Joha 1
1
UbuNkulunkulu lobuntu lomsebenzi kaJesu Kristu
1Ekuqaleni wayekhona uLizwi, uLizwi wayekuNkulunkulu, uLizwi wayenguNkulunkulu. 2Yena wayekuNkulunkulu ekuqaleni. 3Zonke izinto zenziwa ngaye; langaphandle kwakhe kakwenziwanga lutho kukho konke okwenziweyo. 4Ukuphila kwakukuye, ukuphila kwakuyikukhanya kwabantu. 5Ukukhanya kukhanya emnyameni, kodwa umnyama kawukwahlulanga.
6Kwavela umuntu ethunywe nguNkulunkulu, ibizo lakhe linguJohane.#Mat 3:1; Mark 1:4; Luka 3:1–2 7Yena wezela ubufakazi ukuba afakaze ngokukhanya, ukuze bonke bakholwe ngaye. 8Wayengesikho ukukhanya, kodwa wezela ukuba afakaze ngokukhanya.
9Ukukhanya okuqinisileyo okukhanyisa wonke umuntu, kwasekusiza emhlabeni. 10Wayekhona emhlabeni, umhlaba wenziwa ngaye; kodwa umhlaba kawumazanga. 11Weza kokwakhe, kodwa abakhe kabamamukelanga. 12Kodwa bonke abamamukelayo wabapha amandla okuba ngabantwana bakaNkulunkulu, labo abakholwa ebizweni lakhe, 13ababengazalwanga ngegazi lomuntu, langokufisa kwendoda, kodwa bazalwa nguNkulunkulu.
14ULizwi waba yinyama, wahlala phakathi kwethu, sabona inkazimulo yakhe injengeyozelwe yedwa kaYise, egcwele umusa leqiniso. 15UJohane wafakaza ngaye, wamemeza wathi: Nguye lo ebengisitsho ngaye ukuthi: Lowo ozayo emva kwami uyangandulela ngobukhulu, ngoba wayekhona kuqala kulami. 16Ngoba ekugcwaleni kwakhe samukele sonke umusa phezu komusa. 17Ngoba umlayo wanikwa ngoMose, umusa leqiniso kweza ngoJesu Kristu. 18Kakho owake wabona uNkulunkulu; iNdodana ezelwe yodwa esesifubeni sikaYise yiyo emvezileyo.
Ubufakazi bukaJohane
(Mat 3:1–12; Mark 1:7–8; Luka 3:15–17)
19Lobu yibufakazi bukaJohane mhla abaJuda abavela eJerusalema bathuma abapristi labaLevi ukuba bambuze ukuthi: Wena ungubani na? 20Wavuma, kalandulanga, kodwa wavuma wathi: Kangisuye uKristu mina. 21Bambuza futhi bathi: Uyini pho? UnguElija? Wathi: Kangisuye. UngumProfethi na? Waphendula wathi: Atshi.#Dute 18:15, 18; Mal 4:5 22Basebesithi kuye: Ungubani na? Kumele usitshele ukuze sibaphendule abasithumileyo; uzitsho ukuthi ungubani na? 23Wathi njengokutsho kukaIsaya umprofethi:
Ngiyilizwi lomemezayo enkangala, esithi:
Lungisani indlela yeNkosi.#Isa 40:3
24Labo ababethunyiwe babevela kubaFarisi. 25Bambuza bathi: Ubhaphathizelani pho, uba ungesuye uKristu, loElija, lomProfethi na? 26UJohane wabaphendula wathi: Mina ngibhaphathiza ngamanzi; kodwa phakathi kwenu umi elingamaziyo; 27nguye ozayo emva kwami, engingafanele ukuthukulula umchilo wamanyathelo akhe. 28Lokhu kwenzeka eBethani ngaphetsheya kweJordani, lapho uJohane wayebhaphathiza khona.
29Ngakusasa wabona uJesu esiza kuye, wathi: Khangelani, iWundlu likaNkulunkulu elisusayo isono somhlaba. 30Nguye lo ebengisitsho ngaye ukuthi: Emva kwami kuza umuntu ophambi kwami, ngoba wayekhona kuqala kulami. 31Lami bengingamazi; kodwa ukuze abonakaliswe kuIsrayeli, ngizile ngibhaphathiza ngamanzi. 32UJohane wafakaza wathi: Ngibonile uMoya esehla ezulwini njengejuba, wahlala phezu kwakhe. 33Lami bengingamazi, kodwa owangithumayo ukubhaphathiza ngamanzi wathi kimi: Lowo ozakubona uMoya esehlela phezu kwakhe, ehlala kuye, nguye obhaphathiza ngoMoya oNgcwele. 34Mina ngibonile, ngafakaza ukuthi: Lo uyiNdodana kaNkulunkulu.
Abafundi bokuqala
35Ngakusasa futhi uJohane wayemi lababili kubafundi bakhe. 36Wakhangela uJesu ehamba, wathi: Khangelani, iWundlu likaNkulunkulu. 37Abafundi ababili bezwa ekhuluma lokhu, bamlandela uJesu. 38Kwathi uJesu enyemukula, wababona bemlandela, wathi kubo: Lifunani na? Bathi kuye: Rabi, okuyikuthi Mfundisi, uhlalaphi na? 39Wathi kubo: Wozani libone. Beza babona lapho ayehlala khona; bahlala laye ngalolosuku. Laselithambeme. 40Omunye walaba ababili abamuzwayo uJohane ekhuluma, bamlandela uJesu, kwakunguAndreya umfowabo kaSimoni Petro. 41Yena wafumana kuqala umfowabo uSimoni, wathi kuye: Sesimfumene uMesiya, okuyikuthi uKristu. 42Yena wamletha kuJesu; uJesu emkhangela wathi: Wena unguSimoni indodana kaJohane; uzakuthiwa nguKefasi, okuyikuthi uPetro, okutsho idwala.
43Ngakusasa uJesu wayefuna ukuya eGalili, wafumana uFiliphu; wathi kuye: Ngilandela. 44UFiliphu wayengoweBetsayida, umuzi wakibo kaAndreya loPetro. 45UFiliphu wafumana uNathanyeli, wathi kuye: Simfumene lowo aloba ngaye uMose emlayweni kanye labaprofethi, uJesu waseNazaretha, indodana kaJosefa.
46UNathanyeli wathi kuye: Kambe kungavela okuhle eNazaretha na? UFiliphu wathi kuye: Woza ubone. 47UJesu wabona uNathanyeli esiza kuye, wathi ngaye: Khangelani, umIsrayeli uqobo okungekho inkohliso kuye. 48UNathanyeli wathi kuye: Ungazi njani na? UJesu wamphendula wathi: UFiliphu engakakubizi ungaphansi komkhiwa, bengikubona. 49UNathanyeli waphendula wathi: Mfundisi, uyiNdodana kaNkulunkulu; uyiNkosi kaIsrayeli. 50UJesu waphendula, wathi kuye: Uyakholwa ngoba ngithe kuwe bengikubona ungaphansi komkhiwa na? Uzakubona izinto ezinkulu kulalezi. 51Wathi kuye: Ngiqinisile, ngiqinisile ngithi kini: Lizakubona izulu livulekile, lezithunywa zikaNkulunkulu zisenyuka, zisehlela phezu kweNdodana yomuntu.#Gen 28:12
Nke Ahọpụtara Ugbu A:
Joha 1: BE1978
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Bible Society of Zimbabwe 1978