Lukas 15
15
U Nawan a Tupa
(Mateo 18:12-14)
1Essa a aldew u mágsingeh hide ti buwes sakay u agum pa hide a inturing a makasalanan ay immadene ni Jesus para mágsaneg. 2Nágganasasan u Pariseo hide sakay u maisto hide nu Kautusan, kinagi de, “I tolayan iye ay mákpággagum tu makasalanan hide sakay mákpággatubang nide a kuman.” 3Dipo hod ay kinagi ni Jesus nide i talinhagaan iye,
4“Ni u essa nikam ay tehhod a datos a tupa sakay nawan u essa, ánya gimitán naay? Awan beman iwahák na u siyam a pulo ay ti siyam tu parang sakay ahyukán na u nawan hanggan metan na itod? 5Ni ketan na dán ay masaya siya a mangbabákláy tu tupa para isole. 6Káddemát na tu bilay ay akitán na u barkada na hide sakay u kadatig na hide a bilay sakay kagiyán na nide, ‘Mákpagsaya kam nikán, dipo netan ku dán u tupa ko a nawan!’ 7Kagiyán ko nikam, magkahod ti dakál a kasayaan ti langet dipo tu essa a makasalanan a nagsise nan tu siyam a pulo ay ti siyam a malinis a awan kailangan a magsise!”
U Nawan a Pilak
8Kinagi pa ni Jesus, “Ni tehhod a sapulo a pilak u bábbey sakay nebut u essa, ánya wád i gimitán naay? Awan beman taban na u simbuwan sakay walisan na u bilay sakay pakaehyukán na hanggan ketan na itod? 9Ni ketan na dán iye ay akitán na u barkada na hide sakay u kadatig na hide a bilay sakay kagiyán na nide, ‘Mákpagsaya kam nikán, dipo netan ku dán u nebut ko a silber a pilak!’ 10Kagiyán ko nikam, konna bi hod u kasayaan nu anghel hide nu Diyos dipo tu essa a makasalanan a immadág tu kasalanan na.”
U Naglayas a Anak
11Kinagi pa ni Jesus, “Te essa a tolay a tehhod a duwwa a anak a lállake. 12Kinagi nikuna nu dipos, ‘Amáng, iyatád mu dán nikán u manaán ko.’ Kaya hinate nu ama u ari-arian na nide a duwwa. 13Kállipas nu sangan a aldew ay inlako nu dipos u namana na sakay immangay tu adeyo a lugar. Ginasta na hod u pilak tu awan hide ti pinagseserbiyan a bagay. 14Nikuna maubus na dán u pilak na ay nagkahod ti matindi a sák-aláp ti lugaran itod, kanya naghirap siya. 15Kanya simmáddáp siya a utusan tu essa a lállake a taga-hod. Pinaangay na siya tu uma na tánni magalaga tu babuy na. 16Dipo tu aláp na, sakay awan be nikuna ti mangatád ti makan, ngahi-ngahe nadan a kanán u kákkanán nu babuy hide. 17Pero napag-isip-isip na u ginággimet na hide kaya nakagi na tu sadile na, ‘U alipin nama ko ay awan magala-aláp nan lalabis pa u kanan de, pero hikán ay matayák dán he ti aláp! 18Soliyák tu kán amáng sakay kagiyán ko nikuna, “Amáng, nagkasalaák tu Diyos sakay niko. 19Awanák mu dán dapat a dulawán a anak mo; nan ibilangák mo dálla a essa tu alipin mo hide.”’ 20Timmáknág siya sakay nagsole nama na. Adeyo pálla siya ay táttannawán dán siya nama na. Sakay kinagbiyan na siya ti husto kaya gumággenan siya a tummagbu, kinábkábban na sakay inammuwan na siya. 21Sakay kinagi nu anak nikuna, ‘Amáng, nagkasalaák tu Diyos sakay niko. Awanák dán karapat-dapat a dulawán mo a anak mo.’ 22Pero dinulaw nu ama u alipin na hide, ‘Magalisto kam! Iyangay moy he u pinakamaganda a damit sakay isulot moy nikuna. Sulutan moy siya ti sángkalan sakay sapatus. 23Sakay alapán moy u pinatabiyan a dumalaga a baka sakay bunuwan ta kuman kitam sakay magsaya! 24Dipo akala ko ay natay dán i anak kuwan iye, pero biyag pabballa, nawan, pero netan bila.’ Kanya nagsaya hide.
25Nadid, u panganay ay katoy palla tu uma de, mentaras a pademát siya tu bilay ay nasaneg na u togtugan sakay sayawan. 26Dinulawan na u essa tu alipin de hide sakay tinanung, ‘Bakin a te kasayaan ti bilay?’ 27Kinagi nu alipin nikuna, ‘Dimmemát u wadi mo! Kaya pinabuno nama mo u pinatabiyan na a baka a dumalaga, dipo nagsole siya a biyag sakay awan ti saket!’ 28Pero nágngál u panganay sakay umád na dán a sumáddáp tu bilay de. Kanya limmuwas tama na sakay pinaha-paha na siya. 29Pero kinagi nu panganay, ‘Nagserbiyák niko ti makpal a taon sakay maski nikan ay awan taka sinuway. Pero maski ni pumensan ay awanák mo inatádden maskin essa a bul-o a kambing para pagkasayaan me ay tu barkada ko hide. 30Pero nikuna dimmemát u anak mo a nággagastaán tu kabiyagan mo hide tu pángngibábbey ay pinangbuno mo pa tu pinatabiyan mo a bul-o a baka!’ 31Timmábbeg tama na, ‘Anak ko, pirmi taka a kakaguman kaya atanan a kabiyagan ko ay kao mo.’ 32Pero dapat kitam a magsaya dipo u wadi mo a akala tam ay patay dan ay nagsole a huway, pero netan bila.”
Nke Ahọpụtara Ugbu A:
Lukas 15: MBJC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Pahanan Agta New Testament © Philippine Bible Society and Wycliffe Bible Translators, Inc., 2017.