मत्ती 10
10
ईशु चे ब़ारहा चैले
(मरकुस 3:13–19; लूका 6:12–16)
1बल्ति ईशु ने आपणे ब़ारहा चैला नु गोढु हकारती कर, वानु अशुद्ध आत्मा चे उपर अधिकार ङिला कि वानु काढ़ो ते हर तरह ची बिमारीया ते सब तरह ची कमजोरीया नु दूर करो।
2ते यां ब़ारहा प्रेरितां चे नांवे ये छी, पेहला शमौन, जको पतरस किहवावे, ते ओचा भऊ अन्द्रियास, जबदी चा पूत याकूब, ते ओचा भऊ यूहन्ना, 3फिलिप्पुस, ते बरतुल्मै, थोमा, ते चुंगी गेहणे आला मत्ती, हलफई चा पूत याकूब ते तद्दै, 4शमौन कनानी, ते यहूदा इस्करियोती जेह्णे ओनु पकड़वाती वी ङिले।
ब़ारहा प्रेरितां चे सेवा काम
(मरकुस 6:7–13; लूका 9:1–6)
5यां ब़ारहा नु ईशु ने हा आज्ञा ङिती कर भेज़ले, “नेरीया जातिया सनु ना जजा, ते सामरिया चे कुई शहरा मां ना घिरजा। 6पर इस्राएल चे घराणे ही ची गार हुलीया आलीया भेङा चे गोढु जजा। 7ते टुरते-टुरते हा प्रचार करा, ‘स्वर्ग़ चा राज़ गोढु आती गेला।’ 8बिमारा नु ठीक करा, मरला आला नु जीते करा, कोहड़ीया नु शोद्ध करा, दुष्टात्मा नु काढ़ा। तम्ही मुफ्त मां गेला, ते मुफ्त मां ङिया। 9ते आपणे ब़टुवा मां ना तां सोने, ते ना रुपये, ते ना तांबा राखजा, 10#1 कुरि 9:14; 1 तीमु 5:18मार्ग़ा चे वास्ते ना झोली राखजा, ते ना ङोन चोले, ना जुत्तीया ते ना ङांग चवा, कांकि मजदूरा नु ओचे खाणे मिलणे चाही छै।
11“जिसे कुई शहर जा गांवा मां जावा, तां पता काढ़ा कि ओठे कूण लायक छै, तां जब तक उठु विदा ना हुवा तब तक ओही घरा मां रुकले रिहा। 12ते घरा मां घिरते बेले ओनु आशीष ङिजा। 13अगर ओ घरा चे लौक लायक हुवे तां तम्ची शान्ति वांचे उपर पुज़ी, अगर वे लायक नी हुवे तां तम्ची शान्ति तम्चे गोढु वापिस आती जई। 14#प्रेरि 13:51ते जको कुई तम्हानु ग्रहण ना करो ते तम्ची ना सुणो, ओ घरा महु जा शहरा महु निकलते हुले आपणे पग़्ग़ा ची धूड़ झाड़ती नाखा, 15#मत्ती 11:24#लूक 10:4–12मैं तम्हानु सच्च किहे पला कि न्यां चे ङिओ, ओ शहरा ची दशा कनु सदोम ते अमोरा चे देशा ची दशा घणी सेहणे चे लायक हुवी।
आणे आली मुसीबत
(मरकुस 13:9–13; लूका 21:12–17)
16 #
लूक 10:3
“ङेखा, मैं तम्हानु भेङा आलीकर भेड़िया चे बीच मां भेज़े पला, ऐवास्ते नाग़ा आलीकर ब़ुध्दिमान ते कबूतरा आलीकर भोले बणा। 17#मरकु 13:9–11; लूक 12:11,12; 21:12–15पर लौका कनु चौकस रिहा, कांकि वे तम्हानु कई प्राथनाघरा मां सोंपे, ते पंचेता मां तम्हानु कोड़े मारे। 18तम्ही माई वजह हाकिमा ते राजा चे सामणे, वांचे उपर, ते नेरीया जातिया चे उपर ग़वाह हुवणे वास्ते पुचाले जावा। 19जिसे बेले वे तम्हानु पकड़वावे तां हा चिन्ता ना करजा कि अम्ही केस रीति लारे जा का किहुं। कांकि जको कोच्छ तम्हानु केहणे हुवी, ऊं तम्हानु वेही घड़ी बावड़ले जई। 20कांकि ब़ोलणे आले तम्ही कोनी, पर तम्चे ब़ा नरीकार चा आत्मा, तम्चे मां ब़ोले।
21 #
मरकु 13:12; लूक 21:16 “भऊ भावा नु, ते ब़ा पूता नु, मारणे वास्ते सोंपे, ते ब़ाले आई-ब़ा चे विरोध मां खड़े हुती कर वानु मरवाती नाखे। 22#मत्ती 24:9; मरकु 13:13; लूक 21:17; मत्ती 24:13; मरकु 13:13माये नांवा ची वजह कनु सारे लौक तम्चे लारे बैर राखे, पर जको अन्त तक सब्र करली रिही ओचा उद्धार हुवी। 23जिसे बेले वे तम्हानु हेके शहरा मां सतावी, तां ङुजे शहरा सनु द्रोड़ती जजा। मैं तम्हानु सच्च-सच्च किहे पला, तम्ही इस्राएल चे सारे शहरा मां ना फिरती चुका कि मैं इन्साना चा पूत आती जई।
24 #
लूक 6:40;
यूह 13:16; 15:20 “चैला आपणे गुरु कनु बङा ना हुवी, ते ना दास आपणे मालिक कनु। 25#मत्ती 9:34; 12:24; मरकु 3:22; लूक 11:15चैले, गुरु चे ते दास चे मालिक चे बराबर हुवणे ही ब़ोहत छै। जब वाणे घरा चे मालिक नु शैतान, केहले तां ओचे घरा आला नु का कोच्छ नी किहे।
काये कनु ङरु?
(लूका 12:2–7)
26 #
मरकु 4:22; लूक 8:17 “ऐवास्ते इन्साना कनु ना ङरजा, कांकि कहीं ढकले कोनी पले जको खोड़ले ना जाओ, ते ना कहीं लुकले आले छै, जको जाणले नी जई। 27जको मैं तम्हानु अन्धारे मां किहे, ओनु तम्ही सोज़ले मां किहा, ते जको कानो कान सुणा, ओनु छत्ता उपर कनु प्रचार करा। 28जको शरीरा नु घात करी, पर आत्मा नु घात ना कर सग़ी, ओकनु ना ङरजा, पर नरीकारा कनु ही ङरा, जको आत्मा ते शरीर ङुंहु नु नर्का मां नाश कर सग़े। 29का पैसे मां ङोन गैरे ना बिकी? तां वी तम्चे ब़ा ची इच्छा चे बिना वांचे महु हेक वी धरती उपर ना ढे सग़ी। 30तम्चे ठोङा चे माल वी सब गिणले आले छी। 31ऐवास्ते ङरा ना, तम्ही ब़ोहत गैरा कनु बढ़ती कर छिवा।
ईशु ची वजह कनु शर्माणे कोनी
(लूका 12:8,9)
32“जको कुई इन्साना चे सामणे मनु मनती गिही, ओनु मैं वी आपणे स्वर्ग़ीय ब़ा चे सामणे मनती गिही। 33#2 तीमु 2:12पर जको कुई इन्साना चे सामणे माया इन्कार करी, ओचा मैं वी आपणे स्वर्ग़ीय ब़ा चे सामणे इन्कार करी।
ईशु चे आणे चा मकसद
(लूका 12:51–53; 14:26,27)
34“ईं ना समझा कि मैं धरती उपर मिलाप कराऊं आला, मैं मिलाप कराणे वास्ते कोनी, पर तलवार चलवाणे वास्ते आला। 35मैं तां आला कि, ‘छोरा नु ओचे ब़ा कनु, ते धूवे नु विची आई कनु, ते बहुवे नु विची सासवे कनु अलग़ करती ङिये, 36बन्दा चे दुश्मन ओचे घरा चे लौक ही हुवे।’
37“जको कुई आई जा ब़ा नु माये कनु ज्यादा प्यारे जाणे, ओ माये लायक कोनी। ते जको पूत जा धूवे नु माये कनु ज्यादा प्यारे जाणे, ओ माये लायक कोनी। 38#मत्ती 16:24; मरकु 8:34; लूक 9:23ते जको आपणा क्रूस चती कर माये भांसु ना टुरी ओ माये लायक कोनी। 39#मत्ती 16:25; मरकु 8:35; लूक 9:24; 17:33; यूह 12:25जको आपणी जीन्दगी नु बचावणा चाहवे, ओ विनु गुंती ब़ेसी, ते जको माई वजह कनु आपणी जीन्दगी नु गुंवी, ओ विनु बचावी।
प्रतिफल
(मरकुस 9:41)
40 #
लूक 10:16; यूह 13:20;
मरकु 9:37; लूक 9:48 “जको तम्हानु स्वीकार करे, ओ मनु स्वीकार करे, ते जको मनु स्वीकार करे, ओ माये भेज़णे आले नु स्वीकार करे। 41जको भविष्यवक्ता नु भविष्यवक्ता जाणती कर स्वीकार करी, ओनु भविष्यवक्ता चा फल मिली। ते जको धर्मी नु धर्मी जाणती कर स्वीकार करी, ओनु धर्मी चा फल मिली। 42जको कुई यां छोटा महु हेके नु माया चैला जाणती कर सेर्फ हेक मुंगर ठाडे पाणी पिलावे, मैं तम्हानु सच्च किहे पला, ओ किसी रीति लारे आपणा प्रतिफल नी गुंवी।”
Nke Ahọpụtara Ugbu A:
मत्ती 10: ODR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0