मर्कुस 11
11
यरुसलेममि इसुलाइ धुमधामसित स्वागत
(मत्ति २१:१-११; लुका १९:२८-४०; युहन्ना १२:१२-१९)
1जबइ उनु यरुसलेम रे जइतुन डाँणाका नजिकइ बेथफागे रे बेथानिया भन्न्या ठउँर आया, तबइ उनुले आफना सिस्यामध्ये दुइ जनालाइ यसो भुनिबर पठायो, 2“तमु पारिका गाउँ जा, रे जानाजानाइ तमुले अइलसम्म कोइ नचण्या एक गधाको बच्चा धेक्द्या छउँ। तइलाइ फुकाइबर याँ ल्यास। 3रे कसइले तमुलाइ ‘यो तमु क्या अद्दाछउ?’ भुन्यो भन्या, ‘प्रभुलाइ यइको खाँचो छ, #जकरिया ९:९ रे उनुले छिट्टाइ फर्काइदिन्या छन्’ भन्या।”
4तबइ तिनु गया, रे त्यो बच्चा खुल्ला गल्लिमि एक घरका बाइर देलिका अगाडि बादिबर राख्या धेक्यो। तइलाइ फुकाउन्याबेला 5नजिक्कइ कल्लिया मान्सले तिनुलाइ सोध्यो, “गधाका बच्चालाइ फुकाइबर तमु क्या अद्दलाछउ?”
6इसुले तिनुलाइ भुन्या जसेरि सिस्याले तिनुलाइ भुन्यो, रे ताँ भया मान्सले सिस्यालाइ गधाको बच्चा लइजान्दियो। 7सिस्याले गधाको बच्चा इसुका वाँ लेयो, रे आफना लत्ता गधाका बच्चाका पिठिमि राख्दियो, रे उनु तइमि सवार भया। 8भउतइ मान्सले आफना आफना हणइनाका बाइरि लत्ता रे कसइ कसइले त यइतिर उइतिरबटहइ रुखका स्याउँला काटिबर लइ लेया रे बाटाइना बिछायो। 9इसुका अगाडि पछाडि लाग्द्या मान्सले यसो भुन्न लाग्या, “परमेस्वरको प्रसम्सा! प्रभुका नाउँमि आउन्या धन्य हुन्! 10आब हामरा पुर्खा दाउद राजाको राज्य आउन्ना छ! उनरोइ राज्यको जइजइकार हउ! सप्पइ भन्ना मल्तिर स्वर्गमि बास अद्या परमेस्वरको जय हउ!”
11इसु रे उनरा सिस्या यरुसलेम आयापइतर मन्धिर भित्तर पस्या। रे उनुले मन्धिरका चारइतिर हेर्यो अबेला भयाहुनाले उनुले बारइ सिस्यालाइ लइजाइबर बेथानिया गया।
इसुले तिम्लाका रुखलाइ सराप्यो
(मत्ति २१:१८-१९)
12भोलिबार बेथानियाबटहइ फर्कन्ज्या इसुलाइ भोक लाग्याथ्यो। 13उनुले थोक्काइ पल्तिर एक झ्याम्म पण्या तिम्लाको रुख धेक्यो। रे तइमि काँइ फल पाउनउ कि भनिबर हेद्द गया रे तइ रुखका पात मात्तरइ पायो। क्यालाइकि तइ बखत तिम्लो फल्ल्या बेला भया थेइन्। 14तबइ इसुले तइ रुखलाइ भुन्यो, “आब तुबटहइ कसइले लइ फल खान जनपाउ।” यो कुरा उनरा सिस्याले सुन्यो।
15पइ यरुसलेम पुग्या पाछा उनु मन्धिरभित्तर पस्या, रे मन्धिरमि किनबेच अद्यालाइ बाइर निकालिदियो। पइसा साट्टयाका टेबुल रे परेवा बेच्च्याका कुर्चि घोप्टेइदियो। 16इसुले कस्सइलाइ लइ केइ थोक मन्धिरबटहइ लइजान दिएइन्। 17तइपाछा उनुले मान्सलाइ सिछ्या दिनइ भुन्न लाग्या, “क्या धर्म-सास्त्तरमि यसो लेखिया आथिन्, ‘मेरो घर सप्पइ जातिकि निउति प्रार्थनाको घर हुन्या छ?’ तर तमुले त यइलाइ डाँकुको अड्डा बनाया छउ।”
18पइ मुख्य पुजारि रे धर्म-गुरुले यो कुरा सुनिबर उनुलाइ माद्या उपाय खोज्ज लाग्या। तर तिनु उनुसित डराउन्थ्या, क्यालाइकि मान्स इसुका सिछ्या सुनिबर अचम्म मानन्थ्या।
19बसाइतिक भयापाछा उनु आफना सिस्यासित यरुसलेम सहरबटहइ निकल्बर गया।
बिस्वासको सक्ति
(मत्ति २१:२०-२२)
20दोसरा दिन प्रभातइ, तसइ बाटा जान्याबेला, इसुले तइ तिम्लाका रुखलाइ जणाइसमेत सुक्या धेक्यो। 21इसुले तइ रुखलाइ भुन्या कुरा सम्जिबर पत्रुसले इसुलाइ भुन्यो, “गुरु जि, तमले सराप दिया तिम्लाको रुख त सुकिसक्यारइ छ।”
22पइ इसुले तिनुलाइ भुन्यो, “परमेस्वरमि बिस्वास अर। 23साँच्चि मु तमुलाइ भुन्नउ, कसइले आफना मनमि थोक्काइ लइ सङ्का नअरि आफुले भन्या कुरा पुरा हुन्छ भनि बिस्वास अरिबर यइ पाहाडलाइ उखेलिबर तु समुन्दरनु जा भुन्यो भन्या त्यो होइजान्या छ। 24तबइलाइ मु तमलाइ भुन्नउ, तमुले प्रार्थनामि ज्यासुक्कइ मागन्छउ त्यो पायाछउ भन्या बिस्वास अर, रे त्यो तमरो हुन्याछ। 25जबइ तमु प्रार्थना अद्द खडा हुन्छउ, तबइ कसइका बिरुद्दमि तमरो केइ छ भन्या छिमा अर, ताकि स्वर्गमि हुन्या पिताले लइ तमरा पाप छिमा अद्दाछन्। 26तर छिमा अर्यानु भन्या, स्वर्गमि हुन्या पिताले लइ तमरा पाप छिमा अद्द्या आथिन्।”
इसुका अधिकारका बारेमि प्रस्न
(मत्ति २१:२३-२७; लुका २०:१-८)
27इसु रे उनरा सिस्या अज यरुसलेम आया। पइ इसु मन्धिरमि यइतिरउइतिर घुमिरयाबेला मुख्य पुजारि, धर्म-गुरु, अगुवा उनरा वाँ आया। 28तिनुले उनुलाइ प्रस्न अर्यो, “तु कइ अधिकारले यिनु काम अरन्छइ? यिनु काम अद्द्या अधिकार तुइलाइ कइले दियो?”
29इसुले तिनुलाइ भुन्यो, “मु तमुलाइ एक प्रस्न सोद्दउ, रे तमु यइको जबाफ दिय, रे कइ अधिकारले मु यिनु काम अद्दउ, त्यो तमुलाइ भन्या छु। 30युहन्नाले दिया बप्तिस्मा दिन्या अधिकार स्वर्गटहइ पाया हो कि मान्सबटहइ? मुइखि भुन।”
31तबइ तिनु आपसमि बहस अद्दलाग्या, “स्वर्गबटहइ भुन्नाउ भन्या तमुले उनुमि क्यालाइ बिस्वास अर्यानु भनिबर भन्न्या छन्।” 32यदि मान्सबटहइ भुन्नाउ भुन्या कसेरि भुन्न्या? तसो भुन्न तिनु डराया क्यालाइकि सप्पइले युहन्नालाइ साँचो अगमबक्ता भुनि मानन्थ्या। 33तबइ तिनुले इसुलाइ भुन्यो, “हामुलाइ थाँ आथिन्।” तबइ इसुले भुन्यो, “तसो भया मुइले काँबटहइ अधिकार पाइबर यिनु सप्पइ काम अद्दाछु, मु लइ तमुलाइ भुन्नइन्।”
Nke Ahọpụtara Ugbu A:
मर्कुस 11: DOTY
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2024 (Active), Mother Tongue Translators Society and Wycliffe Bible Translators, Inc. All rights reserved.