УблапӀэ 13
13
ЯпшӀыкӀущэнэрэ шъхьэр
Ибрамрэ Лотрэ зэрэзэбгъодэкӀыгъэхэр
1Ибрам Мысырым икӀыжьи, къыблэ лъэныкъом щыӀэ шъоф нэкӀым ыгъэзэжьыгъ ишъузи имылъкуи зэкӀэ кӀыгъухэу. Лоти ащ дикӀыжьыгъ. 2Ибрам бай дэд хъугъагъэ – былымкӀи, тыжьынкӀи, дышъэкӀи.
3Шъоф нэкӀым къикӀыжьи, ар гъогум техьагъ, Бэтэлрэ Ӏай къалэмрэ азыфагу щэтырыр зыщигъэуцугъагъэм къэсыфэ къэкӀуагъ, 4къурмэншӀыпӀэр нахьыпэкӀэ зыщигъэуцугъагъэм. Ащ Ибрам ыгъэлъапӀэзэ Зиусхьаным щелъэӀугъ.
5Лотэу Ибрам кӀыгъугъэми мэл пчэнхэри, былым пӀашъэхэри, унагъуи, унэӀутхэри иӀагъэх. 6НэбгыритӀумэ чӀыгоу яӀэр афырикъущтыгъэп: былымэу яӀэр зэрэбэм къыхэкӀэу зэгъусэхэу зэдыщыӀэнхэ амылъэкӀыжьы хъугъэ. 7Ащ къыхэкӀэу Ибрам иӀахъохэмрэ Лотэ иӀахъохэмрэ зэщыхьэщтыгъэх. КъэнаӀан цӀыфхэри пэрыц цӀыфхэри а лъэхъаным а чӀыгум щыпсэущтыгъэх. 8Ибрам Лотэ риӀуагъ: «Оррэ сэррэ тазыфагуи, о уиӀахъохэми сэ сиӀахъохэми азыфагуи зэмызэгъыныгъэ къимыхьанэу тэгъэшӀы: тэ тызэкъошба! 9ЧӀыгур зэкӀэ о уапашъхьэ илъба? ТызэшӀогъэкӀ. О сэмэгумкӀэ бгъазэмэ, сэ джабгъумкӀэ згъэзэщт, о джабгъумкӀэ бгъазэмэ, сэ сэмэгумкӀэ згъэзэщт».
10Иордан кӀэир зэрэщытэу – ЦэуӀар шъыпкъэм нэс – Зиусхьаным ичъыгхатэ фэдэу, Мысыр хэгъэгум фэдэу, псым зэригъэшъокӀырэр Лотэ ылъэгъугъ – аущтэу зыщытыгъэр Зиусхьаным Сэдомрэ Ӏаморэрэ ымыгъэкӀодызэ ары. 11Арыти Лотэ Иордан кӀэир къыхихи, къокӀыпӀэмкӀэ ежьагъ. Аущтэу ахэр зэгокӀыгъэх: 12Ибрам КъэнаӀан хэгъэгум щыпсэоу, Лотэ – кӀэим иӀэгъо блэгъумэ ащыӀэ къалэхэм ащыпсэоу ригъэжьагъ, ищэтырхэр Сэдом нэсэу щигъэӀагъэх. 13Сэдом щыпсэухэрэр бзэджагъэх, Зиусхьаным ыпашъхьэ псэкӀодыбэхэр щыряӀагъэх.
14Лот зыгокӀым ыуж, Зиусхьаным Ибрам къыриӀуагъ: «Зыплъыхь! Уздэщыт чӀыпӀэм щегъэжьагъэу плъэ темырымкӀи, къыблэмкӀи, къокӀыпӀэмкӀи, къохьапӀэмкӀи. 15Мы чӀыгоу плъэгъурэр зэрэщытэу ори птекӀыщтхэми егъашӀэм шъуиӀэнэу Сэ къышъостыщт. 16О лъэпкъэу птекӀырэр пшахъом фэдэу згъэбэгъощт: чӀыгум телъ сапэр зэрафэмылъытэнэу, о къыптекӀыщтхэри афэлъытэщтхэп. 17ЗыӀэти, мы чӀыгум икӀыхьагъэкӀи ишъомбгъуагъэкӀи рыкӀу, сыда пӀомэ Сэ ар о къыосэты». 18Зы чӀыпӀэм икӀымэ, адрэм кӀозэ, Ибрам Хъэурэн къалэм щыӀэ Мамрэ#13:18 Мамрэ – цӀыфым ыцӀ. чъыгэялъэм къэси, ащ щытӀысыгъ. Ащ дэжьым Зиусхьаным къурмэншӀыпӀэ щыфигъэуцугъ.
Nke Ahọpụtara Ugbu A:
УблапӀэ 13: АдыТГ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Институт перевода Библии, 2002-2023