piˇ ve teˇ yanˇ, tawˇ hkʼaˬ hkʼe gʼa yaw tuˬ ve hta‸ taˇ dawˇ hkiˉ. Awˬ yanˇ oˇ ve awˬ hkʼaw lo nawˬ hui hta‸ tawˇ yaw tcuh laˇ ve hkʼe ceh tiˉ yaw-o. Awˬ lawn kʼo, tawˇ yaw shehˍ hpaˇ lehˬ, nawˬ hui maˇ heˆ, daˬ ve kehˬ ve Awˬ ha hpu yoˬ. 12Oˇ htaˇ, awˬ viˉ awˬ nyi teˇ gʼaˇ leh teˇ gʼaˇ suh tuˬ chiˇ a‸ da‸ tuˬ yoˬ. Awˬ pa htawˇ, a shu yawˇ ve yaˇ hta‸ chiˇ a‸ tuˬ yoˬ. Yaˇ paˍ yaˇ miˇ teˇ hpaˍ htawˇ, a shu yawˇ ve awˬ pa awˬ e hta‸ hpfuhˆ leh tiˇ pehˍ tcuh tuˬ yoˬ. #Mlk 7:6 13Ngaˬ ve awˬ meh hta‸ pa taw chaw hkʼa peu-eˬ nawˬ hui hta‸ canˇ tuˬ yoˬ. Ya‸ hkʼaˇ, awˬ leh hkʼa gaˬ yeˬ chehˇ ve chaw lehˬ, htaiˍ hkʼaw‸ ve hta‸ gʼa tuˬ yoˬ.
14Te luˬ te sheˆ puiˉ ve cha‸ chiˆ ve awˬ ceuˬ lehˬ, maˇ chehˇ cawˇ ve chehˇ kuiˬ lo chehˇ ve hta‸ nawˬ hui gʼa mawˬ ve teˇ yanˇ, (li‸ chi hta‸ gʼaw ve chaw lehˬ shiˍ-o‸,) oˇ htaˇ Yuˇda‸ mvuhˇmiˬ awˬ hkʼaw lo chehˇ ve chaw hui hkʼaw hkʼoˆ lawˬ hkʼoˆ lo hpaw-e loˬ. Yehˬ awˬ hkʼoˆ lo chehˇ ve chaw taˇ kʼaw‸ ya‸-e. #Dyl 9:27 15Chi hkʼoˆ ka‸, mawˇ teˇ ceuˬ ceuˬ ca yuˬ tuˬ, yehˬ awˬ hkʼaw lo taˇ lo‸-e. 16Heh hkʼaw chehˇ ve chaw htawˇ, a shu yawˇ ve veu‸ kʼaˇ ca kʼaw‸ yuˬ tuˬ, taˇ kʼo‸-e. 17Awˬ yanˇ oˇ ve awˬ hkʼaw lo yaˇ hu ma leh cuˉ dawˬ ve yaˇ ehˉ cawˬ ve chaw hui lehˬ, gʼa dawˇ haˍ jaˇ tuˬ yoˬ. 18Awˬ yanˇ oˇ ve lehˬ, mvuhˇ kaˆ yanˇ maˇ gʼa cawˇ tuˬ bon lawˬ-o‸. 19Awˬ lawn kʼo, miˬguiˬ hta‸ Gʼuiˬsha te hpanˍ ve teˇ nyi hta‸ tanˬ leh ya‸ nyi hkʼa gaˬ maˇ hpeh‸ la jaw sheˍ leh, awˬ hkʼaw‸ nawˉ ka‸ maˇ kʼaw‸ hpeh‸ la tuˬ ve tu‸ jaˇ hkanˍ jaˇ ve teˇ ceuˬ lehˬ, awˬ nyi awˬ haˉ oˇ ve teˇ hpaˍ awˬ hkʼaw lo hpeh‸ la tuˬ yoˬ. 20Awˬ yanˇ oˇ ve hta‸ Jawˇmawˇ Gʼuiˬsha maˇ ngeh piˇ lawˬ ve kʼo, chaw teˇ gʼaˇ ka‸ ponˬ maˇ hpeh‸. Ya‸ hkʼaˇ, yawˇ leuˆ yuˬ taˍ ve chaw hui hta‸ pa taw, awˬ yanˇ oˇ ve hta‸ yawˇ ngeh piˇ lawˬ tuˬ yoˬ.
21Oˇ htaˇ, chaw teˇ gʼaˇ gʼaˇ lehˬ, Nyi-o, Hkri‸ choˬ kaˬ lo chehˇ taˍ ve yoˬ, oˇ kaˬ lo chehˇ taˍ ve yoˬ teh‸ nawˬ hui hta‸ kʼoˆ laˇ ve kʼo, taˇ yonˍ. 22Awˬ lawn kʼo, maˇ heˆ heˆ ve Hkri‸ leh maˇ heˆ heˆ ve tcuh kaˍ paˍ teˇ hpaˍ tawˆ la tuˬ yoˬ. Yawˇ hui lehˬ, hpeh‸ ve kʼo leuˆ yuˬ taˍ ve chaw teˇ hpaˍ hta‸ heˍ yuˬ beˬ yuˬ gʼa tuˬ, anˇ tuˬ leh awˬ heˆ teˇ hpaˍ hta‸ te maˍ piˇ tuˬ yoˬ. 23Nawˬ hui shaˍ ti‸ te-o. Maˇ hpeh‸ la sheˍ htaˇ ka‸ teˇ ceuˬ le le ngaˬ nawˬ hui hta‸ kʼoˆ taˉ laˇ ve yoˬ.
Chaw yaˇ ve Yaˇ hpu kʼaw‸ ya‸ la tuˬ ve
24Tu‸ ve hkanˍ ve awˬ yanˇ oˇ ve peuˬ hkʼaw‸ nawˉ, awˬ nyi awˬ haˉ oˇ ve teˇ hpaˍ awˬ hkʼaw lo, mvuhˇ nyi naˆ ho‸ kʼai leh, ha pa htawˇ awˬ gʼeuˆ maˇ kʼaw‸ ba. 25Meu‸ keu shiˍ teˇ hpaˍ mvuhˇ naw ma lo ce la leh, mvuhˇ naw ma lo cawˬ ve kanˇ paˆ teˇ hpaˍ htawˇ hiˆ hiˆ naˇ naˇ kʼai tuˬ yoˬ. #Isy 13:10, 34:4 26Oˇ htaˇ, chaw yaˇ ve Yaˇ hpu lehˬ, awˬ me‸ awˬ hponˇ leh uiˍ jaˇ ve kanˇ paˆ cawˬ ve awˬ hkʼaw lo moˬ ciˇ leh ya‸ la ve hta‸ yawˇ hui gʼa mawˬ tuˬ yoˬ. #Dyl 7:13 27Oˇ htaˇ mvuhˇ awˇ ceˍ miˬ awˍ hpawˇ lo, miˬguiˬ awˬ leh teˇ kaˬ te leh mvuhˇ naw ma awˬ leh teˇ kaˬ hkʼa gaˬ, mvuhˇ naw ma tcuh yaˇ teˇ hpaˍ hta‸ yawˇ kʼai tcuh leh, yawˇ leuˆ yuˬ taˍ ve chaw hui hta‸ hpawnˬ da‸ piˇ lawˬ tuˬ yoˬ.
28Maˉ nawˆ cehˬ hta‸ tehˆ maˍ ve tawˇ pa haˉ chi hta‸ henˇ yuˬ-o‸. Awˬ tuˍ tuˍ la leh awˬ caˍ caˍ la ve teˇ yanˇ, mvuhˇ cha hkui yanˇ gaˬ la paˇ neˇ peuˬ ve hta‸ nawˬ hui shiˍ ve yoˬ. 29Chi hkʼa shuˍ shuˍ, awˬ ceuˬ chi teˇ hpaˍ hpeh‸ la chehˇ ve hta‸ nawˬ hui gʼa mawˬ ve teˇ yanˇ, yawˇ lehˬ yehˬmiˉhpe‸ awˬ paˇ lo gaˬ la peuˬ ve hta‸ nawˬ hui shiˍ-o‸. 30Ngaˬ nawˬ hui hta‸ awˬ tehˬ awˬ na kʼoˆ laˇ ve, chi teˇ co maˇ ponˬ kʼai sheˍ htaˇ ka‸, awˬ ceuˬ chi hkʼa peu-eˬ hpeh‸ la tuˬ yoˬ. 31Mvuhˇ naw ma leh miˬ naˆ ma mehˉ kʼai tuˬ yoˬ. Ya‸ hkʼaˇ, ngaˬ ve tawˇ hkawˇ lehˬ, maˇ mehˉ kʼai taˬ.
32Awˬ nyi awˬ haˉ oˇ ve hta‸ chaw teˇ gʼaˇ ka‸ maˇ shiˍ. Mvuhˇ naw ma tcuh yaˇ hui ka‸, Yaˇ hpu ka‸ maˇ shiˍ. Awˬ pa teˇ gʼaˇ tiˉ shiˍ ve yoˬ. 33Awˬ yanˇ oˇ ve hkʼaˬ htaˆ gaˬ la tuˬ ve hta‸ nawˬ hui maˇ shiˍ ve pa taw, shaˍ ti‸ te leh shaw taˍ-o‸. 34Awˬ yanˇ oˇ ve lehˬ, chaw teˇ gʼaˇ awˬ kaˍ awˬ nu mvuhˇmiˬ lo kʼai ve hta‸ shuˍ ve yoˬ. Yawˇ ve yehˬ hkʼaw tawˆ kʼai htaˇ, yawˇ ve awˬ ceˬ teˇ gʼaˇ peuˬ teˇ gʼaˇ hta‸ a shu yawˇ ve kanˉ chiˇ a‸ piˇ taˉ leh, yehˬ miˉ shaw shehˍ hpaˇ hta‸ htawˇ hkʼa deh‸ shaw taˍ tuˬ tawˇ piˇ taˉ ve yoˬ. 35Hkʼe te leh, yehˬ shehˍ hpaˇ kʼaw‸ gaˬ la tuˬ ve lehˬ, mvuhˇ hpeu‸ htaˇ leh naˍ, shehˍ kʼaw hkui htaˇ leh naˍ, gʼaˆ hpfuh bvuhˬ htaˇ leh naˍ, mvuhˇ shawˉ htaˇ leh naˍ, hkʼaˬ htaˆ kʼaw‸ gaˬ la tuˬ ve hta‸ nawˬ hui maˇ shiˍ ve pa taw, shaw taˍ-o‸. 36Hkʼe maˇ heˆ kʼo, yawˇ teˇ cawˬ haˉ kʼaw‸ gaˬ la leh, nawˬ hui zuh‸ muiˉ kʼa chehˇ ve hta‸ yawˇ gʼa mawˬ tuˬ yoˬ. 37Nawˬ hui hta‸ ngaˬ kʼoˆ laˇ ve hkʼe, chaw hkʼa peu-eˬ hta‸ ngaˬ kʼoˆ piˇ ve, shaw taˍ-o‸ teh‸, yawˇ hui hta‸ kʼoˆ piˇ ve yoˬ.
Nke Ahọpụtara Ugbu A:
Maˍkuˆ li‸ 13: LHBE
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Lahu Bible Edited © Thailand Bible Society and Bible Society of Myanmar, 2010, 2020.