मत्ती 2
2
यीशु केर दर्शन करेक लगिन गेयानी आदमीमन केर आवेक
1जब राजा हेरोदेस यहूदिया परदेस में राइज करत रहे, उ बेरा इ परदेस केर बैतलेहम नगर में यीशु केर जनम होलक, तब पूरब देस से गेयानी आदमीमन यरुशलेम शहर में आय के पूछेक लगलैं, 2“उ बालक छउवा कहाँ अहे, जे यहूदी मनक राजा बनेक लगिन जनइम हे? काले कि हमरे पूरब में उकर जनम केर बारे में बताएक वाला तइरगन देइख ही आउर हमरे उकर भक्ति करेक आय ही।” 3इ गोइठ सुइन के राजा हेरोदेस आउर उकर संगे यरुशलेम शहर केर ढेइर आदमीमन परेशान होई गेलैं। 4तब राजा हेरोदेस सोउब यहूदी मुध पुरोहितमन आउर मूसा केर नियम के सिखाएक वालामन के एक संगे बोलाय के उमन से पूछलक, “मसीह केर जनम केर बारे में पवितर किताब में का लिखल अहे? उकर जनम कहाँ होवेक चाही?” 5उमन उकर से कहलैं, “उकर जनम यहूदिया परदेस केर बैतलेहम नगर में होवेक चाही, काले कि मीका परमेश्वर केर संदेश के बताएक वाला बटले इ लिखल जाय हे, 6‘हे यहूदिया परदेस केर बैतलेहम नगर केर आदमीमन, तोहरेमन जे यहूदा परदेस में अहा, तोहरेमन यहूदा केर अधिकारीमन में से केकरो से छोट नखा, काले कि तोहर में से एगो आदमी आवी आउर उ राजा बनी, जे मोर इसराइली आदमीमन केर चरवाही करी।’” 7तब राजा हेरोदेस जनम होवल बालक छउवा केर उमर के जानेक लगिन गेयानी आदमीमन के चुपचाप से बोलाय के पूछलक, “तइरगन ठीक कोन बेरा देखाई देई रहे।”
8आउर राजा उमन के इ कइह के बैतलेहम नगर भेजलक, “जाय के उ छउवा केर बारे में ठीक-ठीक पता करा आउर जब उ मिल जाई तो मोर ठिना आय के जे कोनों तोहरेमन देखबा सेके मोके बताबा ताकि मोंय हों जाय के उकर भक्ति करमूँ।”
9-10उमन राजा केर गोइठ सुइन के चाइल गेलैं, आउर डहर में जब उमन ओहे तइरगन के देखलैं जेके उमन पूरब में देइख रहैं, तो ढेइर खुश होलैं। उ तइरगन उ मनक आगे-आगे गेलक, आउर जहाँ छउवा रहे, उ ठाँव केर उपरे पोंहइच के रूइक गेलक। 11जब उमन उ घर में पोंहइच के भीतरे गेलैं तो उ छउवा के उकर आयो मरियम केर संगे देखलैं आउर ठेहुना टेइक के उकर भक्ति करलैं। तब उमन अपन-अपन थैला खोइल के उके सोना, लोहबान आउर गंधरस के भेंट चढ़ालैं। 12इकर पाछे उमन सपना में परमेश्वर बटले इ चितौनी पालैं कि राजा हेरोदेस ठिना फिन ना जबा। सेले उमन इ गोइठ के राजा के बेगर बताले दोसर डहर से होई के अपन देस चाइल गेलैं।
यीशु के मिसर देस लेई जाएक
13गेयानी आदमी मनक चाइल जाएक केर पाछे, परमेश्वर केर दूत सपना में यूसुफ के देखाई देलक आउर कहलक, “उठ, उ छउवा के आउर उकर आयो के लेई के मिसर देस भाइग जा। जब तक मोंय तोर से नी कहमूँ तब तक हुवाँय रहबे, काले कि राजा हेरोदेस इ छउवा के खोइज के मरुवाएक वाला अहे।” 14उ राइते के उठलक आउर ओहे राइत के छउवा आउर उकर आयो के लेई के मिसर देस जाएक लगिन निकइल गेलक। 15उ राजा हेरोदेस केर मोरेक तक हुवाँय रहलक। जेकर से जे बचन प्रभु अपन संदेश के बताएक वाला होशे केर मुँह से कइह रहे, उ पूरा होई जाओक, “मोंय अपन बेटा के मिसर देस से बोलालों।”
हेरोदेस बटले छोट छउवामन के मरुवाएक
16जब राजा हेरोदेस इ जाइन गेलक कि गेयानी आदमीमन मोके धोखा देलैं, तो उ मुरुक जोर खिसालक। तब सिपाहीमन के भेइज के गेयानी आदमी मनक ठीक-ठीक बताल बेरा केर मोताबिक बैतलेहम नगर आउर उकर आसे-पासे केर गाँव केर सोउब छोंड़ा छउवामन के जे दूई बरिस केर आउर उकर से छोट रहैं, मरुवाय देलक। 17इ लेखे पवितर किताब में जे बचन के यिर्मयाह परमेश्वर केर संदेश के बताएक वाला कइह रहे, उ पूरा होलक, 18“रामाह नगर में काँदेक आउर गगाएक सुनालक, राहेल नाँव केर एगो जनाना अपन छउवामन लगिन काँदत रहे, आउर चुप होवेक नी चाहत रहे, काले कि उमन मोइर गेलैं।”
यीशु केर मिसर देस से घुरेक
19यूसुफ, मरियम आउर बालक यीशु एखन तक मिसर देस में हें रहैं। राजा हेरोदेस केर मोरेक केर पाछे परमेश्वर केर दूत यूसुफ के सपना में कहलक, 20“उठ, छउवा आउर उकर आयो के लेई के इसराइल देस चाइल जा, काले कि जेमन छउवा के माइर मोराएक चाहत रहैं, उमन मोइर गेलैं।” 21यूसुफ उठलक, आउर छउवा आउर उकर आयो के संगे लेई के मिसर देस के छोइड़ के इसराइल देस में आलक। 22लेकिन जब उ सुनलक कि अरखिलाउस अपन आबा राजा हेरोदेस केर जगा यहूदिया परदेस में राइज कराथे, तो हूवाँ जाएक से डरालक। उ राइत के सपना में परमेश्वर से चितौनी पाय के गलील परदेस चाइल गेलक। 23आउर उ हूवाँ नासरत नगर में रहेक लगलक। इ लेखे जे बचन परमेश्वर केर संदेश के बताएक वालामन केर बटले यीशु केर बारे में बताल जाय रहे उ पूरा होलक: “उ नासरी कहाल जाई।”
Nke Ahọpụtara Ugbu A:
मत्ती 2: SCK
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Sadri Bible by The Love Fellowship is licensed under Creative Commons Attribution-ShareAlike 4.0 License.