Nai Vakatekivu 6
6
Ai valavala ca kei vuravura, a sa kaya na Kalou me vakarusa, 1-8. Sa vakasalataki ko Noa, me cakava na waqa me bula kina, 9-22.
1A SA yaco, ni ra sa vakatekivu na tamata me lewe vuqa mai e dela i vuravura, a sa sucu vei ira na luvedra alewa, 2sa qai raici ira na nodra gonealewa na tamata ko ira na luve ni Kalou ni ra sa matavinaka; a ra sa laʼki taura na watidra maivei ira kecega era sa digitaka.
3A sa kaya ko Jiova, A noqu Yalo Tabu ena sega ni veileti tiko kei na tamata me tawa mudu, e na vuku ni sa vakalewe talega ko koya: ia na nona gauna ena dua tale na drau ka ruasagavulu na yabaki.
4A sa tiko e vuravura na yavusa tamata yagolevu sara e na gauna ko ya; a sa oti, a sa qai curu vei ira na nodra gonealewa na tamata ko ira na luve ni Kalou, a ra sa vakasucu vei ira, a ra sa yaco na gone o qo me tamata kaukauwa, a ra sa tamata rogo eliu.
5A sa raica ko Jiova ni sa ka levu nai valavala ca ni tamata e vuravura, io sa ca walega e na veisiga kecega nai naki kecega sa nanuma na lomana. 6A sa veivutuni ko Jiova e na vuku ni ka cakava na tamata e vuravura, a sa rarawa kina na lomana. 7A sa kaya ko Jiova, Au na vakarusa mai na dela i vuravura na tamata kaʼu sa bulia; io na tamata kei na manumanu e yavai va, kei na ka sa qasi, kei na manumanu ni lomalagi; niʼu sa veivutuni e na vuku niʼu sa cakava. 8Ia ko Noa sa kune loloma e na mata i Jiova.
9O QO nai tukutuku kei Noa: a tamata yalododonu ko Noa, ka tawa cala e na nonai tabayatamata, a rau a daulako kei na Kalou ko Noa. 10A sa sucu vei Noa e tolu na luvena tagane, ko Semi, ko Hami, kei Jefeca. 11A sa vakasisila ko vuravura e na mata ni Kalou, a sa sinai e nai valavala kaukauwa ko vuravura. 12A sa raici vuravura na Kalou, ka, raica, sa vakasisila; ni sa cakava na nodrai lakolako me vakasisila na tamata kecega e vuravura.
13A sa kaya na Kalou vei Noa, Sa lako mai ki na mataqu nai otioti ni tamata kecega; ni ra sa vakasinaiti vuravura e nai valavala kaukauwa; ka, raica, kaʼu na vakarusai ira kei vuravura. 14Mo cakava e dua na waqa vei iko e na kau kofera: mo cakava me vakatikina na waqa, ka boroya eloma, etaudaku talega, e nai boro. 15Ia mo cakava vakaoqo: A kena balavu ni waqa e ono na drau na caga, a kena raraba e dua na drau na caga, a kena cecere e onosagavulu na caga. 16Mo cakava e dua na katuba e na waqa, ka vakaotia me rua na caga na kena raraba maicake; ia na katuba ni waqa mo cakava e na yasana: ia mo caka va e lomana na vata era, kei na kenai karua, kei na kenai katolu. 17Ka, raica, koi au, kaʼu sa kauta mai e dua na waluvu ni wai ki na dela i vuravura, me vakarusa mai na ruku i lomalagi na ka kecega sa tu kina na cegu era bula kina; ia ena mate na ka kecega sa tiko e vuravura. 18Ia kaʼu na vakatau-deitaka vei iko na noqu veiyalayalati: ko na curu ki na waqa; o iko, kei na luvemu tagane, kei na watimu, kei na watidratou na luvemu, vata kei iko. 19Ka rua na manumanu e na yavusa manumanu kecega e na ka kecega sa bula, mo kauta ki loma ni waqa, ka me vakabulai ira kei iko; me dua na tagane ka dua na alewa: 20a manumanu vuka me vaka na kedra yavusa, kei na manumanu e yavai va me vaka na kedra yavusa; a ka kecega sa qasi e vuravura me vaka na kedra yavusa; sa yarua e na yavusa kecega era na curu kivei iko mo vakabulai ira. 21Ia mo kauta vei iko e so na kakana e na ka kecega sa laukana, ia mo kumuna vata vei iko; ia ena kemu kakana kei na kedra kakana o qo.
22A sa cakava ko Noa me vaka na ka kecega sa vunautaka vua na Kalou, ia sa cakava vakakina.
Nke Ahọpụtara Ugbu A:
Nai Vakatekivu 6: FIJ1864
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
First full Bible in the Fijian language © British and Foreign Bible Society, 1864.