San Juan 10
10
Jñꞌoon na tyiꞌquitsiꞌman nquiiꞌhanꞌ ntyja ꞌnaanꞌ teon quinman
1“Jñꞌoon na mayuuꞌ matsjö ndëëhoꞌ, tsꞌan na tyiꞌvaqueeꞌ ꞌndyotsëꞌ teon yuu jon na tooꞌ quinman, veꞌ ncüiichen joo iva juu teonꞌñeen na ngüantyqueꞌ juuhanꞌ, conduihin tsanchꞌuee yo tsan ichꞌuee tyincyo. 2Majoꞌ juu tsꞌan na vantyjeeꞌ quinmanꞌñeen, vaqueeꞌ jon ꞌndyotsëꞌ teon. 3Ndoꞌ tsan na iquen cüenta ꞌndyo juu teonꞌñeen, itsiquinaan jon na ngüenon nquii tsan na vantyjeeꞌ joo choꞌñeen. Ndoꞌ choꞌñeen condye oꞌ jndyeeꞌ jon, icüjiꞌ jon nguee oꞌ na vachu jon joo oꞌ na ntcüaꞌ oꞌ. 4Ndoꞌ vi na jndë tjiꞌ jon tsoñꞌen quinmanꞌñeen quiiꞌ teonꞌñeen, yajoꞌ ivejndyee jon tondëë oꞌ. Ndoꞌ cotsantyja oꞌ toxenꞌ jon ngꞌe cotaꞌjnꞌaan oꞌ jndyeeꞌ jon. 5Majoꞌ juu tsꞌan na chito conduihin tyꞌoo oꞌ na tyiꞌquitaꞌjnꞌaan oꞌ jndyeeꞌ, xeꞌquitsantyja oꞌ toxenꞌ juu, veꞌ nnanꞌnon oꞌhin. Ee tyiꞌquitaꞌjnꞌaan oꞌ jndyeeꞌ ncüiichen tsꞌan na chito tyꞌoo oꞌ.
6Juu jñꞌoonꞌñeen na tyiꞌquitsinin nquiiꞌ Jesús juuhanꞌ ndëëhan, majoꞌ tataaꞌ nꞌonhan nin jñꞌoon ninꞌquitsiquindyihanꞌ.
Condui Jesús tsan na ya jndyi ivantyjeeꞌ quinman
7Ndoꞌ sinin nndaꞌ Jesús ndëë nanꞌñeen. Itso jon:
—Jñꞌoon na mayuuꞌ matsjö ndëëhoꞌ na ja condui juu ꞌndyotsëꞌ teon na cotsaqueꞌ quinman. 8Tsoñꞌen nnꞌan na jndë jndyoquindue na conduihan na ntaꞌntyjeeꞌhan quinman vitjachen na ndyö, conduihan nanntyꞌuee ndoꞌ nnꞌan na contyꞌuee tyincyo. Majoꞌ joo quinman, choꞌ na mayuuꞌ condui oꞌ cüenta ja, tyíꞌquinanꞌjñꞌoonꞌhan jñꞌoon na condue nanꞌñeen. 9Ja condui ꞌndyotsëꞌ teon. Minꞌcya ro tsꞌan na ngaqueeꞌ ntyja njan, ntsinꞌman ja ñuaanꞌ tsanꞌñeen. Itsijonhanꞌ tsanꞌñeen chaꞌvijon ncüii quitsman na quinduiꞌ oꞌ teonꞌñeen na nntjii oꞌ na ntcüaꞌ oꞌ ndoꞌ ndë joꞌ icüjeeꞌ nndaꞌ oꞌ.
10“Tsanchꞌuee ninnquiiꞌchen icüjeeꞌ juu na nchꞌuee juu ndoꞌ na ntscüje juu ndoꞌ na ntsiꞌndaaꞌ juu. Majoꞌ ja jndyö na ninncya na tyiꞌquintycüii na cotandoꞌ ñuaan nnꞌan, ndoꞌ chaꞌ tyiꞌvacuaa xjen na nanꞌxuanhan juuhanꞌ. 11Ja condui tsan na ya mavantyjëꞌ quinman. Juu tsan na ya ivantyjeeꞌ quinman ntsjuenꞌ, ncyaa juu na cueꞌ juu ntyja ꞌnaan oꞌ. 12Majoꞌ juu tsan na veꞌ conduihin moso na chito tyꞌoo oꞌ juu ee veꞌ na vantyjeeꞌ ya juu oꞌ, ndyiaaꞌ juu na nndyo lobo. Yajoꞌ nꞌndyii juu quinmanꞌñeen, nnannon juu. Ndoꞌ juu loboꞌñeen vantyja oꞌ joo quiooꞌñeen ndoꞌ ntꞌuii oꞌ choꞌñeen ndoꞌ joo choꞌñeen cocya oꞌ. 13Inannon tsanꞌñeen ee veꞌ tsꞌan vantjonhin, taꞌnan itsꞌaahanꞌhin yo ꞌnan na coquenon joo quinmanꞌñeen.
14“Ja condui nquii tsꞌan na ya jndyi mavantyjëꞌ quinman. Vajnꞌan ja quinman ntsjuënꞌ ndoꞌ joo oꞌ cotaꞌjnꞌaan oꞌ ja. 15Chaꞌxjen nquii tyëhöꞌ vajnaanꞌ jon ja, mantyi ja mavajnꞌanhin. Ndoꞌ nninncya na nnanꞌcueeꞌ nnꞌan ja ntyja ꞌnaan quinman na condui oꞌ cüenta. 16Ndoꞌ mantyi mꞌan nnꞌan na conduihan quinman ntsjuënꞌ na tyiꞌcꞌonhan juu tmaanꞌva. Mantyi condui ja na cjöquichöhan, ndoꞌ ndyontyjahan na ncüanhan. Ndoꞌ ntsꞌaahanꞌ na ninncüii tmaanꞌ conduihan ndoꞌ ninncüii tsꞌan na ivantyjeeꞌhan.
17“Ngꞌe na nndaꞌ vaa, nquii Tyëhöꞌ tꞌman vaa na venchjii jon ja ee mancya na cüꞌiö cüenta nnꞌan na conduihan quinman ntsjuënꞌ chaꞌ ninncyaa jon na nngüantꞌö xcö. 18Tanin juu na nndëë ncüjiꞌ na vantꞌö na chito yo jñꞌoon njan. Mancöntyë mancya na ngenön na nndaꞌ. Ee vaa najndö na condui ja na quitsꞌahanꞌ, ndoꞌ mantyi vaa najndö na condui ja na ncꞌön na ngüantꞌö xcö. Ndöꞌ vaa jñꞌoon na tquen tyëhöꞌ nnön na quitsꞌa.
19Jñꞌoonminꞌ sꞌaahanꞌ na tyiꞌquitjonꞌ nndaꞌ na jnanꞌnein nnꞌan judíos ntyja ꞌnaanꞌ jon. 20Ee jndye nanꞌñeen jnduehan:
—Juu tsanvaꞌ, tsixuan juu yutyia, ndoꞌ jndë titsanꞌ xquen juu. ¿Ndu na cotyiꞌhoꞌ nquenhoꞌ jñꞌoon na itsinin juu?
21Majoꞌ ñꞌen nnꞌan na jnduehan:
—Jñꞌoonminꞌ tyiꞌnanꞌxuanhanꞌ jñꞌoon na itsinin tsꞌan na mꞌaan nacje ꞌnaanꞌ yutyia. Ee ncüii tsꞌan na mꞌaan nacje ꞌnaanꞌ yutyia, tyiꞌjeꞌquindëë ntsꞌaa tsanꞌñeen na ndyiaaꞌ tsannchjaanꞌ.
Nnꞌan judíos tyíꞌcantyja nꞌonhan Jesús
22Tueeꞌ nguee tsjoon Jerusalén xjen joo nnꞌan judíos tonanꞌtꞌmaanꞌhan na covañjoonꞌ nꞌonhan juu xjen ya na nque ndochihan tquen xco nndaꞌhan vatsꞌon tꞌman cüentaaꞌ Tyoꞌtsꞌon. 23Ndoꞌ xoncüe ngueesuaꞌ xjen tueeꞌ juu ngueeꞌñeen. Mꞌaan Jesús vatsꞌon tꞌman ꞌnaanhan. Ivandyiꞌ jon quiiꞌ ncüii corredor ꞌndyo juu vatsꞌonꞌñeen na xiaꞌntyi nonntꞌeiiꞌhanꞌ min. Juu Salomón tꞌua jon tsꞌian na jndëhanꞌ. 24Ndoꞌ nque nnꞌan na conintque ndëë nnꞌan judíos, xiꞌjndio sacüentyjeeꞌhan ngiaaꞌ Jesús. Taxeeꞌhan nnon jon, jnduehan:
—¿Tsaꞌnndaꞌto xuee na mana chuꞌ já na matsiquijñꞌenꞌ já? Xe na aa mayuuꞌ condui ꞌuꞌ Mesías quitsuꞌ jndyoyuꞌ ndë́.
25Yajoꞌ itso ta Jesús ndëëhan:
—Jndë tsjö ndëëhoꞌ na majuu jon condui ja, majoꞌ mancüiixjen tacovantyja nꞌonhoꞌ ja. Majoo tsꞌian na matsꞌa yo najndei na tsixuan nquii Tyëhöꞌ, joohanꞌ na cotjiꞌ jndyoyuhanꞌ ntyja njan. 26Majoꞌ ꞌoꞌ tyiꞌninꞌcantyja nꞌonhoꞌ ja ngꞌe chito conduihoꞌ tmaanꞌ quinman ntsjuënꞌ. 27Nque nnꞌan na condui quinman ntsjuënꞌ, condyehan jndyëë, ndoꞌ mavajnꞌanhin, ndoꞌ condyontyjahan na xꞌën. 28Ja mancya na tyiꞌquintycüii na cotandoꞌ ñuaanhan, min tajon ngitsu ñuaanhan. Ndoꞌ minꞌncüii tsꞌan tyiꞌjeꞌquindëë ncüjiꞌhan ntꞌö. 29Ee nquii Tyëhöꞌ na tyincyaa jon joohan ntꞌö, tꞌmanntyichen conduihin na tsoñꞌen, ndoꞌ tanin juu na nndëë ncüjiꞌhan ntꞌö nquii jon. 30Ja yo Tyëhöꞌ ninncüii condui já.
31Ndoꞌ joo nnꞌan judíosꞌñeen, vi na jndë jndyehan na nndaꞌ tso Jesús, yajoꞌ jnanꞌncüi nndaꞌhan ntjöꞌ na ntuenꞌhan jon. 32Joꞌ tso jon ndëëhan:
—Cojntyꞌiahoꞌ na matsꞌa jndye nnon tsꞌian njon yo ntyja ꞌnaanꞌ juu najndei na itsixuan Tyëhöꞌ. ¿Nin ncüii joo tsꞌianꞌñeen na itsꞌaahanꞌ na ninꞌquituenꞌhoꞌ ntjöꞌ ja?
33Ndoꞌ tꞌa nnꞌan judíosꞌñeen, jnduehan:
—Chito ngꞌe ncüii nnon tsꞌian na njon na matsaꞌ, joꞌ na ninꞌquituë́nꞌ ntjöꞌ ꞌuꞌ. Ntꞌá na nndaꞌ ngꞌe na matsininꞌ jñꞌoon tsanꞌ cjooꞌ nquii Tyoꞌtsꞌon. Ee ꞌuꞌ na veꞌ tsꞌan ꞌuꞌ, majoꞌ macüjiꞌ nquii ꞌuꞌ cüenta na condui ꞌuꞌ nquii Tyoꞌtsꞌon.
34Tꞌa Jesús, itso jon ndëëhan:
—Quiiꞌ jñꞌoonꞌ Tyoꞌtsꞌon na jndui na conanꞌyꞌonhoꞌ, mangiohoꞌ juu jñꞌoon na sinin jon, itso jon: “ꞌOꞌ na conintquehoꞌ ndëë nnꞌan, matsjö na itsijonhanꞌ ntyja ꞌnaanhoꞌ chaꞌnan ncö.”
Manndaꞌ itsiquindyi jñꞌoonꞌñeen.
35Ndoꞌ itsontyichen Jesús:
—Tso Tyoꞌtsꞌon ndëë nnꞌan na tyꞌon cüenta jñꞌoonꞌ jon na conintquehan quiiꞌ ntꞌan nnꞌan judíos na itsijonhanꞌ ntyja ꞌnaanhan chaꞌna nquii jon. Ndoꞌ mangiö na juu jñꞌoon na tso jon, chito quintuhanꞌ. 36Ndoꞌ na nndaꞌ, ja na jñon tyëhöꞌ quiiꞌ ntꞌan nnꞌan tsonnangue, ncö na iꞌua jon tsꞌian nnön na ntsinꞌman ñuaan nnꞌan, tyiꞌquichuhanꞌ na conduehoꞌ na majuꞌ jñꞌoon tsanꞌ na cjooꞌ jon xengꞌe tsjö na condui ja jnda jon. 37Joꞌ xe na aa chito tsꞌian ꞌnaanꞌ Tyëhöꞌ matsꞌa, tyiꞌquichuhanꞌ na ngantyja nꞌonhoꞌ ja. 38Majoꞌ ngꞌe matsꞌa tsꞌian ꞌnaanꞌ jon, min na tyiꞌninꞌcantyja nꞌonhoꞌ ja, joꞌ cantyja nꞌonhoꞌ ntyja ꞌnaan joo tsꞌianꞌñeen, Ee ntyja ꞌnaanhanꞌ ncüaaꞌ nꞌonhoꞌ na nquii Tyëhöꞌ ninncüii conduihin yo ja ndoꞌ ninncüii condui ja yohin.
39Ndoꞌ nnꞌan judíosꞌñeen, jnanꞌjndaꞌ nndaꞌhan na ntꞌuehan jon, majoꞌ tja jon, taꞌnan jndë jntꞌahan.
40Ndoꞌ tetꞌiö́ nntꞌá jndaa Jordán yo Jesús, squë́ naijon na nintomꞌaan jndyee Juan na totsiquindëëꞌ jon nnꞌan. Jndye xuee tomꞌán joꞌ yo Jesús. 41Ndoꞌ juu xjenꞌñeen jndye nnꞌan squenon na mꞌán na ninꞌquindyehan jñꞌoon na toninncyaa jon. Tonduehan ndëë ntyjehan:
—Juu Juan taꞌnan sꞌaa jon ncüii nnon tsꞌian na tyiꞌjeꞌquindëë nduihanꞌ ntyja ꞌnaan najndei nquii tsꞌan. Majoꞌ sinin jon ntyja ꞌnaanꞌ tsanvaꞌ, ndoꞌ jñꞌoonꞌñeen covityincyo na mayuuꞌhanꞌ.
42Ndoꞌ na vijon na mꞌanhin joꞌ, jndye nnꞌan tantyja nꞌonhan Jesús.
Nke Ahọpụtara Ugbu A:
San Juan 10: AZG
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 1992, Wycliffe Bible Translators, Inc. All rights reserved.