Ruka 23
23
Jesu pamberi paPirato naHerodhi
(Mat 27:1–2, 11–26; Mako 15:1–15; Johan 18:28–38)
1Zvino vose vakanga vakaungana, vakasimuka, vakaenda naye kuna Pirato. 2Vakatanga kumupomera mhosva, vachiti, “Takawana munhu uyu achitsausa rudzi rwedu, achivadzivisa kuti varege kuvigira Kesari kuterera; uye achizviti ndini Kristu Mambo.”
3Ipapo Pirato akamubvunza, akati, “Ko uri Mambo wavaJudha here?” Akamupindura, akati, “Ndizvo zvamareva.”
4Pirato akati kuvapristi vakuru nokuvazhinji, “Handiwani mhosva kumunhu uyu.”
5Ivo vakanyanya, vachiti, “Anomutsa vanhu, achidzidzisa muJudhiya rose, achitanga paGareriya kusvikira pano.”
6Pirato wakati achinzwa izvozvo, akabvunza kana munhu uyu ari muGareriya. 7Akati anzwa kuti anobva kunyika yakatongwa naHerodhi, akamutumira kuna Herodhi, nokuti akanga ari muJerusaremu pamazuva iwayo.
8Zvino Herodhi akafara kwazvo–kwazvo achiona Jesu; nokuti aida kumuona kare, zvaakanga anzwa zvake; akafunga kuti achaona chimwe chiratidzo chingaitwa naye. 9Akamubvunza mashoko mazhinji; asi iye haana kumupindura chinhu. 10Vapristi vakuru navanyori vakamira vakamupomera mhosva zvikuru.
11NaHerodhi navarwi vake vakamuzvidza, nokumuseka; vakazomupfekedza nguo dzinobwinya, vakamudzosera kuna Pirato. 12Nomusi uyo Pirato naHerodhi vakayanana; nokuti vaivengana.
13Zvino Pirato akaunganidza vapristi vakuru namakurukota navanhu, 14akati kwavari, “Mauya kwandiri nomunhu uyu, muchiti, anotsausa vanhu; tarirai ini ndamubvunzisisa pamberi penyu, ndikasawana kumunhu uyu mhosva yezvinhu zvamunomupomera nazvo; 15kunyangwe naHerodhiwo; nokuti wamudzosera kwatiri; tarirai, hakuna chinhu chakaitwa naye, chakafanira rufu.
16“Naizvozvo ndichamurova, ndigomusunungura. [ 17Nokuti aifanira kuvasunungurira mumwe pamutambo.]”
18Asi vose vakadanidzira pamwechete, vachiti, “Bvisai munhu uyu, mutisunungurire Bharabhasi!”
19Iye akanga asungwa mutorongo nemhaka yebope rakanga ramutswa muguta, neyokuuraya. 20Zvino Pirato akataurazve navo, achida kusunungura Jesu. 21Asi ivo vakaramba vachidanidzira, vachiti, “Roverai pamuchinjikwa, mumurovere pamuchinjikwa!”
22Akati kwavari rwechitatu, “Uyu akagotadzeiko? Handina kuwana mhosva yorufu kwaari.”
23Asi ivo vakasimbisa namazwi makuru, vachikumbira kuti aroverwe pamuchinjikwa. Mazwi avo akakunda. 24Zvino Pirato akatonga kuti zvavakakumbira zviitwe; 25akavasunungurira uyo wavakakumbira, akanga asungwa mutorongo nemhaka yebope neyokuuraya; akavapa Jesu vaite nokuda kwavo.
Jesu anoroverwa pamuchinjikwa
(Mat 27:32–56; Mako 15:21–41; Johan 19:17–30)
26Vakati vachienda naye, vakabata mumwe, ainzi Simoni weKurini, achibva kuruwa, vakamutakudza muchinjikwa, kuti autakure shure kwaJesu.
27Akateverwa navanhu vazhinji zhinji, navakadzi vaimuririra nokumuchema. 28Asi Jesu akatendeukira kwavari, akati, “Vakunda veJerusaremu, musandichema ini, asi muzvicheme imi navana venyu; 29nokuti tarirai, mazuva anouya, avachati, ‘Vakaropafadzwa vasingaponi, nezvizvaro zvisina kutongobereka, namazamu asina kuyamwisa.’ 30Musi uyo muchatanga kureva kumakomo, muchiti, ‘Wirai pamusoro pedu,’ nokuzvikomo, ‘Tifukidzei.’ 31Nokuti kana vachiita izvi kumuti munyoro, wakaoma uchaitirweiko?”
32Kwakanga kuna vamwe vatadzi vaviri, vavakaenda navo pamwechete naye kundourayiwa.
33Zvino vakati vasvika panzvimbo inonzi, “Dehenya,” vakamuroverapo navatadzi, mumwe kurudyi mumwe kuruboshwe.
34Ipapo Jesu akati, “Baba, muvakanganwire, nokuti havazivi chavanoita.” Vakagovana nguo dzake, vachikanda mijenya pamusoro padzo. 35Vanhu vakamira, vachitarira; namakurukota vakamusekawo, vachiti, “Wakaponesa vamwe; ngaazviponese, kana ari Kristu waMwari, Mutsanangurwa wake.”
36Navarwiwo vakamuseka, vakauya kwaari, vakamupa vhiniga, 37vachiti, “Kana uri Mambo wavaJudha, uzviponese.”
38Zvino kwakanga kune runyoro pamusoro pake rwaiti, “UYU NDIMAMBO WAVAJUDHA.”
39Mumwe wavatadzi vakanga vakaturikwa, akamutuka, achiti, “Hauzi Kristu here? Uzviponese, nesuwo.”
40Mumwe akapindura, akamurayira, achiti, “Hautyi kunyangwe naMwari kanhi, zvauri pakutongwa kamwe naye? 41Kana tirisu, takaitirwa patakafanirwa napo; nokuti isu tinopiwa zvakafanira mabasa edu; asi uyu haana kuita chinhu chisakafanira.”
42Ipapo akati, “Jesu mundirangarire, kana masvika muushe hwenyu!”
43Iye akati kwaari, “Zvirokwazvo, nhasi uchava neni muParadhiso.”
44Zvino yakanga yava nguva inenge yechitanhatu; rima rikavapo panyika yose, kusvikira panguva yepfumbamwe. 45Zuva rikasviba; keteni retemberi rikabvaruka napakati. 46Zvino Jesu akadana nezwi guru, achiti, “Baba, ndinoisa mweya wangu pamaoko enyu!” Akati areva izvozvo, akabudisa mweya wake.
47Ipapo mukuru wezana akati aona zvaitwa, akarumbidza Mwari achiti, “Zvirokwazvo, munhu uyu akanga akarurama.”
48Vazhinji vose vakanga vakaungana kuzoona izvozvo, vakati vaona zvaitwa, vakadzoka vachirova zvipfuva zvavo. 49Navazikanwi vake vose, navakadzi, vaimutevera vachibva Gareriya, vakamira kure, vachiona izvozvo.
Kuvigwa kwaJesu
(Mat 27:57–61; Mako 15:42–47; Johan 19:38–42)
50Zvino kwakanga kuno mumwe munhu, ainzi Josefa, mumwe wamakurukota, murume akanaka akarurama, 51iye akanga asina kutenderana navo pakurangana, nokuita kwavo, aiva weArimatia, guta ravaJudha, akanga achimirira ushe hwaMwari; 52iye akaenda kuna Pirato, akandokumbira chitunha chaJesu, 53akachiburusa, akachiputira nomucheka, akachiuisa muhwiro hwakanga hwakacherwa pabwe, makanga musina kumbovigwa munhu. 54Waiva musi woKugadzirira, Sabata roda kutanga.
55Navakadzi vakanga vauya naye, vachibva Gareriya, vakavatevera, vakaona hwiro, nomuisirwo womutumbi wake. 56Vakadzoka, vakagadzira zvinonhuwira namafuta. Vakazorora nomusi weSabata vachiterera murairo.
Nke Ahọpụtara Ugbu A:
Ruka 23: SUB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Shona Union Bible © Bible Society of Zimbabwe, 2002.