Luˉka‸ li‸ 7
7
Yeˍsuˆ ma‸ poˍ ve awˬ ceˬ hta‸ gu na-e piˇ ve
1Yeˍsuˆ lehˬ, chaw chi ma ve hta‸ tawˇ hkawˇ oˇ ve hkʼa peu-eˬ maˍ piˇ peuˬ hkʼaw‸ nawˉ, Kaˍpeˍneˍonˍ venˇ hkʼaw lo kʼai ve yoˬ. 2Oˇ htaˇ ma‸ poˍ teˇ gʼaˇ, yawˇ ha‸ ve awˬ ceˬ teˇ gʼaˇ naˬ leh suh la paˇ neˇ ve yoˬ. 3Ma‸ poˍ oˇ ve lehˬ, Yeˍsuˆ awˬ lawn gʼa kaˇ htaˇ, yawˇ ve awˬ ceˬ hta‸ gu na-e laˇ tuˬ, Yuˇda‸ chaw hui ve awˬ hoˉ chaw mawˇ teˇ hpaˍ hta‸ kʼai tcuh leh Yeˍsuˆ hta‸ ca lawˬ hkawˉ tcuh ve yoˬ. 4Yawˇ hui Yeˍsuˆ geh gaˬ la htaˇ, yawˇ hui yawˇ hta‸ gʼaˇ hte‸ lawˬ hkawˉ leh kʼoˆ ve, Nawˬ lehˬ yawˇ hta‸ chi hkʼe te piˇ tuˬ yawˇ keunˍ ve chaw teˇ gʼaˇ hpeh‸ ve yoˬ. 5Awˬ lawn kʼo, yawˇ ngaˬ hui ve chaw ceuˬ hta‸ ha‸ leh, ngaˬ hui awˬ pon bon yehˬ te laˇ peuˬ teh‸ kʼoˆ piˇ ve yoˬ.
6Hkʼe te leh, Yeˍsuˆ yawˇ hui geh kʼai ve yoˬ. Ma‸ poˍ ve yehˬ hta‸ maˇ vuiˇ maˇ neˇ kuiˬ lo gaˬ ve teˇ yanˇ, ma‸ poˍ lehˬ yawˇ ve awˬ chawˇ teˇ hpaˍ hta‸ kʼai tcuh leh, Jawˇ mawˇ-oˬ, nawˬ awˬ to hkeu‸ tuˬ taˇ te. Awˬ lawn kʼo, ngaˬ ve yehˬ hkʼaw nawˬ lo‸ la ve hta‸ ngaˬ maˇ keunˍ. 7Chi hta‸ pa taw, ngaˬ lehˬ nawˬ geh lo laˬ maˇ keunˍ teh‸ dawˇ ve yoˬ. Ya‸ hkʼaˇ nawˬ tawˇ teˇ peu-eˬ ceh yaw ve ka‸, ngaˬ ve awˬ ceˬ na-e la tuˬ yoˬ. 8Awˬ lawn kʼo, ngaˬ lehˬ shu ve kanˇ paˆ awˬ hawˉ lo chehˇ leh, ngaˬ awˬ hawˉ lo ka‸ ma‸ yaˇ teˇ hpaˍ cawˬ ve yoˬ. Teˇ gʼaˇ hta‸, Kʼai-o teh‸ kʼoˆ piˇ ve kʼo, yawˇ kʼai ve yoˬ. Teˇ gʼaˇ hta‸, Laˬ-o‸ teh‸ kʼoˆ piˇ ve kʼo, yawˇ laˬ ve yoˬ. Ngaˬ ve awˬ ceˬ paˍ hta‸ htawˇ, Chi hta‸ te-o teh‸ kʼoˆ piˇ ve kʼo, yawˇ te ve yoˬ teh‸ kʼoˆ piˇ tcuh ve yoˬ.
9Tawˇ chi hta‸ Yeˍsuˆ gʼa kaˇ htaˇ yawˇ anˇ leh, yawˇ awˬ hkʼaˇ suh kʼai ve chaw awˬ moˍ lonˉ hta‸ hpfuhˆ nyi leh, Ngaˬ nawˬ hui hta‸ kʼoˆ laˇ ve, Iˉsaˍreˍlaˆ chaw awˬ hkʼaw lo ka‸ chi taw taw yonˍ ve hta‸ ngaˬ maˇ gʼa mawˬ jaw sheˍ teh‸ kʼoˆ ve yoˬ.
10Kʼai tcuh ve chaw teˇ hpaˍ yehˬ lo kʼaw‸ gaˬ la ve teˇ yanˇ, awˬ ceˬ oˇ ve na-e la peuˬ ve hta‸ yawˇ hui gʼa mawˬ ve yoˬ.
Mehˇchawˇma ve yaˇ paˍ hta‸ Yeˍsuˆ kʼaw‸ te‸ tu la piˇ ve
11Oˇ ve awˬ hkʼaw‸ nawˉ maˇ maw maw, Naˍiˉnaˆ meh ve venˇ lo yawˇ kʼai leh, yawˇ ve awˬ la‸ gʼawˇ teˇ hpaˍ leh chaw awˬ moˍ lonˉ htawˇ yawˇ geh teˇ geh kʼai ve yoˬ. 12Venˇ taˍ meu‸ hpe‸ awˬ paˇ lo yawˇ gaˬ la ve teˇ yanˇ, suh taˍ ve chaw teˇ gʼaˇ hta‸ ca tuˍ tuˬ, shu taˆ tawˆ la chehˇ ve yoˬ. Suh taˍ ve chaw chi teˇ gʼaˇ ve awˬ e lehˬ, mehˇ chawˇ ma hpeh‸ leh, yaˇ paˍ chi teˇ gʼaˇ tiˉ cawˬ ve yoˬ. Mehˇchawˇma oˇ ve geh teˇ geh venˇ yaˇ teˇ hpaˍ htawˇ awˬ moˍ lonˉ te laˬ chehˇ ve yoˬ. 13Jawˇmawˇ Yeˍsuˆ lehˬ, yaˇ miˇ oˇ ve hta‸ gʼa mawˬ ve teˇ yanˇ, yawˇ hta‸ ha kʼaˉ jaˇ leh, Taˇ hawˬ teh‸ kʼoˆ piˇ ve yoˬ. 14Yeˍsuˆ lehˬ awˬ paˇ lo kʼai leh, taˆ tuˬ hta‸ htawˇ leh, chaw taˆ shehˍ hpaˇ teˇ hpaˍ huˉ sheˬ ve yoˬ. Yeˍsuˆ kʼoˆ ve, Chaw haˉ paˍ-oˬ, ngaˬ nawˬ hta‸ kʼoˆ laˇ ve, tu-o teh‸ kʼoˆ piˇ ve yoˬ. 15Oˇ htaˇ, suh taˍ ve chaw tu mui leh tawˇ yaw ve yoˬ. Yeˍsuˆ lehˬ, awˬ e ve la‸ sheh awˬ hkʼaw lo yawˇ hta‸ a‸ piˇ ve yoˬ.
16Chaw hkʼa peu-eˬ kawˆ jaˇ leh, Gʼuiˬsha hta‸ chiˇ uiˍ chiˇ mvuh leh kʼoˆ ve, Gʼuiˬsha ve tcuh kaˍ paˍ lonˉ ngaˬ hui geh tawˆ la peuˬ. Gʼuiˬ sha lehˬ, yawˇ ve chaw teˇ hpaˍ hta‸ ca nyi la peuˬ teh‸ yawˇ hui kʼoˆ ve yoˬ.
17Yeˍsuˆ te ve awˬ lawn chi Yuˇda‸ mvuhˇmiˬ hkʼa peu-eˬ leh, awˬ paˇ awˬ kui teˇ kaˬ le le lo bvuhˬ kʼai ve yoˬ.
Yoˇhanˬ lehˬ yawˇ ve awˬ la‸ gʼawˇ hui hta‸ peu laˇ ve
18Oˇ htaˇ Yoˇhanˬ ve awˬ la‸ gʼawˇ teˇ hpaˍ lehˬ, awˬ lawn oˇ ve hkʼa peu-eˬ Yoˇhanˬ hta‸ ca hto piˇ ve yoˬ. 19Yoˇhanˬ lehˬ, yawˇ ve awˬ la‸ gʼawˇ nyiˇ gʼaˇ hta‸ kuˬ yuˬ leh, Jawˇmawˇ Yeˍsuˆ geh kʼai tcuh leh, Nawˬ lehˬ laˬ tuˬ ve chaw teˇ gʼaˇ yoˬ laˇ. Maˇ heˆ kʼo, awˬ kaˍ awˬ nu teˇ gʼaˇ hta‸ ngaˬ hui gʼa dawˇ law tuˬ sheˍ laˇ teh‸, yawˇ hta‸ ca na nyi tcuh ve yoˬ.
20Chaw oˇ ve nyiˇ gʼaˇ Yeˍsuˆ geh gaˬ la ve teˇ yanˇ, Nawˬ lehˬ laˬ tuˬ ve chaw teˇ gʼaˇ yoˬ laˇ. Maˇ heˆ kʼo, awˬ kaˍ awˬ nu teˇ gʼaˇ hta‸ ngaˬ hui gʼa dawˇ law tuˬ sheˍ laˇ teh‸, nawˬ hta‸ na nyi tuˬ baˆtiˆsaˬ piˇ paˍ Yoˇhanˬ lehˬ, ngaˬ huiˉ maˬ hta‸ nawˬ geh lo laˬ tcuh laˇ ve yoˬ teh‸ kʼoˆ piˇ ve yoˬ.
21Awˬ yanˇ oˇ ve awˬ hkʼaw lo yawˇ lehˬ, chaw maˇ maˇ ve a naˍ leh naˬ ve gawˬ ve teˇ hpaˍ hta‸ gu na-e piˇ leh, haiˬ ve neˇ teˇ hpaˍ hta‸ gʼa‸ kʼoˬ piˇ ve yoˬ. Mehˆ cuˉ ve chaw maˇ maˇ hta‸ htawˇ, mehˆ mawˬ la piˇ ve yoˬ. 22Oˇ htaˇ, yawˇ yawˇ huiˉ maˬ hta‸ kʼaw‸ kʼoˆ piˇ ve, Nawˬ huiˉ maˬ hkʼa gʼa kaˇ hkʼa gʼa mawˬ ve teˇ hpaˍ Yoˇhanˬ hta‸ ca hto piˇ-oˆ. Mehˆ cuˉ ve chaw hui mehˆ mawˬ la ve, hkui luˬ ve chaw hui ya‸ kʼaw juˇ kʼai ve, hkiˬ tu‸ keuˆ ve chaw hui da‸ la kehˬ la ve, naˍ paw pawˇ ve chaw hui naˍ paw kaˇ la ve, suh ve chaw hui kʼaw‸ te‸ tu la ve leh, haˍ ve gʼawˇ ve chaw hui htawˇ, ha lehˬ ve bon hkawˇ hta‸ gʼa kaˇ ve yoˬ. 23Ngaˬ hta‸ nyi ma maˇ luˬ ve chaw lehˬ, awˬ bon uiˍ ve yoˬ teh‸ kʼoˆ piˇ ve yoˬ.
24Yoˇhanˬ tcuh peu laˇ ve chaw nyiˇ gʼaˇ kʼo‸-e peuˬ hkʼaw‸ nawˉ, Yeˍsuˆ lehˬ Yoˇhanˬ ve awˬ lawn chaw awˬ moˍ lonˉ teˇ hpaˍ hta‸ kʼoˆ piˇ ve, Nawˬ hui aˬ hto‸ ma hta‸ ca nyi tuˬ heh puiˉ hkʼaw lo kʼai ve le. Mvuhˇ haw meuˆ leh hiˆ hiˆ naˇ naˇ te chehˇ ve lo cehˬ hta‸ laˇ. 25Maˇ heˆ kʼo, aˬ hto‸ ma hta‸ ca nyi tuˬ kʼai ve le. Nuˇ lehˍ ve veu‸ kʼaˇ veu‸ deh ve chaw hta‸ laˇ. Veu‸ da‸ kʼaˇ da‸ leh caˇ da‸ dawˬ da‸ ve chaw hui lehˬ, hkunˉ hawˉ hkanˇ ve hawˉ yehˬ awˬ hkʼaw lo chehˇ ve yoˬ. 26Maˇ heˆ kʼo, aˬ hto‸ ma hta‸ ca nyi tuˬ kʼai ve le. Gʼuiˬsha ve tcuh kaˍ paˍ hta‸ laˇ. Yoˬ, Gʼuiˬsha ve tcuh kaˍ paˍ hta‸ ca nyi ve yoˬ. Yawˇ lehˬ, Gʼuiˬsha ve tcuh kaˍ paˍ a‸ kehˉ uiˍ ve teˇ gʼaˇ hpeh‸ ve yoˬ teh‸ ngaˬ nawˬ hui hta‸ kʼoˆ laˇ ve yoˬ. 27Nyi loˬ. Nawˬ awˬ gʼuˇ suhˍ lo nawˬ ve ya‸ kʼaw hta‸ gu tuˬ, ngaˬ ve tcuh yaˇ hta‸ nawˬ mehˆ gʼuˇ suhˍ lo ngaˬ kʼai tcuh ve yoˬ teh‸ bvuh‸ taˍ ve lehˬ, yawˇ hta‸ kʼoˆ ve yoˬ. #Mlk 3:1 28Ngaˬ nawˬ hui hta‸ kʼoˆ laˇ ve, yaˇ miˇ geh hkʼa paw la ve chaw hui awˬ hkʼaw lo, Yoˇhanˬ a‸ kehˉ uiˍ ve chaw teˇ gʼaˇ ka‸ maˇ cawˬ. Ya‸ hkʼaˇ, Gʼuiˬsha ve mvuhˇmiˬ awˬ hkʼaw lo shu a‸ kehˉ i ve chaw teˇ gʼaˇ lehˬ, yawˇ a‸ kehˉ uiˍ sheˍve yoˬ.
29(Awˬ hkawnˍ shaw paˍ leh chaw hkʼa peu-eˬ gʼa kaˇ htaˇ, Gʼuiˬsha te ve lehˬ, hteˇ jaˇ cawˇ jaˇ teh‸ kʼoˆ ve yoˬ. Yawˇ hui lehˬ Yoˇhanˬ ve baˆtiˆsaˬ hta‸ hkanˍ yuˬ peuˬ ve chaw hpeh‸ ve yoˬ. 30Ya‸ hkʼaˇ, Hpaˍriˍsehˇ teˇ hpaˍ leh awˬ liˇ tawˇ hkawˇ shiˍ paˍ teˇ hpaˍ lehˬ, Gʼuiˬsha yawˇ hui awˬ pon gu taˍ ve teˇ ceuˬ hta‸ baˬ taˉ ve yoˬ. Yawˇ hui lehˬ, Yoˇhanˬ geh baˆtiˆsaˬ maˇ hkanˍ yuˬ.)
31Hkʼe te leh, chaw chi teˇ co-e hta‸ aˬ hto‸ ma yuˬ leh gʼa tehˆ maˍ tuˬ le. Yawˇ hui aˬ hto‸ ma hta‸ shuˍ da‸ ve le. 32Chaw chi teˇ co-e lehˬ, Nawˬ hui awˬ pon ngaˬ hui nawˍ meuˆ htawˇ, nawˬ hui kʼaˍ maˇ hkʼeˆ. Ngaˬ hui paˆ hawˬ ve htawˇ, nawˬ hui maˇ dawˇ haˍ, teh‸ tcuh hkʼaw mui taˍ leh teˇ gʼaˇ leh teˇ gʼaˇ kuˬ da‸ chehˇ ve yaˇ ehˉ teˇ hpaˍ hta‸ shuˍ ve yoˬ. 33Awˬ lawn kʼo, baˆtiˆsaˬ piˇ paˍ Yoˇhanˬ laˬ leh hkaoˍmonˇ maˇ caˇ leh a pehˉ meuˇ gʼuiˬ maˇ dawˬ ve pa taw, Yawˇ lehˬ neˇ geh ve chaw yoˬ teh‸ nawˬ hui kʼoˆ ve yoˬ. 34Chaw yaˇ ve Yaˇ hpu laˬ leh caˇ ve dawˬ ve pa taw, Chaw chi lehˬ, caˇ leuˉ dawˬ leuˉ ve chaw, a pehˉ meuˇ gʼuiˬ dawˬ ponˬ dawˬ leuˉ ve chaw, awˬ hkawnˍ shaw paˍ leh venˇbaˆ yaˇ hui hta‸ awˬ chawˇ teˇ ve chaw yoˬ teh‸, nawˬ hui kʼaw‸ kʼoˆ ve yoˬ. 35Ya‸ hkʼaˇ cuˇ yiˍ maˍ yiˍ teˇ ceuˬ lehˬ, hteˇ ve cawˇ ve yoˬ teh‸ yawˇ ve awˬ yaˇ awˬ duˬ hkʼa peu-eˬ hta‸ pa taw shu gʼa shiˍ ve yoˬ teh‸, Yeˍsuˆ kʼoˆ piˇ ve yoˬ.
Siˉmonˍ meh ve Hpaˍriˍsehˇ teˇ gʼaˇ ve aˉ hkʼaw lo Yeˍsuˆ awˍ caˇ ve
36Hpaˍriˍsehˇ teˇ gʼaˇ lehˬ, yawˇ geh awˍ caˇ tuˬ Yeˍsuˆ hta‸ kuˬ ve yoˬ. Hkʼe te leh, Hpaˍriˍsehˇ oˇ ve aˉ hkʼaw lo yawˇ lo‸-e leh mui caˇ ve yoˬ. 37Hpaˍriˍsehˇ ve aˉ hkʼaw lo Yeˍsuˆ mui caˇ chehˇ ve hta‸ venˇ oˇ ve awˬ hkʼaw lo chehˇ ve haiˬ ve yaˇ miˇ teˇ gʼaˇ gʼa shiˍ ve teˇ yanˇ, naˍ manˇ hawnˉ keu taˍ ve hpuˉ-ehˍ ve haˉ pui kaw teˇ maˬ yuˬ laˬ leh, 38Yeˍsuˆ awˬ hkʼaw‸ nawˉ hpawˇ hkui sheh paˇ lo huˉ taˍ leh hawˬ chehˇ ve yoˬ. Yawˇ ve mehˆ gʼuiˬ Yeˍsuˆ ve hkui sheh hta‸ jaˆ pfuhˍ leh, yawˇ ve uˉ hkeh mvuh yuˬ shiˆ ve yoˬ. Peuˬ leh, Yeˍsuˆ ve hkui sheh hta‸ boˆ nu leh, naˍ manˇ hawnˉ shehˍ piˇ ve yoˬ. 39Yeˍsuˆ hta‸ kuˬ ve Hpaˍriˍsehˇ teˇ gʼaˇ chi hta‸ gʼa mawˬ ve teˇ yanˇ, yawˇ ve nyi ma hkʼaw dawˇ ve, Chaw chi lehˬ, Gʼuiˬsha ve tcuh kaˍ paˍ hpeh‸ ve kʼo, yawˇ hta‸ htawˇ chehˇ ve yaˇ miˇ chi a shu hpeh‸ ve leh, hkʼaˬ hkʼe ve yaˇ miˇ hpeh‸ ve hta‸ yawˇ shiˍ tuˬ yoˬ. Awˬ lawn kʼo, yaˇ miˇ chi lehˬ haiˬ ve yaˇ miˇ hpeh‸ ve yoˬ teh‸ yawˇ dawˇ ve yoˬ.
40Yeˍsuˆ kʼaw‸ kʼoˆ ve, Siˉmonˍ-oˬ, ngaˬ nawˬ hta‸ kʼoˆ laˇ tuˬ teˇ ceuˬ cawˬ ve yoˬ teh‸ yawˇ hta‸ kʼoˆ piˇ htaˇ,
Saˍ la‸-oˬ, kʼoˆ laˇ-oˆ teh‸, Siˉmonˍ kʼaw‸ kʼoˆ piˇ ve yoˬ.
41Yeˍsuˆ kʼoˆ ve, Hpu chiˇ piˇ shehˍ hpaˇ teˇ gʼaˇ geh jeˬ pfuhˇ paˍ nyiˇ gʼaˇ cawˬ ve yoˬ. Teˇ gʼaˇ jeˬ ngaˇ ha hteh‸ cawˬ leh teˇ gʼaˇ jeˬ ngaˇ chi hteh‸ cawˬ ve yoˬ. 42Yawˇ huiˉ maˬ lehˬ, jeˬ kʼaw‸ shaiˍ tuˬ maˇ cawˬ ve pa taw, hpu chiˇ piˇ shehˍ hpaˇ lehˬ, yawˇ huiˉ maˬ nyiˇ gʼaˇ gʼaˇ ve jeˬ hta‸ ponˬ piˇ ve yoˬ. Hkʼe te leh, yawˇ huiˉ maˬ awˬ hkʼaw lo hkʼaˬ ve teˇ gʼaˇ yawˇ hta‸ leuˉ leh ha‸ tuˬ ve le teh‸ na nyi ve yoˬ.
43Siˉmonˍ kʼaw‸ kʼoˆ ve, Ngaˬ dawˇ ve, jeˬ cawˬ maˇ ve hta‸ gʼa ponˬ ve chaw teˇ gʼaˇ lehˬ, yawˇ hta‸ leuˉ leh ha‸ tuˬ yoˬ teh‸ kʼoˆ piˇ ve teˇ yanˇ, Nawˬ dawˇ taˍ ve hkʼe cawˇ ve yoˬ teh‸, Yeˍsuˆ yawˇ hta‸ kʼaw‸ kʼoˆ piˇ ve yoˬ.
44Oˇ htaˇ, yaˇ miˇ oˇ ve hta‸ yawˇ hpfuhˆ nyi leh Siˉmonˍ hta‸ kʼoˆ piˇ ve, Yaˇ miˇ chi hta‸ nawˬ mawˬ laˇ. Nawˬ ve aˉ hkʼaw lo ngaˬ lo‸ la htaˇ, ngaˬ hkui sheh tsuhˇ tuˬ nawˬ iˉ kaˆ maˇ pe‸ laˇ. Ya‸ hkʼaˇ yaˇ miˇ chi lehˬ, yawˇ ve mehˆ gʼuiˬ ngaˬ ve hkui sheh hta‸ jaˆ pfuhˍ leh, yawˇ ve uˉ hkeh mvuh yuˬ shiˆ laˇ peuˬ. 45Nawˬ ngaˬ hta‸ maˇ boˆ nu. Ya‸ hkʼaˇ yawˇ lehˬ, ngaˬ lo‸ la ve teˇ hkui te leh, ngaˬ ve hkui sheh hta‸ hkʼaˬ htaˆ ka‸ boˆ nu tcuhˉ taˍ ve yoˬ. 46Nawˬ ngaˬ ve oˉ kʼoˍ hta‸ naˍ manˇ maˇ shehˍ laˇ. Ya‸ hkʼaˇ yawˇ lehˬ, ngaˬ ve hkui sheh hta‸ naˍ manˇ shehˍ laˇ peuˬ. 47Chi hta‸ pa taw ngaˬ nawˬ hta‸ kʼoˆ laˇ ve, yawˇ lehˬ venˇbaˆ maˇ jaˇ ve hta‸ gʼa ponˬ leh, ha‸ maˇ ve yoˬ. Venˇbaˆ a ciˉ ceh tiˉ cawˬ leh gʼa ponˬ ve chaw lehˬ, a ciˉ ceh tiˉ ha‸ ve yoˬ teh‸ kʼoˆ piˇ ve yoˬ.
48Yaˇ miˇ oˇ ve hta‸ htawˇ, Nawˬ ve venˇ baˆ teˇ hpaˍ hta‸ hpehˇ hkʼa laˇ peuˬ teh‸ kʼoˆ piˇ ve yoˬ.
49Yawˇ geh teˇ geh mui caˇ chehˇ ve chaw teˇ hpaˍ lehˬ, Venˇbaˆ hta‸ ka‸ hpehˇ hkʼa gʼa ve chaw chi lehˬ, a shu le teh‸, teˇ gʼaˇ leh teˇ gʼaˇ kʼoˆ da‸ ve yoˬ.
50Yeˍsuˆ yaˇ miˇ hta‸ kʼoˆ piˇ ve, Nawˬ yonˍ ve teˇ ceuˬ lehˬ, nawˬ hta‸ htaiˍ hkʼaw‸ laˇ peuˬ. Dawˇ sha gaˇ sha ve awˬ hkʼaw lo kʼo‸-e loˬ.
Nke Ahọpụtara Ugbu A:
Luˉka‸ li‸ 7: LHBE
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Lahu Bible Edited © Thailand Bible Society and Bible Society of Myanmar, 2010, 2020.