(Evangelio según San Lucas) 2
2
Jesús akiinamu
(Mt. 1.18-25)
1Nu tsawantin, César Augusto ashí aents aidau agatmamkatnume tusa chichaman umik dapampajui. 2Jujú nagkamchaku agatmabauk Cirenio, Siria apuji wee pujai nunikui. 3Tibau asamtai ashí shimuidau, makí makichik ditá yaaktajin agatmamjagtatus.
4Tuja Joseshkam Galileanum yaakat Nazaret awa nuiya juwaki Judea nugkanum jegau, yaakat Belén David akiinamu aajakua nui, nigka David wegantu asa. 5Nui agatmamjatatus weak, ni nuwenatasa dakaniamuji María ejamtinun ayasá weuwai. 6Nunikag nui jegaa pujuinai tsawan ni uchigmaktinji jegajiu. 7Nunikmatai iwaijin aishmagkun uchigmaku, dutika uchi pempetaiyai pempeag tagku ayugtainum egkeauwai, ijagka kajiitainig dita ayamainuk agkantak atsusú asamtai.
Ángel aidau uwijá kuitamin aidau wantintukbau
8Nu nugka nuiyag ujumak pastor aidau uwigjin kuitamainak kashi iwá batsataidau. 9Nuniai makichik ángel Apu Apajuinu wantintuku, nuniaig Apu Apajuí tsaaptinjiya nu tsawan awajus tenteawajui, dutikam shiig senchi ishamkajui. 10Nuniagtai ángel chichaak: “Ishamkaigpajum, wika atumin yamajam chichaman ujaktasan minitjime, ashí aents aidau shiig aneasagtata nuna. 11Yamai kashia juik Davita yaaktajiya nui makichik Uwemtikagtin, Apu Cristo akiinae. 12Uchi pempeajam tagku ayugtainum egketu wainkattajum nunú atatui”.
13Nuniaig pachiachbau angeljai kuashat tikich ángel nayaimpinmaya aidau wantinjau, nunikag Apajuin emematuinak:
14“Nayaimpinmash Apajuiya duke emematiagmi,
nugkanmash shiig agkan pujamu atatui Apajuí wait anenjamu aina duka”, wajaidau.
15Ángel aidau nayaimpinum wakitkiagmatai, pastor aidau pempeentunikiag:
—Belén wegagmi, Apu Apajuí nunike tusa ujapaka nu wainkagmi, tuidau.
16Tusag waujus wegag jegakmag, Marian Josejai nuigtú uchi tagku ayugtainum egkemtatman wainkaju. 17Nunik wainkag, uchi pachisa tibauwa nuna etsejuidau. 18Tusa pastor aidau etsegbaun ashí aents antuidauk anentai jegachaju. 19Tujash Mariak nu ashí tabau antukbaun sakapamainchau dekapeau, nuniak nuwi nuwig anentaimá pujau. 20Nunikag pastor aidauk waketuinak Apajuin eme anentsag emematuidau, ashí antukbauji nuigtú wainkaja duka, ángel tibauk imanisag uminkau asamtai.
Jesús jega Apajuí ememattainum ejegamu
21Ocho tsawan jegamtai, uchin pakaji ajapjuatasag adaikaju JESÚS. María eke ejapjumainchau aig, nu adaikattame tusa ángel tibaunak dutiksag.
22Nunikag tsawan dita pegketnujiya nu jegamtai, Moisés chicham umiktinnum tibauwa dutiksag Jerusalén ejegawaju Apu Apajuí eemtin iwainaktatus. 23Nunak Apu Apajuí tibau chicham umiktina nui agagbaunum: “Ashí uchi aishmag iwai akiinuk Apu Apajuinu atí”, tibau asamtai dutikawajui. 24Nunik weenak Apu Apajuinu atinun jukiaju chicham umiktajum tibaunum: Jimag tórtola,#2.24 “Tórtola” tawa duka pauma numamtin tagkumtai aajakui. nu atsakuig jimag paum tsakat itaatajum tibauwa dutiksag.
25Nunú tsawantinig Jerusalén pujujakui Simeón daagtin, pegkejan takau, wait anenkagtin, Israelan Apajuí ichichjatna nuna wainkatatus daká pujú, Wakaní Pegkejishkam ajamu; 26nuniau asa Wakaní Pegkejiya nu dekamtikau aajakui, Apu Apajuí Etegkamu waintsukek jakashtinaitme tusa; 27nunin asa Wakaní Pegkeji anentaimtikjam jega Apajuí ememattainum weuwai; Joseshkam Mariajai Jesusan jukiag jega Apajuí ememattainum jegawaju, chicham umiktinnum dutikatajum tawa nuna betek dutikatatus. 28Nunik Simeón uchin minaaki juki Apajuin pegkegnum chichajak:
29“Apuh, yamaik ame chicham tujutbauwa duka uminkau asamtai,
mina inakjuk shiig agkan anentaimas jakati tusam idaitusta.
30Wagki mina jiijui wainkajai ame uwemtikagtamunak,
31ashí aents ame awemamun wainkagtata nuna.
32Juka tsaaptin
judiochu aidaunash wantintuktina nuuwai,
amina aentsjum Israel aina nu eme anentai atina nu”, tau.
33Ashí nuna pachis uchí tutai, Josek Mariajai anentai jegachaju. 34Nuna tii Simeón atumnash Apajuí yaimpaktinme tusa, Jesusa dukujin, Marian chichajak:
—Nijah, ju uchia junak kuashat Israel aina nuiyag dakitiagtinai niina dakituidauk megkaejagtatui, nuninai kuashat nemajiagtina nu uwemjagtinai. Nigka Apajuinua nuna iwainatnai, tujash kuashat aents dakitiagtinai, 35aatus nuninak ditá anentain awa nuna iwainmabiagtinai, nu nuninamua nunú aminak espadayai ijumaina imatijamak anentaimin waitkagmastinai, tiuwai.
36Nuanuig nuwa profeta Ana daagtin, Fanuela nawanji Aser weantu shiig muuntuch wajasá pujau. Nigka shiig tsakatuch aishina siete mijan pujusui, 37nuniau wajemea ochenta y cuatro mijan wegau; nuigtush jega Apajuí ememattainum kashish tsawaishkam megkaechau, nuniau asa ayunó wajak Apajuin aujú pujú. 38Nuniaig niishkam, Apajuin see taku uchin pachis ashí aents Jerusalén agkanmitkam atinun dakaina nuna tau.
39Apu Apajuí chicham umiktajum tibauwa nunak imatiksag umikag, ditá yaaktaji Nazaret, Galilea nugkanum awa nui wakitkiaju.
40Tuja uchishkam tsakau nuniak senchi wegau, nuigtush senchi yachameau, tuja Apajuí wait anentamujish niiní au.
Jesús jega Apajuí ememattainum pujau wainkamu
41Ashí mijantin José Mariajai, Jerusalén tuke wesagké aidau fiesta Pascua jegatai; 42nuniamunum Jesús doce mijan ajamu ai weajui Jerusalén fiesta inagkeautaiya nuna betek dutikatatus. 43Nunik fiesta ashimnakmatai ditak waketainai Jesusak Jerusalén juwakui, Josek Mariajai dekainatsaig. 44Dita anentaimsajag, tikich aidaujais ijunag wegatai, tusag makichik tsawan kuwaekaju, nuniau ashí ditá waintai nuigtú ditá patayí aidaunmash egaidau; 45tujash wainkachag Jerusalén waketjaju egainak.
46Nunikag kampatum tsawanta jui wainkaju, jega Apajuí ememattainum maestro chicham umiktinun jintinkagtin aidaujai ejapena ekeemas, chichaagtai antak niishkam iniimak eketun. 47Ashí aents ni chichaamun antujuidauk, yachajin diijus puyatkag diidau, dita iniamash shiig aimu asamtai. 48Nunittaman apají dukujijai wainak puyatjuk, dukují chichajak:
—Uchijuh, ¿wagka jusha jutikagtame? Nijah, wi apajai shiig senchi puyatjukan egakun wekaetusjamna, tau.
49Tama ni ayaak:
—¿Wagka minash egatjume? ¿Atumek dekatsjumek mina Apagdau aidaun uyumamainaitag duka?, tau.
50Tujash ditak, wagkag tawa tusag dekagmainchau dekapedau.
51Nunikag Jesusan jukiag Nazaret waketjajui, Jesús nui pujusá ashí dita tabaunak betek umiau. Tujash niina dukujig ashí Jesús nunikbaunak tuke kajimattsuk anentaimtú pujau. 52Tuja Jesuschakam nuní senchi tsakau, nuniak nuní senchi dekau, nunisag Apajuishkam shiig anentau nuigtú aents aidaushkam shiig anentuidau.
Nke Ahọpụtara Ugbu A:
(Evangelio según San Lucas) 2: AGR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2020, Wycliffe Bible Translators, Inc.