Yuuhanna 7
7
Akhwaan Isa lissaaʼ ma aamano beyah
1Wa baʼad da, Isa gamma yuruukh fi hillaal hana daar al-Jaliil. Hu ma dawwar yuruukh fi hillaal hana daar al-Yahuudiiya achaan kubaaraat al-Yahuud dawwaro yaktuluuh. 2Wa iid al-Yahuud al-binaaduuh iid al-Lagaadiib garrab. 3Wa akhwaan Isa gaalo leyah : «Gumm min hini. Amchi fi daar al-Yahuudiiya wa khalli talaamiizak yichiifu al-amal al-inta tisawwiih. 4Kan naadum yidoor yabga maʼruuf, hu ma yilabbid amalah le l-naas. Kan tidoor tisawwi achya misil dool, khalaas amchi khalli kulla l-naas yichiifuuk !» 5Fi l-wakit da, akhwaanah kula lissaaʼ ma aamano beyah.
6Wa Isa radda leehum wa gaal : «Al-wakit al-Allah gataʼah leyi lissaaʼ ma ja. Laakin intu, tagdaro tamchu fi ayyi wakit. 7Naas al-dunya ma yakrahooku wa laakin yakrahooni ana achaan ana chaahid fooghum wa nuguul amalhum fasil. 8Intu gummu amchu wa ayyudu fi Madiinat al-Khudus. Fi l-iid da, ana ma nugumm. Al-wakit al-nugumm foogah lissaaʼ ma ja.» 9Wa hu gaal al-kalaam da wa gaʼad fi daar al-Jaliil.
10Wa wakit akhwaanah gammo khalaas wa macho fi l-madiina le yiʼayyudu, Isa kula macha. Wa laakin ma oora naadum wa saafar be achiir.
11Wa fi Madiinat al-Khudus, kubaaraat al-Yahuud gaaʼidiin yifattuchu Isa fi ust al-naas al-jo le l-iid wa gaaʼidiin yasʼaloohum wa yuguulu : «Hu gaaʼid ween ?» 12Wa kulla l-naas gaaʼidiin yihajju beyah ambeenaathum tihit tihit. Al-waahidiin gaaʼidiin yuguulu hu naadum adiil wa waahidiin yuguulu hu gaaʼid yukhuchch al-naas. 13Wa kulla l-naas ma hajjo beyah be hiss aali achaan humman khaayfiin min kubaaraat al-Yahuud.
Al-Masiih hajja le l-Yahuud
14Wakit nuss ayyaam al-iid#7:14 nuss ayyaam al-iid Iid al-Lagaadiib indah sabʼa yoom. faato khalaas, Isa dakhal fi beet Allah wa gamma yiʼallim al-naas. 15Wa l-Yahuud alʼajjabo bilheen wa gaalo : «Kikkeef al-naadum da bigi aalim wa ma gara ?» 16Wa Isa radda leehum wa gaal : «Al-kalaam al-niʼallimku beyah ma jaayi minni ana. Hu jaayi min Allah al-rassalaani. 17Ayyi naadum kan indah niiye yisawwi kulla cheyy al-Allah yidoorah, hu yaʼarif kan kalaami da jaayi min Allah aw jaayi minni ana bas. 18Ayyi naadum al-gaaʼid yiʼallim al-naas be taʼliim haggah halaalah, hu yidoor chukur min al-naas. Laakin al-naadum al-yidoor al-naas yachkuru Allah al-rassalah, al-naadum da kalaamah sahiih wa hu ma yukhuchch ayyi naadum. 19Muusa ma antaaku al-Tawraat walla ? Wa laakin ma fi naadum minku yitabbig churuut al-Tawraat. Maala tidooru taktuluuni ?»
20Wa l-naas raddo leyah wa gaalo : «Ma ke ! Inta muchootin. Yaatu yidoor yaktulak ?» 21Wa Isa radda leehum wa gaal : «Ana sawweet ajab waahid fi yoom al-sabt wa intu kulluku ajjabtu minnah bilheen. 22Tuguulu Muusa antaaku wasiiyat al-tahuura. Wa laakin be l-sahiih, juduudna al-awwalaaniyiin kula induhum al-tahuura gubbaal Muusa. Wa be sabab al-wasiiye di, intu titahhuru naadum hatta kan fi yoom al-sabt kula.#7:22 yoom al-sabt kula Fi l-gaanuun al-yahuudi, kan wildo wileed, waajib yitahhuruuh baʼad tamaane yoom min waaluudtah kan da yoom al-raaha kula. 23Wa kan titahhuru naadum fi yoom al-sabt achaan ma tikhaalufu Tawraat Muusa, maalku ziʼiltu minni kan fi yoom al-sabt ana anteet al-chifa le kulla jisim al-naadum ? 24Ma tahkumu be l-zaahir. Ahkumu be l-adil !»
25Wa naas waahidiin min sukkaan Madiinat al-Khudus assaaʼalo wa gaalo : «Da ma al-naadum al-yidooru yaktuluuh walla ? 26Laakin daahu gaaʼid yikallim fi ust al-naas wa l-kubaaraat ma yuguulu cheyy ! Akuun irfo khalaas hu al-Masiih. 27Laakin al-naadum da, naʼarfu al-bakaan al-jaayi minnah. Wa wakit al-Masiih yibiin, ma fi naadum yaʼarif al-bakaan al-hu ja minnah.»
28Wa achaan da, wakit Isa gaaʼid yiʼallim al-naas fi fadaayit beet Allah, hu hajja be hiss aali wa gaal : «Sahiih taʼarfuuni walla ? Sahiih taʼarfu al-bakaan al-ana jiit minnah walla ? Ana ma jiit be izni. Al-rassalaani hu bas saadikh wa intu ma taʼarfuuh. 29Wa laakin ana naʼarfah achaan ana jaayi minnah wa hu rassalaani.»
30Wa fi chaan da, naas waahidiin dawwaro yakurbuuh wa laakin ma fi naadum sawwa leyah cheyy achaan al-wakit al-Allah gataʼah leyah, lissaaʼ ma ja. 31Wa fi l-bakaan da, naas katiiriin aamano beyah wa gaalo : «Al-Masiih kan ja, yisawwi ajaayib ziyaada min al-naadum da walla ?»
32Wa l-naas gaaʼidiin yihajju tihit tihit ambeenaathum be Isa. Wa l-Fariiziyiin simʼoohum wa lammo maʼa kubaaraat rujaal al-diin wa rassalo askarhum achaan yakurbu Isa. 33Wa Isa gaal : «Ana nagood maʼaaku chiyya bas wa baʼad da, namchi fi bakaanah hu al-rassalaani. 34Wa intu tifattuchuuni wa ma talgooni wa l-bakaan al-ana nagood foogah ma tagdaro tamchu leyah.»
35Wa l-Yahuud hajjo ambeenaathum wa gaalo : «Ween al-bakaan al-yidoor yamchi foogah wa aniina ma nagdaro nalgooh ? Hal hu yidoor yisaafir le l-Yahuud al-muchattatiin ajaanib fi buldaan al-Yuunaaniyiin walla ? Hu yidoor yiʼallim al-Yuunaaniyiin walla ? 36Wa hu gaal : ‹Intu tifattuchuuni wa ma talgooni.› Wa battaan gaal : ‹Al-bakaan al-ana nagood foogah ma tagdaro tamchu leyah.› Chunu maʼana al-kalaam da ?»
Buhuur hana almi al-haya
37Wa aakhir ayyaam al-iid, hu akbar yoom fi l-iid. Wa fi l-yoom da, Isa gamma foog wa hajja le l-naas be hiss aali wa gaal : «Kan ayyi naadum atchaan, khalli yaji leyi wa yachrab. 38Wa ayyi naadum al-yiʼaamin beyi, almi al-haya yajri fi galbah misil buhuur wa da misil maktuub fi l-Kitaab.» 39Wa be l-kalaam da, hu hajja be l-Ruuh al-Khudduus al-baʼadeen yanzil fi l-naas al-muʼminiin beyah. Wa fi l-wakit da, Allah lissaaʼ ma nazzal al-Ruuh achaan Isa lissaaʼ ma talaʼ fi majdah.
Al-naas gammo alkhaalato
40Wakit al-naas simʼo al-kalaam da, waahidiin minhum gaalo : «Akiid hu bas al-nabi.» 41Wa naas waahidiin gaalo : «Da bas al-Masiih.» Wa naas waahidiin gaalo : «Haay ! Al-Masiih yaji min daar al-Jaliil walla ? Abadan. 42Al-Masiih yaji min zurriiyit Sayyidna Dawuud wa min Beet Laham, al-hille al-rabbo foogha Dawuud. Ma maktuub fi l-Kitaab walla ?» 43Wa be misil da, al-naas ankhalafo ambeenaathum be sabab Isa. 44Naas waahidiin dawwaro yakurbuuh wa laakin ma fi naadum sawwa leyah cheyy.
45Wa l-askar gabbalo le kubaaraat rujaal al-diin wa l-Fariiziyiin. Wa l-kubaaraat saʼalo al-askar wa gaalo : «Maala ma jibtuuh leena ?» 46Wa l-askar raddo leehum wa gaalo : «Abadan ma fi naadum hajja kalaam ajiib misil al-naadum da !» 47Wa l-Fariiziyiin raddo leehum wa gaalo : «Haay ! Hu khachchaaku intu kula ? 48Fiyah naadum waahid min al-kubaaraat aw min al-Fariiziyiin al-aaman beyah walla ? 49Naas al-hille dool ma yaʼarfu al-Tawraat. Humman malʼuuniin !»
50Wa Nigudiimus maʼaahum wa hu al-naadum al-yoom waahid macha hajja maʼa Isa be l-leel. Wa hu hajja leehum wa gaal : 51«Chariiʼitna ma tikhalliina nahkumu le naadum gubbaal ma nasmaʼooh wa niʼakkudu min al-cheyy al-hu sawwaah.» 52Wa l-kubaaraat raddo leyah wa gaalo : «Haay ! Inta kula min daar al-Jaliil walla ? Kan tagri al-Kitaab adiil ke wa tichiif ma fi nabi yaji min daar al-Jaliil.» 53Wa khalaas, kulluhum chatto wa ayyi waahid macha le beetah.
Nke Ahọpụtara Ugbu A:
Yuuhanna 7: ADT19
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Arabe tchadien (alphabet latin) Bible © Alliance Biblique du Tchad, 2019.