(Evangelio según San Marcos) 14
14
Jesús maami tusa chicham umigkamu
(Mt. 26.1-5; Lc. 22.1-6; Jn. 11.45-57)
1Jimag tsawan asa fiesta Pascua nuigtú pag levaduragtuchu yutai jegatin ai, sacerdote apuji aidau maestro chicham umiktinun jintinkagtin aidaujai, wajuk Jesusash achikaiya tsanumjuja maumainaita nuna egatuidau. 2Nunidau asag: Fiesta aigkik dutikachagmi, aents aidaujai pampandayamu ai, tiajui.
Betanianmaya nuwa Jesusan kugkuinui buuken nijakbau
(Mt. 26.6-13; Jn. 12.1-8)
3Jesús Betania weuwai, Simón lepragtin tutaiya nuna jeen. Nunik mesanum jegan eketai, makichik nuwa botella alabastro najanamunum kugkuin ayatak nardo najanamu senchi akikan takusá tajuauwai. Dutika botella alabastro najanamua nuna kupik Jesusa buuken ukatjauwai. 4Dutikamtai ujumak aidau initkag kajedaush asajui, nunikag:
—¿Wagka kugkuinnash wainkash wasujua? 5Aikatsuk trescientos denario amain sujuka ujunauch aidau sumainajamah, tusag nuwan ashishmatuidau. 6Tiagtai Jesús chichajak:
—Idaisatajum, ¿wagka waitkagme? Pegkejan jutijawai. 7Ujunauch aidauk tuke atumjai batsamiagtatui, nuniakui atum wakegakjumek yaimainaitjume, untsu wika atumjaig pujushtatjai. 8Juka nuwak ni dutikmaina nuna dutikae; wagki mina iyashjunak emtika ukatjutkae mina ukugsagtina nuna. 9Dekas tajime, yamajam chichama juna etsejuinak ashí nugkanum yujainakush, ju nuwa mina jutija juna pachis tuke etsejiagtin ainawai, tiuwai.
Judas Iscariote Jesusan sujukta tibau
(Mt. 26.14-16; Lc. 22.3-6)
10Nuna timatai Judas Iscariote, doce aina nuiya jiinki weuwai sacerdote apuji aidaujai Jesusan wajuk sujumainaita nuna chichaman umiktatus. 11Nu tama antukag shiig aneasaju, nunikag kuichkin susatatus anagkuawaju. Dutikam Judaschakam wajuk yupichu sujukajak tusa egatu.
Jesús inagnaku Pascuatin yuwamu
(Mt. 26.17-29; Lc. 22.7-23; Jn. 13.21-30; 1 Co. 11.23-26)
12Pag levaduragtuchu yutai nagkamak fiesta tsawagbaunum, Pascua yuwatin uwig aishmag tsakat mautai asamtai, Jesusa jintintaiji aidau:
—¿Tuwí umiktatji Pascuatin yuwatnush?
13Tiagtai jimagchik niina jintintaijin awemak:
—Yaakat wetajum, nunikjum aishmag yumin aimak waketu wainkattajum nunú pataetuktajum, 14nunikjum wayaakui jeenna nu: “Maestro chichaak: Tuwí wi mina jintintaig aidaujai Pascua yumainush” agkantash awa tujamae titajum, tiu. 15—Nu tajumin ni inaktugmastatui yakí tesamu agkan muuntan shiig umikbaun, nuanui jutiinuk umiktajum, tiu.
16Tiajam jintintaiji aidaushkam wegag yaakat jegakmag, ni tibaunak imatiksag wainkag, Pascuatin yuwatnunak nui umikajui.
17Kiyagmatai Jesús niina jintintaiji doce aina nujai jegawaju. 18Nunik mesanum pekaamsag yuwinamunum Jesús chichaak:
—Dekas tajime: Atum ainajum juwiyag makichik wijai yuwa nu minak sujutkattawai, tau.
19Tutai ditak wake besekaju, nunikag makí makichik iniininak:
—¿Wikaitag? tutai, tikitchakam: —¿Wikaitag? wajaidau.
20Tiagtai Jesús ayaak:
Duka doce ainajum juwiya wijai nu platonmag uchutua yuwa nuuwai, tau.
21Tusa:
—Dekaskenmag Aentsmaga akiinauwa duka, ni pachisa agagbauwa nunisag wetatui; tujash, ¡wait anentajai ya sujuktatua nunak! Duka dekas akiinmainchaunas akiinawabiataih, tau.
22Yuwinak pekagbaunum, Jesús pagkan juki Apajuin see tii puuká, ditan suwak:
—Ju yuwatajum, juka mina iyashjun iwainawai, tau.
23Tusa, copa juki Apajuin see tii ditan susauwai, dutikam ashí betek uwajajui. 24Dutika:
—Juka mina numpajui, yamajam chicham apaamunum kuashat aentsnum ukaejatta nuuwai. 25Dekas tajime, ju uva yumijinak awenanuk uwagchattajai, atak tsawan uminkui Apajuí inamtaijin ataktú yamagman uwagtin asan, tiuwai.
Jesús Pedron uugtuktatme tusa ujakbau
(Mt. 26.30-35; Lc. 22.31-34; Jn. 13.36-38)
26Nuna timatai himno kantamawag, Olivosan mujajin weajui. 27Nunik Jesús ditan chichajak:
—Jujú kashia juik, ashí atum aidautigmek mina pampanjugtatjume; wagki agagbauwa nui: “Pastoron maattajai, dutikam uwig aidauk pampagkagtinai” tawa nunisag. 28Tujash ataktú nantakin, atumek Galilea wegatsjuminig wiyá emkan wetatjai, tiuwai.
29Tutai Pedro ayaak:
—Ashí tikich aidau ukugmainakuish, wika nunikchattajai, tau.
30Tutai Jesús ayaak:
—Dekas tajame, yamai kashia juik atash eke jimajá shinatsaig, kampatumá wainchaujai tujuttatme, tau.
31Tamashkam Pedrok itatchau, nuniak:
—Amijai jakata tau asan wainchaujai tichattagme, tau.
Tutai tikich aidaush ashí dutiksag tiajui.
Jesús Getsemaní pujusá Apajuí ausamu
(Mt. 26.36-46; Lc. 22.39-46)
32Nunikag ajak ajakbau Getsemaní tutainum jegawajui. Nunik jintintaiji aidaun:
—Jui ekeemsatajum, nuniagmin wi awi wenu Apajuin ausatjai.
33Tusa weak Pedron, Jacobon, Juan aatus yajuak ditajai wesa, wake besetan nagkamauwai nuniak shiig senchi anentaimak waitiau, 34nuniak:
—Senchi wake besemag dekapeakun jamain dekapeajai, atumek jui batsamsajum iwá batsamtajum.
35Tusa machik kuwaesag, nugká tikishmag, Apajuin ausauwai, nunimain ataig ni waitmaina duka tsawantak jegagtishti tusa. 36Nunik: “Mina Apajuh, ashí wají aina duka ame dutikmainaitme, wi waitmainaitag nuwig agkanmitkajuata, tujash wi wakegamuk achati, ame wakegamu atí”, tiuwai.
37Tusa wakitki dita batsatbaunum jegakmá, kajig batsatun wainak, Pedron chichajak:
—Simón, ¿kanamek? ¿Makichik horakesh iwamainchauk dekapeam? 38Kají batsamtsuk Apajuí ausatajum, pegkegchaunum iyawaijum; dekaskenmag wakanik pegkejan takastatus wakegawai, tujash iyashia nuuwai kakaakchauk.
39Tusa ataktú wee, ni tibaujiya dutiksag, Apajuí ausauwai. 40Nunik waketjuki diikmá, ataktú kajig batsatun wainkauwai kaji senchi mainam, nunidau asag aimainchau dekapjajui. 41Kampatuma jui waketjuki taa, chichajak:
—Kajigtajum nuniakjum ayamjatajum, yamaik horak jegae Aentsmaga akiinauwa nuna tudaugtin aidaunum sujam atata nu. 42Nantagtajum, wegagmi; mina sujuta duka tikiju minawai, tiuwai.
Jesús achiká jukimu
(Mt. 26.47-56; Lc. 22.47-53; Jn. 18.2-11)
43Tusa Jesús eke chichaak wajai, Judas, doce aina nuiya kuashat aents espada, numi aidaun takuinaku sacerdote apuji nuigtú maestro chicham umiktinun jintinkagtin aidau judío apuji aidau ishiakbaujai tajuntauwai. 44Judas Jesusan sujukua nu: “Wi kugkuastatag nu atatui; achikjum shiig emetjajum jukitajum”, 45tiu asa Jesusan wamkes jeganmawaik:
—¡Maestro! takug kugkuasui. 46Dutiktai achikag jukiajui.
47Tujash ijuna nuiya makichik espadajin ukuini juwakug, sumo sacerdote inake kuwishin tsupigkauwai. 48Tuja Jesús nu aents aidaun chichajak:
—¿Wagka kasa achiktasa utugmaina imanikjumesh espada, numi aidau takusjumesh achigkatasagmesh minitjagme? 49Wi kashí kashinig jega Apajuí ememattainum atumjai pujusan jintinnujime, nuniakuish achigchau agmaugme; tujash juka Agagbau uminu asamtai juniagme, tiuwai.
50Nuna taig, ashí niina jintintaiji aidauk pisainak, ukukiajui. 51Tujash makichik datsauch sabanan pempemag pataetuku, nunittaman achikajui, 52tujash sabananak ukuak wisú tupikakiuwai.
Jesús apu aidau batsatbaunum ejentamu
(Mt. 26.57-68; Lc. 22.53, 54-71; Jn. 18.12-14, 19-24)
53Jesusan jukiag sumo sacerdote pujamunum ejegawajui; dutikawagmatai ashí sacerdote apuji aidau, judío apuji aidau nuigtú maestro chicham umiktinun jintinkagtin aidaujai ijunjajui. 54Tuja Pedrok ikaag pataetus wea weakua, sumo sacerdote jeen wayá agaajin achijatin aidaujai jiin anamak eketu.
55Sacerdote apuji aidau, ashí apu chichaman inagnau aidaujai egatuidau, Jesusan tsanumjujag maatnume tusa sujukagtatus, tujash ejetuinachu. 56Wagki kuashat wainak tsanumjuinakush, betek tuinachu. 57Nuniai ujumak wainak tsanumjuinak:
58—Jutii ni tabauk antugkabiaji: “Wi ju jega Apajuí ememattai uwejai takasbauwa nunak yumpuan kampatum tsawantai tikichin uwejai takaschamun jegamkattajai” timayi, tuidau.
59Tujash nuna aatus tuinakush makichkish bakumainchaun tuidau.
60Nuniai sumo sacerdote ejapen wajantá, Jesusan iniak:
—¿Wagka machikish aimtsume? ¿Nunash wajinbauna tujamainawa?, tau.
61Tujash nigka aimkag chichaachu, nunitai sumo sacerdote awentsag iniak:
—¿Amekaitam Cristo, Apajuí Pegkeja nuna Uchijim?, tau.
62Tutai Jesús ayaak:
—Witjai, nuigtush wainkatnaitjume Aentsmaga akiinauwa nu Apajuí ashí senchigtina nuna untsujin eketu nayaimpinmaya yujagminum pachitkau minamu, tau.
63Tutai sumo sacerdote ni nugkuagbaujin japikí ichigká chichaak:
—¿Nuigtush ya etsegtukti tusaya atsumaji? 64Apajuin pegkegchau chichagka nu antukugme, ¿atumesh wajuk anentaimtagme?
Tusag ashí pampajag, mantamnati tiajui.
65Tiagmatai ujumak usukinai, jiin epetkag ijuinak:
—Adaikakia, ya ijupime, tuidau.
Tuja achijatin aidaushkam yapinum awatuidau.
Pedro Jesusnak wainchaujai tusa uukbau
(Mt. 26.69-75; Lc. 22.56-62; Jn. 18.15-18, 25-29)
66Pedro jegá agaajin nugkaa pujai sumo sacerdote inake nuwa aina nuiya makichik tajuntau, 67nunikmá Pedro jiin anamak ekeemtatman wainak, dii wajatu, nunik:
—Amesh Jesús nazaretnumiaya nujaimpap wekaemume, tau.
68Tama Pedro uwaak:
—Wika wainchaujai, ame tujutam nunakesh dekatsjai, tiuwai.
Tusa ukuak waitaiya nuní jiinkiuwai, nuniai atash shinukui. 69Nuwa inaka nu ataktú wainak, nui batsatun chichajak:
—Jujú ditajai wekaenuwejamah, tau.
70Tujash nigka ataktushkam uwau. Nuniai machik asag, nui batsatu ataktushkam Pedron chichajak:
—Dekaskenum amesh dita aina nuiyampapitme, wagki amesh galileanmayaitamjamah, dita chichaina aujai betek chichamjamah, tuidau.
71Imatjuinam pegkegchau chichatan nagkama nuigtú Apajuí adaiyas:
—¡Atum tajum nunak wika wainchaujai!, tau.
72Nuna taig atash awentsag shinukui, nunitai Pedroshkam Jesús chichajak: “Atash jimajá shinatsaig, kampatumá waintsamjai tujuttatme” tibauwa nuna adeag buutiuwai.
Nke Ahọpụtara Ugbu A:
(Evangelio según San Marcos) 14: AGR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2020, Wycliffe Bible Translators, Inc.