УблапӀэ 14
14
ЯпшӀыкӀуплӀэнэрэ шъхьэр
Ибрам пыйхэм Лотэ къызэрэӀакӀихыжьыгъэр
1ЩынӀар ипачъыхьэу Амрафэл, Еласарым ипачъыхьэу Ариох, Елам ипачъыхьэу КъэдарлаӀомэр, Гой ипачъыхьэу ТыдыӀал 2заокӀэ якӀугъэх Сэдом ипачъыхьэу БэраӀ, Ӏаморэ ипачъыхьэу БирщаӀ, Адмэ къалэ ипачъыхьэу Щынаб, Цэбоим ипачъыхьэу Щэмэбэр, БэлаӀ къалэ – джырэ ЦэуӀар – ипачъыхьэ. 3Ахэмэ Сидим кӀэим – джы Хы Щыугъэр зыдэщыӀэм дэжь – дзэхэр щаугъоигъагъэх. 4Илъэс пшӀыкӀутӀурэ ахэр КъэдарлаӀомэр ыӀэ илъыгъэх, ау япшӀыкӀущэнэрэ илъэсым зыкъаӀэтыгъ.
5ЯпшӀыкӀуплӀэнэрэ илъэсым КъэдарлаӀомэр, икъотэгъу пачъыхьэхэр кӀыгъухэу къакӀохи, Ӏаштэрот Къарнаим щыпсэурэ рэф цӀыфхэм, Хъам щыпсэурэ зуз цӀыфхэм, Щао Къыриатаим щыпсэурэ ем цӀыфхэм, 6СэӀир къушъхьэм, шъоф нэкӀым ит Ел Паран нэсэу щыпсэурэ хор цӀыфхэм атекӀуагъэх. 7Ащ къикӀыжьхи, псыкъэкӀуапӀэу Ӏэн Мышпат, джы Къадэщ зыфаӀорэм, къэкӀуагъэх, Ӏамалэкъ цӀыфхэм яхэгъэгу зэрэпсэоу, Хъацэцэн Тамар щыпсэурэ амор цӀыфхэми атекӀуагъэх.
8ЕтӀанэ Сэдом ипачъыхьи, Ӏаморэ ипачъыхьи, Адмэ ипачъыхьи, Цэбоим ипачъыхьи, БэлаӀ къалэ – ЦэуӀар ары – ипачъыхьи къыдэкӀыхи, Сидим кӀэим заор къащыдаублагъ 9Елам ипачъыхьэу КъэдарлаӀомэр, Гой ипачъыхьэу ТыдыӀал, ЩынӀар ипачъыхьэу Амрафэл, Еласар ипачъыхьэу Ариох. ПачъыхьиплӀыр пачъыхьитфымэ апэуцугъ. 10Сидим кӀэим мыстхъу мэшабэ иӀагъ. Сэдомрэ Ӏаморэрэ япачъыхьэхэу кӀэзыӀэжьыгъэхэм ягъусагъэмэ ащыщыбэхэр ахэмэ арыфагъ; къэнэжьыгъэхэр къушъхьэм хэхьажьыгъэх. 11Сэдомрэ Ӏаморэрэ мылъкоу адэлъыр, гъэтӀылъыгъэу яӀагъэхэр зэкӀэ ашти, текӀуагъэхэр кӀожьыгъэх. 12Лоти, Ибрам ипхъорэлъфэу Сэдом дэсыгъэр, ащ имылъкуи зыдащагъ.
13Псэоу къэнэжьыгъэмэ ащыщэу зы нэбгырэ къакӀуи, джуртэу Ибрам къэбар ригъэшӀагъ. Ибрам амор цӀыфхэм ащыщэу Мамрэ зыцӀэм ичъыгэялъэ дэжь щыпсэущтыгъэ. А Мамре ыкъошхэу Ещколэрэ Ӏанэрэрэ Ибрам икъотэгъухэу щытыгъэх. 14Ыкъош гъэры хъугъэу зызэхехым, Ибрам иунэӀутхэу, иунэ къихъухьагъэхэу, нэбгырэ шъищрэ пшӀыкӀуйрэ ыуӀэши, Дан нэсыфэ пыйхэм алъычъагъ. 15Чэщым Ибрам идзэ ыгощи, ахэмэ ежьыми ицӀыфхэми пыйхэр къадзыхьэхи, зэхакъутагъэх, Хъобэ, Дамаск итемыркӀэ щыӀэм нэс афыгъэх. 16ЗэкӀэ мылъкури ыкъошэу Лоти, ащ имылъкуи, бзылъфыгъэхэри, гъэрхэри къыщэжьыгъэх.
Ибрам Малкъыцэдэкъ къызэрэӀукӀагъэр
17КъэдарлаӀомэррэ ащ игъусэгъэ пачъыхьэхэмрэ атекӀуи, Ибрам къызегъэзэжьым, кӀэеу Щао, непэ Пачъыхьэ кӀэй зыфаӀорэм дэжь, Сэдом ипачъыхьэ ащ къыщыпэгъокӀыгъ. 18Малкъыцэдэкъ, Щалэм ипачъыхьэ, хьалыгъурэ санэрэ ащ къыпигъохыгъ. Тхьэу зэкӀэмэ анахь Иным ар икъурмэнышӀэу щытыгъ. 19Ащ ынэшӀу къыщифи, къыриӀуагъ:
«Тхьэу зэкӀэмэ анахь Иным Ибрам ынэшӀу къыщэф,
чӀыгуи огуи КъэзыгъэшӀыгъэхэм!
20Щытхъур ий Тхьэу зэкӀэмэ анахь Иным,
уипыйхэр пӀэ къизылъхьагъэхэм!»
Ибрам мылъкоу иӀэм иӀахь пшӀанэ Малкъыцэдэкъ ритыгъ.
21Сэдом ипачъыхьэ Ибрам къыриӀуагъ: «СицӀыфхэр сэ къысэтыжьхи, о мылъкур къызфэгъан». 22Ибрам джэуап ритыжьыгъ: «Зиусхьаным, Тхьэу зэкӀэмэ анахь Иным, уашъомрэ чӀыгумрэ КъэзыгъэшӀыгъэм, сӀэ фэсэӀэтышъ, тхьэлъанэ сэшӀы 23зы Ӏудани, цокъэ лъэпси о уиӀэм щыщэу сымыштэнкӀэ. „Ибрам бай сшӀыгъэ“ умыӀожь нэужым. 24СицӀыфмэ ашхыгъэм текӀодагъэм нэмыкӀ сэ сыфаеп. Заом къыздежьагъэхэу Ӏанэри, Эшколи, Мамреий яӀахь аӀорэкӀ».
Nke Ahọpụtara Ugbu A:
УблапӀэ 14: АдыТГ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Институт перевода Библии, 2002-2023