Matius 16
16
Tomwat Farisyar ma tomwat Sadukyar rtak Yesus ma nose kabain mpasalnar
16:1-4
(Mrk. 8:11-13)
1Na ler sa e, tomwat Farisyar ma tomwat Sadukyar ketnir rma ma rakmat Yesus. Sir rmpeang ma rateman Yesus mpa rfalak ber I ma nose kabain mpasalnar sa neluk faniak la nfatutu feti Ratu nsiduk I.#Mat. 12:38; Luk. 11:16 2Ne Yesus nfalak ber sir, “Noak ma lere ketla nfufw ma langit namemeye kmi mfyalak feti bobole e lere mefanas. 3Nempa noak ma lere nma das na bobolisin ma msyalan ma langit namemetam ma nuse makrokap, kmi mfyalak feti keta lere ye udan. Kmi msyalan langit felany motak e mifai desar feti keta udan nre to udan. Nempa to mifai ma msyalan fanikar ma rbotin lere ye. 4Tomwatar a kmi na are ye, kmi miyatak ma to milele Ratu. Kmi mtyak ma kose fanikar sa ber a kmi nempa keta to kose faniak fen lese nbal. Ma keta kmi msyalan faniak ma farlan na are nabi Yunus luryain a ne.” Lama nfalak farane I nti a ntate sir.#Mat. 12:39; Luk. 11:29
Yesus nfalak ber Ni manglartar ma ka rajake sir rof tomwat Farisyar ma tomwat Sadukyar nir anftutwar
16:5-12
(Mrk. 8:14-21)
5Noak ma Yesus Ni manglartar rait twemul Galilea balisya, sir ramlufe ma ronr roti. 6Ne Yesus nal tnyanuk pupule ma nfalak ber sir, “Ka mijake kmi fen ngamone myof tomwat Farisyar ma tomwat Sadukyar nir ragi.”#Luk. 12:1 7Ma Yesus Ni manglartar to rkaul ral tnyanuk pupule ne isiny mpa rafalak ber sir, “I nfalak farane fali to tonr roti.” 8Nempa Yesus nafai safe ma sir rfalak a ne, mpa nfalak ber sir, “Hei kmi ma to milele Ratu! Safema dedesar ma mfyalak feti to mir roti? 9Kmi to mkyaul myal a fuky e? Ali mimlufe noak ma kupuse rotyar lim ber tomwate ribun lim lo e? Ma mimlufe feti mibutin rotyar ma nres a ne na botyar fir lo e?#Mat. 14:17-21 10Ma kmi mimlufe noak ma kupuse rotyar itw ber tomwate ribun fat a ne lo e? Ma mimlufe feti mibutin rotyar ma nres a ne na botyar fir lo e?”#Mat. 15:34-38 11Ma safema to mkyaul myal feti Yakw to kfwalak na rotyar a ne? Mpa Yakw kfwalak ber a kmi ma ka mijake kmi myof tomwat Farisyar ma Sadukyar nir ragi. 12Yesus nfalak farane, betno sir rkaul ral feti Yesus to nluan ma rajake sir rof ragi ma rabali ror terigu, nempa ka rajake sir rof tomwat Farisyar ma Sadukyar nir anftutwar.
Petrus nyoding feti Yesus ye Ray Silai ma Ratu nyoding I
16:13-20
(Mrk. 8:27-30; Luk. 9:18-21)
13Noak ma Yesus ka rait nuse ma nlosir kote Kaisarea Filipi, I nenrat Ni manglartar, “Tomwatar rfalak feti Yakw, Tomwate Anaky ye ise I?” 14Ne sir rfalak, “Ketnir rfalak feti Ko ye Yohanes Mangadiris, ketnir e rfalak feti nabi Elia, ma ketnir a nbal e rfalak feti Ko ye nabi Yeremia nre nabyar sa nof nabi luryanir a ne.”#Mat. 14:1-2; Mrk. 6:14-15; Luk. 9:7-8 15Ne Yesus nenrat sir a nbal, “Ma koko kmi e mfyalak feti Yakw ye ise?” 16Ne Simon Petrus nfalak, “Maken, Ko ye Ray Silai, ma Ratu ma nmorip dedesar ne Anaky.” 17Ne Yesus nfalak, “Simon Yunus anaky, ngamone ber ko fali tomwatar to rafbotin ngrie ne ber ko, nempa Amangw ma namin surga ne ma nafbotin ber ko.” 18Iane nwayat ma kufngare ko a na Petrus, ma isiny feti baty fakoran. Yakw keta kufdiri Ningw das a na baty fakoran a ne. Ningw das a ne iane feti tomwatar ma ralele Yakw. Ma keta mamate to nkuase sir. 19Keta kal kuase ber ko ma mnrure Ningw tomwatar. Iane feleles farlan ma kal kukusy surga ma ber ko. Ma safe-safe monuk ma myose mtyeri na saryamprene ye, keta Ratu nose nteri na surga nbal. Ma safe-safe monuk ma mwinrang na saryamprene ye, keta Ratu ninrang na surga nbal.#Mat. 18:18; Yoh. 20:23 20Lama Yesus nfalak farane, I nose nteri sir nema kete rafbotin ber tomwatar feti I ye Ray Silai.
Yesus nfalak na Ni suse ma Ni mamate
16:21-28
(Mrk. 8:31; Mrk. 9:1; Luk. 9:22-27)
21Ntabw nof a ne Yesus nafbotin ber Ni manglartar na safe ma keta diat I a na Yerusalem. I nfalak, “Yakw ka ktwi Yerusalem! Ma makenar, mangsomp ulnir ma mangaftutu Musa ni faretar na iano keta rbangal ma rsiksa Yakw. Ma keta rluan tomwatar ma rfen Yakw nempa ni lerar tel e kmworip a kbwali.” 22Ne Petrus nrabut Yesus far seriny ma ntampu i ma nfalak, “Mangnrure, kete mfwalak farane! Yakw ktwak ma weni Ratu nalin kalin safe-safe monuk a ne nof Ko.” 23Mpe Yesus nfon Petrus ma nfalak, “Mbwie ko mof ye! Ko mfwalak farane e farlan smwangat yatkar nir ulun ma natanuk. Kete mose mtweri Yakw ma kose klwarat Ratu Ni mpempeang. Ko mdwaun lan safe ma tomwatar rdaun ma to mdwaun safe ma Ratu ndaun.”
24Mpene Yesus nfalak ber Ni manglartar, “Ise nmpeang ma nlarat Yakw, ka kete nlarat ni mpempeang, nempa ka nabare ni sangwalu ma nlarat Yakw.#Mat. 10:38; Luk. 14:27 25Fali ise ma nmorip a nlarat koko i ni mpempeang, keta to nonri momorip dedesar. Nempa ise ma to nmorip a nlarat ni mpempeang terik ma nmat fali nlarat Yakw, keta nonri momorip dedesar.#Mat. 10:39; Luk. 17:33; Yoh. 12:25 26To ubany ber tomwate ma nonri monuk kabain saryamprenar, nempa to nonri momorip dedesar na lere ma nma ne. Fali to bise ma nal sasaf la nlikur momorip dedesar. 27Fali to dodo a nbal e keta Yakw, Tomwate Anaky kmwa kor dadangin ma nlie nlengan ma Amangw Ratu nal ber Yakw ne. Ma keta Yakw kmwa kor Ningw malaektar a nbal. Na lere ne keta Yakw kal sewe ber sir nre kukun sir, klwarat safe ma sir rose.#Mzm. 62:12; Mat. 25:31; Rm. 2:6 28Yakw kfwalak ber a kmi! Ni botuan e tomwatar ketnir nof a kmi ma mimin ye keta to rmat a fuky terik ma rsalan Yakw, Tomwate Anaky ma kmwa saryamprene ma kweluk Rai ma kfwarete tomwatar.”
Nke Ahọpụtara Ugbu A:
Matius 16: YMD
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Yayasan Pemberdayaan Masyarakat Desa © Wycliffe Bible Translators, Inc. All rights reserved.