Matius 19
19
Yesus Ni anftutwar na ene sawe
19:1-12
(Mrk. 10:1-12)
1Lama Yesus naftutu monuk tomwatar na Galilea, I nti propinsi Yudea. Propinsi Yudea ye namin wer Yordan balisya. 2Mpe tomwat ngayadin rlarat I ma nafngamone sir a na iane. 3Ne tomwat Farisyar ketnir rma ma rateman Yesus ma rfalak, “Maken, nof kit ninr agame ni yayatrwar e merwanar bise ma rose safe-safe motak ma neluk lole ber sir la ryebas sawnir e?” 4Ne Yesus nfalak, “Kmi mbyaca safe ma rarengi na Kitap Lelerap lo nre, feti noak ma Ratu nose tomwate luryain a ne, I nose bate ma merwane.#Kej. 1:27; 5:2 5Ma Ratu nfalak feti, merwane ka nti a ntate enany amany, ma nafsaw nor sawany nwayat ma radu a rmorip e lese.”#Kej. 2:24 6Mpa na Ratu sounlury e tomwatar ma rafsau ne to du lo nempa lese motak. Iane nwayat ma merwane ma bate ma Ratu nkete sir ma lese ne lo to tomwate fen lese ma bise ma nakese sir. 7Ne tomwat Farisyar rfalak ber Yesus, “Farlan farane safema Musa ninrang merwane ma nyebas sawany a ne ka nal surat talak ber sawany a ne?”#Ul. 24:1-4; Mat. 5:31 8Ne Yesus nfalak, “Kmi ulmir arwaluk mpa Musa ninrang a kmi ma myebas sawmir, nempa ni botuan e Ratu to ninrang ma farane nof luryain lo.” 9Yakw kfwalak ber a kmi: “Merwane ma nafsau lo to bise ma nyebas sawany. Ma farlan sawany nanronr, merwane bise ma nyebas i. Nempa farlan sawany to nanronr ma merwane nyebas i betno nafsau nor bat walyete iane nanronr lo.”#Mat. 5:32; 1Kor. 7:10-11 10Ne Yesus Ni manglartar rfalak ber I, “Farlan fasawe ni yayatrwar ma farane ma nose ma nawar kit e ni ngafele e kete tafsau lo.” 11Nempa Yesus nfalak, “To tomwatar monuk ma rkaul ral safe ma kmi mfyalak ye, lan sir ma Ratu nfil sir a ne lo ma keta rkaul ral anftutwar a ne.” 12Tomwatar ketnir to rafsau, fali noak ma ramtoranbabe sir e farane lo. Ma ketnir e to rafsau fali tomwat walyetar rose ma sir farane. Ma ketnir a nbal e rtetak ma to rafsau fali rmpeang lan ma rkarya ber Ratu. Tomwate ma nlangun anftutwar a ne, ni ngafele e i nose nlarat.
Yesus nberkat kangkir
19:13-15
(Mrk. 10:13-16; Luk. 18:15-17)
13Na ler sa e tomwatar ror angkir ber Yesus nema nsaup limnir a na sir ma nberkat sir. Nempa Ni manglartar rarese tomwatar a ne. 14Mpa Yesus nfalak, “Msyalan lonri motak kangkir a ne rma ma rakmat Yakw! Ma kete myose mtyeri sir, fali tomwatar ma farlan kangkir ye keta reluk Ratu Ni tomwatar noak ma I neluk Rai ma nfarete saryamprene.” 15Ne Yesus nsaup limnir a na sir ma nberkat sir, betno I nti a ntate ain a ne.
Suse ber mangoskayar ma rnau kalin nir anoskai ma rlarat Yesus
19:16-30
(Mrk. 10:17-31; Luk. 18:18-30)
16Ler sa e tomwat sa nma ma nakmat Yesus ma nfalak, “Tuangguru, yakw ka kose adat ngamone ma farpe nema konri momorip dedesar?” 17Ne Yesus nfalak, “Safema ko mwenrat Yakw na safe ma nangamon? Lan Lese ma nangamon. Mpa farlan mpweang ma monri momorip dedesar e ka mose mlwarat Ratu Ni faretar monuk.” 18Ne tomwate ne nfalak ber Yesus, “Ratu Ni faret mpe ye?” Yesus nfalak: “Kete mufen, kete munronr, kete mumnang, ka kete mweluk mangtungan lepusuk,#Kel. 20:13-16; Ul. 5:17-20 19ka mwalang anoi-amoi, ma mkwamis tomwat walyetar farlan ma mkwamis ko a mbwali.”#Kel. 20:12; Im. 19:18; Ul. 5:16 20Ne tabweri ne nfalak, “Yakw kose klwarat faretar a ne monuk lo, ma bait safe nbal ma ka kose?” 21Ne Yesus nfalak, “Farlan mpweang ma Ratu nsalan ma mungamon a na sounlury, mtwi mfwenri monuk nim kabanir betno mswaman dotyar a ne ber tomwatar ma rawatan, ma keta monri kabanir a na surga. Ko mose farane betno mlwarat Yakw.” 22Lama tabweri ne ndengar ma Yesus nfalak farane, nbali i e dalamy suse desar fali naoskai resi.
23Mpe Yesus nfalak ber Ni manglartar, “Mdyengar ma kfwalak, masumput desar ber mangoskayar sa ma neluk Ratu Ni tomwate noak ma I nfarete neluk Rai. 24Yakw kfwalak ber a kmi, merawe ber unta lese nsung nof nririmase matan, nlengan nof mangoskayar sa ma neluk Ratu Ni tomwate na Ni ain farete.” 25Noak ma Yesus Ni manglartar rdengar farane, sir rampriang ma rfalak, “Farlan masumput ber mangoskayar ma reluk Ratu Ni tomwate noak ma I nfarete neluk Rai e keta ise ma Ratu nfair i?” 26Ne Yesus nfon sir ma nfalak, “Tomwatar to bonir ral ma rfair a rbali sir, nempa Ratu boany nal, fali Ratu bise ma nose safe-safe motak.”
27Ne Petrus nfalak ber Yesus, “Tuangguru, no mswalan! Kam mnau kalin kam mamy kabanir monuk lo ma mlarat Ko, mpa keta monri safe?” 28Ne Yesus nfalak ber Ni manglartar, “Yakw kfwalak ber a kmi, ni botuan e noak ma Ratu nafbweberi nbali saryamprene, keta Yakw, tomwate Anaky, kumtoran Ningw kadere ma nangafel resi ma kfwarete.” Noak a ne kmi ma mlyarat Yakw ye, keta mimtoran a nbal na kadere buti resin du ma mfyarete Israel nir nuse buti resin du.#Mat. 25:31; Luk. 22:30 29Ma ise ma nau kalin ni das, urany wainy, enany amany, angkir, nre ni lete aun. Farlan i nau kalin ni safe-safe monuk a ne fali nlarat Yakw, keta Ratu nal sewe ber i fen lain rati nlengan nof safe-safe ma i nau ne. Ma keta i nonri momorip dedesar a nbal.
30Nempa tomwatar yadin ma lere ye reluk tomwat silayar, keta famudi e reluk tomwatar ma to ubnir sasaf. Ma tomwatar ma lere ye to ubnir sasaf, keta famudi e reluk tomwat silayar.#Mat. 20:16; Luk. 13:30
Nke Ahọpụtara Ugbu A:
Matius 19: YMD
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Yayasan Pemberdayaan Masyarakat Desa © Wycliffe Bible Translators, Inc. All rights reserved.