Lukah 21
21
Namanuatunguna hatou na mawinni ɓalu nama milla
(Mrk. 12:41-44)
1Atanga einya hi Yehu ta ɓei Umma Pingi Pahabayangu tou Yahudi ta koata Yeruhalem, na itaha ɗa tou poati aɗa patamangu manuatung ta padou manuatung. 2Na ita ʄellaya na mawinni ɓalu nama milla ana patamang ɗubba riti kaka ta padou manuatung. 3Manga hi Yehu wina, “Mirangu bollu wigugim: na mawinni ɓalu nei ʄiaya nama patamangu manuatungu reihi ɗangu waling ta tou hawanguk. 4Kaɗang ngaladukaɗa ɗa tou nawoangu waling ta mareihi ɗahapoatin, ʄiaɗinguka na mawinni ɓalu nawoa waling ta jakanguna. Japa nawoa bolluha nama eingu lahi ɗunna.”
Na ɓei Umma Pingi Pahabayangu tou Yahudi enga naweharuya tou
(Mat. 24:1-2; Mrk. 13:1-2)
5Einya hangi laɗɗu, hi Yehu naranguha ɗama tou mapirraha ɗapanewiɗ awiɗa, na ɓei Umma Pingi Pahabayangu tou Yahudi duku dehaya, awoluya waingu watu madeha ʄaka apamanadanya waingu ngawu pamanuatung lahi Alla. Manga winaja hi Yehu, 6“Baaru aminya na rahina ngaladukaɗa ɗaha itami ana weharuya tou; da eimangu hangiteka watu nama engang ta padounaǃ”
Hi Yehu napeaka memaya gananyah namaʄaʄi adaɗi napuɗaya na pinu-tana
(Mat. 24:3-14; Mrk. 13:3-13)
7Jaka ɗa ana pahakoala-Na ɗapatutur lahi Yehu, “Ama Gurr, pirrangukaka nahatikkimu anaʄaʄi ʄaka gananya na tadana?”
8Nagapiya hi Yehu, “Mimaromatungu wikimi, abi eingu tou mapalaping lahi nyiami. Na ɗangu natou nama aminya nama waiganya na ngara-Gu, ʄaka wina, ‘Nyouwa ya, ʄiawaka hi Karituhǃ’ ʄaka ‘Ɗagitnanyaka na rahina na pinu-tana ana puɗaya.’ Jiaɗinguka abi mi kerimaha. 9Ami rangukaka lii mapatau ʄaka makangila, abi mimangeꞌatɗing. Ngaladuka bolluna nou, naʄaʄi mouluha. Jiaɗinguka daɗi puɗamananyaha na pinu-tana.”
10Manga hi Yehu napangalanya napatikina, wina, “Enga ʄaʄina napatau hangi kaɓihu geꞌangu kaɓihu hawanguk. Jaka hangi mapareaha na geꞌang mapareaha hawanguk. 11Ɓayayaka enga naʄaʄi na opung, einyaka na karobangu, ʄaka matu-matu kapoari nama pahapalamata. Enga naʄaʄi napamangeꞌat ɗengang, ʄaka na taduk napakaɓarraɗengang ta awang. 12Jiaɗinguka adaɗi naʄaʄi bolluha, nyiami enga ɗa apami ʄaka ɗa palumi tik hamaeti. Nyiami enga pahakigimi ta umma pingi pakaɓuangu tou Yahudi#21.12 Umma pingi pakaɓuangu tou Yahudi ʄiayak na umma nahawaiɗa ɗa tou Yahudi aɗa bahhaya na Hurat Ɓakul ta Lii Dei, pingi pakaɓua-kawoting, pingi papanunga-papeakang ʄaka pingi paɓotahu palakara. ʄaka patamagimi ta gallu. Jaka nyiami wealami ta hagaɗa ɗa raja ʄaka ɗama hamanu kuaha, kaɗang nyiami ami keri-Wa. 13Jiaɗinguka ʄiayaka na kaloaga lahi nyiami ami patomanya na Lii Kalung waling lahi Alla witigu Nyouwa, ta tou nama hamanu kuaha. 14Pamadunya na atimi, abi dadarmangu nalarana gikineina ami panewi kaku toada wikigu awimi. 15Kaɗang Nyouwa wiki nama woagu manyakat ami panewi, lapak ɗa geꞌami daɗa piakumangu pahagagu, a da aɗa pataragunya napatikimi. 16Ɓaaru ɗa ina-amami, ɗa tuta-neimi, ɗa oali-ʄaʄimi ʄaka ɗa oali pabuhangumi enga pakoꞌunguɗa lahi nyiami. Ɗuɗa ʄella enga ɗaharakaja ɗama tou mapirrah waling lahi nyiami aɗa hamatih. 17Nyiami enga hukaɗagimi ati ngaladukaɗa ɗa tou, kaɗang nyiami ami keri-Wa. 18Jiaɗinguka da haluamang rouloagim waling ta katikumi nama maroba. 19Ami madu pangalaɗing ami keri-Wa, enga manumarami.
Nalarana ana mohu na koata Yeruhalem
(Mat. 24:15-21; Mrk. 13:14-19)
20Hi Yehu napangalanya napatikin, wina, “Ami itakayaka na koata Yeruhalem ana kapoangiya ʄawabani, nyiami enga peaminya na koata nou dana hilu madeimah enga pamohuɗanya. 21Ta rahi nou, ɗa tou ɗama eingu ta loaɗa Yudea ɗapalaiha ta pinu letina. Ɗuɗa ɗama eija ta rongu koata, ɗa ɗujakunyah na koata, ʄaka ɗuɗa ɗama eingu ta habali koata abi ɗa tamamangu ta rongu koata. 22Kaɗang ta laɗɗu-laɗɗu nou ʄiayaka ‘Na Laɗɗu Rahi Hukunanya’, kana binuya gananya nama langa matuling ta Hurat Ɓakul. 23Ta rahina hi Moiri ana hukuja ɗa tou ta koata nou, nama reihi mawilla, ɗa mawinni pakabu ʄaka ɗama pahuhu. Na tana ya enga hagananya namawilla nama ɓakul, ʄaka hi Moiri enga hukunaja ɗa tou ta tana ya. 24Eija ɗapahamaeti waingu pahoari, ei ʄellaja ɗapa idi apa ataja ta tana tou; ʄaka na koata Yeruhalem enga kuahananya natou dama Yahudi, lapak ana duka na rahin napalanga papaturana hi Moiri taguɗa.”
Na aminya na Ana Tourara
(Mat. 24:29-31; Mrk. 13:24-27)
25“Ɓaaru natou na itaya na tada dapatara namaʄaʄi ta matalaɗɗu, ta wulangu, ʄaka ta kapea. Ngaladukana natou ta pinu-tana enga ɗamangeꞌat ʄaka ɗahangotar aɗa haganya nakanguran ʄaka nataungun na tahik. 26Na tourara enga ɗamangeꞌat oata, aɗa haganya gananya namaʄaʄi ta haguꞌul pinu-tana. Kaɗang hi Alla napakagohakuha ɗama kuahay na awang, na matalaɗɗu, na wulangu ʄaka ɗa kapea. 27Ta rahi nouka ɗa tou enga itaɗanya, na Ana Tourara a aminya ta robang waingu kuaha ʄaka na habilanguna dapatara. 28Aɗa pakaka kanguka ɗa tada hou aɗaʄaʄi, kiɗiyay pahuaha ɗa katikumi, kaɗang maraninanyaka na rahina hi Alla ana pamanumarami.”
Lii-pangearangu hapangu na pingi-ai
(Mat. 24:32-35; Mrk. 13:28-31)
29Manga hi Yehu nalolukuɗanya na lii-pangearang nei, wina, “Pateti pakalunya na pingi kapilit#21.29 Ta hilu ʄawa pingi ara wiɗanya, nama tubu paɗangu ta tana Ihrael. Na rouna na pingi ara ɗa bellar. Ta rahi maringu ta tana Ihrael ɗa rouna ɗa moana, ʄiaɗinguka ta rahi wajal ɗakalunga ɓaling. Ɗa wua ara ɗa memerrahu ʄaka pa anguha. Na pingi ara hameara waiɗanya tou Ihrael. ʄaka ngaladukaɗa ɗa pingi-ai hawanguk. 30A mi itakahaka ɗa pingi-ai aɗa walla, peaminyaka na rahi wuaɗa aɗa marani. 31Tou ʄellana, a mi itakahaka ngaladukaɗ ɗa tada hou ɗamaʄaʄi ta awang ʄaka ta tana, peaminyaka hi Alla napapareaha ʄaʄi Raja ana marani.
32Wigugimǃ Ngaladukaɗa ɗa tada hou enga na ʄaʄiha, adaɗi ɗamati bolluha ɗa tou ɗama morik ta dalar ya. 33Na awang ʄaka na tana enga puɗaya, ʄiaɗinguka napatiki-Gu lapak piangu-piangu dana molahumangu.”
Lii-panungang kamaromatung wiki
34“Maromatungu wiki, na morikumu abi ʄiapay napangaɗamunya na tunu ʄaka na inung wei mawuk. A da, abi ali pangaɗanya nalara morikum, ʄenang abimu kapoduk a aminya na laɗɗuna hi Moiri ana hunga halaɓadda. 35Kaɗang na Laɗɗu nou dapaliwaimanya enga aminya ta ngaladukaɗa ɗa tou ta pinu-tana ya mearana na kaɗipit. 36Jiayaka, maromatung wikim kaɗang dana hilu madeimah nyiami enga hagaminya namawilla. Mihabayanguh ana ʄaʄikak na rahi nou, kapiku manni pangalami-Ga. Manga nyiami enga egi atim ʄaka dami makiimang ami haga-Ga ta rahin na ami ɓali-G ta pinu-tana ya.”
37Hi Yehu napanunga-papeakangu ta ɓei Umma Pingi Pahabayangu tou Yahudi ta didar laɗɗu, ʄaka ana riɗunguka nahalaku ana juɗa ta paledi nama ngarangu Paledi Haitun. 38Babaaruhinguka ɗa tou ɗangu ɗakaɓuangu ta ɓei Umma Pingi Pahabayangu tou Yahudi kama ranguya hi Yehu nama panunga-papeakangu awiɗ.
Nke Ahọpụtara Ugbu A:
Lukah 21: wnk
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2024 (Active), Wycliffe Bible Translators, Inc. All rights reserved.