Yuuhanna 18
18
Al-Masiih karabooh
1Wa wakit Isa kammal al-duʼa da, hu gamma maʼa talaamiizah wa gataʼo waadi Khidruun. Wa jo le jineene waahide wa dakhalo fiiha. 2Wa Yahuuza al-naadum al-yukhuun Isa kula yaʼarif al-bakaan da achaan Isa lamma foogah maʼa talaamiizah iddat marraat. 3Wa Yahuuza ja fi l-jineene maʼa askar Roomaaniyiin wa l-hurraas al-rassaloohum kubaaraat rujaal al-diin wa l-Fariiziyiin. Wa humman musallahiin wa chaayliin fawaaniis wa machaahiib yidawwu beehum.
4Wa Isa irif kulla cheyy al-yabga foogah wa macha leehum wa gaal : «Tifattuchu yaatu ?» 5Wa raddo leyah wa gaalo : «Nifattuchu Isa al-min hillit al-Naasira.» Wa Isa gaal : «Ana bas hu.» Wa Yahuuza al-khaayin gaaʼid fi usuthum. 6Wa wakit Isa gaal : «Ana bas hu», humman kasso minnah wara wa wagaʼo fi l-turaab.
7Wa marra taaniye, hu saʼalaahum wa gaal : «Tifattuchu yaatu ?» Wa gaalo : «Isa al-min hillit al-Naasira.» 8Wa Isa radda leehum wa gaal : «Awwal ooreetku ana bas hu. Wa khalaas kan tidooruuni, khallu al-naas al-maʼaayi yamchu.»
9Wa hu gaal al-kalaam da achaan al-kalaam al-gaalah min awwal yitimm. Awwal hu gaal : «Min al-naas al-inta anteetni, ma fi naadum waddar.»
10Wa Simʼaan Butrus indah seef wa sallaah wa darab beyah abid kabiir rujaal al-diin wa gataʼ adaanah al-zeene. Wa usum al-abid da Malkhus. 11Wa Isa hajja le Butrus wa gaal : «Dakhkhil seefak fi beetah. Maala ma nachrab min kaas al-taʼab al-abuuyi antaani ?» 12Wa l-askar maʼa kabiirhum wa l-hurraas al-rassaloohum kubaaraat al-Yahuud karabo Isa wa rabbatooh. 13Wa awwal cheyy, waddooh le Hanaan. Wa hu abu marit Gayaafa wa Gayaafa da kabiir rujaal al-diin fi l-sana di. 14Wa Gayaafa da, hu bas al-naadum al-gaal le kubaaraat al-Yahuud akheer leehum kan naadum waahid yumuut le l-chaʼab.
Butrus nakar Isa
15Wa Simʼaan Butrus wa tilmiiz aakhar macho wara Isa. Wa l-tilmiiz al-aakhar maʼruuf le kabiir rujaal al-diin wa achaan da, gidir dakhal fi fadaayit al-beet maʼa Isa. 16Wa Butrus wagaf barra fi khachum al-beet. Wa l-tilmiiz al-maʼruuf le kabiir rujaal al-diin marag le l-khaddaama al-masʼuula fi l-baab wa hajja leeha wa wadda Butrus daakhal. 17Wa l-khaddaama saʼalatah le Butrus wa gaalat : «Inta kula tilmiiz hana l-raajil da ?» Wa Butrus gaal : «La, la.»
18Al-wata baarde. Wa l-khaddaamiin wa l-hurraas oogado naar fi kaanuun achaan yiddaffo. Wa Butrus gaaʼid yiddaffa maʼaahum. 19Wa kabiir rujaal al-diin gamma saʼal Isa min talaamiizah wa min taʼaaliimah. 20Wa Isa radda leyah wa gaal : «Ana hajjeet giddaam kulla l-naas. Min al-awwal, allamt al-naas fi buyuut al-sala wa fi beet Allah wa fi l-bakaanaat al-kulla l-Yahuud yilimmu fooghum. Ma gult cheyy be achiir. 21Maala tasʼalni ? Al-naas al-simʼo kalaami, asʼalhum min al-kalaam al-ana gultah leehum. Humman yaʼarfu al-kalaam al-ana gultah.»
22Wa wakit gaal al-kalaam da, waahid min al-hurraas al-waagfiin jambah chaddagah wa gaal : «Kikkeef turudd le kabiir rujaal al-diin be misil da ?» 23Wa Isa radda leyah wa gaal : «Kan kalaami kidib, achhad fi l-kidib. Laakin kan kalaami sahiih, maala darabtini ?»
24Wa Hanaan wadda Isa murabbat le Gayaafa kabiir rujaal al-diin. 25Wa Simʼaan Butrus waagif yiddaffa fi l-naar. Wa gaalo leyah : «Inta kula ma waahid min talaamiizah ?» Wa hu nakar wa gaal : «La, ana ma tilmiizah.» 26Wa waahid min khaddaamiin kabiir rujaal al-diin hajja leyah. Wa hu akhu hana l-naadum al-Butrus gataʼ adaanah. Wa hu saʼal Butrus wa gaal : «Ana ma chiftak maʼaayah fi l-jineene walla ?» 27Wa Butrus nakar battaan wa tawwaali al-diik ooʼa.
Al-Masiih giddaam Bilaatus
28Wa marago Isa min beet Gayaafa wa waddooh fi gasir al-waali. Al-wata bigat fajur. Al-kubaaraat zaathum ma dakhalo fi gasir al-waali al-Roomaani achaan da yoom al-iid. Wa kan dakhalo fi beet naadum ma Yahuudi, yinajjusu nufuushum wa ma yagdaro yaakulu acha iid al-Fisha. 29Wa achaan da, Bilaatus al-waali marag leehum wa gaal : «Chunu al-tuhma al-khatteetuuha fi l-naadum da ?» 30Wa raddo leyah wa gaalo : «Al-naadum da kan ma mujrim, ma nisallumuuh leek.» 31Wa Bilaatus gaal : «Chiiluuh wa chaaruʼuuh hasab gaanuunku.» Wa l-Yahuud gaalo : «Gaanuunak ma yasmah leena achaan nahkumu le ayyi naadum be l-moot.» 32Be misil da, al-kalaam al-Isa gaalah fi l-tariiga al-yumuut beeha#18:32 Al-kalaam da talgooh fi Yuuhanna 12:32-33. bada yilhaggag.
33Wa Bilaatus gabbal fi gasrah wa naada Isa. Wa saʼalah wa gaal : «Inta malik al-Yahuud walla ?» 34Wa Isa radda leyah wa gaal : «Al-suʼaal da, suʼaalak inta walla ? Walla suʼaal hana naas aakhariin ?» 35Wa Bilaatus radda leyah wa gaal : «Haay ! Ana Yahuudi walla ? Gabiiltak inta bas wa kubaaraat rujaal al-diin sallamook leyi. Chunu al-cheyy al-inta sawweetah ?»
36Isa radda leyah wa gaal : «Mamlakati ma mamlaka hana l-dunya. Kan mamlakati hana l-dunya, khaddaamiini yugummu yidaawusu achaan al-Yahuud ma yakurbuuni. Wa laakin mulki ma jaayi min al-dunya.» 37Wa Bilaatus gaal : «Ha, inta malik ?»
Wa Isa radda leyah wa gaal : «Misil inta gultah. Wa be l-sahiih, fi chaan da bas ana mawluud wa jiit fi l-dunya, achaan nachhad le l-hagg. Ayyi naadum al-yiriid al-hagg yasmaʼ kalaami.» 38Wa Bilaatus gaal : «Chunu al-hagg ?»
Wa wakit gaal al-kalaam da, Bilaatus marag le l-Yahuud wa gaal leehum : «Ana ma ligiit foog al-naadum da ayyi jariime. 39Laakin fi aaditku waajib natlig masjuun waahid fi iid al-Fisha. Tidooru natlig leeku malik al-Yahuud walla ?» 40Wa aato be hiss chadiid wa gaalo : «La, ma hu ! Atlig leena Baraabaas !» Wa Baraabaas da, hu sawri.
Nke Ahọpụtara Ugbu A:
Yuuhanna 18: ADT19
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Arabe tchadien (alphabet latin) Bible © Alliance Biblique du Tchad, 2019.