(Evangelio según San Lucas) 23
23
Jesús Pilatowai ejegamu
(Mt. 27.1-2, 11-14; Mr. 15.1-5; Jn. 18.28-38)
1Ashí aents aidauk wajajag, Jesusan jukiag Pilato pujamunum ejegawaju. 2Dutikawag Jesusa tsanumjuinak:
—Jujú aents jutii nugkeen chichaman tsuwapak wekaegas: —Witjai Rey Cristunuk; tusa, Roma apujig akimaitsui, tu wekagu asamtai jui itaaji, tuidau.
3Tiagtai Pilato iniak:
—¿Amekaitam Rey judío aidaunu? tau.
Tama Jesús ayaak:
—Duka ame tujutme, tiuwai.
4Timatai sacerdote apuji, nuigtú aents tuwakú aina nuna Pilato chichajak:
—Wika ju aents bakumamainjinak makichkish waittsujai, tau.
5Tutai nuní nagkaemasag:
—Aanka aents aidaun jintintak dapamkagtú wekaenuwe. Nuniak Galilea nagkamas jintí jintinkagtakua juwish Judeanmash dutiksag dapamkagtú wekaewai, awajuidau.
Jesús Herodesai ejegamu
6Nu tabaun antuk, Pilato iniimu, ju aents galileanmayachukai tusa.
7Jesusak Herodes inama nuiyayai tabaun dekaa, Herodesan awetiuwai, niishkam nunú tsawantinig Jerusalén taa pujau asamtai. 8Herodes Jesusan wainak shiig aneasu, kuashat tsawantai niina wainkatatus wakegá pujú asa, niina pachis chichaidaun antau asa, nunik Jesusan wainchatai iwainakta titatus. 9Nuniau asa kuashat iniasui, tujash Jesusak makichkish aikchauwai. 10Nunitai nui sacerdote apuji, maestro chicham umiktinun jintinkagtin aidaujai ijunu wainak senchi tsanumjuidau. 11Herodeschakam ni suntaji aidaujai, Jesusan dushikinak, jaanch shiig iwajamun anugkug, ataktú Pilato pujamunum awemauwai. 12Yaunchkek Herodesak Pilatojai shiwag pujuwaitak, nunú tsawanta duik, nuna dutikainak kumpamdayawajui.
13Dutikawagmatai Pilato sacerdote apuji aidaun, gobernante aidaun nuigtú tikich aents aidaun ijumjau. 14Dutika chichajak:
—Atum ju aents itagtuamugme, aentsun dapampawai tusajum; tujash wi atumi eemtimin iniasjai, dutikaknush dekajuashjai atum nuninai tajum nui bakumamainnak. 15Nunisag Herodeschakam dekajuache, dutikau asa awagkine; diistajum, makichkish ni mantamnamainnak pegkegchaunak takaschae. 16Asutiatajum titajai, dutikan akupkatjai, tiuwai.
17Nu fiestatinig makichik aents tuke jiitai aajakui.
18Tutai ashí aents aidauk betek pampaajag:
—¡Anka mantamnati, Barrabás akupkata! wajaidau.
19Barrabasnak cárcel egkeawaju yaaktanum pampandayamunum aentsun mau asamtai. 20Pilato Jesusan akupkata tau asa, ataktú awentsag ditan chichajak: —Dekas Jesusan akupkatjai, tau.
21Pilato tutai nuní senchi untsumkag:
—¡Achigtá! ¡Achigtá! wajaidau.
22Imatiagtai kampatuma juwishkam Pilato chichajak:
—¿Tujash wají pegkegchauna takasé jusha? wika ni pegkegchau takasbaunum bakumaku mantamnamainjinak dekagchau asan, ayatak asutiawagmatai jiiktajai, tau.
23Tutaishkam nuní senchi untsumkag, achinjati wajainak Pilatonak depetkiajui. 24Imatiagtai Pilatoshkam, dita sumaina dutiksag uminkati, tiuwai, 25dutikak dita aentsun jiinkiti tusa segamaina nuna jiikiuwai, pampandayamunum aentsun maamtai cárcel egkeamua nuna, dutikak Jesusnak dita wakegaina dutiksag umiktinme tusa sujuk idaisauwai.
Jesús achigbau
(Mt. 27.32-44; Mr. 15.21-32; Jn. 19.17-27)
26Dutikam Jesusan achigtatus juki emainak, cirenenmaya aents Simón daagtin ajajinia minittaman awantag, cruzan ayankajui.
Dutikam Jesús eemak wetai, ukuunum yanas wegau.
27Jesusan kuashat aents nemajus ashinainamunum, nuwa aidaushkam imanisag ukunum saegas, untsu untsumas buu buutuinakua ashinaidau. 28Imatiagtai Jesús nuwa aidaun ayampatua chichajak:
—Jerusalegnumia nuwa aidauwah, minak eganjaigpajum, atumek egaamakjum uchijum anentaimtusjumesh buuttajum. 29Wagki tsawan jegagtamiagtinai, nunikmatai: “Nuwa kaga aidauk, uchinash jujegchau, muntsujinash amuntsuachu aidauk yajau aneas batsatainatsuapi wajatin ainagme”. 30Nuniakjum muja chichagkujum: “¡Yutujatuata!” takujum, mujauch aidaush: Uujatkata, wajatin ainagme. 31Wi tudau takaschau aig, imatijuawag waitkajuinaish, ¿Apajuish wagkag tudau aidaunash waitkaschati? tiuwai.
32Nuigtushkam jimag magkagtinun jukiajui, Jesusjai achijag maawagtatus. 33Nunikag Gólgota tutainum ejegawag, Jesusan achijajui nuigtú magkagtin aidaunashkam, dutikawag makichik untsugnum awajuinak tikichnak menajin awajawajui. 34Dutikam Jesús chichaak: “Apawah, tsagkujata, wagki dita jutikaina nunak dekainatsui”, tau.
Nuniai suntag aidauk, yana kayajig jiinkit nunú Jesusa jaanchjinak jukiti tusag wasugkamaidau. 35Nuniamunum aents aidauk dii ijuntuinai, gobernante aidau Jesusan dushikinak:
—Tikichnak uwemtiknuwe, yamai niishkam nigki uwemjati, ju dekas Cristo, Apajuí etegkamuitkug, tuidau.
36Nunisag suntag aidaushkam jegaantag dushikinak, vino chujuinun aagtatus jegantag, 37chichajuinak:
—Ame judío Reyjiyaitkumek, amek uwemjakia, awajuidau.
38Tuja ni chaikenchakam griego, latín, hebreo chicham aidauwai: “JUUWAI REY JUDÍO AIDAUNUK”, tusag agatjajui.
Magkagtin aidau chichakbau
(Mt. 27.45-56; Jn. 19.28-30)
39Jimag magkagtin achijam deta nuiya makichik Jesusan pegkegchau chichajak:
—Ame dekas Cristuitkumek, amek uwemjam, aaní nematsuk amea akaikim, jutiish uwemtikagtujia, tau.
40Tutai nui tikich detau aiká jiyak:
—¿Amek Apajuik ishamatsmek, amesh niijai betek suwimak juwayatkumesh? 41Jutiik dekaskenum waituinaji, ii nunikbaunum suwimak juwau asá; tujash juka makichkish pegkegchau takasbauk atsujui, tau.
42Tusa Jesusan chichajak:
—Jesusah, minash ame apu wajasam inamjattam nuniakmesh kajimatjukipa, tiuwai.
43Tutai Jesús ayaak:
—Dekas tajame, yamaiya juik amek wijai paraíso pujuttame, tiuwai.
Jesús jakamu
(Mt. 27.45-56; Mr. 15.33-41; Jn. 19.28-30)
44Etsa tutupit ai nagkamas, a las tres wegaish ashí nugkanum suwe wajas asauwai. 45Etsa suwe wajas ai, jega Apajuí ememattainum jaanch ejaamu ichiinak jimaituk kanakui. 46Nuniai Jesús senchi untsumak:
—¡Apawah, amina uwegmin mina wakanjunak idaijai! tau. Nuna tusa jakauwai.
47Nunik jakamtai Capitán wainak, Apajuin emematak:
—Dekas ju aentsua juka pegkegchaukesh atsujui, tau.
48Ashí aents nui ijunaidauk, nu nunikbaun wainkag, waketuinak, wake besemag dekapenak detsepenak awatkiag weedau. 49Nuninai ashí Jesusa waintaiji aidauk, nuwa Galilea nagkamas saetusag yujajakú aidaushkam, ikaag ijunas Jesusan dii ijuntuidau.
Jesús ukusbau
(Mt. 27.57-61; Mr. 15.42-47; Jn. 19.38-42)
50Judeanum yaakat Arimatea tutai awa nuiya José daagtin, niishkam apu chichaman inagnau aina nuiya, aents pegkeg nuigtushkam pegkeg aidaunak takaak pujuwa nu, 51Apajuí inamjatnujin dakak pujú asa, Jesusan maata tiagtaish dakitjauwa nu 52Pilato jegajua Jesusa iyashin segauwai. 53Dutika cruznumian akakí sabanayai pempeag, kaya waa muun tai umikbau, makichik aentskesh ukuschamunum egkeauwai. 54Nunú tsawantak, tsawan ayamtai atin asamtai, ashí umintai aajakui.
55Nuwa aidau Galilea nagkamas Jesusa nemajus yujasaju aidaushkam, José wetai pataetukaju, nunik wainkaju Jesusa iyashin wajuk ukusaje nuna, 56nunik waketug jegá kaunkag, Jesusa iyashí ukatkatnun kugkuin shiig pegkeg aidaun najanawaju, dutikawag tsawan ayamtai tsawaju asamtai, ayamjaju chicham umiktinnum tawa nunisag.
Nke Ahọpụtara Ugbu A:
(Evangelio según San Lucas) 23: AGR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2020, Wycliffe Bible Translators, Inc.